Read lumasaaba Yeremiya 38 Bible Online

Yeremiya 38 - lumasaaba bible

Yeremiya 38

¹Lutweela, Shefatiya umusooleli wa Matani, Gedaliya umusooleli wa Pashuri, Yehukali umusooleli wa Shelemiya, ni Pashuhuri umusooleli wa Malukiya, baawulila biilomo byeesi Yeremiya aaba alikhuboolela babaandu,

²nga ababoolela byeesi Umukasya aamulomela ari, “Umuundu yeesi urama mu shiriimba atsya khufiila mu busoolo, namwe lwe ntsala namwe lwe buulwaale. Ne abo boosi babaatitukha belukhila isi ba Babulooni, sibatsya khukhwiiribwa ta, baba baawonesile buulamu bwaabwe.”

³Ni shishiindi sheesi Umukasya aaloma ari, “Shiriimba shino shitsya khuwaanibwayo isi ba Babulooni, baryo batsya khushiwaamba.”

⁴Baryo kila baakhulu bane bano batsya isi umuyiinga, baamulomela bari, “Umusaani Yeremiya yuno aakha khukhwiiribwa. Lwekhuuba niye nga waakanikhile aryo, aba ali khuumalamwo baselikhale babaaramile mu shiriimba shino kamaani, atweela ni babaandu boosi bawamo kumwiyikino. Umuundu yuno s'ali khuukanikha lwe khuuyeeta babaandu bano ta, ne lwe khuubatsiinisa busa.”

⁵Umuyiinga Zedekiya naye waabeelamo ari, “Isho shili isi muli, umuundu uyo ali mu makhono keenywe, khola sheesi mukana. Ise nga umuyiinga singene imbakhaange ta.”

⁶Baryo baayila Yeremiya, baamutuuma mu lilowo lye sebele iyaba iya Malikiya, umusooleli w'omuyiinga, nga ili mu lwaanyi lwe lubili. Isebele yino siyabamwo kameetsi ta, ne nga abe mulimo busa litosi lyonyene, mweesi Yeremiya esiikha.

⁷Khu mbuka nyene iyo Ebedimeleki, uwaba umwakaanisi umwoomole mu lubili lw'omuyiinga khukhwaama i Esiyopiya, waawulila bari Yeremiya baamutuumile mu sebele. Khu saawa iyo, umuyiinga Zedekiya aaba nga wekhaale aambi ni shilibwa sheesi baalaanga bari Benyamini.

⁸Abweene awo Ebedimeleki waarurayo weetsa isi umuyiinga,

⁹waamulomela ari, “O Uwe Lukoosi umuyiinga, babaandu bano baakholile shishiindu shiibi naabi khu muŋoosi Yeremiya. Bona baamuyilile baamutuumile mu lilowo lye sebele, mweesi anyala waafwa lwe ntsala, lwekhuuba kimikaati sikiliwo mu shiriimba ta.”

¹⁰Lwanyuma kila umuyiinga alakila Ebedimeleki umu Esiyopiya ari “Tsya ni basaani babaandi kamakhumi kataru khukhwaama ano, mutsye mwinyuse Yeremiya khukhwaama mu lilowo lye sebele nga ashiili khufwa ta.”

¹¹Aryo Ebedimeleki waatsya ni basaani abo mu lubili w'omuyiinga, waabukula tsingubo tsingale khukhwaama mu kabada. Khukhwaama mu ngubo tsino, waatsilukhamo kumukosi, kweesi aayila, waakwiikhisila Yeremiya aasi mu lilowo lye sebele.

¹²Nga waamalile khuumutuumila kumukosi, kila amulomela ari, “Yisabikha kumukosi ukwo mukhwaawa mwoowo, singene kukhukhole buubi ta.” Naye Yeremiya waakhola nga ni baamulomela.

¹³Baryo basaani bano baamukhweesa khukhwaama mwilowo lye sebele, lwanyuma aryo waaliindibwila mu lwaanyi lw'omuyiinga.

¹⁴Lwanyuma umuyiinga Zedekiya waarumanisa bamureerere umuŋoosi Yeremiya is'ali. Kila batsya baamureera khu mulyaango kwe Lisaayilo ly'Omukasya Likhulu kukuukhola khataru. Kila umuyiinga alomela Yeremiya ari, “Intsya khukhureebakho shireebo shitweela, ne ngana untsilemo, ukhaambisabisakho ilomo yoosi ta.”

¹⁵Yeremiya naye waamwiilamwo ari, “Ise siinga ikhwiilamo shaŋali shisheene, ukakasa uri singene untsire ta? Ne abe nangakhuboolela nga ikhuwa khu makyesi, iwe singene undekeerese ise ta.”

¹⁶Kila umuyiinga Zedekiya amwitsubila mu shimoonyo ari, “Ise ikhwitsubila mu lisiina ly'Omukasya Wele umulamu, uwakhuwa ifwe kumuukha kwe buulamu, indi ise singene ikhwiire iwe ta, namwe bari ikhuwaaneyo isi babaandu babaali khuweentsa buulamu bwoowo khuubumalawo ta.”

¹⁷Lwanyuma kila Yeremiya aboolela Zedekiya sheesi Umukasya Umunyali wa byoosi, Wele wa Isiraeli aamulomela ari, “Iwe siinga wiwaanayo wamweene isi baakhulu b'omuyiinga wa Babulooni, kane uwonese buulamu bwoowo, ni shiriimba shino singene bashooshe ni kumulilo ta. Iwe atweela ni be muungo mwoowo kane mube baalamu.

¹⁸Ne siinga ulekha khukhwiiwaanayo isi bali ta, shiriimba shino Yerusalemu shitsya khuwaanibwayo isi liiye lye ba Babulooni, bashooshe ni kumulilo shoosi shiweele aasi, ni nawe uryo wamweene bakhaakhuwaambe bakhuyile nga umubowe.”

¹⁹Naye umuyiinga Zedekiya weelamo Yeremiya ari, “Ise naariire naabi khulwe Bayudaaya babaantsawukhakho khusiise baatsya betubaasa khu ba Babulooni. Babeene bano banyala bambaanayo isi ba Babulooni, baambirisaka buubi naabi.”

²⁰Yeremiya waamwilamo ari, “Nibo singene bakhuwaaneyo isi bali ta. Ise ikhuloomba busa ndi ufukiilile buurume bw'Omukasya, ni bibiindu byoosi kane bikhutsiile iwe buulayi, ni nawe uryo kane uramewo nga uli umulamu.

²¹Ne iwe siinga wikaana khukhwiiwaanayo, iliwo sheesi Umukasya antsokyesile mu marooro:

²²Ise nabonamwo bakhasi abe babaaramawo mu lubili lw'omuyiinga wa Yuda, nga bayilibwa isi baakhulu b'omuyiinga wa Babulooni. Bakhasi abo baaba baloma bari, ‘basaale boowo abe beesi weyikina naabi nibo babaakhuborosa iwe, ne ari bikyele byoowo ni byoola khukhwisiikha mu litosi aasi, basaale tsana bakhwaantsukha baakhulekha.’

²³“Bakhasi boowo boosi atweela ni babaana boowo beene bakhaayilibwe isi ba Babulooni, ne iwe wamweene, s'ukhaanyale khuutitukha ta. Bakhaakhuwaambe bakhuyile nga umubowe isi umuyiinga wa Babulooni, ni shiriimba shino shoosi bakhaashooshe ni kumulilo shoosi shiweele aasi.”

²⁴Shikila Zedekiya elamo Yeremiya ari, “Ukhafukiilisakho umuundu yeesi waamanyakho bino byoosi byeesi khukanikhile, shinyala shaakhwiirisa iwe.

²⁵Siinga baakhulu babaandi bashiwulilakho bari ise naakanikhilekho ni nawe, ne beetsa baakhulomela bari, ‘Khuboolelekho sheesi ukanikhile n'umuyiinga; ukhakhubisakho ni lomo ta ndweela ta, ne siinga usila busa, kane khukhwiire.’

²⁶Nio abweene awo nawe ubeelemo ubaboolele uri ‘Ise imbeele niikoontselela umuyiinga, khuulekha khuntsisayo mu mapuusu kakaali mu ntsu ya Yonasani khufwiila iyo ta.’ ”

²⁷Lwanyumakho baakhulu tsana beetsa isi Yeremiya, baamureebelesa byoosi nga nibibeele, naye aryo waababoolela byoosi byeesi umuyiinga aamulomela khuukanikha. Baryo kila bamulekha, yalekha khubawo umuundu uwakobola khuumukanikhayo luundi ta, lwekhuuba mbaawo umuundu yeesi uwawulilakho inganikha isi aaba ni nayo n'umuyiinga ta.

²⁸Aryo Yeremiya waarama mu lwaanyi lwe lubili, khukhwoolesa khu mbuka isi baawaambila shiriimba Yerusalemu.