Read lumasaaba Yeremiya 39 Bible Online

Yeremiya 39 - lumasaaba bible

Yeremiya 39

¹Mu mweesi kwe likhumi, kwe mu mwiiko kwe shisheenda kwe buwuuli bwa Zedekiya, nga ashiili umuyiinga wa Yuda, Nebukaduneeza, umuyiinga wa Babulooni weetsa ni liiye lyeewe lyoosi, baakhuumba baatsya bebwakala shiriimba Yerusalemu.

²Biryo, khu shifukhu she shisheenda she mu mweesi kwe khaane, mu mwiiko kwe likhumi na mutweela kwe buwuuli bw'omuyiinga Zedekiya, shiriimba Yerusalemu shoosi baaba baashimalile.

³Lwanyuma nga baamalile khuuwaamba shiriimba Yerusalemu, baakhulu b'omuyiinga wa Babulooni beetsa mu shiriimba, bekhalaka khu bitsoloŋo bye khu Shilibwa she Akari, nga nibo bano: Nerigali Sharezeri, Samugari Nebo, Sarisekimu uwe Rabusarisi, ni Nerigali Sharezeri, niye uwaba umukhulu waabwe.

⁴Zedekiya umuyiinga wa Yuda, atweela ni baselikhale beewe ni baabona ba Babulooni nga beetsa, baatitukha belukha baatsya. Baryo baatitukha baarura mu shiriimba mu shilo, nga baraambisa kumukhoosi kwe kumukuunda kw'omuyiinga, khuutsya khururira mu shilibwa she kamatikiiyi kaabili. Baryo baanyalisa khuutitukha baalola kwe Litila lya Yorudaani[9].

⁵Ne liiye lye ba Babulooni lyaabaloondakho nga libatimisa, lyaanyalisa khuwaamba Zedekiya mu musaleela kwe Yeriko. Liryo liiye lino lyaamuyila isi umuyiinga Nebukaduneeza, uwaba nga ali i Ribula, mu shisiintsa she Hamasi, waamukhalila kumusaango abweene ni abweene.

⁶Nga bashiili i Ribula weene awo, Nebukaduneeza waalakila baakhoonyaka basooleli ba Zedekiya nga umweene waaloleeleele ni tsimoni tseewe, naluundi baakhoonyaka ni baakhulu babaandi be mu Yuda babaaba bali ni naye.

⁷Lwanyuma lweesho, baasokoolamo tsimoni tsa Zedekiya, baamubowa kiminyololo, baamuyila i Babulooni.

⁸Nga ibyo bili biryo, ba Babulooni babaaramile baaba nga balikho booshaka lubili lw'omuyiinga, atweela ni tsiintsu tse babaandu, ni khuufuniaakaka tsimako tse kamatikiiyi ke khu Yerusalemu.

⁹Lwanyuma lwa byoosi, Nebuzaradani, uwaba umukhulu we baaliindi, waawuyisaka babaandu babaarama mu shiriimba, waabayilaka mu bubowe, atweela ni naabo boosi abe babaaba nga baatitukhiile isi ali, ni babaandu babaandi boositsana abe babaaramayo.

¹⁰Khuurusakho babaandu beesi Nebuzaradani aalekha mu shibala sha Yuda baaba abo babafuurayo butaambi, nga sibalikho na shiindu shoosi ta, aryo waabafuumbasa kimikuunda kye kimizabibu ni tsinimilo tsitsiindi.

¹¹Nebukaduneeza umuyiinga wa Babulooni waawa Nebuzaradani, umukhulu we baaliindi shilakilo shishiwaamba khu Yeremiya, nga amulomela ari,

¹²“Tsya uruseyo Yeremiya, umuyile, umuliinde buulayi. Uli ni khuumulolelela buulayi nga umukholela shoosi sheesi akana.”

¹³Aryo Nebuzaradani umukhulu we baaliindi, nga ali atweela ni baakhulu basheewe babaandi nga nibo: Nebushazibani, ni Nerigali Sharezeri, khuutubakho ni baakhulu babaandi b'omuyiinga wa Babulooni,

¹⁴baarumana batweela khu baselikhale khuutsya bareere Yeremiya, khukhwaama mu lwaanyi lw'omuyiinga. Baryo baamureera baamuwa Gedaliya, umusooleli wa Ahikamu, umwitsukhulu wa Shafani, khuumuyila ingo weewe amuliindileyo buulayi. Aryo Yeremiya waarama nga ali mu baandu beewe.

¹⁵Yeremiya n'aba nga ashiili umubowe mu lwaanyi lw'omuyiinga, Umukasya waamukanikhayo ilomo yeewe nga amulomela ari,

¹⁶“Tsya uboolele Ebedimeleki umu Esiyopiya sheesi ise Umukasya Umunyali wa byoosi, Wele wa Isiraeli, nakhuboolela ndi, ‘Nareewula babaandu bano indi intsya khureera bukosi bubuutsya khuhesa shiriimba shino, ne akhuba khuutsowatsowana ta. Imbuka ili aambi bitsya khwoolela, ukhaabibone ni tsimoni tsoowo.

¹⁷Ne ise Umukasya samweene, ikhaakhukhiinge iwe khu shifukhu isho, ulekhe khuwaanibwayo isi abo beesi iwe urya ta.

¹⁸Samweene ikhaakhuwonese iwe, mbaawo ukhaakhwiire ta. Iwe ukhaatitukhe nga uli mulamu, lwekhuuba waayintsiyikina ise. Ise Umukasya samweene niye ukuukuula bibiindu bino.’ ”