Read lumasaaba Yeremiya 4 Bible Online

Yeremiya 4 - lumasaaba bible

Yeremiya 4

¹Umukasya aloma ari, “Baandu ba Isiraeli, ni muba nga mukana khuukobola, mwaakha khuukobola isiise. Murusilewo ilala bumoyaani bweenywe khukhwaama mu moni tsase, mulekhe khuborokha luundi ta.

²Naluundi ni muba nga mwitsuba mu lisiina ly'Omukasya, mubyoolelesa byoosi mu bwaŋali, mu buulayi atweela ni mu bukwalaafu. Nio isho shikile kamanaambo kafune tsikhabi, naluundi indyo ingawe lukoosi luukali.”

³Sheesi Umukasya alomela babaandu ba Yuda, atweela ni babekhali boosi be mu Yerusalemu nisho shino: “Ni mutsye mulime liiswa lyeenywe lilikhali liilime ta, mukhatsya mwabyaala bumiitso mu busifu ta.

⁴Ni mwiimiliise mwabeene isi Umukasya, mwimiliise kimyoyo kyeenywe, inywe babaandu be mu Yuda, atweela ni babekhali be mu Yerusalemu. Siinga mulekha khushikhola ta, lirima lyase lilyaburukha nga kumulilo likhaabeekhekho lwe bubwoonaki bweenywe, libookhe muwewo, itaambewo umuundu na mutweela unyala khuukusimisa ta.”

⁵“Tsya mukuukuule mu Yuda, luundi mushilaangile mu Yerusalemu luukali lweene nga muloma muri, ‘Yinyukha mwibuusanise, khayo khutsye khwinjile mu biriimba byeesi bebotokhelesakho kamatikiiyi!’

⁶Yinyukha mwokyeselele kumukhoosi kukuutsya mu Sayuuni, ni mutime mutsye ibweene iyo muwone, mukhekayaasa ta. Lwekhuuba ise Umukasya indi khuureera buukosi khukhwaama khu mukhoosi kwe lubeka lwe ngaaki, butsya khuuba bwe khuuhela khuukali naabi.

⁷Nga n'ubona italanyi n'irura khukhwaama mu shitsakha shayo, uyo uwesa kamanaambo werekeleele busa khurura. Bona ali khukhwiitsa khuuhesa shibala shoowo sha Yuda. Biriimba byoowo bitsya khurama nga kamakubili busa, nga mbaawo umuundu na mutweela ukamenyamwo ta.”

⁸Ise kila inomela babaandu ba Isiraeli ndi, “Nashiryo, inywe ni mukwaare tsisawu tsya makoongwe, murakikhe khuukhupa luwuungu ni khukhwilootsa, lwekhuuba lirima ly'Omukasya lishiili liikali naabi isi khuli, lyaakhuweetsekhelela ta.”

⁹Kila ndi Umukasya aloma ari, “Shifukhu isho nga sheetsile khwoola, umuyiinga atweela ni baawuli beewe babaandi bakhaaweelemwo ilala kamaani, basaayi nabo beetsule shiriisa shikali, ni baŋoosi nabo baryaaryaamukhe.”

¹⁰Shikila ise inoma ndi, “Iwe uli Umukasya umunyali wa byoosi. Ne lwashiina iwe uwombesele babaandu boowo bano, atweela ni shiriimba Yerusalemu shoosi nga uloma uri kane babe buulayi mu lukoosi, ate nga bona lurima baalureere khu mimilo kyaabwe!”

¹¹Imbuka iyo nga yeetsile khwoola, babaandu bano boosi atweela ni Yerusalemu yoosi, bakhaashimanye bari, “Ise indi khuusiindikha imbewo imbile khukhwaama mu shibala shishoomu she angaaki, yiitse nga iwuutsa khuulola khu lubeka lwe babaandu baase. Ne imbewo yino sikheetse nga itamuusa busa likhuutsi ni khuumiliisa ta;

¹²ne imbewo iyiitsa ni kamaani ni luwuutse luukali nga luno iba yaama isiise Umukasya. Ninashiryo ari inaangilila khuukhala kumusaango kwase isi babaandu bano.”

¹³Ari bona baasiku balikho beetsa bafwaanile busa nga namufweeli, ni kamakaali kaabwe kali busa nga imbewo iye sisyafuusi, ni tsiŋwaaŋwa tsaabwe tsitsya tsiwuta busa nga kiminywiinywi waasu. Ilala kumutaambo kwaakhunyoolile! Khwaafwa khwawawo!

¹⁴O iwe Yerusalemu, yisiinga buubi bwoowo, uburuse mu mwoyo kwoowo, nio manya wawonesebwa. Ari kane wolese eena, nga ushibiikha bubwoonaki buukali buryo mu mwoyo kwoowo?

¹⁵Bona ari iliwo likono liliili khukuukuula khukhwaama mu shiriimba sha Dani, nga lilaangilila kamakhuuwa ke khuuhela khukhwaama khu ngoongo tsa Efurayimu.

¹⁶Umukasya waaloma ari, “Tsya muboole nga mureewula kamanaambo, mushilaangile mu Yerusalemu muri, liiye liliitsya khuubahesa lilikho liitsa, nga lyaama mu shibala she aleeyi, nga lilaangilila luwuungu lwe buusoolo khu biriimba bya Yuda.

¹⁷Liiye lino lifwaana nga baaliindi babaaliinda kimikuunda, lwekhuuba babaandu baabwe baayiminyaalila ise Umukasya.” Bino Umukasya umweene niye ubikanikha.

¹⁸Inywe babaandu ba Yuda, intsibirisa yeenywe atweela ni buraambi bweenywe bubweene, nibyo bibibarereere bibiindu bibifwaana biri. Khuno khuli khuutaambisibwa khweenywe, naluundi khuli khuurafu naabi khukhuutsya khwiinjila khwoole mu myoyo kyeenywe mukari.

¹⁹Butsiina bwe mu mwoyo, butsiina bwe mu mwoyo, nga butsiina bwe mwoyo kwase buli buukali naabi! Ise ndikho niborora busa ni butsiina buukali mu mwoyo kwase, nashiryo ise sinyala naasila busa ta. Lwekhuuba bona ise naawuliile likono lye khoombi, naawuliile luwuungu lwe buusoolo.

²⁰Bukosi butsya buloondekhana busa, ari bona shibala shoosi shaaramile awo busa nga likubili. Mu mbuka ifwiiti busa iri, kamasari keefwe konakisibwile, ni tsinaanga tseesi batiimbamwo batsonuulakile.

²¹Ari ise inamala mbuka shiina nga mbona busoolo bubuyiindiile naabi buryo, naluundi nga mbulila likono lye tsikhoombi lino?

²²Kila Umukasya umweene aloma ari, “Babaandu baase babeene bali baasilu busa, nibo sibaayimanya ise ta. Nibo bali babaana babaakhalimwo kamakyesi ta, nibo sibalimwo ni khuumanya khwoosi ta. Bali baamanyilifu naabi mu khukhola bye bubwoonaki, ne nga boolile khu bye khuukhola buulayi, sibamanyakho shoosi ta.”

²³Lwanyuma lwa bino, naanyukanyuka khu shibala, naatsya khubona nga shaaramile busa awo nga mbaamwo buulamu ta, indi ninyusa tsimoni tsase mu ngaaki, naabona liikulu nga sililimwo buwaanga bwoosi ta.

²⁴Indi ndola khu njiinji, naatsibona nga tsilikho tsitengaala busa, ni bikoongo nabyo byoosi nga bilikho biyeŋaana busa eyi ni neeyi.

²⁵Indyo neloosela khuulola, naalekha khubonakho umuundu na mutweela ta, ni binywiinywi byoosi bye mu ngaaki, nga byatitukhile mbaawo na shitweela ta.

²⁶Nabona ni liloba lilyaba liilayi lye khuulimamwo biilyo, nga lyekyelile kumubiimbi busa, ni biriimba byoosi, nga byaaramile awo kamawuumbu busa. Lirima ly'Omukasya lirafu naabi nilyo lilyakhola bino byoosi.

²⁷Lwekhuuba Umukasya umweene aloma ari, “Shibala shoosi shitsya khwoonakisibwa shirame busa, abe yakhaba nga siintsya khushimalilawo ilala ta.

²⁸Nashiryo shibala shino shitsya khwantsuwa, ni likulu litsya khumaliya busa lili tii; Lwekhuuba ise Umukasya samweene naakanikhile, siintsya khushuusamwo ta; indyo naakhalilewo ilala.”

²⁹Nga babaandu baawuliile liyoombo lye basaani babaakyeendela khu ŋwaaŋwa, ni naabo babaalasa buyiingo, buli mutweela mu shiriimba aryaryamukha waatitukha. Balala khu nibo batitukha baatsya benjilaka mu bitsakha, babaandi baatsya baaninaka khu mabaale kamaboofu. Biryo biriimba byaarama awo busa nga mbaawo umuundu ubimenyamwo ta.

³⁰Iwe Yerusalemu, kumutaambo kwaakhunyoolile! Lwashiina ukwaara wemiliisa mu bikwaaro bibesemu, waatsya weronarona busa ni bubuuma bwe zaabu? Lwashiina wiyakha iraangi khu bisikye bye tsimoni tsoowo? Musaambo iyo ulikho umala busa imbuka yoowo khukhwiimiliisa. Abe babaandu beesi wambaasa uri bakhukana naabi, balikho bakhulekelesa busa, naluundi baweentsa ni khukhwiira iwe tsana.

³¹Indyo ise nawulila khuulila nga khw'omukhasi uuli mu butsiina bwe khusaala, nga alikho antsuwa lwe khuusaala umwaana weewe umukiboole. Khwaba khuulila khw'omukhaana wa Sayuuni nga aeetsaeetsa busa, lwanyuma waatsanuusa kamakhono keewe, nga aloma ari, “Kumutaambo kwanyoolile! Bona babeeri balikho beetsa khuumalawo buulamu bwase.”