Read lumasaaba Yeremiya 40 Bible Online

Yeremiya 40 - lumasaaba bible

Yeremiya 40

¹Umukasya waakanikha luundi isi Yeremiya ilomo yeewe, lwanyuma lwa Nebuzaradani, umukhulu we baaliindi khuumulekhuulila i Rama. Niye aanyoola Yeremiya nga waabowebwa mu minyololo, nga ali atweela ni baabowe babaandi babaamisibwa i Yerusalemu, ni mu Yuda mwoosi, babaaba bali khuuyilibwa i Babulooni.

²Umukhulu we baaliindi yuno n'anyoola Yeremiya, waamulomela ari, “Umukasya Wele weenywe aareewula babaandu ari atsya khureera bukosi buno khu shibala shino.

³Bona ari shaayolelela, Umukasya waakhola sheesi aaloma ari kane akhole. Shino shakholebwa shiryo lwekhuuba babaandu boowo beloosela khukhwoonakisa isi Umukasya, baalekha khumuwuliilisa ta.

⁴Ni nashiryo, bona ari ikhulekhuula iwe shaleelo shino, nga ikhukaangulula kiminyololo kino khu makhono koowo. Ari iwe siinga ufukiilila, yiitsa khutsye ni nase i Babulooni, ni nase kane ikhuloleele buulayi. Ne siinga uba waalobile, n'uube. Bona shibala shino shoosi shili is'uli, unyala waatsya oosi isi ukana khuutsya.”

⁵Ne Yeremiya n'aba nga ashiili khushuukha khuutsya ta, Nebuzaradani waaloselakho ari, “Yiilayo wa Gedaliya, umusooleli wa Ahikamu, umwitsukhulu wa Shafani, umweene uyo isi umuyiinga wa Babulooni akhola khuuba gafana we biriimba byoosi bye mu Yuda. Unyala waatsya waamenya ni naye, akari mu baandu abo, namwe unyala waakhalawo khuutsya oosi isi kane ukane.” Aryo umukhulu we baaliindi yuno waamuwa bibikanibwa byoosi, ni shiwaanwa, lwanyuma waamusibula waatsya.

⁶Yeremiya waakhalawo khuutsya khumenya ni Gedaliya, umusooleli wa Ahikamu, i Mizipa. Aryo waamenya akari mu baandu babaaramayo mu shibala isho.

⁷Ne batweela khu baakhulu be liiye lya Yuda, babaaba nga baasalanila busa iyo mu kyeewa, ni baawulila bari umuyiinga wa Babulooni waakhola Gedaliya, umusooleli wa Ahikamu, khuuba nga niye gafana we shibala sheewe, naluundi nga waamuwa niye bunyala bwe khuloleelela babaandu basaani ni bakhasi atweela ni babaana babaaba nga nibo babaafuurayo butaambi mu shibala shaabwe, nga nibo babaaba baakhuyilibwa mu bubowe ta,

⁸baryo beetsa isi Gedaliya i Mizipa, nga nibo bano: Ishimaeli umusooleli wa Nesaniya, Yohanani ni Yonasani basooleli ba Kareya, Seraya umusooleli wa Tanihumesi, ni basooleli ba Efayi khukhwaama i Netofa, ni Yezaniya umusooleli w'omuundu khukhwaama i Maka; bano boosi atweela ni baselikhale baabwe.

⁹Gedaliya umusooleli wa Ahikamu waabetsubila nga akana khuubamalamo buuri, waaloma ari, “Inywe mukhabakho ni khuurya khwoosi isi ba Babulooni ta. Ni mutsye mumenye mu shibala, mwaakaanisatsake umuyiinga wa Babulooni, bibiindu kane bibatsiile buulayi.

¹⁰Ise samweene kane niloosele khuumenya ano i Mizipa, nga naakanana ni baakhulu be ba Babulooni, buli lweesi kane beetsile ano. Ne inywe ni mutsye mu biriimba byeenywe mubuusanise iviini, kamatuunda, ni kamafura ke kuusaala ku olivu, mubibuunge mu nyuungu, muryo mwiloosele khuumenya mu biriimba byeesi mumenyamo.”

¹¹Biba biryo, Bayudaaya abe babaamenya mu Mowabu, Amoni, Edomu ni mu manaambo kakaandi baawulila bari umuyiinga wa Babulooni, waafukiilisakho ba Isiraeli baalala khuumenya mu Yuda, naluundi baawulila bari waakhola Gedaliya umusooleli wa Ahikamu, umwitsukhulu wa Shafani, khuuba nga niye gafana ubalolelela.

¹²Musaambo iyo, nabo baakobolaka mu shibala sha Yuda, khukhwaama mu bibala bibiindi ibyo, beetsa isi Gedaliya i Mizipa. Nabo baarakikha khuubuusanisa iviini, ni kamatuunda mu bukali bwako.

¹³Lwanyuma lwa bino byoosi, Yohanani atweela ni baaraangilisi be baselikhale babaandi abe babashili iyo mu kyeewa busa, nabo beetsa isi Gedaliya i Mizipa,

¹⁴baamulomela bari, “Iwe waakhushimanyakho uri umuyiinga Baalisi uwa Amoni, waarumana Isimaeli khuukhukhoonya iwe ta?” Ne Gedaliya niye waalekha khushifukiilisa sheesi baloma ta.

¹⁵Lwanyuma kila Yohanani musooleli wa Kareya, alomela Gedaliya i Mizipa mu shimoonyo ari, “Lekha ise intsye ikhoonye Isimaeli umusooleli wa Nesaniya, nga mbaawo umuundu yeesi ushimanyakho nakhari ta. Lwashiina khufukiilila niye khuukhukhoonya iwe. Lwekhuuba ni shiba shiryo, Bayudaaya bakyeekhe babebuusila isi iwe uli, kane basalanisibwe, naluundi kane shibarereere khuukhoonyebwa bawewo.”

¹⁶Ne Gedaliya umusooleli wa Ahikamu waamwiilamo ari, “Ukhatsya waakhola shishiindu shishifwaana nga isho ta! Isho sheesi uli khuukanikha khu Isimaeli sishili shaŋali ta.”