Read lumasaaba Yeremiya 41 Bible Online

Yeremiya 41 - lumasaaba bible

Yeremiya 41

¹Mu mweesi kwe kumusaafu, Ishimaeli umusooleli wa Nesaniya, umwitsukhulu wa Elishama, uwe mu luruungo lwe buyiinga, naluundi nga niye mutweela khu baliindi baakhulu b'omuyiinga, waatsya i Mizipa, nga ali ni baselikhale likhumi khuutsya khubona Gedaliya, umusooleli wa Ahikamu. Baryo ni baaba nga balikho baliila atweela,

²Ishimaeli ni baselikhale likhumi tsana abo, benyukha basoolayo tsiindima tsaabwe, baawunaka Gedaliya, umusaani abe isi umuyiinga wa Babulooni aarobora khuuba nga gafana we shisiintsa isho, baamukhoonyelawo.

³Ishimaeli ni babaandu beewe bakhoonyaka ni ba Isiraeli babaandi babaaba ni Gedaliya i Mizipa, atweela ni baselikhale ba Babulooni nabo babaaba bali abweene awo.

⁴Khu shifukhu shisheelakho lwanyuma lwe khukhwiiribwa khwa Gedaliya, nga mbaawo umuundu na mutweela ushimanyilekho ta,

⁵yabawo basaani kamakhumi shinaane, beetsa nga baama i Shekemu, i Shilo ni Samariya. Babeene bano beetsa nga baabeekilekho bunwaanwa bwaabwe, bonuulakile bikwaaro byaabwe, naluundi nga bekhalakile ni kimibano. Nibo baaba nga bali khuuyila biwaanwa bye biilime bibulungule ni bubaane, khuubiwaanayo mu Lisaayilo Likhulu ly'Omukasya.

⁶Aryo Ishimaeli tsana waarura i Mizipa, waatsya nga alila kamasika khuubakaanana. Kila nga woolile isi bali, waabalomela ari, “Nimwiitse mubone Gedaliya, umusooleli wa Ahikamu.”

⁷Nabo nibaamala khukhwiinjila mu shiriimba mukari, Ishimaeli atweela ni basaani beesi aaba nabo, baasiintsaka babaandu bano, baatuumaka kimilaambo kyaabwe mu sebele iyabawo nga shiilimo kameetsi ta.

⁸Ne mu beeribwa bano, mwabamo basaani babaandi likhumi babaalomela Ishimaeli bari, “Ukhakhwiiraka ifwe ta! Bona khweetsile ni ŋaano, seyiri, kamafura ke kuusaala ku olivu, ni bubuushi bwe ntsukhi, khwaabibisile mwirome iyo.” Aryo waabalekha, waalekha khubeeraka nga ni eraka babaaramile ta.

⁹Isebele mweesi Ishimaeli aatuumaka kimilaambo kye babaandu beesi akhoonyaka ikyo, khuutubaasa khu mulaambo kwa Gedaliya, yaba niyo isi umuyiinga Asa ombekha khuuba shitweela khu bye khukhwikhiinga isi umuyiinga Baasha wa Isiraeli. Aryo Ishimaeli weetsusa isebele inyomu yino ni kimilaambo.

¹⁰Lwanyuma Ishimaeli wawaambaka babaandu babaaramile boosi babaaba i Mizipa, waabayila nga baabowe, mu beene bano nga mulimo bakhaana b'omuyiinga, nga mulimo ni babaandu babaandi boosi babaaramayo, beesi Nebuzaradani, umukhulu we baaliindi aafumbasa Gedaliya khuulolelela. Aryo Ishimaeli umusooleli wa Nesaniya waabayila nga baabowe, waatsya waakhalisa ni nabo, khuutsya mu shibala sha Amoni.

¹¹Ne lwanyuma Yohanani umusooleli wa Kareya, atweela ni baaraangilisi be liiye babaandi baawulila khu bubi bweesi Ishimaeli aakhola.

¹²Kila benyukhilamo, nibo atweela ni baselikhale baabwe, khuutsya khusoolanisa Ishimaeli. Baryo baamunyoolela aambi ni litibo liboofu lye Gibiyoni.

¹³Ne babaandu beesi Ishimaeli aaba nabo nga bali baabowe ni baabona Yohanani, ni baaraangilisi be liiye babaandi beetsa, bewulila kumwikhoyo kumukali naabi.

¹⁴Babaandu bano boosi beesi Ishimaeli aaba ali khuuyila nga baabowe, baashuukha boosi, baatimaka baatsya betubaasa khu Yohanani umusooleli wa Kareya.

¹⁵Ne Ishimaeli waaba nga waaramile ni basaani shinaane bonyene, baatitukha khu Yohanani, baatsya mu shibala she ba Amoni.

¹⁶Yohanani atweela ni baakhulu be liiye babaandi babaaba ni naye, baayila kumulimo kwe khuulolelela babaandu abe beesi Ishimaeli aaba ni nabo khukhwaama i Mizipa, lwanyuma lwe khuukhoonya Gedaliya, umusooleli wa Ahikamu. Mu nibo mwabamo baselikhale, bakhasi, babaana atweela ni babomole abe babaakaanisa mu lubili lw'omuyiinga khukhwaama i Gibiyoni.

¹⁷Baryo baatsya ni nabo, baamenyakho i Geruti Kimuhamu, aambi ni Yerusalemu, nga bakhakakho khuutsya kwe Misiri

¹⁸khuutitukha khu ba Babulooni. Baaba nga baariire naabi ba Babulooni, lwekhuuba Ishimaeli aaba waakhoonyile Gedaliya, umusooleli wa Ahikamu, isi umuyiinga wa Babulooni umweene aarobora khuuba gafana uwe shisiintsa isho.