Read lumasaaba Yeremiya 42 Bible Online

Yeremiya 42 - lumasaaba bible

Yeremiya 42

¹Lwanyuma baakhulu be kamahe boosi, nga mulimo Yohanani umusooleli wa Kareya, ni Yezaniya umusooleli wa Hoshaya, atweela ni babaandu ba buli saambo tsoosi, khukhwaamila ilala khu we aasi khukhwoolela ilala khu we angaaki, baabuusana beetsa

²isi Yeremiya baamulomela bari, “Khwaakhwikoontseleele, n'ukhukholele sheesi khukhuloomba! Khuloombelekho isi Umukasya Wele woowo, lwe babaandu bakyeekhe bano babaaramawo. Nga n'ukhubona uri, makiboole khwaba baakali, ne ari bona khwaarama bakyeekhe bari.

³Khuloombelekho nio manya Wele woowo waakhwookesa ifwe kumukhoosi kweesi khunyala khwaatsiilakho, ni shishiindu sheesi khunyala khwakhola.”

⁴Kila umuŋoosi Yeremiya naye abeelamo ari, “Iseese naawuliile sheesi muli khuuloma. Kane imbaloombele isi Umukasya Wele weenywe nga ni mukana. Naye nga waantsililemo, ise nase kane imbaboolele byoosi byeesi kane abe nga waambooleele. Mbaawo sheesi kane imbabisabise ta.”

⁵Nabo beelamo Yeremiya bari, “Khuloomba Umukasya abe uwaŋali luundi umwiyikinwa khuukhuwa ifwe shitaambiso, siinga ifwe khulekha khukhola nga buli shiindu shoosi ni shili sheesi akhulakila ifwe khuukhola ta.

⁶Oba sheesi akana khuukhola shiba shiilayi namwe shiibi, ifwe kane khufukiilile khuuloondelela Wele weefwe, umweene isi ifwe khuli khuukhurumanayo. Khwaamanyile khuri buli shiindu kane shikhutsiile buulayi, siinga khumuwulila byeesi akhuboolela nga Wele weefwe.”

⁷Lwanyuma lwe bifukhu likhumi khuubirawo, Umukasya weelamo Yeremiya sheesi aamuloomba.

⁸Kila alaanga Yohanani atweela ni baakhulu be liiye boosi, babaaba ni naye, ni khuutubakho babaandu ba buli saambo yoosi, khukhwaamila khwe aasi khuutsya khwoola khuwe angaaki.

⁹Waabalomela ari, “Umukasya Wele wa Isiraeli, isi inywe mwaandumanayo khuubaloombela alikho aloma ari;

¹⁰‘Inywe siinga mufukiilila khukhwiiloosela khuumenya mu shibala shino, ni nase indyo ingaababyaale mutsowe, siindilayo luundi imbafuniaakake ta. Ilala ise samweene ingaababyaale, indekhe khukhwiilayo luundi khuubakhuulaka, lwekhuuba shamaambilekho naabi khuubona nga ise nabareerera inywe buukosi bubufwaana buri.

¹¹Nashiryo mukharya khulw'omuyiinga wa Babulooni, isi ari mwiyembelela ta. Ise Umukasya Wele weenywe imbalomela ndi, indi atweela ni nanywe, ni nase samweene kane imbawonese inywe khukhwaama mu makhono keewe.

¹²Lwekhuuba ise samweene indi uwe shiisa isi muli, kane imukhole niye khuubawaambila inywe nanywe shiisa, abalekhe mukoboleyo mu shibala sheenywe.’

¹³“Ne inywe siinga muloma muri, ‘Ifwe singene khumenye mu shibala shino ta,’ muryo kane mube nga mwaaminyaaliile Umukasya Wele weenywe,

¹⁴namwe siinga muloma muri, ‘Taawe, khakhutsye i Misiri, isi kane khube buulayi khulekhe khubonakho luundi busoolo ta, namwe khuwulilakho ifurumbeti yoosi ifuura ta, namwe khwewulilakho luundi intsala ta.’

¹⁵Ari inywe baandu ba Yuda babaaramawo, nimuwulile sheesi Umukasya aloma. Umukasya Umunyali wa byoosi, Wele wa Isiraeli aloma ari, ‘Inywe nikane mube nga mwaakhaliilewo ilala khuutsya i Misiri, naluundi mwaatsya mwaamenya ibweene iyo,

¹⁶busoolo bweesi mwarya naabi kane buboolekho, ni intsala isi mwiyembelela naabi kane ibaloondekho i Misiri iyo, mufwiile ibweene iyo.

¹⁷Ilala, babaandu boosi babaakhaalilewo khuutsya i Misiri khuumenyayo, bakhaafwiileyo mu busoolo, namwe bafwe lwe ntsala, namwe lwe buulwaale. Mbaawo na mutweela khu nibo ukhaawone ta, namwe bari atitukhe khuuwona buukosi bweesi indibareerakho ta.’

¹⁸“Lwekhuuba sheesi ise Umukasya Umunyali wa byoosi, Wele wa Isiraeli, inoma nisho shino ndi, ‘Nga lirima lyase ni buurafu bwase ni byatsutsukha khu baandu be mu Yerusalemu, buryo ndi buurafu bwase bukhaatsutsukhe khu baandu mweesi babaali khuukhalawo khuutsya i Misiri. Inywe mukhekyele shishiindu shishiyaangisa isi buli muundu yeesi ukhaababonekho, babaandu bakhaababirise busa nga she mbikho luundi nga shitsubo. Inywe simukhaabonekho shiifwo shino luundi nakhari ta.’ ”

¹⁹Yeremiya weloosela nga aboolela babaandu ilomo y'Omukasya isi aamulomela ari, “Inywe baandu ba Yuda babaaramawo, mukhatsya i Misiri ta. Ni mwitsiliilise shino sheesi imbareewula shaleelo ndi

²⁰kane mube mwaakholile shishiindu shiibi naabi. Inywe mwabeene mwanoomba ise khuubaloombela isi Umukasya Wele weefwe, naluundi mwaasuubisa ise muri kane mukhole buli shiindu shoosi sheesi niye abalakile khuukhola.

²¹Ni nase ndyo khu shifukhu she shaleelo shino naababooleele, ne inywe mwalobeele ilala khuuloondelela biilomo byeesi Umukasya Wele weefwe, aandumana ise khukhwiitsa khuubaboolela.

²²Ni nashiryo, ni mumanye shino: mutsya khufwiila mu busoolo, namwe lwe ntsala, namwe lwe buulwaale, nga muli mu shibala isho isi muli khuukana khuutsya khumenya.”