Read lumasaaba Yeremiya 43 Bible Online

Yeremiya 43 - lumasaaba bible

Yeremiya 43

¹Aryo Yeremiya waaboolela babaandu biilomo byoosi byeesi Umukasya Wele waabwe aamurumana khuukanikha.

²Ne lwanyuma Azariya umusooleli wa Hoshaya, ni Yohanani umusooleli wa Kareya, atweela ni babaandu boosi babaaba be shikili shiikali, baalomela Yeremiya bari, “Iwe uwombesa busa! Umukasya Wele weefwe waakhukhulomelakho iwe ari khukhatsya i Misiri khuumenyayo ta.

³Ne Baruki umusooleli wa Neriya aakha khuuba nga niye ukhusuluusile iwe khukhwiitsa isi khuli, lwekhuuba akana ba Babulooni beetse bakhuwaambake ifwe, bakhuyile i Babulooni, namwe bakhukhoonyake.”

⁴Musaambo iyo, Yohanani umusooleli wa Kareya, atweela ni baakhulu be liiye boosi, ni khuuyilila atweela babaandu boosi, baaminyaalila likono ly'Omukasya, bekaana khuurama mu shibala sha Yuda.

⁵Lwanyuma Yohanani ni baakhulu be liiye abo boosi, baaraangilila babaandu babaaramawo mu shibala sha Yuda, baabayilaka mu Misiri, nga waatubaasilekho ni babaandu babaandi babaakobolaka khukhwaama mu bibala byoosi, abe isi baasalanisibwila.

⁶Baryo baayilaka basaani, bakhasi, babaana ni bakhaana b'omuyiinga, ni babaandu babaandi boosi, abe beesi Nebuzaradani, umukhulu we baaliindi, aalekha mu bunyala bwa Gedaliya, umusooleli wa Ahikamu, uwe mu lulyo lwa Shafani. Mu beene abo waayililamo ni Baruki umusooleli wa Neriya, n'umuŋoosi Yeremiya mweene.

⁷Baryo nga ni bakhaawuliilisa shiilakilo sh'Omukasya, besuta baatsya mu shibala she Misiri. Baatsya bamenyatsaka i Tahipanihesi.

⁸Umukasya waakanikha isi Yeremiya ilomo yeewe nga ali mu shiriimba sha Tahipanihesi, nga amulomela ari,

⁹“Bukulayo kamabaale kamaboofu kameene kabili, ukasiikhe aasi mulyaango, iburaangisi we shishoombekhe she lubili lwa Faraawo i Tahipanihesi. Shino uli ni khuushikhola nga ba Isiraeli be mu Yuda boosi baloleeleele.

¹⁰Lwanyuma ubalomele uri, ise Umukasya, Umunyali wa Byoosi Wele wa Isiraeli, intsya khurumana umwakaanisi wase Nebukaduneeza, umuyiinga wa Babulooni, eetse mu shifwo shino. Ni naye akhoombekhe shitsoloŋo sheewe khu ngaaki khwe kamabaale keesi isiikhile ano kano. Aryo akhaabalaayise iweema yeewe iye buyiinga khuumalatana awo oosi.

¹¹Niye akheetse ebwakale luundi awule ba Misiri. Nio babaandu abo babaareebwawo bari bakhaafwe, bafwiile abweene awo, ni naabo babaaliwo lwe buubowe bayilibwe mu bubowe, ni nabo babeeribwila mu busoolo ni lurima, beeribwe ni lurima.

¹²Ikhaamuwe buunyali awaambise kumulilo khu mesaayilo ke ba wele ba Misiri koosi, ni ba wele beene baalala bakhaabooshake ni kumulilo, ni babaandi babasutake babayile mu bubowe. Nga n'ubona umwaayi ni eboweleela isuukha, aryo umuyiinga wa Babulooni naye akhaabukule shibala sha Misiri ashiboweleele, arureyo nga mbaawo shishiindu shoosi shishimwoolilekho nakhari ta.

¹³Aryo akhaakhupake luundi afuniaakake kimisiindi kyeesi besaaya kikiili i Heliyopolisi, naluundi booshake kamesaayilo ke ba wele be ba Misiri.”