Read lumasaaba Yeremiya 44 Bible Online

Yeremiya 44 - lumasaaba bible

Yeremiya 44

¹Umukasya waakanikha ilomo yeewe luundi iwaamba khu Bayudaaya abe babaamenya mu shisiintsa she mwaalo wa Misiri she Migidolu, Tahipahinesi ni Menfisi, ni shisiintsa sha Pasurosi.

²Umukasya Umunyali wa byoosi, Wele wa Isiraeli aloma ari, “Inywe mwabeene mwabona khuuhela khweesi nareera khu shiriimba Yerusalemu, ni biriimba bibiindi bye mu Yuda. Ni khukhwoolesa shaleelo shino, byaafunikhaka byaayikyela kamawuumbu konyene.

³Shino shakholekha lwe bubwoonaki buukali bweesi nibo baakhola, shaakila baasuluusa lirima lyase nga boosha bubaane isi ba wele babaandi ni khuubesaaya. Shishiindu nga shino abe shakhubatsakawo mu baandu baase khuushikholakho ta, abe yakhaba nibo babeene, oba inywe, namwe bakuuka beenywe bataayi baakhwisaayatsakakho bibiindu nga bino ta.

⁴Abe yakhaba nga byabeele biryo, imbuka ngali ise narumanatsaka baŋoosi baase, babeetsatsaka isi bali khuubareewula, balekhe khuukhola bibiindu bye mbikho nga ibyo byeesi ise naabiyila.

⁵Ne nibo baalobela ilala khuuwuliilisa, namwe khukhwiinaanayo. Nibo sibaakanilakho ilala khukhwaakamisa khukhwoosha bubaane isi ba wele babaandi ta.

⁶Nashiryo, imbuka yoola ise naabatsukhakho lirima lyase, ni buurafu bwase bwamalatana khu biriimba bya Yuda byoosi, ni khu nguudo tse mu Yerusalemu mwoosi, nga naashiwaambilekho kumulilo. Biryo biriimba ibyo byoosi byarama awo nga she khukhwiyaanga isi buli muundu yeesi uwabibonakho, nga ni bibonekha shaleelo shino.

⁷“Ari Umukasya Umunyali wa byoosi, Wele wa Isiraeli ereeba ari shiina kila inywe mukana khukhwiireerakho buukosi? Mukana khukhwiireerakho buukosi bubuutsya khuubahesa inywe mweesi, basaani ni bakhasi boosi, ne akhuba inywe mwenyene ta, ne ni khuutubakho babaana beenywe baafwiiti ni baŋaalye beene, nga mbaawo umuundu na mutweela uramawo ta?

⁸Lwashiina inywe mukana naabi khusuluusa lirima lyase, nga muraambisa ibyo byeesi kamakhono keenywe kabuumba, naluundi nga muwaanayo tsisaayilo isi bawele be mu Misiri, isi mwakhalawo khukhwiitsa khuumenya? Musaambo iyo, mulikho mwiihesa mwabeene, naluundi mwireerakho shitsubo ni bukhomo akari mu manaambo ke mu shibala shoosi.

⁹Ilala inywe mwayibilila bubwoonaki bweesi bakuuka beenywe ni bayiinga, atweela ni ba nabakyelama ba Yuda baakhola, atweela ni bubwoonaki bweesi inywe mwabeene mwakhola, nga waareerekho baakyelama beenywe, nga mubikholela mu shibala sha Yuda ni mu nguudo tse mu Yerusalemu?

¹⁰Bona ni khukhwoolesa shaleelo shino, inywe mwakhwakamisa khuuba ni shikili ta, namwe bari mwaabakho ni khuurya nga muwa shiriifwa kamakaambila ni biilakilo byase, byeesi ise samweene nabawa inywe ni bakuuka beenywe.

¹¹“Ni nashiryo, shishiindi sheesi Umukasya Umunyali wa byoosi, Wele wa Isiraeli aloma nisho shino ndi: Ise naakhaliilewo ilala khuubareerakho buukosi bubamalewo inywe mweesi, ni babaaramile boosi babaali mu shibala sha Yuda.

¹²Babaandu ba Yuda babaaramayo, ate nga baakhalilewo khuutsya bamenya mu Misiri, ise samweene ikhaabayile. Ne boosi bakhaahelele mu Misiri iyo. Abo boosi babaakhaatsye, oba baakhulu, oba baakyeekhe, bakhaafwiile mu Misiri mu busoolo ni lurima, namwe lwe ntsala. Bakheekyele shishirisaka isi buli muundu yeesi ukhaababonekho, babaandu babaandi bakhaababirise busa nga shitsubo luundi she bukhomo.

¹³Babaandu babaakhaabe nga bamenya mu Misiri abo ikhaabawe shitaambiso, nga ninawa Yerusalemu shiitaambiso, nga inaambisa lurima, intsala ni buulwaale.

¹⁴Mbaawo na mutweela khu baandu ba Yuda babaatsya mu Misiri, ukhaaramewo nga mulamu ta, namwe bari atitukhe ta. Mbaawo na mutweela khu nibo ukhaakoboleyo mu Yuda, nga ni bambaasilisa bari bakheeleyo ta, khuurusakho bakhaabe bakyeekhe bari babaakheeleyo.”

¹⁵Lwanyuma basaani babaashimanyakho bari bakhasi baabwe baaba boosha bubaane isi ba wele, nga batubaanila atweela ni bakhasi babaabayo, nga mulimo ni ba Isiraeli babaaba bamenya mu shisiintsa sha Misiri she mwaalo, nga boosi bali babaandu baakali naabi, beetsa baalomela Yeremiya bari,

¹⁶“Ifwe khwikaanila ilala buurume bweesi ukhuboolele, nga ubukanikha mu lisiina ly'Omukasya!

¹⁷Ne shonyene ndi khusuubisa khuri kane khukhole isho sheesi khulomile khuri khutsya khukhola. Kane khwiiloosele khukhwiisaaya Nabakyelama we Likulu, nga khumwooshela bubaane, naluundi kane khwiloosele khuumuwa niye biwaanwa bye viini, nga ifwe fabeene atweela ni bakuuka beefwe, n'umuyiinga weefwe, ni baaraangilisi beefwe ni baakholatsaka khaalekho mu biriimba bya Yuda, ni mu nguudo tse mu Yerusalemu. Nga ni khwakholatsaka khuryo, khwafunatsaka biilyo biikali naabi, khwaaba buulayi naabi, nga mbaawo buukosi bwoosi ta.

¹⁸Ne bona ari nga ni khwaakamisa khukhwisaaya Nabakyelama we Liikulu, nga sikhumwokhelakho bubaani ta, naluundi nga sikhumureererakho biwaanwa bye viini ta, ari bona sikhulikho na shiindu shoosi ta, ate nga khwabeele khutaambisibwa naabi ni busoolo buukali ni ntsala.”

¹⁹Ni bakhasi nabo balooselakho nga baloma bari, “Ifwe khu mbuka isi khwamenyatsakila mu shibala sha Yuda, khwesaayatsaka Nabakyelama we liikulu, nga khuwaanayo tsisaayilo, ni khuumureerera biwaanwa bye viini, naluundi nga khuteekha bukaati bubuuli mu shifwaani sheewe, ne baseetsa beefwe baafukiilisana ni neebyo byeesi khwaba nga khukhola, nga sibabikhaabisanisa ta.”

²⁰Lwanyuma kila Yeremiya naye elamo isi babaandu boosi, basaani ni bakhasi beene, nga nibo babaaba baamwililemo tsilomo itso tsoosi, waabalomela ari,

²¹“Inywe mwambaasa muri Umukasya umweene s'ashimanyakho, namwe s'ashebulila ari inywe, ni bakuuka beenywe, ni bayiinga beenywe, ni baaraangilisi beenywe babaandi, atweela ni babaandu boosi, mwawaanatsakayo bubaani nga mubwookhela mu biriimba bya Yuda, ni mu nguudo tse mu Yerusalemu ta?

²²Ne lwekhuuba niye s'anyalisa luundi khukhwikhalilikha buraambi bweenywe bwe bubwoonaki ta, ni bibiindu bibiindi bye tsisoni byeesi mwaba nga mukhola, waakhalawo khuureera shitsubo khu shibala sheenywe, shiryo shekyela shishoomu busa nga kumubiimbi, nga mbaamo babaandu ta, nga nishili shaleelo shino.

²³Buukosi buno bwaboolakho buri nga ni mubona, lwekhuuba inywe mwesaaya ba wele babaandi, nga mubookhela bubaani, muryo mwaaba nga mwoonakisa isi Umukasya, mwaaba nga mumumiinyaalila, mwalekha khuuloondelela biilakilo byeewe ni kamakaambila keewe ta.”

²⁴Indi luundi kila Yeremiya alomela babaandu ba Yuda boosi, babaaba nga bamenya mu Misiri, nga mulimo bakhasi ni basaani beene, biilomo by'Omukasya,

²⁵waabalomela ari, “Umukasya Umunyali wa byoosi, Wele wa Isiraeli ababoolela ari: Inywe atweela ni bakhasi beenywe mwokesanisile buraambi bweenywe, khuŋaŋasa byeesi mwaloma muri, ‘Kane khwoolelese bibitsubo byeefwe byeesi khwakholela Nabakyelama we likulu, khuumwookhelatsaka bubaani, ni khuumureereratsaka biwaanwa bye viini.’ Ari imbalomela ndi, ni mutsye mu moni mukhole byeesi mwasuubisa khuukhola. Ni mwoolelese bisuubiso byeenywe!

²⁶Ne inywe Bayudaaya babaali mu Misiri mweesi, ni muwuliilise byeesi Umukasya ababoolela nga aloma ari, Nitsuba mu lisiina lyase lye kamaani, ndi mbaawo na mutweela khusiinywe babaamenya mu Misiri, babaaliilayo luundi khuuraambisa lisiina lyase mu khwitsuba nga muloma muri, ‘Nga Umukasya n'ali Umulamu,’ ta.

²⁷Bona, samweene nabeshenjile nga mbona ndi singene imbawe biilayi luundi ta, ne kane muhele muwewo. Babaandu ba Yuda boosi babaali mu Misiri bakhaahelele mu busoolo, namwe lwe buulwaale, khukhwoolesa nga mbaawo na mutweela uramawo ta.

²⁸Ne bakyeekhe bari nibo babaakhaawone batitukhe khukhwaama mu Misiri beeleyo mu shibala sha Yuda. Nio lwanyuma abo babaakhaaramewo nga baalamu, nibo babaakhaamanye bilomo bya naanu bibyoolelela: bibyaabwe namwe bibyase.

²⁹Ari khano nikho khaabonelo khakhokyesanisa khari ise Umukasya intsya khubawa shitaambiso mu shifwo shino, naluundi nio mushimanye muri biilomo byase byeesi imbalomakho byoolelela khu lwe buubi bweesi mukhola.

³⁰Ise Umukasya ashiŋaŋasa ndi, ‘Intsya khuwaanayo Faraawo Hofura, umuyiinga wa Misiri isi baasiku beewe babaali khuumuweentsa, nga ni nashikhola nawaanayo Zedekiya umuyiinga wa Yuda isi Nebukaduneeza, umuyiinga wa Babulooni, umusiku uwaba nga aweentsa khuumukhoonya.’ ”