Read lumasaaba Yeremiya 46 Bible Online

Yeremiya 46 - lumasaaba bible

Yeremiya 46

¹Umukasya waakanikha ilomo yeewe isi umuŋoosi Yeremiya, iwaamba khu manaambo,

²nga anyoowela khu Misiri. Buurume bubwanyoowa buno bwaba buwaamba khu liye lya Faraawo Neko, umuyiinga wa Misiri, umweene yuno isi umuyiinga Nebukaduneeza uwa Babulooni aasoolanisa waamuwulila i Karikemishi, aambi ni luluutsi Efurati, mu mwiiko kukuukhola khane, kwa Yehoyakimu, nga niye umuyiinga wa Yuda:

³Imbuka yoolile yiiŋoonaŋoona mutsye musoolane, suta tsingabo tseenywe mukhuumbe mutsye mu busoolo.

⁴Wooyawooya tsiŋwaaŋwa tseenywe, muryo mutsiikhwaabekho, buli mutweela emikhe mu shifwo sheewe nga waareerekho ikuutwa yeewe. Nimuwakale kamafumo keenywe, mwisabikhe bye busoolo.

⁵Umukasya aloma ari, “Ne ari shiina shino sheesi indikhuubona? Boosi bariire busa, balikho batima beelayo inyuma isi baamile. Baselikhale baabwe baakhupibwile buubi naabi, ni buli luwaande isi balola iliwo khuryaryamukha khwonyene.

⁶Abo babanyala khuutiikhula tsiindimo sibanyala ni khuutitukha ta, abe yakhaba abo babaali ni kamaani sibanyala bewoma ta. Boosi bafuulyaamila aasi baakwa na khukwa khu lubeka lwe ngaaki aambi ni luluutsi Efuraati.

⁷Linaambo shiina lino lilinyukha nga luluutsi Nayilo, nga n'ubona luluutsi lulutsula kameetsi kaasalasala.

⁸Linaambo lilinyukha lino nilyo lya Misiri, linyukha nga n'ubona kameetsi kaketsuule ni kasalasala khu ndulo. Misiri shaloma shiri, ‘Kane ninyukhe imalatane shiibala shoosi, intsye nga noonakisa biriimba byoosi atweela ni babaandu boosi babaabimenyamwo.’

⁹Lakila tsiŋwaaŋwa tsikhuune tsiindimo! Lakila abo babaatsiikhalakho batsitimise ni kamaani keene. Lekha baasoolani barure batsye: Basaani khukhwaama mu Esiyopiya ni Puti babaabaliile tsingabo, ni babaandi khukhwaama i Ludiya batsanuule buyiingo bwaabwe.”

¹⁰Ne shifukhu isho shikhaabe sh'Omukasya Wele, Umunyali wa byoosi, kane shibe shifukhu sheewe she khukhwiliyasilakho baasiku beewe. Lurima lweewe lukhaabeere khukhwoolesa ni lwihakha kamafuki lwoosi, lufwaane busa nga kamafuki. Lwekhuuba Umukasya umweene, Umunyali wa byoosi niye akhaabawaaneyo nga tsisaayilo, mu shibala shishiili khu lubeka lwe ngaaki aambi ni luluutsi Efurati.

¹¹Inywe babaandu be Misiri, yinyukha mutsye i Gileyadi, mufune bukaangi ibweene iyo. Ne shonyene ndi bukaangi ibwo mbaawo sheesi buyeeta ta; naluundi sibureera khuuwona nakhari ta.

¹²Kamanaambo koosi kaawuliile nga ni muswaalile naabi, naluundi shibala shoosi shawuliile khuulila khweenywe. Umusoolani mutweela akwa khu musoolani washeewe; boombi belima aasi kumubwii.

¹³Yino niyo ilomo y'Omukasya iyeetsa isi umuŋoosi Yeremiya, nga iwaamba khu khwiitsa khwa Nebukaduneeza, umuyiinga wa Babulooni, nga eetsa khukhwibwakala Misiri.

¹⁴“Kuukuulila ilomo yino mu Misiri mwoosi, utsye ukikuukuulile mu biriimba bya Misiri nga Megidolu, Menfisi, ni mu Tahipanesi. Tsya ulome uri, ‘Yinyukha mwireekekhe, buli mutweela emikhe mu shifwo sheewe, lwekhuuba lurima lulikho lutsya khulya babaandu babaabebotokheleele inywe.’

¹⁵Shiina shikilile wele weenywe Apisi waakwa aasi mafumala? Abe s'anyala weemikha ta, lwekhuuba Umukasya umweene niye uwamukuniuusile.

¹⁶Baselikhale baabwe be kamaani bakheetuye bakwe aasi kimiluundi swa busa, nga buli mutweela akwa khu washe khu ngaaki. Buli mutweela akhaalomele uwasheewe ari, ‘Yinyukha khaangu khukoboleyo ingo isi babaandu beefwe ni isi bisiintsa byeefwe mweesi khwasaalikhilamo, khwiilukhe khutsye khurure isi lurima lw'omusiku lunyala lwakhwoolelakho.’

¹⁷Mulaangilile lisiina lishaakha isi Faraawo nga liloma liri; ‘Uwe tsilomo tsingali, ne nga mbaawo sheesi anyala khuukhola ta; waafiiliile ikhabi yeewe iye kamaani.’ ”

¹⁸Umukasya aloma ari, “Ise lisiina lyase ndi Umukasya Umunyali wa byoosi, indi Umuyiinga, naluundi indi Wele Umulamu. Ikhaabeyo ukheetse khukhwiibwakala, nga afwaana nga lukiingi Tabori lulwaleeha khufuura tsinjiinji tsiitsiindi, ni lukiingi Karumeeli lulwiimikha khu ndulo khwe kuyaantsa kwe kameetsi.

¹⁹Ari ni mubuusanise bibiindu byeenywe mwireekekhe khuutsya mu bubowe, inywe mweesi babaamenya mu Misiri. Shiriimba Menfisi shitsya khurama busa nga kumubiimbi, shibeewo busa nga mbaamwo umuundu ushimenyamwo ta.”

²⁰“Shibala she Misiri shili busa nga imasoti inefu buulayi, ne iliwo umusiku uuli khukhwaamila lubeka lwe ngaaki nga isame imbuko khuushibwakala.

²¹Ni baselikhale baasho baaliindi babaamisibwa mu manaambo kakaandi, baanera bafwaana busa nga tsimoosi tseesi batsya khukhoonya, nabo bakhenyukhe batitukhe batsiile atweela boosi, sikhaabewo na mutweela khu nibo ukheemikhewo ta. Lwekhuuba shifukhu she kumutaambo shilikho shibeetsila nibo, imbuka iye khuhela khwaabwe yoolile.

²²Babaandu be Misiri bakhaatitukhe bafwaane nga indemu ititukha yaatsya nga imesamesa tsinimi, lwekhuuba baasiku balikho beetsa ni kamaani kamakali. Bakheetse baabaliile tsiyaywa tsaabwe, bafwaane nga basaani babaatsya khurema kimisaala.

²³Bakhaatsye bareme kimisaala kye mu shisaali, bakimalile aasi, abe yakhaba nga shisaali isho shasiimba luukali. Baselikhale babaali khukhwiitsa boola buukali nga tsiisike, bali baselikhale babaakhabalikha ta.

²⁴Babaandu be Misiri bakhaabe mu khuswaala khuukali naabi, nga boosi bawaanibwileyo isi babaandu be linaambo liliili khu lubeka lwe ngaaki.”

²⁵Umukasya umunyali wa byoosi, Wele wa Isiraeli aloma ari, “Indi aambi khureerera Amoni, wele we Tebesi shitaambiso, atweela ni Faraawo, ni Misiri yoosi, ni ba wele baayo beene, atweela ni bayiinga.

²⁶Ise ikhaabawaaneyo isi uyo uuli khuubaheentsa nga akana khuubahesa; niye Nebukaduneeza umuyiinga wa Babulooni, atweela ni liiye lyeewe. Ne lwanyuma lwa byoosi, Misiri shikheeleyo shitsulemo babaandu, nga ni shaba khaalekho.”

²⁷“Inywe babetsukhulu ba Yakobo, mukharya ta, mukhawamo kamaani inywe babaandu ba Isiraeli ta. Ilala kane imbawonese nga imbaamisa inywe khukhwaama mu shibala she aleeyi, ingobose babetsukhulu beenywe khukhwaama mu shibala isi bali nga baabowe. Babetsukhulu ba Yakobo bakhaafune luundi luukoosi, nga bakobolaka ingo, bakhaabe buulayi ni buliindi, nga mbaawo umuundu ubariisariisa ta.

²⁸Ni nashiryo inywe baandu baase ba Isiraeli, mukharya ta, lwekhuuba ise Umukasya samweene indi atweela ni nanywe. Bino ise Umukasya samweene niye ubikuukuula. Abe yakhaba nga nahesela ilala kamanaambo koosi mweesi nabayila naabasalanisila, ne inywe mwabeene ise singabahese imbamalewo ta. Ikhaabawe shitaambiso, ne ingashikhole ni bwaŋali; singabalekhe busa nga mwakhuweebwa shitaambiso ta.”