Read lumasaaba Yeremiya 47 Bible Online

Yeremiya 47 - lumasaaba bible

Yeremiya 47

¹Buurume bw'Omukasya bweetsa isi umuŋoosi Yeremiya, bubuwaamba khu ba Firisitiya, nga Faraawo umuyiinga wa Misiri ashiili khwibwakala shisiintsa she Gaza ta.

²Umukasya waaloma ari: “Bona, iliwo kameetsi kakaali khukhwinyukhila khu luwaande lwe ngaaki; ne katsya khuubuusana ketsule kasalasale. Kameetsi kano kakhaamalatane buli aandu, kamile shibala, na buli shiindu shoosi shishiilikho, katsye kamile ni biriimba atweela ni babaandu baamwo beene. Babaandu bakhaalile kamasika nga bakana bari ibewo umuundu ubayeeta, buli muundu yeesi uwe shibala akhaantsuwe.

³Nibo bakhaawulile lutiri lwe bibutusi bye tsiŋwaaŋwa tsitsiitsa nga tsisuna busa, ni lutiri lwe kamakaali ke baasiku, nga kimipiila kye kamakaali kitirira khwiloba. Basaali sibakhaanyale ni khukhwishebukha bayeete babaana baabwe ta, bakhaakyeende nga kamakhono kaabwe kalebela busa.

⁴Lwekhuuba shifukhu shikhaabe shoolile she khuhesa ba Firisitiya, ni khuukhalakho babaandu babaaramawo abe babanyala bayeeta Tuulo ni Sidoni. Umukasya umweene niye utsya khuhesaka ba Firisitiya, abo boosi babaaramawo khu baandu babeetsa khukhwaama khu ndulo khwe nyaantsa i Kafutori.

⁵Babaandu be Gaza batsya khubekakho kamatsuune kaabwe lwe kumutaambo; shisiintsa she Ashikeloni shikhelaliile busa. Inywe babaandu babaatsya khuramawo khu ba Anakimu, kane mwoolese liina khukhwikhalaka mwabeene?

⁶Ni nawe ‘Lurima lw'Omukasya, kane woolese eena nga utsya usiintsaka ulekhe khuwolakho ta? Ari kobolayo mu shilaalo shoowo, ube mu bweene umwo uwolekho!’

⁷Kane luwolekho luryeena, ate nga Umukasya waaluweele kumulimo kwe khuukhola? Niye umweene waalulakiile khuutsya khwibwakala shisiintsa sha Ashikeloni, ni babaandu babaamenya khu ndulo khwe nyaantsa.”