Read lumasaaba Yeremiya 48 Bible Online

Yeremiya 48 - lumasaaba bible

Yeremiya 48

¹Byoosi bibiwaamba khu Mowaabu, Umukasya Umunyali wa byoosi, Wele wa Isiraeli aloma ari: Nga kumutaambo kwaanyoolile shiriimba Nebo, lwekhuuba shikhaahelele ilala. Kiriyatayimu bakhaashiwaambe, shiwaambisibwe tsisoni, ni kamatikiiyi kaasho bakakhupake kaweele aasi khwiiloba.

²Mowaabu abe uwamanyikhana naabi waaweelewo; umusiku weewe ekhala i Heshiboni khuukhola tsiŋooŋoona tse khuuhesa linaambo lya Mowaabu: “Yiitsa khuhese linaambo ilyo khulimalewo.” Ni nanywe babaandu babaalwaala kimirwe mutsya khusila murunye tsu; baselikhale batsya khubaloondakho ni tsiindima tsaabwe.

³Ari sila muwuliilise khuulila khukhwaama i Horonayimu, luwuungu lwe khuyenguukhana khuukali ni khuuhela.

⁴Shibala sha Mowaabu shikhaahele, babaana bakyeekhe bakhaalile.

⁵Nga ni baniina khu mukhoosi kwe Luhisi, bakhaatsye nga baantsuwa luukali; nga batsya kwe Horonayimu, khulila khwe kumutaambo khuwulilikha.

⁶Yikhuuna tsiindimo! Titukha lwe khuuwonesa buulamu bweenywe; ni mutiikhule tsiindimo nga isikilya iye mwirome mu mubiimbi.

⁷Iwe Mowaabu, waayiyikina kamatikiiyi koowo ni buyiindifu bwoowo, nawe bakhaakhuwaambe bakhuyile nga umubowe, ni wele woowo Kyemoshi bakhaamuyile mu bubowe, atweela ni basaayi beewe ni baakhulu babaamwakaanisa.

⁸Umusiku uwiitsa khuuhesa akheetse khu buli shiriimba, mbaawo shiriimba na shitweela shishikhaamwiwomekho nakhari ta. Litila lyoosi likhoonakisibwe, ni kumusaaleela kwayo kweene kukhoonakisibwe. Shikhaabe shiryo lwekhuuba ise Umukasya samweene niye ushikanikhile.

⁹Reengareengekhela Mowaabu iŋani, lwekhuuba muŋali shitsya khuhela Lekha biriimba byasho byoosi biraŋaale busa nga mbaamo muundu na mutweela ta ubimenyamo na khari ta.

¹⁰“Atsubibwe umuundu yeesi ukhali khuukana khuukhola sheesi Umukasya amulomela khuukhola ta. Atsubibwe umuundu yeesi ubiikha lurima lweewe waalekha khuluraambisa khukhwiira ta!”

¹¹Umukasya aloma ari, “Mowaabu waamenya buulayi mu luukoosi, nga mbaawo umutaambisakho ta. Ali busa nga iviini isi baalekha yaasila busa mu nyuungu yayo, nga sibakishuusanisa khukhwaama mu nyuungu ndweela baamutsukha mu nyuungu ikiindi ta. Nashiryo waarama ni kumuŋaawo kweewe, lwekhuuba siwakhutsyakho mu bubowe bwoosi ta, ni khuuwunya khweewe awunya buulayi, waakhushuukhatsakakho ta.

¹²Ne ari bona bifukhu bilikho byoola, isi ise Umukasya samweene, ikhaarumanile babaandu khukhwiitsa beruruure Mowaabu nga ni beruruura iviini khukhwaama inyuungu, lwanyuma nga baakimalilemo yoosi, bakhupake tsinyuungu batsaraakake.

¹³Lwanyuma babaandu ba Mowaabu bakhaawaambibwe tsisoni lwa wele waabwe Kyemoshi, nga babaandu ba Isiraeli nabo ni baswaala khu mbuka isi besaayatsakila i Beseli.”

¹⁴“Inywe munyala muryeena mwaaloma muri, ‘Ifwe khuli basoolani luundi basaani be kamaani ate baarafu mu busoolo’?

¹⁵Shibala sha Mowaabu atweela ni biriimba byasho byeene bitsya khuhela; basaani baabwe be kamaani mu busoolo batsya khusalibwa ni tsiindima.” Bino bilomebwa n'Umuyiinga, Umukasya Umunyali wa byoosi.

¹⁶Khuukwa khwa Mowaabu khwoolile; buwaangafu bweewe bulikho bwiitsa mu khaangu naabi.

¹⁷Inywe babaamenya aambi ni linaambo ilyo ni musole, inywe mweesi babaamanyile shiriifwa shalyo, loma muri, “Bunyala bwasho bwe kamaani bwaweelewo; shiriifwa shasho atweela ni kamaani kaasho sikashiiliwo ta.

¹⁸Inywe babaandu babaamenya mu shiriimba Diboni, yiikha mwiitse aasi, murure mu shifwo sheenywe she shiriifwa isho, mwikhale aasi mwifukhuulu; lwekhuuba umusiku uwiitsa khuhesa Mowaabu alikho eetsa ano khufuniaakaka kamatikiiyi ke biriimba byeenywe.

¹⁹Inywe babaandu mweesi babaamenya mu Aroeri, yiimikha khu ndulo khwe luguudo muliinde mubone; Nga mwaaboone umusaani n'umukhasi barura nga batitukha mubareebe muri, ‘Shiina shishiili khuukholekha?’

²⁰Nabo kane beelemo bari, ‘Mowaabu shaakwiile,’ lwekhuuba baashiwulile. Yantsuwa mukhupe luwuungu! Laangilila isi buli muundu khu Luutsi Arinoni muri, Mowaabu baashihesile!”

²¹“Shibala she khu musalela boolile khuushikhalila kumusaango, nga nibyo biriimba bya Holoni, Yahizahi, Mefasi,

²²khukhwoola i Diboni, Nebo Besi Dibulatayimu

²³khukhwoola i Kiriyatayimu, Besigamuli, Besimewoni,

²⁴khukhwoola i Keriyosi, ni Bozira. Kumusaango kwoolile khu biriimba bya Mowaabu bibiili aambi ni bibiili aleeyi.

²⁵Luluuka lwa Mowaabu lulwookesa kamaani balukhalilekho, kumukhono kweewe kwe kamaani baakufunile.” Bino byoosi Umukasya unweene niye ubikanikha.

²⁶Umukasya waaloma ari, “Nyweesa Mowaabu ameele, lwekhuuba niye aakhalawo khukhuuminyaalila ise Umukasya. Lekha Mowaabu ameele akwe aasi mu malusi keewe kameene, nio nga waapiringikhile mu malusi iko, babaandu bamutsekhelele.

²⁷Mowaabu, iwe ushebulila nga ni watsekhelela babaandu baase ba Isiraeli? Iwe wababirisa nibo waabafwaanisa busa nga babeefwi, nga buli isi ubakanikhilakho, usiisikha busa kumurwe kwoowo.

²⁸Inywe babaandu babaamenya mu Mowaabu, yinyukha murure mu biriimba byeenywe, mutsye mumenye mufwa tse kamabaale. Ari ngana mufwaane busa nga kamawuusi kakaatsya koombekha biiswi byako imulyaango we lifuluma.”

²⁹“Ifwe khwaamala khaale khuuwulila bibiwaamba khu khwiyiingayiinga khwa Mowaabu, niye eyiingayiinga luundi weniinisa luukali naabi. Khuryo khukhwiiniinisa khweewe ni bunywaanywa bweesi ali nabwo, bukila wekholakhola mu mwoyo kweewe.

³⁰Ise Umukasya samweene, naamanya bunywaanywa bweewe ate nga sibumuyeeta ta, khukhwiyiingayiinga khweewe mbaawo sheesi khukhola ta.

³¹Ni nashiryo ise ndililila Mowabu, Ise naantsuwa ni kamaani khu lwa Mowaabu yeesi, indyo ikhupa luwuungu khulwe babaandu be Kiri-Heresi.

³²Inywe babaandu be Sibuma, ise imbalilila naabi, khuufuurisakho khuulila khweesi nalilila Yazeri. Iwe shiriimba Sibuma, uli nga kuusaala kukwabalaayisa tsisakya tsakwo tsaatsya tsoola khu nyaantsa iye Yazeri. Ari bona kimifigi kyeenywe kimirobe baamalile khaale khuukyonakisaka.

³³Kumwikhoyo ni sangaalo byataamuukhile byaweelewo mu mikuunda ni tsinimilo tse shibala sha Mowaabu. Ari ise naayakamisa khukhwirurukukha khwe viini khukhwaama mu masuuriro; mbaayo umuundu usuura iviini nga eemba ni kumwikhoyo, ni liyoombo lye sangaalo ta.”

³⁴“Iliyo khuulila khuwulilikha mu bisiintsa khukhwaama i Heshiboni khukhwoola i Eleyale ni Yahazi. Naluundi khuwulilikha mu baandu be Zowari khuutsya khukhwoolela ilala i Horonayimu ni Egulasi Shelishiya. Ni kameetsi ke mu luutsi lwe Nimurimu kaayomelela.

³⁵Ikhaakamisile ilala babaandu ba Mowaabu babaatsya bawaanayo tsisaayilo mu bifwo byaabwe bye angaaki bye khukhwisaayilamo, nga boosha bubaane isi ba wele baabwe. Shino ise Umukasya samweene niye ushikuukuulile indyo.”

³⁶“Ni nashiryo mu mwoyo kwase indila naabi lwa Mowaabu, khukhwiilootsa khwase khwafwaana nga kumweenya kweesi bafuurira mu mulele. Ise ndila khulwe babaandu be mu shiriimba Kiri Haresesi, lwekhuuba buli shiindu she buyiindifu shoosi sheesi baafuna shaweelawo ilala.

³⁷Babaandu baayo boosi baababekakho kamatsuune kaabwe, ni bunwaanwa bwaabwe bweene baabubekakho. Kamakhono kaabwe keene baakakhalakho, aryo buli mutweela akyeenda nga weboyile isawu ya makoongwe mu shikuute.

³⁸Khu bisuli bye tsiintsu tsoosi mu Mowaabu, atweela ni mu bifwo mweesi babaandu babuusanila mu biriimba, mbaawo shiindu shiindi sheesi umuundu awulila ta, khurusakho khulila khwonyene. Lwekhuuba ise samweene naafuniaakile Mowaabu, waafwaanile nga inyuungu iyatikhile, lwekhuuba mbaawo umuundu ukiinaaanakho. Umukasya umweene niye ushilaangililila aryo.

³⁹Mowaabu shaafunikhile shaakwiile aasi! Wulila babaandu nga ni baantsuwa! Mowaabu shakwiile aasi shili ni tsisoni tsingali naabi! Ari bona shekyelile shishiindu sheesi babaandu batsekhelela busa, nga buli muundu yeesi ubirawo asisiikha busa kumurwe kweewe nga eyaanga.”

⁴⁰Wulila sheesi Umukasya aloma: “Bonakho, umusiku wa Mowaabu alikho eetsa ewuta aasi nga kunywiinywi waasu, nga kwiitsa kwaabalaayisile tsindaaha tsakwo khu shibala sha Mowaabu.

⁴¹Biriimba byoosi bikhaawaambibwe biyilibwe, ni tsimako tse kamatikiiyi tsoosi tsikhaafuniaakikhe. Khu shifukhu khweene ukhwo, baselikhale ba Mowaabu bakhaabe ni khuurya khuukali mu myoyo kyaabwe, bafwaane nga umukhasi uriire naabi nga ali mu butsiina buukali bwe khusaala.

⁴²Musaambo iyo linaambo lya Mowaabu likhoonakisibwe, lwekhuuba nilyo lyaaminyaalila biilakilo by'Omukasya.

⁴³Khuurya khuukali, kamalowo ni kimireko byaabaliindiliile, inywe babaandu ba Mowaabu. Umukasya umweene niye ukuukuula bibiindu bino.

⁴⁴Buli muundu yeesi ukhaakhakekho bari atitukha khuurura mu khurya khuukali, akhaakwe mu lilowo, ni nooyo ukhakakho bari aniina khuurura mu lilowo, akhaawaambikhile mu mureko, lwekhuuba Umukasya umweene waareekekhilewo imbuka iye khuuhela khwa Mowaabu. Lwekhuuba ikhaareere bibiindu bino byoosi khu shibala sha Mowaabu mu mwiiko kweewe kwe shitaambiso.” Umukasya umweene niye ukuukuula bilomo bino.

⁴⁵Aambi ni shiriimba sha Heshiboni, sheesi umuyiinga Sihoni aawulatsaka khaale, baamuli beemikha awo nga baaluwile, nga sibalikho n'umuundu yeesi ubayeeta ta, nga babona kumulilo kukuliliba, nga kwoosha shiriimba shaabwe. Kumulilo kwooshile biifwo bye buraangisi, ni khu ngaaki khwe tsinjiinji tse babaandu ba Mowaabu babaakana naabi bye busoolo.

⁴⁶Nga kumutaambo kwaabanyoolile inywe babaandu ba Mowaabu! Inywe babesaaya wele Kyemoshi, mwahelile mwaweelewo; babaana beenywe besiinde atweela ni bakhaana beene baayilibwile mu bubowe, mu shibala she aleeyi naabi.

⁴⁷“Ne mu bifukhu bibiili khukhwiitsa mu moni, intsya khukobosela Mowaabu tsikhabi tsasho shibe buulayi luundi.” Bino Umukasya umweene niye ubikuukuula aryo. Kumusaango kwe shibala sha Mowaabu kwaakamile abweene ano.