Read lumasaaba Yeremiya 49 Bible Online

Yeremiya 49 - lumasaaba bible

Yeremiya 49

¹Byeesi Umukasya aloma bibiwaamba khu linaambo lya Amoni nibyo bino: “Babaandu ba Isiraeli shibali ni babaana ta? Nibo sibalikho ni baasikha baabwe ta? Ne lwashiina nibo balekheele babaandu babesaaya wele Moleki khuuyila liiswa lya Gadi lyoosi, baatsya baamenya ni mu biriimba byaabwe byoosi?

²Ne bona bifukhu bitsya khwoola, isi ise Umukasya samweene intsya khwinyusila luwuungu lwe buusoolo isi shiriimba Raba she ba Amoni; shiryo shikhaakhupibwe aasi shikyele kamawuumbu busa, ni bibyaalo byoosi bibishili aambi bikhaawaambisibwekho kumulilo. Nio lwanyuma Isiraeli enyukhe atimise abo babaayila liiswa lyeewe, abawoone abaruse ibulafu.” Bino byoosi Umukasya umweene niye ubikuukuula aryo.

³Inywe babaandu be mu Heshiboni, lila kamasika luukali, lwekhuuba shiriimba Ai shoonakisibwile! Inywe nanywe bakhasi be Raba, nimwantsuwe luukali, mukwaare tsisawu tsa makoongwe mutsye musole. Timaka mutsye eyi ni neeyi mu ntsu tseenywe. Lwekhuuba wele weenywe Moleki bakhaamuyile mu bubowe atweela ni basaayi beewe ni baakhulu babaamwakaanisa.

⁴Inywe babaandu be Amoni babaali ni shikili, lwashiina mwibuyila mwabeene lwe kamatila keenywe, nga mwibuyila lwe kamatila kakaalimwo bye buyiindifu? Inywe mwiyikina buyiindifu bweenywe, kila muloma muri mbaawo umuundu unyala khuubebwakala ta.

⁵Umukasya Umunyali wa byoosi alooselakho ari, Atsya khuubareerakho shiriiso shikali naabi khu buli lubeka, nga abalekhela kamanaambo kakaabebotokheleele kabakwiile. Buli mutweela akhaatime atitukhe khu lwe buulamu bweewe, ilekhe khubawo namutweela ubuusanisa atweela baamuli ta.

⁶“Ne lwanyuma lwa byoosi, ikhaakobose babaandu ba Amoni ingo waabwe babe buulayi luundi.” Bino Umukasya umweene niye ubikuukuula aryo.

⁷Byeesi Umukasya umunyali wa byoosi aloma bibiwaamba khu linaambo lya Edomu nibyo bino: “Khuumanya khukhwaba mu baandu be Temani khwaatsya eena? Babaandu babaabatsaka be kamakhula ari baawamo? Kamakhula kaabwe kaaweelawo ilala?

⁸Inywe babaandu babaamenya mu Dedani, yinyukha mushuukhe mutime mutsye, mwibise aasi mu mafuluma. Lwekhuuba intsya khureera buukosi khu Esawu, ari imbuka yoolile isi imbaweelakho shitaambiso.

⁹Nga babaandu babaakyesa kimisabibu baatsiile khuukyesa, baalekhakakho kimilala inyuma lwe babaandu bataambi. Namwe nga banuuli beetsile khunuula bibiindu mu shilo, basutakho busa bibiindu byeesi bakana khuusuta byonyene.

¹⁰Ne Esawu ikhaamurusekho byoosi byeesi ali nabyo, ikhaasakulake luundi nokyesanise biifwo abe bibyebisa byoosi, ilekhe khubawo isi umuundu yeesi ebisa ta. Baryo babaana beewe, ni baalebe beewe atweela ni babesanwa beewe bahele bawewo, ni naye umweene aweelewo ilala.

¹¹Ari ni mundekhele baafuubi beenywe babe ni nase samweene, ise kane imbaliinde buulayi. Mulekhe ni banamulekhwa beenywe nabo baantsiyikine ise.”

¹²Lwekhuuba sheesi Umukasya aloma nisho shino ari, “Ni kamanaambo abe kakaakhali ni khuuweebwa shitaambiso, kakhaanywe khu shikhopo she lirima lyase. Ari inywe mwambaasa muri kane mutsye busa nga mwakhufuna shitaambiso sheenywe ta? Muryo mukhaaweebwe shitaambiso, shikila mwaakha khuunywa khu shikhopo isho.

¹³Ise Umukasya samweene naayitsuba ndi, shiriimba Bozira shikhekyele shishiindu she khuukhomebwa, she khuutsekhelela, nga shili kamawuumbu busa, naluundi shikhekyele shiitsubo. Ni biriimba byasho bibishibotokheleele, bikhaamenye mu mawuumbu busa biryo biilo ni biilo.”

¹⁴Ise naamala khaale khuuwulila buurume nga bwaama isi Umukasya; umurume waamala khaale khuurumanibwa isi kamanaambo akalomele ari, “Ni mubuusane atweela mwirekekhe khuutsya khwibwakala! Yinyukha mutsye musoolane!”

¹⁵“Bona ari intsya khukhwikyelisa iwe khuuba umuundu mukyeekhe busa akari mu manaambo, iwe niye ukhaafuureyo khuulekelesebwa mu baandu boosi.

¹⁶Khuuriisariisa khweesi mukhola isi kamanaambo kakaandi khwaabawombesile, atweela ni khukhwiyiingayiinga khweesi muli nakhwo. Inywe mumenya muufwa tse lulwaanda, mukona khu ngaaki iyo imurwe we tsingoongo. Ne abe mwangaba nga mwayoombekha biiswi byeenywe khu ngaaki ilukulu ibweene nga n'ubona kunywiinywi waasu, ikheetse imbawanuseyo khukhwaama ibweene iyo.” Bino Umukasya umweene niye ubikuukuula aryo.

¹⁷Umukasya aloma ari, “Shiibala sha Edomu shikhekyele shishiindu shishiriisaka, na buli muundu yeesi ukhaabirewo akhaasisiikhe kumurwe eyaange busa nga ewunamila lwe khuubona khu buwaangafu bubufwaana buri.

¹⁸Shishiindu shitweela sheene shishakholebwa khu Sodomu ni Gomora nga byoonakisibwa, atweela ni biriimba bibyebotokhelelawo, nisho shishikhaakholebwe khu Edomu. Mbaawo umuundu na mutweela ukhaashimenyemo, namwe bari ashikonemo luundi ta.” Umukasya umweene niye ukuukuula biilomo bino.

¹⁹“Nga n'ubona italanyi nga irura khukhwaama mu bitsakha bibiili khu ndulo khwe luluutsi Yorudaani, yeetsa khukhwibwakala kamasheese nga kali mu maayilo kaako, nase indyo ikheetse ndimise babaandu ba Edomu mu mbuka ifwiiti iri khukhwaama mu shibala shaabwe. Ne naanu umweene isi ikhaarobore khuukhola shishiindu shino? Naanu ilala ufwaana ise, unyala khukhukhaabisanisa ise? Namwe mwaayi shiina unyala weetsa weemikha khukhaandisana ni nase?”

²⁰Ninashiryo ari reekeresa uwulile byeesi Umukasya akana khuukhola khu Edomu, ni neesho sheesi ali khuuŋoonaŋoona khuukhola khu baandu babaamenya mu shiriimba Temani: babaandu bakheetse bakhweese bayile abe yakhaba ni bumeeme bweene, karyo ni kamaayilo koosi koonakisibwe lwe buubi bwaabwe.

²¹Nga Edomu shilikho shoonakisibwa, liyoombo lye khuukwa khwasho likhaakile shiibala shoosi shinikine busa, ni luwuungu ulwo lukhaawulilikhile i aleeyi ni khu nyaantsa Imbesemu.

²²Bonakho! Umusiku akheetse nga waabalaayisile tsindaaha tseewe, ewute aasi akwiile Bozira nga n'ubona kunywiinywi waasu nikwiwuta. Khu shifukhu khweene ikhwo, kimyoyo kye baselikhale ba Edomu, kikhaabe mu khurya khuukali nga n'ubona umukhasi uuli mu butsiina bwe khusaala umwaana.

²³Byeesi Umukasya aloma bibiwaamba khu Damasiko nibyo bino: “Babaandu be mu biriimba Hamasi ni Aripadi baariire luukali, lwekhuuba baawuliile kamakhuuwa kamabi. Ari buuri bwaabakoneele, baweelemo kamaani, bayengukhana nga khukhwilyebula khwe kameetsi ke mu nyaantsa.

²⁴Babaandu ba Damasiko baweetsekheleele, ari bona baashuukhile balikho bekhuuna tsiindimo nga batitukha ni buuri buukali naabi. Naluundi bali mu butsiina ni kumutaambo kwabawaambile, ni butsiina bweesi bali nabwo buli nga bw'omukhasi uutsya khusaala.

²⁵Shiriimba abe shishabatsaka shiriimba shishamanyikhana, luundi she kumwikhoyo kwase ari shaangulukhile busa, babaandu mbaamo.

²⁶Ilala mu mbuka ifwiiti iri, basooleli baasho bakheeribwe kimilaambo kyaabwe kisalanile mu nguudo, ni baselikhale baasho bakhaahele bawewo khu shifukhu isho.” Bino Umukasya umunyali wa byoosi niye ubikuukuula aryo.

²⁷“Naluundi ingawaambise kumulilo khukhwoosha kamatikiiyi ke shiriimba Damasiko, kuryo kwooshe kumalilewo ilala lubili lwa Benihadadi lwe kamaani ilwo.”

²⁸Byeesi Umukasya akanikha bibiwaamba khu shikuuka sha Kedari ni buyiinga bwa Hazori, nga nibyo bisiintsa byeesi Nebukaduneeza umuyiinga wa Babulooni aawula. Sheesi Umukasya umweene aaloma nisho shino ari, “Yinyukha utsye wibwakale babaandu be mu Kedari, utsye uhese babaandu be bwaamanyaanga!

²⁹Kamasari kaabwe ni bibyaayo byaabwe bikhaayilibwe, bukono bwaabwe bukhaasutibwe buyilibwe, atweela ni bye buyiindifu bwaabwe ni tsiŋamila tseene. Nio lwanyuma babaandu bakhaalookhe luukali lweene bari, ‘Buuri buukali khu mbeka tsoosi!’ ”

³⁰Umukasya ashikuukuula ari, “Inywe babaandu mweesi be mu Hazori, timaka mutsye, mukyeendaane mu bifwo bye aleeyi! Mutsye mumenye mu mafuluma. Bona Nebukaduneeza, umuyiinga wa Babulooni alikho abakholela tsimbomelo, naluundi alikho ni sheesi aŋoonaŋoona shishibawaamba khwiinywe.”

³¹Umukasya akuukuula luundi ari, “Yinyukha mutsye mwibwakale linaambo lilyewolelesile, naluundi nga lili buulayi. Linaambo ilyo lilikhalikho ni kamatikiiyi khu biriimba byalyo ta, ni babaandu baasho bamenya awo bonyene.

³²Baasiku bakhaayayaane busa tsiŋamila tsaabwe, naluundi bayayaane ni bibyaayo byaabwe biboofu. Ikhaasalanisile khu buli lubeka babaandu abo babaabekakho litsuune lyaabwe baalimbiyisa, naluundi imbareerere buwaangafu nga bwaamila khu buli luwaande.” Bino Umukasya umweene niye ubikuukuula.

³³Hazori shikhekyele busa buumenyo bwe kimisolo patuukha, shiibewo mu mawuumbu busa, nga mbaawo umuundu yeesi ushimenyamo ta, namwe nga mbaawo ukyeenda waashitsyamo ta.

³⁴Umukasya umunyali wa byoosi, waakanikha ilomo yeewe isi umuŋoosi Yeremiya, iwaamba khu shibala sha Elamu, khu mbuka isi Zedekiya aarakikhila khuuba umuyiinga wa Yuda.

³⁵Umukasya Umunyali wa byoosi aloma ari, babaalasa buyiingo be mu Elamu boosi, lwekhuuba nibo babaakila shiibala sha Elamu shaaba she kamaani.

³⁶Ikhaareere iwuutse khu shibala sha Edomu khukhwaama mu soonda tsine tse liikulu; isalanise babaandu buli aandu oosi, isho shikile babaandu ba Elamu babe nga baayolakho mu buli shiibala shoosi nga baamuli.

³⁷Ikhaakile babaandu ba Elamu baryaaryaamukhe nga baaboone khu basiku baabwe, babaakhaabe nga baweentsa buulamu bwaabwe khuubumalawo. Mu lirima lyase liikali, ikhaahese babaandu ba Elamu boosi, ikhaabasiindikhile buukosi bwe busoolo bubamalilewo ilala boosi khukhwoolesa nga baaweelewo. Bino byoosi Umukasya umweene niye ubikuukuula aryo.

³⁸Ingekhase shitsoloŋo shase khu shibala sha Elamu, indyo inyalise khuhesa umuyiinga waabwe atweela ni baakhulu beewe boosi. Umukasya niye ubikuukuula aryo.

³⁹“Ne mu bifukhu bibiitsa iburaangisi, ikhaakobosele babaandu ba Elamu khuuba buulayi luundi.” Bino Umukasya niye ubikuukuula aryo.