Read lumasaaba Yeremiya 5 Bible Online

Yeremiya 5 - lumasaaba bible

Yeremiya 5

¹Inywe babaandu be mu Yerusalemu, timaka eyi ni neeyi, mwimenieelese buulayi, mwibonele mwabeene. Tsya muweentselese mu nguudo mubone, noola munanyoolayo umuundu yakhaba mutweela ukhola biilayi, naluundi ukanikha bya ŋali. Siinga munyoolayo umuundu ufwaana aryo, Ise intsya khwiyakhila shiriimba isho.

²Abe yakhaba nga betsubila naabi mu lisiina ly'Omukasya, ibyo byoosi byeesi betsuba bili bye bubeeyi busa.

³Kila ise niilamwo ndi, “Ise naamanya ndi tsimoni tsoowo tsikana naabi khuubona bwaŋali bwonyene. Iwe wakhupa babaandu boowo luukali lweene, ne baalekha khuwulila buurafu ta. Iwe wabasimula ni kamaani keene, ne baalekha khukolomokha ta. Baryo baakhunisa mu moni mwaabwe, mwafwaana busa nga libaale, bekaana khukhwiibiiyisa.”

⁴Shikila ise nambaasa mu mwoyo kwase ndi, “Bano bali busa bataambi luundi sibalimwo kamakyesi ta, lwekhuuba nibo baakhumanya kumukhoosi kw'Omukasya ta, ni neebyo byeesi Wele akana bakhole ta.

⁵Nashiryo kane intsye isi babaandu babaali mu bunyala imbakanikheyo, ilala nibo baamanya kumukhoosi kw'Omukasya, ni neebyo byeesi Wele waabwe akana.” Ne nabo shitweela busa, baafuniaaka kamakaambila keewe, balekha khumuwulila byeesi akana ta.

⁶Nashiryo baasiku bakhaafwaane busa nga tsitalanyi tsitsitsookhaka khukhwaama mu shitsakha tsibebwakale, nga butsuutse bubwaama mu mubiimbi bubalumake. Naluundi bafwaane busa nga tsiingwe tsitsibuulila biriimba byaabwe, nga yaabeelewo umuundu yeesi ukyeenda waarura ibulafu washo, tsimutyenuulakamwo bipatu. Lwekhuuba bubwoonaki bwaabwe buli buukali naabi, ni khuukwa khwaabwe khuli khwe kamaani naabi.

⁷Shikila Umukasya areeba ari, “Baandu ba Yuda, iseese inyala ndyeena naabeyakhila inywe? Bona babaandu boowo boosi baayindoba ise, batsya betsubila mu lisiina lyaabo babaakhali ba wele ilala ta. Ise nabaliisa nibo biilyo bekurira ilala, ne shonyene baatsya beloosela busa khuukhola bye buyeyani, besoomba nga batsya mu ntsu tsye bamalaaya.

⁸Inywe mwafwaana busa nga tsiŋwaaŋwa tseesi baliisa buulayi tsaanera, nga buli mutweela atsya wewotooma busa umukhasi w'omwesanwa weewe.

⁹Ni lwe lomo iyo, sishintsakhila ise khuubawa nibo shitaambiso ta? Ilala ise sinyala neliyaasa samweene lwe linaambo lilifwaana liri ta?” Bino byoosi Umukasya umweene niye ubikuukuula aryo.

¹⁰Kane indakile baasiku baabwe ndi, “Ni mutsye nga mubirira mu nimilo tsaabwe, mutsye nga mutsonakisaka ne mukhatsimalilawo ilala ta, mutsye nga mufuniaakaka tsisakya tsakhwo, lwekhuuba nitso tsili babaandu babaakhali b'Omukasya ta.

¹¹Mu buli saambo yoosi, babaandu ba Isiraeli atweela ni be mu Yuda, baayindyamwo ise luwomelo, balekha khuuba baŋali isi ise ta.” Shino ise Umukasya samweene niye ushilaangila ndyo.

¹²Babaandu bano bakanikha bubeeyi bwonyene khu Mukasya, nga belomesaka bari, “Umukasya awombesa busa mbaawo sheesi kane akhole ta. Mbaawo buubi bwoosi bubunyala bwakhwoolakho nakhakyeekhe khoosi ta; naluundi sikhukhaabonekho lurima lwoosi namwe intsala ta.

¹³Baŋoosi bali busa nga imbewo, lwekhuuba buurume bw'Omukasya sibubalimwo ta, nashiryo sheesi baloma sishikhaabakholikhekho ta.”

¹⁴Nashiryo sheesi Umukasya Wele umunyali wa byoosi aloma nisho shino: “Lwekhuuba babaandu bano baakanikhile biilomo bibifwaana biryo, ise samweene intsya khukhola bilomo bye mukhanwa mwoowo bifwaane busa nga kumulilo, ni babaandu bano bakhafwaane busa nga tsiikhu tsitsikhaaburukhe lwe kumulilo kweene.”

¹⁵Inywe baandu ba Isiraeli, ise ndi khuutsya khubareerakho linaambo khukhwaama i aleeyi, liitse libebwakale inywe. Nilyo lili linaambo lya penani luundi lili lilinyindaalifu naabi, linaambo lilikanikha lulimi lweesi mukhamanyile ta, byeesi bakanikha simunyala mwabimanya nakhari ta.

¹⁶Nibo bali baalasi be buyiingo balayi naabi beerirawo khaangu naabi, boosi bali basoolani be kamaani.

¹⁷Babeene bano nibo babaakhaalye bibiindu byeenywe byeesi mukyesile ni biilyo byeenywe byoosi. Nibo bakhaahese basooleli beenywe atweela ni bakhaana beene. Baakhaatsye mu mataala keenywe balye bibyaayo babimalemwo, naluundi bamalewo kimisaala kyeenywe kimisabibu ni kimifigi kyeene. Biriimba byeenywe bibiilikho kamatikiiyi byeesi mwiyikina ibyo, bakheetse babifuniaakake.

¹⁸Umukasya aloma ari, “Yeremiya, abe yakhaba mu bifukhu byeene ibyo, ise sikhaafukiilile bahese babaandu baase babamalewo ta.

¹⁹Babaandu babaakhaaramewo bakhaareebe bari, ‘Ne shiina kila Umukasya wele weefwe akholile bibiindu bibifwaana biri khwiifwe?’ Nawe ulibeelamwo uri, ‘Ise ndi Umukasya Wele weenywe, ne inywe mwakhalawo mwaatsya mwesaaya ba wele babaandi, ate nga mubesaayila mu shibala sheenywe shisheene. Ni nashiryo ari, mukhaatsye mwikyele baakulwa be banaambo mu shibala shishikhali shisheenywe ta.’ ”

²⁰Umukasya waaloma ari, “Tsya ukuukuule bibiindu bino isi babetsukhulu ba Yakobo, tsya ubilaangilile mu Yuda:

²¹Inywe babaandu baasilu luundi babaakhalimwo kamakyesi ta, ni muwuliilise buulayi. Inywe babaandu babaali ni tsimoni ne nga simubona ta, inywe babaali ni kamaru ke khuwulila, ne nga simuwulila ta.

²²Lwashiina mukhaantsisamwo ise, ise Umukasya weenywe lukoosi? Lwashiina mukhanikina nga mweetsile isiindi? Iseese niye uwarawo kumuyeekhe khuuba nga lulwaakha khu nyaantsa, nilwo lulwaakha lwa penani lweesi kameetsi kakhanyala kaakhalisa ta. Abe kameetsi kaakhelyebula karyeena, sikalunyala lulwaakha ulwo ta, abe kakhayilila karyeena, sikanyala kalukhalisa ta.

²³Ne shonyene ndi babaandu bano bali bamiinyi luundi sibawulila ta; nibo baaborokha luundi baataala baayindura khusiise.”

²⁴Nibo sibaayilomela mu myoyo kyaabwe bari, “Kane ifwe khwisaaye Umukasya Wele weefwe, ukhuwa ifula iye mu bunyifu atweela ni fula iye mu biheeso, naluundi nga niye ukhuwa ifwe likyesa liilayi lilyeene.”

²⁵Lwe bibyoonako byeenywe bibyeene nibyo bibikilile bibiindu biilayi bino byabarusibwakho, naluundi bibyoonako byeenywe nibyo bibibarusilekho tsikhabi tsino.

²⁶Umukasya waaloselakho ari, “Akari mu baandu baase mulimo babaandu baabi, batsya baabeebisamwo, baafwaana nga babaareka kimireko kye khuuwaambisa binywiinywi, ate nga nikyo kili kimireko kye khuuwaambisa babaandu.

²⁷Nga n'ubona umuundu uyiima tsisolo mu shisaali ni etsusa binywiinywi mu shipo, baryo babaandu bano baayitsusa tsiintsu tsaabwe ni bibiindu byeesi bayaayile busa. Shisheene isho shaakila bekyela be kamaani luundi bayiindifu,

²⁸isho shaakila nibo baanera luundi baamiliya luukali naabi. Buubi bwaabwe sibulikho ni isi bwaakama nga babukhola ta; nibo sibenaanayo khuuwotsa kumusaango nga bakuwotsela uyo uuli umufuubi ta, naluundi sibokesanisa bwaŋali isi abo babaali bataambi ta.

²⁹Inywe mwambaasa muri ise singene imbawe inywe shitaambiso lwe bibiindu bino ta? Ise Umukasya kane niliyaase linaambo lino lwe tsisaambo tsitsifwaana nga tsino.

³⁰Shishiindu she mbikho luundi shishiwaambisa kamaŋaanyu shakholikhile mu shibala:

³¹Baŋoosi bakanikha buŋoosi bwe bubeeyi, ni basaayi nabo bakhalawo kimisaango mu bunyala bwaabwe busa, ni babaandu baase baaba nga bafukiilisana busa ni nabo mu byeesi bakhola. Ne nibo kane beetse bakhole baryeena nga imbuka iye ntsakamo yeetsile khwoola?”