Read lumasaaba Yeremiya 50 Bible Online

Yeremiya 50 - lumasaaba bible

Yeremiya 50

¹Buno nibwo buurume bweesi Umukasya aakanikha, bubuwaamba khu shiriimba Babulooni atweela babaandu baasho, khuubirira mu muŋoosi Yeremiya:

²“Kuukuula luundi mulaangilile akari mu manaambo, mwinyuse angaaki ibendela lwanyuma mulaangilile nga mbaawo sheesi mulekha khuukanikha ta, nga muloma muri, ‘Babulooni shawaambibwile, wele waabwe Beli tsisoni tsamuwaambile, erodaki wele waabwe waatsaangalalile ni khuurya khuukali, bifwaani byeewe byaswaalile busa, naluundi byaatsangalaalile busa.’

³Linaambo khukhwaamila khu lubeka lwe ngaaki lilikho liitsa khukhwibwakala Babulooni, balekhe shibala nga shishoomu busa. Sikhaabewo umuundu yeesi uulishimenyamo ta, lwekhuuba babaandu ni tsisolo tsoosi bikhaatitukhe biwuuye.”

⁴Umukasya aloma ari, “Bifukhu ibyo nga byeetsile khwoola, khu mbuka inyene, babaandu ba Isiraeli bakhebuuse atweela ni babaandu ba Yuda, barure ibulafu batsye nga baantsuwa kimibala. Bakhaatsye nga baambeentsa ise Umukasya Wele waabwe.

⁵Bakhaareebe kumukhoosi kukuutsya mu Sayuuni, baryo bawaambe kumukhoosi kweene ikwo bakukyeendelekho. Bakheetse nga baloma bari, ‘Yiitsa khutsye khwitubaase n'Umukasya, mu Ndakaano ikhaawawo ta, isi bakhanyala bebilila ta.’ ”

⁶“Babaandu baase bali busa nga kamakheese keesi babaayi bakoseele mu maayilo ke mu bikoongo. Bakyeendaana busa nga kamakheese kakaakyeenda khukhwaama lukiingi lutweela khuutsya khu luundi, baryo baaba nga bebiliile litaala lyaabwe.

⁷Isho shaakila baayilibwa na buli muundu yeesi ubanyoola. Baasiku baabwe baaloma bari, ‘Ifwe sikhulikho ni kumusaango kwoosi ta, babeene nibo baboonakisa isi Umukasya, uuli bubwaayilo bwaabwe bubweene, niye isi baakuuka baabwe beyikinatsaka khaale.’ ”

⁸“Baandu ba Isiraeli, titukha murure mu shibala sha Babulooni, Ni munyoowe murureyo khaangu, mufwaane nga tsimbusi ni tsiraangila mu byaayo.

⁹Indi khuutsya khwinyusa kamanaambo khukhwaamila lubeka lwe ngaaki, keetse kebwakale shibala sha Babulooni kashiwaambe. Bakheetse beemikhake mu bifwo byaabwe nga bali mu lwantsaango, lwanyuma bashisoolanise bashiwaambe. Bufumo bwe buyiingo bwaabwe bweesi balasa, bufwaana busa nga basoolani baamanyilifu naabi, babaarura baatsya ne baalekha khukobola nga bali busa mu makhono kaabwe ta.

¹⁰Musaambo iyo, Babulooni bakhaashiwaambe, bashisakulake ni bibiindu byasho bibiilimo byoosi bakhaabisutake babiyile, ilekhe khuramawo shishiindu na shitweela ta.” Bino byoosi Umukasya umweene niye ubikanikha aryo.

¹¹Umukasya aloma luundi ari, “Inywe babaandu ba Babulooni, inywe mwaba ni kumwikhoyo kumukali naabi nga ni mwatsya mwanuula babaandu be linaambo lyase. Mwekhoya luundi mwaba basangaafu naabi, nga mwiyuuya nga iyeeyi iwuula iŋaano, namwe iŋwaaŋwa iyisutaka,

¹²ne shiriimba Babulooni shishafwaana nga maayi weenywe shikhaaswaale naabi. Shiriimba isho maayi weenywe uwabasaala shikhawaambisibwe tsisoni. Nisho shikhaabe shishakamayo aasi mu manaambo koosi, shibe kumubiimbi, shibala shishoomu busa, luundi shishikhalimo kameetsi ta.

¹³Lwe lirima liikali ly'Omukasya, mbaawo umuundu na mutweela uulimenya mu shibala isho ta, ne shikhaarame awo nga shatsangalalile busa. Buli muundu yeesi ukhaabirewo akheesindukhe busa, awuke mawuka busa lweebyo byoosi bibikholikhile.”

¹⁴“Inywe baselikhale mweesi yinyukha aasi, mwiimikhe mu bifwo byeenywe mwibotokhelele Babulooni. Mulase buyiingo bweenywe khu Babulooni akhali khuromboosa khwoosi ta, lwekhuuba shaminyaalila Umukasya.

¹⁵Nimwinyuse luwuungu lwe buusoolo khu buli lubeka lwoosi! Nga Babulooni ewaanayo isi babebwakali, kiminaala kye shiriimba kikwa aasi, ni kamatikiiyi kaasho koosi kaweela aasi. Khuno nikhwo khukhwiliyaasa khw'Omukasya, muryo ni mutsye mwiliyaasile ilala, mubakholekho nabo byeesi baakhola khu babaandu babaandi.

¹⁶Ikhabawo umumiitsi yeesi uramakho mu Babulooni ta, namwe ikhabawo umuundu na mutweela uwaamba injeso wakyesa khuubonekhelayo ta. Lwekhuuba khulwe lurima lw'omusiku, buli muundu alikobola iwaabwe mu baandu beewe, na buli mutweela alititukha eleyo mu shibala she waabwe.”

¹⁷Umukasya aloma ari, “Babaandu ba Isiraeli bali busa kamakheese kakaatimisibwa luundi kaasalanisibwa ni tsitalanyi. Italanyi iyanyoowa khukhwibwakala yaba umuyiinga wa Asiriya, ni kiindi iyeelakho yaba Nebukaduneza umuyiinga wa Babulooni, uwafuniaakaka kamakuumba kaabwe.”

¹⁸Ni nashiryo sheesi Umukasya Umunyali wa byoosi, Wele wa Isiraeli aloma nisho shino ari, “Nilwe lomo yino, intsya khuwa umuyiinga wa Babulooni shitaambiso, niye atweela ni shibala sheewe sheene, musaambo niyo ndweela isi nawamo umuyiinga wa Asiriya shitaambiso.

¹⁹Ne intsya khukobosa babaandu ba Isiraeli imbeseyo mu shibala shaabwe. Bakhaatsye balye biilyo bibitsowa khu lukiingi Karumeeli ni mu bisiintsa bya Bashani. Bakhaalye luundi bekure nga banyoolile biilyo bibitsowa khu ngoongo tsa Efurayimu ni mu Gileyadi.

²⁰Imbuka iyo nga yeetsile khwoola, mbaawo shishoonako shoosi shishilinyoolikhana mu shibala sha Isiraeli, namwe bubwoonaki bwoosi mu shibala sha Yuda ta. Lwekhuuba ise samweene indiyakhila bibyoonako bye babaandu baase beesi naramisawo.” Ise Umukasya samweene niye ukuukuulile biilomo bino.

²¹Umukasya waaloma ari, “Tsya mwibwakale babaandu be Meratayimu, ni naabo babaamenya mu Pekodi. Tsya mubatimise, mubakhoonye luundi mubahesele ilala boosi. Ni mutsye mukhole buli shiindu shoosi nga nimbalakiile khuukhola. Ise Umukasya samweene niye uuli khuubikuukuula indyo.

²²Luwuungu lwe buusoolo lulikho luwulilikhana mu shibala, ni khukhwoonakisa khuliwo khuukali naabi!

²³Babulooni shafwaana nga inyoondo iyatsya yaakhupa yaraakaka buli linaambo khu shibala! Ne ari kamanaambo koosi kalikho kesindukha lweesho shishikholikhile khu Babulooni!

²⁴Iwe Babulooni, ise samweene naakhurekela iwe kumureko, kwaamala kwakhuwaambisa nga ushiili khushimanyakho ta. Iwe wanyoolekhana nga waawaambikhiile mu bweene imwo, lwekhuuba iwe wakhaandisa Umukasya.

²⁵Ari bona Umukasya wekuulewo libiikhilo lyeewe lye bye busoolo, aryo waarusile ibulafu bye busoolo bye lirima lyeewe. Lwekhuuba Umukasya Uwe kamahe, Umunyali wa Byoosi, ali kumulimo kumukali busa kweesi atsya khukhola mu shibala she ba Babulooni.

²⁶Ari baasiku mweesi ni mwiitse khukhwaama buli lubeka, mwibwakale Babulooni, mufuniaakake birara byasho mweesi babuunga biilyo, ni mubabuunge nibo atweela mu shifwo shitweela mufwaane nga babaabuunga bilyo biibulungule. Lwanyuma muhesele ilala Babulooni, ilekhe khuramawo umuundu na mutweela umulamu ta.

²⁷Tsya mwiirake baselikhale baamwo boosi. Lekha bafwaane busa nga tsiwuunwa tseesi batsya khukhoonya! Nga kumutaambo kwaabanyoolile babaandu ba Babulooni! Lwekhuuba imbuka yaabwe yoolile, niyo imbuka yaabwe iye khufuna shitaambiso!

²⁸Ari rekeeresa! Baamuli khukhwaama mu Babulooni beetsa i Yerusalemu, nga baboola isaambo isi Umukasya Wele weefwe, eetsa khukhwiiliyaasa lweesho sheesi ba Babulooni baakhola khu Lisaayilo lyeewe Likhosefu.

²⁹Laanga babaalasa bufumo bwe buyiingo, ni naabo boosi babaamanya khukhweesa buyiingo. Lekha beetse bebuuse nga bebotokheleele Babulooni, ilekhe khubawo umuundu yeesi unyala khuutitukha ta. Sasula Babulooni khusiintsiila khu bikholwa byasho, babirise musaambo isi nibo baabirisamwo bashaabwe. Lwekhuuba nibo bafootsola Umukasya Wele Umukhosefu wa Isiraeli.

³⁰Baryo basaani baasho basoleeli boosi bakheeribwe bakwe mu nguudo tse mu shiriimba, ni baselikhale baasho boosi balibuna busa tsu khu shifukhu sheene isho.” Umukasya umweene niye ukuukuula bilomo bino.

³¹Umukasya Wele uwe kamahe, umunyali wa byoosi aloma ari, “Iwe Babulooni, waayitsula khukhwiyiinga khuukali naabi. Ne ari bona shifukhu shoowo shoolile, imbuka iye khuutaambisibwa khwoowo niyo yino.

³²Babulooni shibala she shiikili shitsya khwituya shikwe aasi, ilekhe khubawo umuundu yeesi ushiyeeta khuushinyusa ta. Intsya khuwaambisa kumulilo mu biriimba byasho, kuryo kwooshe buli shiindu shoosi shishibotokheleelewo.”

³³Umukasya Wele Umunyali wa Byoosi aloma ari, “Babaandu ba Isiraeli baamiinilisibwa naabi, atweela ni babaandu ba Yuda beene. Abo babaabayila nga baabowe babaliinda luukali naabi, sibafukiilisa khuubalekhuula ta.

³⁴Ne ka ŋali kali ndi uyo utsya khubaasikula ali uwe kamaani naabi, Umukasya Umunyali wa byoosi nilyo lisiina lyeewe. Umweene niye ulimikha ni kamaani keewe khukhiinga, aryo areere lukoosi khu shibala. Ne isi abo babaamenya mu Babulooni akhaabareere buwaangafu bwonyene.”

³⁵Umukasya alaangilila ari, “Buusoolo bweetsile isi babaandu be mu Babulooni, bweetsile isi abo boosi babaamenya mubweene imwo, ni isi babaandu baasho be kamakhula luundi be angaaki.

³⁶Buusoolo butsya khukwiila baŋoosi baabwe be bubeeyi! Baryo bakhekyele baasilu babeene! Buusoolo bukhaakwe khu basoolani baabwe, baryo bakhaatsangalaale busa!

³⁷Buusoolo bukhaakwe khu ŋwaaŋwa tsaabwe, ni khu makaari kaabwe ke liiye, ni khu baselikhale baabwe bakyeni boosi babaali ni nabo. Bakhekyele busa nga bakhasi. Naluundi buusoolo bukhaakwiile bye buyiindifu bwaabwe! Bwoosi bukhaanuulibwe buwewo.

³⁸Shimiyu shikheetse khu ntsitsi tsaabwe tse kameetsi! Tsoosi tsikhoomelele! Lwekhuuba shibala sha Babulooni shaayitsula bifwaani, ni kimyoyo kyaabwe kyoosi kyaayimalila khu nibyo byonyene.”

³⁹“Ni lwelomo iyo, tsisolo tse mwirome tsikhaamenye atweela ni namuunyu mu Babulooni, ni kiminywiinywi tsikhiikhi nakyo kikhaamenye mubweenemwo. Shiilibayo luundi babaandu babaalibamo namwe bari ibeyo babaalimenyamwo luundi kimiboolo ni kimiboolo ta.

⁴⁰Musaambo nyene isi Wele aakwiisilamo Sodomu ni Gomora, atweela ni biriimba byoosi bibyaba byayesanawo, nisho shisheene shishikhaakholebwe khu Babulooni. Sikhaabeyo umuundu na mutweela ukhaamenyekho mu shiriimba isho namwe bari abiremo ta.” Ise Umukasya samweene niye ukuukuula biilomo bino.

⁴¹Bonakho! Iliwo liiye liliili khukhwiitsa khukhwaamila khu lubeka lwe ngaaki! Lili linaambo lye kamaani atweela ni bayiinga baakali babeene, balikho besokosa lwe buusoolo khukhwaama mu bibala bye mu shibala bibiili aleeyi.

⁴²Nibo bawaambile buyiingo ni kamafumo mu makhono kaabwe, bali baarafu naabi luundi sibali ni shiisa ta. Balikho bawuuma busa nga inyaantsa, nga batimila khu ŋwaaŋwa tsaabwe, besabikhile nga baberekekheele busoolo khuubebwakala inywe babaandu babaamenya mu Babulooni.

⁴³Umuyiinga wa Babulooni waawuliile bibiwaamba khu khukhwiitsa khwaabwe, karyo kamakhono keewe kalebaleba busa, kumutaambo kwamuwaambile naabi, butsiina buukali nga bw'omukhasi uutsya khusaala.

⁴⁴Nga n'ubona italanyi niyaama mu bitsakha bya Yorudaani khukhwibwakala litaala lye kamasheese, nase ndyo intsya khubatimisa babaandu ba Babulooni belukhe khukhwaama mu shiriimba shaabwe. Indyo intsya khuroborayo umuyiinga uutsya khuba umuwuli we shiibala isho. Ari naanu umweene ulifwaananisibwa ni nase, namwe naanu uulikhaandisana ni nase? Namwe mwaayi shiina unyala waakhingilisa ise?

⁴⁵Ni lwe lomo iyo, wuliilisa tsiŋoonaŋoona tseesi Umukasya akholile khu Babulooni, ni biitsilililwa byeewe byeesi akholile khu shibala sha Babulooni. Mu ŋali, bumeeme bwe bibyaayo bukhaakhuruuribwe buyilibwe aleeyi. Mu ŋali, niye akhaahesele ilala kamaayilo kaabwe, nabo belaliile busa khulweebyo.

⁴⁶Shiibala shoosi shilinikina naabi nga shaawuliile khu khukwa khwa Babulooni, ni luwuungu lwe khuulila lukhaawulilikhe mu bibala byoosi.