Read lumasaaba Yeremiya 51 Bible Online

Yeremiya 51 - lumasaaba bible

Yeremiya 51

¹Umukasya aloma ari, “Bonakho! Intsya khwinyusa kumwoyo kw'omwiiri, enyukhile Babulooni atweela ni babaandu boosi babaashimenyamwo.

²Ikhaarumane babaandu babeetswa batsye mu Babulooni, baseese shiibala isho shoosi, bashoonakisile ilala, bashilekhe nga shaaramile awo busa. Shifukhu she khuuhela isho nga sheetsile khwoola, bakheetse bashibwakale khukhwaamila khu buli lubeka.

³Baselikhale babeetswa bano bakhawakho baselikhale ba Babulooni imbuka iye khuulasa buyiingo bwaabwe ta, namwe baabawakho imbuka iye khuukwaara bikwaaro byaabwe bye busoolo ta. Bakhalekhakho basoolani baabwe bahele nga baalamu ta. Bali ni khuubahesela ilala boosi bawewo.

⁴Boosi bakhaakwe bahelele mu Babulooni, batsiinisibwe buubi naabi mu nguudo tse mu biriimba byaabwe.

⁵Lwekhuuba babaandu ba Isiraeli atweela ni babaandu ba Yuda, baakhwaantsukhibwa n'Umukasya Wele waabwe, Umunyali wa byoosi ta. Ne shonyene ndi shiibala sha Babulooni shaayitsulamo bunyaalu isi Umukhosefu wa Isiraeli.

⁶Yinyukha mutitukhe khuurura mu Babulooni! Yilukha muwonese buulamu bweenywe! Mukharamamwo mwahela lwe bubwoonaki bwa Babulooni ta. Ari imbuka yoolile isi Umukasya atsya khwiiliyaasila Babulooni ashiwe shitaambiso lwebyo byoosi byeesi shakhola.

⁷Shibala sha Babulooni shaba nga shikopo she Zaabu mu mukhono kw'Omukasya, shishakila shibala shoosi shaanywa shaameela. Kamanaambo kaanywa iviini yamwo, shaakareerera khuulalukha kimirwe.

⁸Ne bona mu khaangu naabi, Babulooni shaakwiile, luundi shaheleele ilala, ari nimwantsuwe khu lwasho! Mufune kamasuuswa khulwe butsiina bwasho, manya lukanile shinyala shaawona khukhwaama mu butsiina bwasho.”

⁹Baamuli abe babaamenya ibweene iyo baaloma bari, “Ifwe khwakhakakho naabi khuuyeeta khuukaanga Babulooni, ne shalekha khunyalikhana ta. Ari khakhushilekhe nga ni shili khwiileyo ingo mu shibala she weefwe, lwekhuuba kumusaango kwasho kwaaniinile kwoolile mwikulu, luundi kwaaniinile kwaabiririsile naabi.”

¹⁰Babaandu ba Isiraeli baaloma bari, “Yiitsa khuuboolele buli mutweela umenya mu Sayuuni khuri ‘Umukasya wookesanisile bwaŋali bweewe khukhwookesa ari ifwe sikhuli ni kumusaango ta, khuubaboolele sheesi Wele akholile.’ ”

¹¹“Ari akala buufumo bwe buyiingo, muhanuleyo tsingabo! Umukasya waafukurusile kimyoyo kye bayiinga ba Mediya lwekhuuba shiitsilililwa sheewe shili she khuuhesa Babulooni.” Umukasya akana khukhwiiliyaasa, nga eliyaasa khulwe Lisaayilo lyeewe Likhulu.

¹²Suta ibendela angaaki iyokesanisa khukhwibwakalibwa khwe kamatikiiyi ka Babulooni. Mwisemo baaliindi kamaani! Rawo baselikhale khukhwiibuula! Reekekha buulayi abo babaanyala khukhwibuulila! Umukasya umweene atsya khukhwoolelesa shiitsilililwa sheewe, nga nisho shiilakilo sheesi aawa shishiwaamba khu baandu ba Babulooni.

¹³Inywe babaandu ba Babulooni, mukona aambi ni tsintsitsi tse kameetsi kamakali, naluundi muli ni bye buyiindifu biikali, ne shonyene ndi imbuka yeenywe iye khuufwa yoolile, khawuutsi khe buulamu bweenywe khaakhalikhile.

¹⁴Umukasya uwe kamahe umunyali wa byoosi, weetsubile ari atsya khuureera basaani baakali babeene bafwaane nga tsiisike beetse khukhwibwakala Babulooni. Baryo bakheenyuse kumweenya kwe khukhwiikhoya nga baawulile busoolo.

¹⁵Umukasya Wele umweene niye uwabuumba shibala nga araambisa kamaani keewe; mu makhula keewe waarawo shiibala, ni mu khumanya khweewe khuukali waabalaayisa liikulu.

¹⁶Niye nga wenyusile liikono lyeewe, kameetsi kakaali mwikulu kawolela, naluundi niye ukila namufweeli waaniina khukhwaama khu buli lubeka lwe shibala. Niye usiindikha lumweemwe lweetsila atweela ni fula, aryo niye umweene uwikulilawo ikhuungu khukhwaama mu libiikhilo lyeewe.

¹⁷“Buli muundu yeesi ali umusilu busa naluundi s'alimo kamakyesi ta, buli umubasi we bibyuuma yeesi ukholamwo bifwaani aswaala lwe bifwaani byeewe byeene. Bifwaani ibyo bili bye bubeeyi busa; nibyo shibilimo ni kumuukha kwe buulamu nakhari ta.

¹⁸Bifwaani ibyo shibilimo kumukaso ta, nibyo bili bibiindu bye khuutsekhelelwa busa. Nga imbuka yeetsile khwoola iye khuukhala kumusaango, nibyo bikhaahele.

¹⁹Wele uwa Yakobo s'ali nga nibyo taawe, lwekhuuba niye ali umubuumbi uwe bibiindu byoosi, naluundi waarobora Isiraeli khuuba babaandu be buusikha bweewe bubweene. Niye lisiina lyeewe bari Umukasya Wele Umunyali wa byoosi.”

²⁰Umukasya aloma ari, “Iwe Babulooni uli inyoondo yase naluundi shishuuma shase she busoolo. Intsya khukhuuraambisa iwe khukhwaarakaka kamanaambo, naluundi ikhuraambise iwe khuuhesa buyiinga.

²¹Naluundi intsya khukhuuraambisa iwe khuuhesa tsiŋwaaŋwa ni naabo babaatsikyeendelakho, khuufuniaakaka kamakaali ke liiye ni naabo babaakatimisa.

²²Intsya khuukhuraambisa iwe khuuhesa buli musaani n'umukhasi mweene, khuuhesa umusakhulu n'umusooleli mweene, ni khuuhesa basooleli ni bakhaana beene.

²³Khuukhuraambisa iwe khuuhesa babaayi be kamasheese ni kamasheese keene, khukhwiira umulimi ni tsiyeeyi tseene, khuukhuraambisa iwe khuhesa bawuli ni baakhulu babaandi boosi.”

²⁴Umukasya aloma ari, “Ise ikhaasasule Babulooni atweela ni babaandu babaashilimwo nga inywe mwaloleleele muri ni tsimoni tseenywe. Ikhaakhole indyo khulwe buubi bweesi baakhola khu Yerusalemu.

²⁵Iwe Babulooni, uli nga lukiingi luluhesa shiibala shoosi, ne ise Umukasya samweene intsya khutsanuusa kumukhono kwase ikhukumile, lwanyuma ikhulekhuule uwanukhe upiringikhe khukhwaama khu lukiingi khu ngaaki, ukile ufwaane busa nga lukiingi lweesi bookhile ni kumulilo.

²⁶Mbaawo libaale na litweela liliilikhaasutibwe khukhwaama mwiiwe bari batsya khwoombekhela ta, namwe bari baraambisekho libaale na litweela khuuraambisa khukhwoombekha kumusiingi ta. Iwe ukhaarame awo busa nga s'ulimo kumukaso na khari ta, khuumala biilo ni biilo.” Ise Umukasya samweene niye ukuukuulile biilomo bino.

²⁷“Yinyusa angaaki ibendela khu shibala! Fuura ikhoombi iwulilikhe oosi mu manaambo! Reekekha kamanaambo kasoolanise Babulooni. Kuukuula buyiinga bwa Ararati, Mini ni Ashikenazi bwiitse bwibwakale. Roborayo umuraangilisi mutweela eetse araangilile khukhwibwakala khuno. Rumana tsiŋwaaŋwa tsitsye nga n'ubona tsiisike tsingali.

²⁸Reekekha kamanaambo keetse kasoolanise Babulooni. Rumanisa isi bayiinga ba Mediya, beetsile atweela ni baaraangilisi baabwe atweela ni baakhulu babaandi, naluundi nga bali ni biibala byeesi nibo bawula.

²⁹Shiibala shinikina luundi shiterema mu butsiina buukali, lwekhuuba Umukasya waakhalilewo khuureera busoolo khu Babulooni, khuukhola Babulooni shiikyele kumubiimbi busa, ilekhe khubawo umuundu na mutweela ushimenyamo ta.

³⁰Be liiye lya Babulooni baakamisile khuusoolana, baasilile busa mu kaambi tsaabwe. Kamaani kaabaweelemo, beekyelile busa nga bakhasi. Bumenyo bwa Babulooni bwawaambisibwilekho kumulilo, ni tsintseko tse bilibwa byaabwe tsaafunikhile.

³¹Umutimi mutweela atima waatsya waakanana n'ukuundi, n'umurume mutweela atsya waakanana n'umurume washeewe, nga baatsya khuuboolela umuyiinga wa Babulooni bari shiriimba sheewe shoosi shawaambibwile khu buli lubeka.

³²Nga umusiku wawaambile biifwo byoosi isi baambukhila kameetsi, ni kamatikiiyi koosi baakawaambisilekho kumulilo, ni baselikhale boosi buuri bwaabawaambile.”

³³Umukasya uwe kamahe, Umunyali wa byoosi, Wele wa Isiraeli aloma ari, “Babaandu ba Babulooni bakhafwaane busa nga luusha khweesi bawuulila buulo nga balikho babukhupaka, imbuka iye khuukyesebwa khweewe ili aambi.”

³⁴Babaandu be mu Yerusalemu bakhaalome bari, “Nebukaduneeza umuyiinga wa Babulooni eetsa waakhulya ifwe waakhumalawo, niye aakhureerera ifwe khuyungukhana, aakhukhola ifwe khwafwaana nga inyuungu ikhalimwo shiindu ta. Nga n'ubona kuuremu kuuboofu, niye waakhumilile ifwe, aryo waakhwiitsusile ifwe muunda yeewe atweela ni bye buyiindifu byeefwe. Ne lwanyuma nga waarobolemo byeesi akana khuuyila, waakhufuutsa ifwe ibulafu.”

³⁵Lekha babaandu be mu Sayuuni balome bari, “Khali buwaangafu bubwakhukwa khwiifwe butsiile bukwa khu ba Babulooni nabo.” Lekha babaandu be mu Yerusalemu nabo balome bari, “Khali kamafuki keefwe kakaatsukha kabeele khu mirwe kye ba Babulooni.”

³⁶Ni nashiryo Umukasya Umunyali wa byoosi alomela babaandu be mu Yerusalemu ari, “Bona, ise samweene intsya khubakhupanila inywe, indyo niiliyaase khulweenywe. Intsya khwoomisa inyaantsa ya Babulooni, tsiryo tsintsitsi tsaabwe tse kameetsi tsiweelele.

³⁷Shiryo Babulooni shikheekyele induumi iye kamawuumbu, shiifwo mweesi tsishipwe tsisamila, shikheekyele shiifwo shishiriisaka luundi shishiyaangisa, mweesi umuundu yeesi akhanyala waamenyamwo ta.

³⁸Babaandu ba Babulooni bakhaabuutsile atweela busa bafwaane nga tsitalanyi, bakhaalabuluule busa nga tsinyana tse tsitalanyi.

³⁹Baryo nga kumuluungo kwabenyukhile, ise Umukasya samweene ikhaabaŋoonaŋooneleyo kamayiiya, ikhaabakhole banywe bameele, nio basangaale benyuse liyoombo lye khuutsekha, lwanyuma bawungukhile bakone liilo namaani lyeesi bakhanyala baasisimukha ta.” Bino Umukasya umweene niye ubilaangilila aryo.

⁴⁰“Indyo ingaabayile bafwaane busa nga kamasheese ni kamamiiku keesi batsya khukhoonya, ni tsimbusi tseesi batsya khusala. Ise Umukasya samweene niye ubilaangilila ndyo.”

⁴¹Umukasya akanikha biilomo bino khu Babulooni, “Shiriimba Babulooni sheesi kamanaambo koosi kaabuyilisatsaka, shaawaambibwile! Babulooni ari shekyelile busa she khukhwiyaangisa isi kamanaambo!

⁴²Inyaantsa imboofu yenyukhile yabiimbiliile Babulooni, yaashifunikhile ni khukhwilyebula khwe kameetsi ni biibuli byako.

⁴³Biriimba bya Babulooni byekyelile shishiriisaka; shekyelile shiibala shishoomu luundi kumubiimbi, shishiikhalimo umuundu ushimenyamo ta, namwe mweesi umuundu yeesi akhanyala wakyeendela ta.

⁴⁴Ikhaawe shitaambiso isi Beli, wele wa Babulooni, imuruse mu khanwa mweewe isho shoosi sheesi aaba nga waayifuunda. Kamanaambo shikalilayo luundi khuumuloondelela ta. Litikiiyi lya Babulooni lyakwiile!”

⁴⁵“Baandu baase ba Isiraeli, nimurure mu Babulooni, lekha buli mutweela atime ewonise umweene! Tima mwiwonese buulamu bweenywe isi buurafu bw'Omukasya buukali!

⁴⁶Mukhawamo kamaani namwe mweyembelela lwe kamakhuuwa keesi mukhaawulile mu shibala ta. Kakhaabe kamakhuuwa ke bituluungu biikali mu shibala mu buli mwiiko, nga buli muyiinga atsya webwakala umuyiinga washe.

⁴⁷Ninashiryo imbuka ikhoole isi intsya khuweela ba wele ba Babulooni shitaambiso. Shibala shoosi shikhaaswaale busa, ni babaandu baamwo boosi bakhaahele bakwe mubweene.

⁴⁸Nio lwanyuma likulu ni shibala byeembe ni kumwikhoyo kumukali lwe khuukwa khwa Babulooni. Baasiku babaalihesa Babulooni balyaamila lubeka lwe ngaaki, baliitsa bebwakale.” Bino byoosi Umukasya umweene niye ubikuukuula aryo.

⁴⁹“Babulooni shaakha khuukwa, khulwe ba Isiraeli babaahela, nga babaandu babaandi be mu shibala ni baahela khulwe ba Babulooni.

⁵⁰Inywe baandu baase mwawonele khuufwa, nashiryo nimururemo mutsye, mukheemikha awo busa muryo ta! Ne mwangaba nga muli mu shibala she aleeyi, mushebulilatsaka Umukasya, naluundi mushebulilatsake Yerusalemu.”

⁵¹Inywe muloma muri, “Bakhuwaambisa naabi tsisoni, naluundi khwaswaala naabi, baakhukhoomyaasa luukali lwekhuuba babaandu banaambo baayinjila mu bifwo bikhosefu bye mu Lisaayilo Likhulu ly'Omukasya.”

⁵²Umukasya ashilaangilila ari, “Imbuka itsya khwoola isi ikhaaweele bifwaani bya Babulooni shitaambiso, ni babaandu boosi babaakhaabe ni kamakoontsyo nga baabawunakile, bakharaatse mu shibala shoosi.

⁵³Ne abe yakhaba nga Babulooni shaaleeya shaayola mu ngaaki, naluundi shakhaba nga shaayoombekha kamatikiiyi kamasiro, ise intsya khurumana baasiku beetse bebwakale shiriimba isho bashoonakise.” Ibyo Umukasya umweene niye ubikuukuula aryo.

⁵⁴Umukasya aloma ari, “Wulila! Iliyo liyoombo lye khuulila liliili khukhwaamila mu Babulooni, liwulilikha nga kumuwuulo kwe khukhwoonakisa, khukhwaamila mu shibala sha Babulooni.

⁵⁵Ise Umukasya samweene intsya khwoonakisa Babulooni, intsya khushisilisa busa shibune tsu. Baasiku balikho beetsa ni shibuli shiikali nga n'ubona kameetsi nikelyebula ni kuubuli kuukali, ni liyoombo lye kamakono kaabwe likhaawulilikhe luundi.

⁵⁶Umusiku uwiitsa khukhwoonakisa weetsile khukhwoonakisa Babulooni, baselikhale baasho baaliindi bawaambibwile, ni buyiingo bwaabwe baabufuniaakile. Lwekhuuba ise ndi Umukasya Wele uwiliyaasa kamanaambo lwe bubwoonaki bwaabwe bweesi bakholile; indyo ikhaasasule Babulooni mu bwitsufu.

⁵⁷Ikhaakile baakhulu baasho ni babaandu baasho be kamakhula banywe bameele, ba gafana baasho, ni baakhulu be kamahe, atweela ni basoolani baabwe beene. Bano boosi bakhaakone liilo namaani balekhe khusisiimukha luundi ta.” Bino Umuyiinga, ulaangibwa Umukasya Umunyali wa Byoosi, niye ubilaangilila aryo.

⁵⁸Umukasya Wele Umunyali wa Byoosi aloma ari, “Kamatikiiyi ka Babulooni kamasiro ako kakhaakhupibwe koosi kaweele aasi, ni bilibwa byasho bileeyi ibyo, bikhookhebwe ni kumulilo. Babaandu boosi beluwisa busa ni buraambi bwaabwe, buraambi bwaabwe bukhaafwaane busa nga kamafura kakaaburusa kumulilo.”

⁵⁹Buno nibwo buurume bweesi Yeremiya, aawa Seraya, umusooleli wa Neriya, umwitsukhulu wa Mahiseya, uwaba mutweela khu baakhulu babaatsya i Babulooni atweela n'umuyiinga Zedekiya uwa Yuda, mu mwiiko kwe khaane kwe buwuli bweewe.

⁶⁰Yeremiya aarona mu shitabo bibiindu biibi byoosi bibyaba bitsya khukwa khu Babulooni, ni khuutubakho bibiindu bibiindi byoosi bibyaba byaronebwa bibiwaamba khu Babulooni.

⁶¹Yeremiya waalomela Seraya ari, “Nga woolile i Babulooni, waakha khuubona uri wilwaatsa biilomo bino byoosi nga babaandu babiwulila.

⁶²Lwanyuma uloombe uri, ‘Umukasya, iwe waloma uri kane woonakise shiifwo shino, nio ilekhe khuramawo shishiindu na shitweela shiilamu shishinyala shamenyamwo luundi ta, abe yakhaba babaandu namwe bisolo khuumenya muno ta. Byoosi bilyantsukha shiifwo shino, shirame busa biilo ni biilo.’

⁶³Uryo nga waamalile khukhwilwaatsa shitabo shino isi babaandu, ushibowekho libaale, lwanyuma ushituume mu luutsi Efuraati.

⁶⁴Lwanyuma ulome uri, ‘Shino nisho shishikhaakholebwe khu Babulooni: Shilisiikha aasi, shilekhe khukyelakyela luundi ta, lwe bukosi bweesi indishireerakho. Ni babaandu baasho boosi bakhaahele bawewo.’ ” Bilomo bya Yeremiya byaakama abweene ano.