Read lumasaaba Yeremiya 52 Bible Online

Yeremiya 52 - lumasaaba bible

Yeremiya 52

¹Zedekiya aaba oolesa kimiiko kye buukhulu kamakhumi kabili na mutweela, khu mbuka isi ekyelela umuyiinga uwa Yuda, waaba umuwuli mu Yerusalemu khuumala kimiiko likhumi na mutweela. Maayi weewe abe bamulaanga bari Hamutali, umukhaana wa Yeremiya, uwamenyatsaka mu shiriimba she Libuna.

²Umuyiinga Zedekiya aakhola bye bubwoonaki buukali mu moni ts'Omukasya, musaambo nyene isi umuyiinga Yehoyakimu n'akholatsaka.

³Umukasya aaba ni lirima liikali naabi isi babaandu beewe, nisho shishakila bibiindu bino byoosi byakholekha khu baandu be mu Yerusalemu ni mu Yuda, khu ntsakamo shaakila waabawoona khukhwaama mu moni tseewe. Aryo Zedekiya aaminyaalila Nebukaduneeza, umuyiinga wa Babulooni.

⁴Uri mwiiko kwe sisyeenda, kwe buwuli bwa Zedekiya, khu shifukhu she likhumi, she mu mweesi kwe likhumi, Nebukaduneeza umuyiinga wa Babulooni waakhuumba ni be liiye lyeewe boosi, weetsa khukhwibwakala Yerusalemu. Baryo beetsa bebuulila ibulafu we shiriimba, boombekha buurwi, khukhwibotokhelela shiriimba shoosi.

⁵Shiryo shiriimba shoosi shaaba nga baashibotokheleele, khukhwoolesa khu mwiiko kwe likhumi na mutweela kwe buyiinga bwa Zedekiya.

⁶Uri khu shifukhu she shisheenda, mu mweesi kwe khaane, mu mwiiko kweene ikwo, yakwawo intsala indafu naabi mu shiriimba, nga mbaawo biilyo byeesi babaandu banyala khuulya ta.

⁷Lwanyuma baakubulaka litikiiyi lye shiriimba, ni baselikhale babaliinda boosi baatitukha. Baryo barura mu shiriimba shiilo isho, nga baraambisa kumukhoosi kwe shilibwa, shishaba akari e kamatikiiyi kaabili kakaaba aambi ni nimilo y'omuyiinga, abe yakhaba nga ba Babulooni baaba bebuuliile khu mbeka tsoosi. Baryo baselikhale bano baarura baatitukha nga bawaamba kumukhoosi kwe Araba.

⁸Ne liiye lye Babulooni baatimisa umuyiinga Zedekiya, baamuwaambila aambi ni kumusaalela kwe Yeriko. Baselikhale beewe boosi bamwaawukhakho bamwantsukha baasalanila busa.

⁹Musaambo iyo, bawaamba Zedekiya, baamureera isi umuyiinga Nebukaduneeza, uwaba nga ali mu shiriimba she Ribula, mu shibala sha Hamasi. Ibweene iyo niyo isi Nebukaduneeza aamukhalila kumusaango.

¹⁰Nga bali i Ribula iyo, umuyiinga wa Babulooni weeraka basooleli ba Zedekiya, nga Zedekiya umweene waaloleleele ni tsimoni tseewe, ni khu bweenekhwo waatubaasakho ni baakhulu be mu Yuda babaandi boosi.

¹¹Lwanyuma lweebyo, waasokoolamo tsimoni tsa Zedekiya, bamubowa kiminyololo, baamuyila i Babulooni. Ibweene iyo, baamubowa mu mapuusu, khukhwoolesa khu shifukhu khweesi aafwiilakho.

¹²Khu shifukhu she likhumi, she mu mweesi kwe kharaano, mu mwiiko kwe likhumi na sheenda, kwe buwuli bwa Nebukaduneeza, nga umuyiinga wa Babulooni, Nebuzaradani uwaba umukhulu uwe liiye lilyaliindatsaka umuyiinga wa Babulooni, weetsa i Yerusalemu.

¹³Aryo wahaambisa kumulilo khu Lisaayilo Likhulu, ni lubili lw'omuyiinga, atweela ni tsiintsu tsoosi tsitsaba mu Yerusalemu. Buli shoombekhe shoosi she kamaani mu Yerusalemu baashoosha kumulilo.

¹⁴Liiye lye ba Babulooni lilyaba aasi w'omuselikhale umukhulu uwe baaliindi b'omuyiinga, baafuniaakaka kamatikiiyi koosi kakaaba kaayibotokhelela shiriimba Yerusalemu.

¹⁵Aryo Nebuzaradani, umukhulu we liiye lino, waasuta waayila batweela khu baandu babaaba bataambi, ni babaandi boosi babaarama mu shiriimba Yerusalemu, waabayila nga baabowe, atweela ni bafuundi, ni babaandu babaandi abe babaamala khaale khukhwiwaanayo isi umuyiinga wa Babulooni.

¹⁶Ne babaandu beesi Nebuzaradani aalekhayo mu Yerusalemu nibo babaaba babafuurayo butaambi mu shibala, khuurama nga nibo babaaraamba mu mikuunda kye kimizabibu ni tsinimilo tsitsiindi.

¹⁷Ba Babulooni baafuniaaka kimisiindi kya buroonzi, ni bikaari abe bibyaba mu Lisaayilo likhulu, atweela ni shitowo sha buroonzi she kameetsi, lwanyuma baasutaka bibiindu bya buroonzi byoosi baabiyila i Babulooni.

¹⁸Baabukulaka ni tsinyuungu, ni bitiiyo, ni byeesi baraambisa khuusimisa tsitaala, bipwakhuli byeesi baatilisilamo kamasalasile, bipwakhuli bibiindi atweela ni bibiindu bibyakholebwa khukhwaama mu buroonzi byoosi, abe bibiraambisibwa mu khwisaaya mu Lisaayilo Likhulu.

¹⁹Umukhulu we liiye lye baaliindi b'omuyiinga lino, waalakila baasutaka ni tsibeseni, tsiwuuma abe tsitsisuta kamaanda ke kumulilo, bipwaakhuli abe byeesi baatilisilamo kamalasile, tsinyuungu, bisiindi bye tsitaala, bipwaakhuli bibiindi ni bitaakwe abe bibiraambisibwa mu khuwuuta biwaanwa bye khuunywa. Bino byoosi abe bibyakholekha khukhwaama mu feetsa ni zaabu, baabisuta baabiyila.

²⁰Bibiindu bya buroonzi byoosi byeesi umuyiinga Solomoni aakhola khuuraambisibwa mu Lisaayilo Likhulu, nga mulimo kimisiindi kya buroonzi kibili, bikaari, Inyaantsa iye kameetsi, atweela ni tsiwuunwa tsa buroonzi likhumi na tsibili tsitsaba aasi aabyo. Bino byoosi byaba biikali naabi nga sibinyalikha ni khuupimibwa ta.

²¹Abe buli kusiindi kwoolesa tsimita shinaane (8) buuleeyi bwe khuuniina mu ngaaki, ni tsimita tsiraano ni busiintsa butaru (5.3) buubalaayi bwe khukhwibotokhelela, nga kyoosi kyalekhaana busa. Kimisiindi kino kyaba kyayasamilila busa mukari, ne nga liisisiri lyakyo abe lyoolesa tsimilimita kamakhumi musaafu na tsiraano (75).

²²Buli ntseko yabakho shikofwiila sha buroonzi, nga buli shitweela shoolesa tsimita tsibili ni busiintsa butaru (2.3) buuleeyi. Bikofiila bino byaba byaaronebwakho ni bifwaani bye kamatuunda pomeguraneti, nga bili bya buroonzi byoosi. Ni kusiindi kukuundi kukuramile nakwo nga kulikho bifwaani bya pomeguranetisi, nakwo abe kufwaana ni kikiindi.

²³Yabawo ni bifwaani bye kamatuunda pomeguraneti kamakhumi syeenda na kasesaba (96), ne buukali bwako koosi kakaaba nga kabonekha khu misiindi tsimbeka tsoosi, kaaba koola shitoondo shitweela.

²⁴Ni khuulooselakho khu biindu ibyo, Nebuzaradaani, umukhulu we liiye lye baaliindi uyo, waayila umusaayi umukhulu Seraya, n'umusaayi abe umwilililakho mu bukhulu Zefaniya, atweela ni baaliindi be khu milyaango bataru: waabayila boosi nga baabowe.

²⁵Ne khu baakhulu babaaba nga bashiili mu shiriimba, aayila umukhulu uraangilila baselikhale, ni baakhulu musaafu abe babaalolelela bye khuuwa umuyiinga kamakyesi. Khu bano waayiililamo n'umuroni abe uw'omukhulu we liiye, uwabatsaka nga arona babaandu abe babaali mu shibala boosi, ni babaandu babaandi kamakhumi kasesaba (60), babaanyoolekhana ni naye mu shiriimba.

²⁶Nebuzaradani, umukhulu we liiye lye baaliindi b'omuyiinga, aayila babaandu bano boosi, waabareera isi Nebukaduneeza, umuyiinga wa Babulooni, uwaba nga ali i Ribula.

²⁷Aryo nga ashiili i Ribula, mu shibala sha Hamasi, umuyiinga Nebukaduneeza waalakila baabakhupaka boosi baabakhoonya. Musaambo iyo, babaandu ba Yuda baayilibwa mu shibala she aleeyi mu bubowe.

²⁸Luno nilwo luruungo lwe babaandu beesi Nebukaduneeza aayila nga baabowe. Mu mwiiko kweewe kwe kumusaafu nga ali umuyiinga, aayila Bayudaaya biikana bitaru ni kamakhumi kabili na bataru (3,023);

²⁹Mu mwiiko kwe likhumi na shinaane, Nebukaduneeza, aayila babaandu bitoondo shinaane ni kamakhumi kataru na babili (832) khukhwaama mu Yerusalemu

³⁰Mu mwiiko kweewe kwe kamakhumi kabili na kitaru, Nebuzaradani, uwaba umukhulu we liiye lye baaliindi, aayila babaandu bitoondo musaafu ni kamakhumi kane na baraano (745). Babaandu boosi babaayilibwa mu bubowe baaba nga boola bikana bine ni bitoondo bisesaba (4,600).

³¹Mu mwiiko kwe kamakhumi kataru na musaafu (37) kwe bubowe bwa Yehoyakini, umuyiinga wa Yuda, mu mwiiko kweene ukwo mweesi Evili-Merodaki, ekyelela umuyiinga wa Babulooni, waalekhuula Yehoyakini, umuyiinga wa Yuda. Aryo waamurusa mu mapuusu, khu shifukhu she kamakhumi kabili na biraano, mu mweesi kwe likhumi na kibili.

³²Evili-Merodaki yuno waabirisa Yehoyakini buulayi naabi, kila amuwa shiifwo she shiriifwa, khufuurisakho she bayiinga babaandi babaaba nga nabo baabowe atweela ni naye mu Babulooni.

³³Aryo umuyiinga waafukiilisa Yehoyakini khuurusamo bikwaaro bye buubowe. Ni khukhwaamila abweenewo, waaba nga aliilatsakila khu meetsa y'omuyiinga buli mbuka bifukhu byoosi.

³⁴Buli shifukhu shisheelakho, umuyiinga wa Babulooni, waawatsaka Yehoyakini tsinusu tse khuraambisatsaka khu biindu bibikaniwa mu buulamu bweewe, khu mbuka yoosi isi aabeela nga ali umulamu, khukhwoolesa khu shifukhu khweesi aafwiila.