Read lumasaaba Yeremiya 6 Bible Online

Yeremiya 6 - lumasaaba bible

Yeremiya 6

¹Inywe babaandu ba Benyamini, ni mutitukhe mutsye muwonese buulamu bweenywe! Ni mutitukhe murure mu Yerusalemu. Fuurira mu Tekowa ikhoombi! Lwanyuma mwombekhe shiifwo shishiili khaabonelo i Besi Hakeremu. Lwekhuuba mulikho mutsya khwibwakalibwa ni busiku khukhwaamila kwe ngaaki, butsya khuba bukosi bwe khuuhela khuukali.

²Shiriimba Sayuuni shili shimiliwu luukali, ne shitsya khuhela shiwewo.

³Babaayi batsya khwiitsa ni bibyaayo byaabwe bashibwakale, bakheetse boombekhe kamasari kaabwe khuushibotokhelela, nga buli mutweela eyilila shiifwo sheesi akana khukhwaayisilamwo.

⁴Bayiinga balilomela kamahe kaabwe bari, “Yirekekha khukhwibwakala Yerusalemu! Yinyukhilamwo khaangu, khutsya khushibwakala mwihangilwe.” Ne lwanyuma bakheelemo bari, “Ne khwakyelewile naabi, antsye bulikho bwilabula, bona shishilima shilikho shoola khaangu naabi.

⁵Byakhaba biryo, yinyukha, khakhutsye khushibwakale mu shilo, khutsye khwoonakisake tsimako tse kamatikiiyi tsaabwe.”

⁶Umukasya uwe kamahe, umunyali wa byoosi waalakila bayiinga abo ari, “Remaka kimisaala mukikwiise aasi, muryo mupaange bitsikhi bibe induumi iye khukhwibwakala Yerusalemu. Shiriimba shino shaakha khuweebwa shitaambiso; lwekhuuba mu nisho mwaayitsulamwo khumiinikhilisa khuukali naabi.

⁷Nga n'ubona isebele n'ibiikha kameetsi kaamwo nga kali kamalayi, Yerusalemu nasho shaabiikha buulayi bubwoonaki bwasho. Mbulila bari mu shiriimba isho mulimwo bituluungu ni khuuhela khuukali. Mbonamwo buulwaale ni kamakoontsyo kamakali.

⁸Ari inywe babaandu be mu Yerusalemu mweesi, indi khuubarewula busa, imbuka itsya khwoola, ngana khuubarurakho imbalekhe. Ise intsya khwikyelisa shibala sheenywe khuuba kumubiimbi busa, shibe shiibala shishikhalimwo babaandu ta.”

⁹Umukasya Umunyali wa byoosi aloma ari, “Khayo baasiku batsye bangalake babaandu babaaramawo mu Isiraeli nga babaandu ni batsya baabutaka kimisabibu khu kuusaala baakimalilakho ilala. Nga n'ubona umuundu ubuta kimisabibu n'elayo luundi khu kuusaala kusabibu khuumaliila kimisabibu kikyaramakho.”

¹⁰Nase nelamwo indi, “Ari naanu isi inyala naakanikhayo, naamuwa khuurewula khuno? Kamaru kaabwe ke khuuwulila koosi ari kaafuundila, sibanyala baareekeresa ta. Ari ilomo y'Omukasya yaabalokhela nibo, bakitsekhelela busa nga sibakibonamwo kumukaso ta.

¹¹Shikila ari ise netsuulemo lirima ly'Omukasya, sinyalisa luundi khukhwikumisa ni nalyo ta.” Kila Umukasya naye anomela ise ari, “Tsukhiilila lirima lyase khu baana babekhala mu nguudo, ni basooleli boosi babaabuusanilayo. Baseetsa ni bakhasi nabo bakhaayilibwilemo, atweela ni naabo boosi babaali baasakhalu ni baloosi beene.

¹²Ikhaakabe tsiintsu tsaabwe isi babaandu babaandi busa, ni khuuyililamo kimikuunda kyaabwe atweela ni baakyelama baabwe. Ise indi khuutsya khutsanuusa kumukhono kwase, khuuwa babaandu babaamenya mu shibala isho shitaambiso.” Bino Umukasya umweene niye ubikuukuula aryo.

¹³“Buli mutweela mu baandu bano boosi, khukhwaamila ilala khuwe aasi khukhwoola khuwe angaaki, boosi bakhakakho naabi khuufuna buyiindifu bwe kumuluungo; abe yakhaba ni baŋoosi atweela ni basaayi beene, nabo bakhola bye khuulyakhana babaandu.

¹⁴Nibo batsya bekholakholanisa busa isi babaandu baase babaamala khaale khukhupiwa baafuna kamakuma, nga babalomela bari, ‘byoosi biilayi, byoosi biilayi,’ ate nga mwilala mbaawo lukoosi lwoosi nakhari ta.

¹⁵Ne nibo manya baafunakho khuswaala khwoosi nga ni baakhola bibiindu bye mbikho nga bino? Ilala nibo sibaabonakho khuswaala khwoosi ta, naluundi sibanyalisa ni khukhwookesanisakho bari tsisoni tsaabawaambile ta. Ni nashiryo, nabo baryo bakhaafune shitaambiso nga babaandu babaandi ni baafuna shitaambiso. Boosi bakhelime aasi kimibwi, nga naabaweele bitaambiso. Bino ise Umukasya samweene niye ubikanikhile.”

¹⁶Umukasya waakanikha isi babaandu beewe ari, “Ni mwiimikhe mu masaŋantsila, munyukanyuke nga mulola eyi ni neeyi. Muryo mureebe kimikhoosi kimikhale isi kili, naluundi mwireebe isi kumukhoosi kumulayi kuli. Nga mwaakunyoolile, mukyeendele khubweene khwo, nio munyale khufunila buulamu bweenywe shiwolelo she lukoosi. Ne inywe mwaaloba nga muloma muri, ‘Singene khukyeendele khu mukhoosi ikwo ta.’

¹⁷Ise narobora luundi naarumana baŋoosi isi muli khukhwiitsa babafuurire ikhoombi iye khuubareewula, inywe mubawuliilise, ne inywe tsana mwaloma muri, ‘Ifwe singene khuwuliilise ibyo ta.’

¹⁸Shikila inywe kamanaambo mweesitsana, ni muwuliilise buulayi luundi mwiimenielesele ilala, inywe baaboni, nio mumanye isho shishiitsya khukholekha khu baandu baase.

¹⁹Iwe nawe shiibala rekeeresa! Ise samweene indi khuutsya khureera shitaambiso khu baandu bano, lwekhuuba nibo babeene, bakhola tsimbomelo, baryo baalekha khurekereesa biilomo byase ta, naluundi baaloba ni khuwuliilisa kamakaambila kaase ta.

²⁰Ari mukaso shiina kukuuli mu bubaane bweesi mundeerera ise khukhwaama i Sheba, namwe bari mundeerera bibiindu bibyatokota ni bibiwunya buulayi nga mubyaamisa mu bibala bye aleeyi naabi? Iseese singene ifukiilisekho biwaanwa byeenywe bibyookhe, namwe abe yakhaba tsisaayilo tseenywe nakhafwiiti khoosi ta.

²¹Ni nashiryo, ise ikhaareerewo babaandu bano kamakenya ke khukhwiituyakho bakwe aasi. Basaali atweela ni babaana beene, ni khuutubakho babesanwa ni basaale, boosi bakhaahele bawewo.”

²²Umukasya umweene aloma ari, “Lola mubone, iliwo liiye liliili khukhwiitsa nga lyaamila mu shibala shishiili khu lubeka lwe ngaaki; lili linaambo lye kamaani, lyenyukhile khukhwaama i aleeyi we shibala nga liiŋoonaŋoonela busoolo.

²³Baryo berekekhile buulayi nga baasutile buyiingo ni kamafumo; bali babaandu baarafu luundi sibali ni shiisa na khari ta. Luwuungu lweesi benyusa nga bali khuutimila khu ŋwaaŋwa tsaabwe, luli busa nga khuuyilila khwe kameetsi ke mu nyaantsa. Balikho beetsa beerekekheele ilala lwe buusoolo ni nawe, iwe Sayuuni shishibonekha buulayi!”

²⁴Lwanyuma babaandu nabo beelamwo bari, “Ifwe nga khwaawuliile kamakhuuwa kano kakaabawaambakho, kamakhono keefwe kaalebaleba busa, ingunyi yaakhwitsuulemwo naabi, ni butsiina buli buukali naabi, bufwaana nga bw'omukhasi uuli khuutsya khusaala.”

²⁵Umukasya waaloma luundi ari, “Inywe mukhatsya mwakyeenda mu mikuunda kyeenywe ta, namwe bari mukyeendele khu luguudo ta, lwekhuuba baasiku beenywe baabaliile tsiindima mu makhono kaabwe, nashiryo iliwo khuurya khuukali khu buli lubeka lwoosi.

²⁶Nashiryo inywe baandu baase, nimwibowe tsisawu tsa makoongwe, mutsye mwifuufulile mu likokhe. Mulile ni kumutaambo kumukali naabi, ifwaane nga umuundu ufwiisile umwaana weewe uuli mutweela yenyene. Lwekhuuba uyo uutsya khubahesa inywe ali khukhwiitsa mu khaangu naabi khuubebwakala.”

²⁷“Yeremiya, iseese nakhwikyelisile iwe khuuba nga shikyuuma shishikhaka bibyuuma bibiindi, ni babaandu baase nibo bali nga bibyuuma byeene, bakhake ubemenieelese nio umanye bafwaana barye.

²⁸Nibo bali banabumiinyi be shikili shiikali. Baayikhunisa babeene, bahandalala nga n'ubona bibyuuma buroonzi ni ayoni. Bali babaandu baboonakisa, luundi bakyeenda nga bakhupa bashaabwe kamayino konyene

²⁹Abe kumulilo kwakheseŋeŋa kwaabila luukali kurye, bibyuuma byeesi baramwo khukhwoosha, sibibila byaayengukhaka ta. Nashiryo mbaamwo kumukaso kwe khuukhakakho khuupyeluusa babaandu baase ta, lwekhuuba abo babaali baamoyaani sibarusiwamo bawamwo ta.

³⁰Nibo balaangibwa khuuba ifeetsa isi baaloba bamwaata, lwekhuuba Umukasya umweene waabaloba nibo.”