Read lumasaaba Yeremiya 7 Bible Online

Yeremiya 7 - lumasaaba bible

Yeremiya 7

¹Yino niyo ilomo iyaama isi Umukasya, yeetsila Yeremiya, nga iloma iri:

²“Yiimikha a shilibwa she Lisaayilo Likhulu ly'Omukasya, isi babaandu beewe babuusanila, abweene awo ulaangilile buurume buno ‘Ni muwuliilise buurume bw'Omukasya, inywe mweesi babaandu ba Yuda, babeetsa mu Lisaayilo lino khukhwisaaya Umukasya.’

³Umukasya Umunyali wa byoosi Wele uwa Isiraeli aloma ari: Ngana mushuusemo intsibirisa yeenywe ni buraambi bweenywe bwoosi. Ni nase kane imbafukiilise inywe khuumenya mu shifwo shino.

⁴Ni mwaakamise khukhwiyikina mu bilomo bino bye bubeeyi nga muloma muri ‘khuli buulayi lwekhuuba: Lino lili Lisaayilo Likhulu ly'Omukasya, Lisaayilo Likhulu ly'Omukasya, Lisaayilo Likhulu ly'Omukasya.’

⁵“Ngana mushuusekho tsisaambo tseenywe isaambo isi mwiibirisamwo, muŋoonemwo buraambi bweenywe, mube babaandu babaabirisa basheenywe buulayi.

⁶Mwaakamise khuumiinilisa abo babaali babeetswa musiinywe, baafuubi, atweela ni banamulekhwa. Mukhakhoonyakila mu shifwo shino babaandu, mwaatsukha kamafuki kakaakhalikho ni kumusaango ta. Mwaakamise khukhwisaaya ba wele babaandi, lwekhuuba nisho shishibareerera inywe khuutaambisibwa.

⁷Nga mwashuusilekho, nase kane imbafukiilise inywe khuumenya mu shifwo shino, shibala sheesi nawa bakuuka beenywe khaalekho, khuuba busikha bwaabwe bwe biilo ni biilo.

⁸“Ne ni mubone ari sheesi muli khuukhola, inywe mulikho mwiyikina biilomo bye bubeeyi busa, bibikhanyala byaabayeeta ta.

⁹Inywe mutsya mweeba, mweera, mwaakhola bye buyeyani, mwaakanikha bye bubeeyi nga mwitsuba, mwaakholela Bayaali tsisaayilo tsintsokhe, luundi mwaatsya mwesaaya ba wele abe beesi mukhaamanyatsakakho na khafwiiti khari ta.

¹⁰Nga mwaamalile khuukhola bibiindu bino byeesi ise ikhaakana ta, mwakyelawo mweetsa mweemikha mu moni tsase, mu Lisaayilo lyase Likhulu, lililaangibwa lisiina lyase lilyeene, mwaaloma muri, ‘Ari khuli buulayi,’ Muryo nio mwiloosele khuukhola bibiindu bye mbikho bino?

¹¹Inywe mwambaasa muri, Intsu yase yino, ilaangibwa lisiina lyase, yeekyelile lifuluma lye baanuuli? Ne bona ise, Umukasya samweene, imbeele naaloleleele byeesi muli khuukhola.

¹²“Ari yinyukha mutsye mu shifwo shase shishiili i Shilo, isi Lisari lyase lye khukhwisaaya lyanyoowa khuuba, mubone sheesi nakhola shiifwo isho, lwe bubwoonaki bwe babaandu baase ba Isiraeli.

¹³Ni lwekhuuba ndi inywe mubeelatsakile nga mukhola bibiindu bibifwaana biri, nase Umukasya, imbeelatsakile nga buli imbuka imbakanikhayo, ne buli lwaweele nga inywe simukana khukhuumbuliilisa ise ta. Naluundi nga ni nabekhuunga, inywe mwaalekha khukhuuntsilamwo ta.

¹⁴Ni lwe lomo iyo, shishiindu sheesi nakhola i Shilo, nisho shitweela sheene sheesi intsya khukhola khu Lisaayilo lino Likhulu lililaangibwa lisiina lyase, naluundi ate nisho shiifwo sheesi mwiyikina naabi. Shili nisho shiifwo sheesi ise nawa baakuuka beenywe atweela ni nanywe mwabeene.

¹⁵Indyo ikhaabatimise imbawoone, murure isiindi, indekhe khubabonakho luundi ta, imbakhole nga ni nakhola baalebe beenywe, babaandu ba Efurayimu[1].”

¹⁶Umukasya waalomela Yeremiya ari, “Iwe ukhaloombelakho luundi babaandu bano ta. Namwe bari wileyo wikoontselele, namwe ubelootsele khulwe buulayi bwaabwe ta, lwekhuuba abe waakhashikhola, ise singene ikhuwuliilise na khafwiiti khoosi ta.

¹⁷Iwe s'uli khuubona byeesi babaandu bano bali khuukhola mu biriimba bya Yuda, ni mu nguudo tse mu Yerusalemu ta?

¹⁸Babaana nibo batsya khureenya tsiikhu, ba paapa baabwe baasa kumulilo, ni bakhasi nibo bakaanda buufu, bari nio bakhalaange bukaati khulwa Nabakyelama we Likulu[2]. Baryo ndi batsya bakhola biwaanwa bye khuunywa isi ba wele babaandi, nisho shishikila basokosana lirima lyase.

¹⁹Iwe wambaasa uri ise Umukasya niye isi bali khusokosana? Akhuba ise ta, ne balikho beetsiinisa busa babeene, bereerera busa khuswaala.

²⁰Ni nashiryo, ise Umukasya Wele, indi khuutsya khutsukhiliila lirima lyase lirafu lilyeene khu shifwo shino, ni na buli khu muundu yeesi, ni bisolo byeene, khu misaala ni khu bilime byeene. Lirima lyase likhaaburukhe, ilekhe khubawo n'umuundu yeesi unyala khulisimisa ta.”

²¹Sheesi Umukasya Wele uwe kamahe, umunyali wa byoosi aloma nisho shino ari, “Ni mutsye mu moni, mutubaase biwaanwa byeenywe bibyookhe khu tsisaayilo tsitsiindi, lwanyuma mwiiliile tsinyama mwabeene!

²²Lwekhuuba khu mbuka isi narusila bakuuka beenywe khukhwaama mu shibala sha Misiri, nabakanikhatsakayo. Ise sinabawa busa nibo biilakilo bibiwaamba khu biwaanwa bibyookhe ni tsisaayilo tsitsiindi ta,

²³ne nabawa nibo shiilakilo shino: Muwulilatsake byeesi imbalomela, ni nase kane imbatsake Wele weenywe, ni nanywe kane mubatsake babaandu baase. Ngana mukyeendele mu mikhoosi kyase kyeesi imbalomela khuukyeendelamwo, nio bibiindu bibatsiile buulayi.

²⁴Ne nibo baalekha khukana khuwulila namwe khukhwiinaanayo khwoosi ta. Ne shonyene ndi baatsya baloondelela intsambaasa imbi iye mu myoyo kyaabwe, ni bumiinyi. Baryo bakyeenda nga bakobolaka inyuma, mu shifwo she khukyeenda nga batsya ibweeni.

²⁵Khukhwaamila ilala khu shifukhu khweesi bakuuka beenywe baarurira mu shibala she Misiri, khukhwoolesa ni shaleelo shino, iseese naabeele nga imbakaanisa inywe babaakaanisi baase baŋoosi buli mbuka.

²⁶Ne inywe mwaba nga mwirekela busa, mwaloba khukhuundeekeeresa ise byeesi inoma ta, mwaaba bamiinyi luukali, muryo mwaakhola buubi bubufuurakho bweesi bakuuka beenywe baakhola.”

²⁷“Yeremiya kane utsye ubakanikhile bibiindu bino byoosi, ne babaandu bano singene bakhurekeerese iwe ta. Ukhaatsye ubalaange, ne sibakhaakhwiilemwo ta.

²⁸Nio nawe ukyelewo ubalomele uri nibo bali linaambo lilikhawulila likono ly'Omukasya Wele walyo ta, naluundi uri sibenaanayo khushuusakho tsisaambo tsaabwe nga ni nabawa bitaambiso ta. Ari bwaŋali bwaafwa khaale, ari sibashiwulilikhakho khukhwaama mu minwa kyaabwe ta.”

²⁹“Ari ni mubekekho litsuune muliruse khu mirwe kyeenywe, mulituume aleeyi. Mwinyuse luwuungu nga muli khu ngaaki khwe tsingoongo, lwekhuuba ise Umukasya nalekhulile babaandu baase be kumuboolo kuno, nabekaanile lwe khukhuukhalasa ise.”

³⁰Umukasya waashiilaangilila ari, “Babaandu ba Yuda baakholile bibyoonako biikali mu moni tsase. Baryo baareerire bifwaani bye mbikho mu ntsu ilaangibwa Lisiina lyase, baakikyelisa inyaalu.

³¹Musaambo iyo boombakhile shisheeso isi balaanga bari Tofesi, mu litila lya Beni Hinomu, nio banyale khukhwookhelakho basooleli, atweela ni bakhaana baabwe mu mulilo. Shino shili shishiindu abe sheesi ikhabalakilatsakakho, namwe bari nashambaasakho mu mwoyo kwase ta.

³²Nashiryo, nimwitsiliilise naabi, bifukhu bitsya khwiitsa isi shiifwo isho bakhaalekhe khushilaanga bari Litila lya Beni Hinomu ta, ne bashilaange bari Litila lye Khuukhoonyelamwo. Shikhaabe shiryo lwekhuuba, bakhaasiikhe kimilaambo kye babaandu baakali naabi mu litila ilyo, itaambeyo shiifwo mweesi banyala khuusiikhamwo umufu ukuundi nakhari ta.

³³Nio lwanyuma kimilaambo kye babaandu bano kikyele she khuulya isi binywiinywi bye mu ngaaki ni tsisolo tse mwirome, naluundi itaambeyo n'umuundu na mutweela unyala waabitimisa ari bitsye ta.

³⁴Musaambo iyo, shibala shoosi shikhaabemwo khuusila khwe kumutaambo. Shikhaabe shiryo lwekhuuba ise ikhaakamise bibiyiliimba bye kumwikhoyo, ni liyoombo lye sangaalo, atweela ni bye kamayiiya ke bukhwaale, bibiwulilikhila mu biriimba bya Yuda, atweela ni mu nguudo tse mu Yerusalemu.”