Read lumasaaba Yeremiya 8 Bible Online

Yeremiya 8 - lumasaaba bible

Yeremiya 8

¹Umukasya waashilaangilila ari, “Imbuka iyo nga yeetsile khwoola, kamakuumba ke baayiinga be mu Yuda babaafwa, atweela ni baakhulu beesi baaraambatsaka ni nabo, ni kamakuumba ke basaayi ni ke baŋoosi, ni khutubakho kamakuumba ke babaandu boosi be mu Yerusalemu, bakhaalime bakasyuukhuluule khukhwaama mu ŋani tsako.

²Kamakuumba kano sibakhaakabuuse lwanyuma bakasiikhe ta, ne bakhaakasalanise busa buli aandu oosi kafwaane busa nga kamasaanikho ke ibuumbi. Bakhaakasalanisake isi inyaanga, ni kumweesi, atweela ni tsinieniesi tse mwikulu, abe byeesi bakana naabi khuuloondelela, khukhwireebakho ni khukhwisaaya.

³Batweela khu baandu be linaambo lilyonaki lino, babaakhaaramewo nga baalamu mu shibala isho isi bakhaatsye babe nga baabowe, bakhewotoome naabi khuufwa khufuurisa khuuba baalamu.” Bino byoosi Umukasya umweene niye ubilaangilila aryo.

⁴Umukasya waanoma intsye inomele babaandu bano ndi, “Nga umuundu wakwiile aasi, s'anyala wenyukha luundi ta? Namwe nga umuundu waakooranile intsila, s'ashuukha waakobola ta?

⁵Ne lwashiina babaandu bano babaakwiile baandurakho, sibanyala bashuukha baakobola ta? Nibo behaambile beyomisiile mu bubeeyi bwaabwe, baalobile khuukobola isiindi.

⁶Iseese naarekile khukhuru kwase naarekeeresile buulayi bubweene, ne mbaawo namutweela uuli khuukanikha bilomo bya ŋali ta. Naluundi mbaawo na mutweela uuli khukhwiibiiyisa buubi bweewe, nga bareeba busa bari, ‘Ne shiina sheesi ise ikholile?’ Buli mutweela atsya waakhola byeesi umweene ekanila, nga n'ubona iŋwaaŋwa niyuubakilisa khuutsya khwiinjila mu busoolo.

⁷Ni binywiinywi nalukosi bibipamburukha mu ngaaki byaamanya imbuka yabwo iye khuukobola, ni kamawuusi nako, atweela ni kaburuku, byaayimenieelesa buulayi imbuka yabyo isi biwuuyilamwo. Ne shonyene ndi babaandu baase bano nibo sibaamanya bibikanibwa bye mu makaambila kaase ta.

⁸Ari inywe munyala muryeena khuuloma muri, Inywe muli babaandu baakyesi, ni kamakaambila k'Omukasya kali ni nanywe. Ate nga baaroni beenywe bakashuusa bakekyelisa bye khuuwombesa busa.

⁹Basaani be kamakyesi abo bakhaawaambisibwe tsisoni, baryo bakhelaliile busa, luundi babe nga bawaambikhiile mu shifwo shitweela, lwekhuuba nibo bekaanile khuuwuliilisa ilomo y'Omukasya. Ari indeeba ndi, makhula shiina keesi nibo bali nako?

¹⁰Ni nashiryo, ikhaawe bakhasi baabwe isi baseetsa babaandi, naluundi imaambise tsinimilo tsaabwe isi babaatsilolelela babaandi. Baryo buli mutweela khu nibo, khukhwaamila khuwe aasi khuutsya khwoola khuwe angaaki, boosi bali ni kumuluungo kwe khuufuna biikali akhali bwaŋali ta. Abe yakhaba ni baŋoosi atweela ni basaayi beene, nabo bakhola bye khuwombesa khwonyene.

¹¹Nibo batsya baaboweelela kamakoontsyo ke babaandu baase, nga kafwaana uri kakaakhalimwo butsiina ta. Nibo bakhola belomesaka busa bari, ‘Lukoosi luliwo, Lukoosi luliwo,’ ate nga mbaawo lukoosi nakhari ta.

¹²Manya nibo baswaalakho lwanyuma lwe khuukhola shishiindu she mbikho nga shino? Taawe, ilala nibo tsisoni tsaakhubawaambakho nakhakyeekhe khari ta; naluundi baakhumanyakho shiina sheesi kamaŋaanyu kamanyisa ta. Ni nashiryo, nanywe kane mukwe nga babaandi nabo ni baakwa; imbuka iye khuuweebwa shitaambiso nga yeetsile khwoola, boosi bakhaasalanile bawewo.” Shino ise Umukasya samweene niye ushikanikha.

¹³Umukasya waashilaangilila ari, “Iseese nakana khuubabuusilisa babaandu baase nga umulimi n'abuusilisa biilime byeewe, ne nibo baafwaana nga kimisaala kimisabibu kikikhalikho kimisabibu ta, namwe nga kimisaala kimifigi kikikhalikho kimifigi ta; bona, abe yakhaba ni kamasaafu kaabwe kaniaalile. Ni bibiindu byeesi nabawa nibo naafukiilisile babaandu babaandi khuubiyila.”

¹⁴Kila babaandu be mu Yuda belomela bari, “Ifwe khukhwikhala ano, khwaliindile shiina? Lekha khwiibuuse atweela khutime khutsye mu biriimba bibiilikho kamatikiiyi, khutsye khufwiile mu bweene imwo! Lwekhuuba Umukasya Wele weefwe waakhalilewo ari ifwe khuhele; niye waakhuweele ifwe kameetsi kakaalimwo buutwa khuunywa, lwekhuuba ifwe khwaamuminyaaliile niye.

¹⁵Lwekhuuba ifwe khwaba khwambaasa khuri inabawo lukoosi, ne mbaawo shiilayi shoosi nakhari ta, khwambaasa khuri inabawo khuuwonesebwa, ne yabawo khuutsiinisibwa khwonyene.

¹⁶Khwaawuliile bari baasiku beefwe beetsile boolile i Dani, naluundi khuwulila ni khuuruukaruuka khwe tsiŋwaaŋwa tsaabwe, shaakila buli mutweela mu shibala sheefwe waarya luukali. Baasiku bano balikho beetsa khuuhesa shibala shoosi, na buli shiindu shoosi shishiilimwo, beetsa khuuhesa shiriimba ni babaandu boosi babaashiilimwo.”

¹⁷Ne Umukasya ashilaangilila ari, “Bona ise ndi khuusiindikha tsindemu khuubalumaka, tsindemu tse buutwa tsitsikhanyala tsaakaangibwa ta.”

¹⁸Kumutaambo kweesi indi nakwo mu mwoyo kwase sikunyala kwaawonesebwa ta.

¹⁹Wuliilisa! Ise imbulila khuulila khwe babaandu baase mu shibala she aleeyi naabi. Balikho balila nga baloma bari, “Umukasya s'ashiili mu Sayuuni ta? Niye s'ashiili umuyiinga washo ta?” Imbulila Umukasya nga naye elamwo ari, “Ne lwashiina inywe mwandeerere lirima liikali, nga mutsya khukhwisaaya bifwaani bye ba wele be kamanaambo bibikhalimwo kumukaso ibyo?”

²⁰Babaandu beluŋuunya bari, “Imbuka iye likyesa yaweelekho, ni mbuka iye biheeso yaakamile, ne ate nga Umukasya ashiili khukhuwonesa ifwe ta.”

²¹Nga babaandu baase ni betsuule kumutaambo mu myoyo kyaabwe, nase indyo neetsuule kumutaambo mu mwoyo kwase. Indi khuulila luukali, lwekhuuba netsuulemwo inguunyi ingali naabi.

²²Manya mu Gileyadi mbaamwo kamasuuswa ta? Ilala mubweenemwo mbaawo umukaangi na mutweela ta? Lwashiina babaandu baase bakhawonesebwa kamakoontsyo kaabwe?