Read lumasaaba Yeremiya 9 Bible Online

Yeremiya 9 - lumasaaba bible

Yeremiya 9

¹Iba nga bari kumurwe kwase kukuuli isebele iye kameetsi, naluundi iba nga biikho bye tsimoni tsase bibibeele shiifwo isi kameetsi karubukha, khali ise naatoololile kamasika kumuusi ni shiilo khu lwe babaandu baase babaamala khuukhoonyebwa khaale!

²Ise imba bari ulikho ni bukono bwe bakyeni mu mubiimbi iyo, khali naakyeendile intsya ibweene iyo, indekha babaandu baase, imbaantsukha nibo! Lwekhuuba baakholile bye buyeyani, naluundi bekyelile lituuli lye babaandu babaakhali babeyikinwa taawe.

³Umukasya ashilaangilila ari, “Babaandu bano barekekha lulimi lwaabwe lwafwaana nga buyiingo, khuulasa bye buwombesi. Baryo beloosela khuukhola bye buwombesi nio bunyala bwaabwe bweloosela mu shibala shaabwe, naluundi sibakana khushifukiilila bari indi Wele waabwe ta.”

⁴Ari buli mutweela aakha khukhwiliinda umwesanwa weewe, alekhe khukhwiyikina ni waandaaye umweene ta. Lwekhuuba buli mutweela ali umulyakhani, ni na buli mwesanwa akyeenda nga asalaasa kamatsi.

⁵Buli muundu atsya nga awombesa uwashe, nga mbaawo na mutweela ukanikha byaŋali nakhari ta. Batsya nga baleekela tsinimi tsaabwe khuukanikha bye khuwombesa byonyene, baryo baaba nga beluwisa babeene lwe khuukhola bye bubwoonaki.

⁶Baryo batsya baakhola shituluungu shitweela, balooselakho shituluungu shishiindi, uri bamala khuukhola she khuwombesa shitweela, balooselakho shishiindi, shaakila baloba khukhuumanya ise nga Umukasya Wele waabwe ta.

⁷Shino shaakila Umukasya uwe kamahe, Umunyali wa byoosi aloma ari, “Samweene intsya khubapyeluusa nga umuundu n'apyeluusa shishuuma, naluundi intsya khubakhakilisa. Mbaawo shishiindu shiindi she khuukhola ta, lwekhuuba babaandu baase bakholile bye bubwoonaki biikali.

⁸Tsinimi tsaabwe tsayokiya nga bufumo bwe buyiingo, tsikanikha bye khuwombesa byonyene. Uwulila umuundu akanikha buulayi n'umwesanwa weewe, ne nga mu mwoyo kweewe mukari ali khuumurekela kumureko.

⁹Mwambaasa muri ise sinyala naabawa shitaambiso lwe bibiindu nga bino ta? Mwambaasa muri ise Umukasya, sinyala neliyaasa linaambo lilifwaana nga lino ta? Ise Umukasya samweene naakanikhile bibiindu bino.”

¹⁰Ikhaatsye indile luundi naantsuyile khu njiinji, intsye indile khulwe kamaayilo kakaali mu mubiimbi. Niko karama awo busa luundi kaayoma, nga mbaawo umuundu na mutweela utsya khuukakyeendamwo ta. Naluundi s'uwulilakho akhaba luswaaki lwe shishaayo shoosi ta. Ni binywiinywi bye mu ngaaki byapamburukha byakorawo, ni tsisolo tse mwirome tsataala tsaatsya, mbaawo na ndweela ta.

¹¹Umukasya waaloma ari, “Intsya khwikyelisa shiriimba Yerusalemu shibe induumi ye kamawuumbu busa, shibe busa buumenyo bwe bisolo patuukha; naluundi nikyelise biriimba bya Yuda bifwaane nga kamakubili busa, nga mbaamwo umuundu na mutweela ubimenyamwo ta.”

¹²Kila ise indeeba Umukasya ndi, “Muundu shiina uuli umukyesi unyala waamanya shishiindu shino? Muundu shiina isi Umukasya umweene aakanikhayo waamuleekela khuubisontsoola? Ilala lwashiina shibala shoosi shoonakisibwa, ni liiswa lyarama awo busa nga kumubiimbi, nga mbaawo n'umuundu na mutweela unyala waatsya waakyeendayo ta?”

¹³Kila Umukasya elamwo ari, “Shino shaakholikhile shiryo lwekhuuba babaandu baase baayiminyaalila ise, baaloba khuuloondelela kamakaambila kaase keesi nabawa, naluundi baaloba khukhuumbuliilisa ise, namwe khukhuunoondelela ta.

¹⁴Ne shonyene ndi baaloondelela buumiinyi bubuuli mu myoyo kyaabwe, baryo baatsya besaaya Bayaali, nga baloondelela byeesi bakuuka baabwe babaaleekela khuukhola.

¹⁵Nashiryo ni murekeerese sheesi ise Umukasya uwe kamahe, Umunyali wa byoosi, Wele wa Isiraeli, inoma: Intsya khuwa babaandu baase biilyo bibyaluluwa, naluundi imbawe kameetsi kakaalimwo buutwa khuunywa.

¹⁶Intsya khubasalanisa mu manaambo keesi nibo namwe bakuuka baabwe bakhaamanyakho na khafwiiti khoosi ta. Naluundi intsya khwakaanisayo kamahe ke baasiku nga baabaliile tsiindima, bakhoonye buli mutweela yeesitsana.”

¹⁷Sheesi Umukasya uwe kamahe, Umunyali wa byoosi aloma nisho shino: “Ni mushambaasekho ari shino shishikholikhile! Ngana mulaange bakhasi babaamanya khuusola beetse ano, murumanise bakhasi babaamanya khukhwilwaatsa kimibala khukhwiitsa.”

¹⁸Babaandu beelamwo bari, “Tsya muboolele bakhasi abo beetse khaangu belwaatse kimibala nga basola, nio manya tsimoni tseefwe tsileengaleenge kamasika kerurukukhe, nio manya bisikye byeefwe bisitowe ni kamasika katsutsukhake busa nga kameetsi.”

¹⁹Ni murekeerese muwulile khukhwantsuwa khukhuwulilikhila mu Sayuuni, “Ifwe khwahelile khwaweelewo! Nga khuswaala khweesi khulimwo khuno khuli khuukali naabi! Lwekhuuba khuli ni khuurura mu shibala sheefwe, lwe lomo ndi, bibyombekhe byeefwe byoosi abe mweesi khuumenya byoonakisibwile.”

²⁰Ari inywe bakhasi, ni muwulile ilomo y'Omukasya, murekeerese buulayi biilomo bibirura khukhwaama mu khanwa mweewe. Ingana muleekele bakhaana beenywe khuusola, buli mutweela aleekele uwashe khukhwilootsa.

²¹Khuufwa khweyibinile khwenjiile mu ntsu tseefwe nga khubirira mu matilisa, khuufwa khwenjiile mu mako tseefwe. Khuufwa khuno khwahesile babaana babaali mu nguudo, atweela ni basooleli babaakyeendela mu mikhoosi kye mu shiriimba.

²²“Umukasya waakhuboolela ifwe ari kimilaambo kye basaani kikhaasalanisibwe busa buli aandu kifwaane nga n'ubona kamasisye mu kyeewa, kikhaafwaane busa nga kamasakari mu mikuunda kyeesi bakyesile, nga mbaawo umuundu na mutweela unyala waakibuusilisa ta.”

²³Umukasya waaloma ari, “Abo babaali ni kamakhula bakhebuyila lwe kamakhula kaabwe ta, ni naabo babaali ni kamaani bakhebulila mu maani kaabwe ta, namwe abo babaali bayiindifu bebuyilile mu buyiindifu bwaabwe ta.

²⁴Ne lekha uyo yeesi uwibuyila ebuyile lwe lomo yino: ari niye ali ni khuumanya khuukali, naluundi ari waayimanya ise nga Umukasya uwokyesanisa shiisa, bwaŋali ni bukwalaafu khu shibala. Lwekhuuba bibyeene bino nibyo byeesi ise Umukasya, ingana naabi khuukhola.”

²⁵Umukasya waaloma luundi ari, “Bonakho khane, bifukhu bilikho biitsa isi ikhaaweele shitaambiso babaandu babaamala khaale khukhwinjila imbalu iye kumubili.

²⁶Naluundi ikhaawe shitaambiso isi kamanaambo nga Misiri, Yuda, Edomu, Amoni, Mowaabu, ni bikuuka bibiindi bibimenya mu bifwo bye aleeyi bibiili mu mubiimbi. Lwekhuuba kamanaambo kano koosi kaakhwinjila imbalu nakhari ta, ne ate ndi babaandu be mu Isiraeli nabo baakhwinjila imbalu iyaŋali iye mu mwoyo ta.”