Read lumasaaba Khukhwiwunamila 2 Bible Online

Khukhwiwunamila 2 - lumasaaba bible

Khukhwiwunamila 2

¹Nga Umukasya waabiimbiliile babaandu ba Sayuuni mu lifuumbi lye lirima lyeewe! Abe shishaba shiriifwa sha Isiraeli waashikholowile khu shibala khukhwaama mwikulu; niye waakhushebulilakho shiifwo mweesi asaamba bikyele byeewe khu shifukhu she lirima lyeewe ta.

²Umukasya woonakisakile birekere bye buumenyo bwe babaandu ba Yakobo nga s'alikho ni shiisa shoosi taawe; ni buurafu buukali waamenyulakile kamatikiiyi abe kakaakhiinga shibala sha Yuda. Niye waarereere baakhulu ni buyiinga bwaabwe khuswaala khuukali naabi lwe khuubarekula waabakhupa aasi.

³Mu lirima lyeewe liikali waafuniaakakile kamaani ka Isiraeli koosi. Niye waarusileyo kumukhono kweewe kwe buyeeti, nga n'abona baasiku beetsa. Niye aaburukha woosha Yakobo nga n'ubona kumulilo kukuutindiima kwoosha buli shiindu shoosi shishibotookhelelewo.

⁴Aryo waatsanuusile buyiingo bweewe nga umusiku n'akhola, kumukhono kweewe kwe kamaani kwaanekeleele busa. Niye aakhoonyaka babaandu abe babaabonekha buulayi, aryo waatsukhiliile lirima lyeewe lyafwaana nga kumulilo, nga oosha kamasari ke babaandu be mu Sayuuni.

⁵Umukasya waafwaanile nga umusiku, lwekhuuba waahesile Isiraeli yeesitsana. Niye waahesile biifwo mweesi bayiinga bamenya, naluundi waafuniaakakile kamatikiiyi kakaabakhiinga koosi. Waarereere babaandu ba Yuda kumutaambo ni khukhwiwunamila khukhuukhawawo ta.

⁶Niye waasalanisile Lisaayilo lyeewe Likhulu abe isi babaandu beewe bamwisaayila, woonakisiile ilala shiifwo isi babuusanila. Musaambo iyo Umukasya umweene waakilile babaandu be mu Sayuuni bebiliile bifukhu biikhulu bye kamayiiya kakaareebwawo ni bifukhu bya Sabato byoosi. Lwashino, umuyiinga n'umusaayi bewuliile buunyala bwe kumukhono kweewe.

⁷Umukasya umweene waayikaana shisheeso sheewe, waayantsukha ni Lisaayilo lyeewe Likhulu. Aryo waafukiilisa baasiku khuufuniaakaka kamatikiiyi ke bumenyo bwe bayiinga. Baasiku bano baayinyusa luwuungu luukali Lisaayilo Likhulu ly'Omukasya shafwaana nga ni bakhola khu shifukhu she kamayiiya.

⁸Umukasya waakhalawo ari kamatikiiyi kakaakhiinga Sayuuni kaakha khuukhupibwa aasi. Niye akhaapiime ni kumukhono kweewe khukhwookesanisa ari koonakisibwe kaweelewo ilala. Niye umweene uwaakila tsintseko ni kamatikiiyi khukhwinamilila, byoosi byakwiila atweela byawawo.

⁹Bilibwa byasho byesiikhile mwiloba aasi; ni kimitaliimbo kyasho waakifuniaakile luundi waakyonakisile. Umuyiinga washo atweela ni baakhulu baasho babaandi baawuyisibwa baayilibwa mu bubowe akari mu manaambo kakaandi. Kamakaambila sikashilekebwela ta, ni baŋoosi baasho sibashifuna khuubonekhelwa khukhwaama isi Umukasya ta.

¹⁰Basakhulu be babaandu ba Sayuuni bekhala aasi bewunamila nga baasilile busa; betsukhiile lifukhulu khu mirwe kyaabwe, naluundi bakwaarire tsisawu tsa makoongwe. Bakhasi bekhaana be mu Yerusalemu beenamisile kimirwe kyaabwe aasi khwiloba.

¹¹Tsimoni tsase tsaaluwile lwe khuulila khuukali; kumwoyo kwase kwetsuule ingunyi ingali. Kumwoyo kwase kwaweeleelemo ilala, lwekhuuba babaandu baase baahelile. Babaana bafwiiti atweela ni baŋaalye baakwiile aasi balikho bahetsahetsela mu ngudo tse mu shiriimba.

¹²Balikho balilila ba maayi baabwe lwe ntsala nga baloma bari, “Bye khuulya ni bye khuunywa bili waheena?” Baloma baryo nga balikho bekhupa busa aasi nga n'ubona babaandu beesi bawunakile ni tsiindima nga bakwa aasi mu ngudo, ni buulamu bwaabwe nga buweetsekhelela busa nga bali mu makhono ke ba maayi baabwe.

¹³Ari ise inyala naakhulomela ndyeena? Ise inyala naakhulengaasa khu shiina, iwe Umukhaana wa Yerusalemu? Ise inyala naakhufwaananisa na shiina nio manya nakhwiisamo kamaani, iwe umukhaana wa Sayuuni? Likoontsyo lyoowo lili liibalaayi naabi lyafwaana nga inyaantsa imboofu. Ne naanu unyala khuukhukaanga iwe waakhuwonesa?

¹⁴Kamarooro ke baŋoosi boowo kali ke bubeeyi nga kaborosa busa; nibo sibabakala bubwoonaki bwaabwe mu buwaanga nio manya ukobole mu shifwo shoowo mweesi waba makiboole ta. Ne buurume bwe buŋoosi bweesi bakhuboolela buli bwe bubeeyi luundi bukoraanisa.

¹⁵Boosi babaabira khu ntsila yoowo, bakhupa muungono mwaabwe nga bakhupa luutsine, nga babatsekhelela inywe busa luundi nga basisiikha busa kimirwe kyaabwe khu lwe babaandu ba Yerusalemu; nga bereeba bari, “Shino nisho shiriimba Yerusalemu sheesi baarakho kuutikiiyi kuulayi, nga shibonekha buulayi, luundi nga shili kumwikhoyo kwe shibala shoosi?”

¹⁶Baasiku beenywe baasama mukhanwa mwaabwe baabatsekhelela, babalolelela ni shimooni shiikali naabi, nga baloma, “Khwaabahesile khwaabamalilewo. A a a, yino niyo imbuka abe isi khwaliindilila, bona yoolile khwaakiboone!”

¹⁷Umukasya umweene waakholile sheesi aarekekha, woolelesile sheesi aaloma ari kane akhole, sheesi umweene aalakila khaalekho ari shikholekhe. Bona waabahesile inywe akhali shiisa shoosi ta, waalekhile baasiku beenywe khuubekhoyelakho, bona waweele baasiku beenywe khuufumisibwa khuukali.

¹⁸Lila luukali isi Umukasya! Inywe babaandu be mu Sayuuni, lekha kamasika keenywe keekhe kafwaane nga luluutsi lwe kameetsi kumuusi ni shiilo! Mukhasilakho mwawola ta, mukhawakho tsimoni tseenywe khuuwola ta.

¹⁹Nimwinyukhe mutoloole kamasika shiilo shoosi, rakikha khuulila isi bubwiile bwe shiilo burakikhila! Toloola kamasika koosi kerurukukhe nga kameetsi nga mulilila Umukasya. Musute kamakhono keenywe mu ngaaki is'ali, nga mumulilila lwe babaana beenywe, babaana babaali khuweetsekhelela lwe ntsala, buli aandu oosi mu nguudo tse mu shiriimba.

²⁰O Umukasya, lola ubone! Manya naanu isi wawakho shitaambiso khukhwoola shiri? Iwe ukana bakhasi balye babaana baabwe, babaana beesi babeene balolelela? Ilala umusaayi n'umuŋoosi beeribwile mu Lisaayilo Likhulu mubweene?

²¹Basooleli atweela ni baasakhalu beene baakonile aasi mwifukhuulu lye khu ntsila, Bahele atweela ni bakhaana beene bahelile nga beeribwa ni lurima. Iwe waabakhoonyile nibo boosi khu shifukhu she lirima lyoowo. Iwe waabakhoonyile akhali shiisa shoosi ta.

²²“Iwe walaangile baasiku baase khukhwiitsa bangonele ise khu buli luwaande, bafwaane nga bakyeni balaange babeetsa khu shifukhu she kamayiiya. Khu shifukhu sh'Omukasya she lirima lyeewe, mbaawo umuundu namutweela uuliwona nakhari ta. Abo boosi beesi ise nalela luundi naatsowesa, baasiku baase baabahesile boosi.”