Read lumasaaba Khukhwiwunamila 3 Bible Online

Khukhwiwunamila 3 - lumasaaba bible

Khukhwiwunamila 3

¹Ise ndi umuundu uboone khuutaambisibwa aasi e miimbo iye buurafu bweewe.

²Niye waandimisile ise waandeerire mu shilima namukoto isi buwaanga bukhali ta.

³Mu ŋali niye andatsakakho ise welaaŋanamwo buli ndaalo tsoosi.

⁴Niye waatolwaasile kumubili kwase, ni lihaafu lyase lyahangaale, naluundi waafuniaakile kamakuumba kaase koosi.

⁵Aryo waantsibwakaale naluundi waasirirekho lumako lwe butsiina ni khuunaanisibwa.

⁶Niye waakilile ise naamenya mu shilima, naafwaana nga abo babaafwa khaale.

⁷Aryo wangaariire mukari ni kiminyololo kimisiro kimyeene nio ndekhe khunyala khutitukha ta.

⁸Abe naakhekhuunga ni kamaani nga ngana buyeeti, Wele awoonela aleeyi khuuloomba khwase.

⁹Wekaale tsintsila tsase ni kimibaale kimiboofu kimyeene, waakaraangaranisile kimikhoosi kyase.

¹⁰Waaniindiliile ise busa nga n'ubona shibulukhu shishibuliile isaanyi, waafwaanile nga italanyi iyibuliile khu ntsila.

¹¹Niye andimisa ise waandusa khu ntsila inyene, waatsya waantsonuulakamo bipatu busa, lwanyuma waandekha awo nga naraŋaalile busa.

¹²Niye aasoowolayo buyiingo bweewe, waanaambisa ise nga she khuukhakilakho bufumo bweewe.

¹³Aryo waandasa khu mwoyo ni bufumo bwe nduukhu yeewe.

¹⁴Ise ari naayikyela she khuutsekhelela mu baandu boosi, ise naayikyela lufumo lwe kimyeenya kyaabwe tsindaalo tsoosi.

¹⁵Niye waayintsitsusamo butsiina buukali naabi, aryo waayintsikusa ise ni nabululu.

¹⁶Niye waakilile kameeno kaase kapepena kamabaale, naluundi waakiilile ise nafulyaamila mwikoshe.

¹⁷Mu mwoyo kwase mbaamo lukoosi nakhari ta, Ise naayibilila ilomo ilaangikha busangaafu;

¹⁸Isho shishikila ise naaloma ndi, Buulayi bwase bwawamo, ni kumwiyikino kwase isi Umukasya kwawawo.

¹⁹Shebulila kumutaambo kwase ni butsiina bwase, byoosi bili nabululu umweene luundi indurwe!

²⁰Kumwoyo kwase kwikhala nga kubyambaasakho, buulamu bwase wewunamila luukali.

²¹Ne shonyene ndi ise shebulilakho shishiindu shino, shaakila ise naabakho ni kumwiyikino:

²²Khuukana khuukali khw'Omukasya Wele sikhuweetsekhelelatsaka ta, ni shiisa sheewe sishiwatsakawo ta.

²³Biikyela biishaakha buli kumutikhinyi, bubwiyikinwa bweewe nga buli buukali naabi!

²⁴Shikila ise nilomela mu mwoyo kwase ndi, “Umukasya niye kumukabo kwase, ni nashiryo kane imbatsake ni kumwiyikino mu niye.”

²⁵Umukasya ali umulayi isi abo boosi babaamwiyikina niye, isi umuundu yeesi umuweentsa niye.

²⁶Nashiryo shiba shiilayi khuliindilila ni buwolu buwonesi bw'Omukasya.

²⁷Shiba shiilayi umuundu khukhwitwiikha shisutwa sheewe nga ashiilimo kamaani ke busooleli.

²⁸Lekha umuundu ufwaana aryo ekhale ewunamile nga waasilile busa, lwekhuuba Umukasya umweene niye ushimureerekho.

²⁹Khayo umuundu uyo ewombeekhe nga wenamisile kumurwe kweewe aasi khwiloba, lwekhuuba kumwiyikino kunyala kwaaba nga kushiiliwo.

³⁰Niye n'arewo lusaya lweewe bamukhupe luuyi, aryo afukiilile bibimukholekhakho byoosi.

³¹Umukasya niye ali uwe shiisa shiikali, niye s'anyala wekaana babaandu beewe khuumala imbuka yoosi ta.

³²Abe yangaba nga niye akhureerera kumutaambo, ne ndi okesanisa shiisa sheewe shiikali, khuryo khuukana khweewe khukhuukhawawo ta khuli khwe kamaani.

³³Niye sishimwikhoyesakho nakhari ta khureerera umuundu yeesi kumutaambo, namwe khureerera umuundu yeesi butsiina.

³⁴Umukasya niye waamanya imbuka isi bakhaandakilila kimyoyo kyeefwe nga baabowe aasi mwifukhuulu.

³⁵Naluundi niye s'afukiilisa khuumalakho umuundu lukoosi lweewe lwe busaalikhana bweewe bubwamuweebwa ni Wele uwe angaaki ta.

³⁶Nga yabeelewo khulyakhana umuundu yeesi mu khukhala kimisaango, Umukasya bibiindu bino byoosi waabimanya.

³⁷Naanu unyala waalakila shishiindu shakholekhana, khurusakho nga Umukasya umweene waafukiilisile ari shibe shiryo?

³⁸Bibiindu biilayi atweela ni biibi byeene biitsa nga Wele uwe angaaki luukali umweene waalakile ni kumunwa kweewe.

³⁹Lwashiina umuundu umulamu eluŋuunya ate nga waaweebwile shitaambiso lwe bubwoonaki bweewe umweene?

⁴⁰Lekha ifwe khupime luundi khutseme tsintsila tseefwe, lwanyuma khushuukhe khwiileyo isi Umukasya!

⁴¹Lekha khwikulewo kimyoyo kyeefwe, khusute ni kamakhono keefwe mu ngaaki isi Wele uuli mwikulu, lwanyuma khulome khuri:

⁴²Ifwe khwoonakisile luundi khwaaminyaalile, ni nawe Wele waakhukhwiyakhila ifwe ta.

⁴³Iwe waayibiimbilila wamweene ni lirima lyoowo, lweesho waakhutimisa ifwe, waakhuhesa feesi akhali khuubakho ni shiisa shoosi ta.

⁴⁴Iwe waayibiimbilila wamweene mu namufweeli we lirima lyoowo, shaakila yalekha khubawo khuuloomba khwoosi khukhuubiramo khukhwoolakho isi uli ta.

⁴⁵Uryo waakhukhola ifwe khuuba nga kamaandu ke buumbi akari mu baandu be shibala shoosi.

⁴⁶Baasiku beefwe boosi bayasama mu khanwa mwaabwe khuukhukhomaka ifwe.

⁴⁷Ifwe khwaabirire mu khutaambisibwa khuukali ni khukhwoonakisibwa; khwaamenyile mu buwaangafu ni khuuhela.

⁴⁸Kamasika kamakali kerurukukha khukhwaama mu moni tsase, lwekhuuba babaandu baase bahelile baaweelewo.

⁴⁹Kamasika khukhwaama mu moni tsase singene kaakamise khukhwirurukukha ta, kane keloosele karyo imbuka yoosi.

⁵⁰Kane shibe shiryo khukhwoolesa isi Umukasya kane emikhe mwikulu alole aasi khuukhubona ifwe.

⁵¹Kumwoyo kwase kwitsula butsiina ise ni ndola naabona bibikholekha khu bakhasi be mu shiriimba shase.

⁵²Babaandu babaali baasiku baase, baandeka ise kumureko baamaambisa nga n'ubona ni bawaambisa khaanywiinywi.

⁵³Baasiindikhilisa baanduuma mwilowo nga ishiili mulamu, lwanyuma baamwaatakakho kamabaale;

⁵⁴kameetsi keetsula kaantsola khu murwe, abweene awo nambaasa ndi ari khuufwa khwaantsoleele.

⁵⁵Ibweeneyo nga ndi aasi mwilowo iyo, ise naakhwilootsela iwe Umukasya,

⁵⁶Ni nawe uryo waawulila khukhwilootsa khwase nga ikhuloomba ndi, “Ukhafuundisa mu khuru mwoowo waalekha khuwulila khuulila khwase lwe buyeeti ta.”

⁵⁷Ise nga ninakhwilootsela, iwe weetsa aambi isi ndi, kila unomela ise uri, “Ukharya ta!”

⁵⁸O Umukasya, iwe weetsa waawulila kamasika kaase, uryo waawonesa buulamu bwase.

⁵⁹Iwe, O Umukasya, wamweene waaboone buubi bweesi nibo baakhola khusiise. Iwe n'ukhalile ise kumusaango kwa ŋali.

⁶⁰Iwe wamweene waabona isaambo isi nibo baambiiyilamwo ise, ni saambo isi baakholelamo ise tsimbomelo tsaabwe.

⁶¹Iwe wamweene Umukasya, waawulila bukhomo bweesi nibo baakhomaka ise, ni kimireko kyeesi baandeka ise.

⁶²Kamalomo kamabi ni bibyambaaso biibi bye baasiku baase biba bili khusiise khuumala imbuka yoosi.

⁶³Babone nibo! Oba bekhaale aasi, oba beemikhile, nibo buli mbuka baba nga baanguta ise.

⁶⁴Iwe O Umukasya, ikhuloomba ndi ubeliyaase nga ni shibaakhila babeene, ubeliyaase khusintsiila khu byeesi kamakhono kaabwe kakholile.

⁶⁵N'ubakhole baleendaale kimyooyo kyaabwe, khali shitsubo shoowo shibeele khu nibo!

⁶⁶N'ubatimisile mu lirima lyoowo liikali, uryo ubahesele ilala, bahesele ilala bawewo khu shibala!