Read lumasaaba Khukhwiwunamila 4 Bible Online

Khukhwiwunamila 4 - lumasaaba bible

Khukhwiwunamila 4

¹Nga i zaabu imulikhamulikha yaapuukhile, nga buumiliwu bwayo bwaakalukhile! Kamabaale kamakwalaafu kaasalaniile khu mikhoosi kye mu nguudo kyoosi.

²Basooleli ba Sayuuni be lisuno baabatsaka nga busiro bwe zaabu, ne ari bona baayikyela busa nga n'ubona tsinyuungu tse liloba, tsitsiili busa buraambi bw'omubuumbi!

³Abe yakhaba ni tsishipwe tsinuunisa tsinyana tsatso kamabeele, ne babaandu baase bekyelile busa nga kunywiinywi maaya kwe mu mubiimbi.

⁴Baryo balekha babaana baabwe baŋaalye baafwa lwe ntsala ni bulesa; babaana baloomba sha khulya ne nga mbaawo ubawakho ta.

⁵Abo babaalyatsaka bya khulya abe bibifuurayo buulayi ari balikho babonabonela khu mikhoosi kye mu shiriimba. Ni naabo babaatsowesebwela mu buulamu bwe angaaki bwe buyiinda, ari bakona khu maandu ke buumbi.

⁶Shitaambiso sheesi babaandu baase bafunile shili shikali naabikho khufuurisa sha Sodomu, shiriimba shishoonakisibwa mu mbuka ifwiiti iri, nga sibuli bunyali bw'omuundu bubwashikhola ta.

⁷Babaandu baasho baakhulu baaba bamweekhamweekha mu bukhose khufuura kamararara, baaba baakhosa mu buwaanga khufuurisakho kamabeele, kimibili kyaabwe kyaba kyarurumbila buulayi busa nga kamabaale kamamiliwu, ni mbonekha yaabwe yaba ili nga kamabaale ke buukusi bwe angaaki ka safaya.

⁸Ne ari babeene baamaliyile khufuurisakho imbilu, bakyeenda babira mu nguudo tse shiriimba ne nga mbaawo ubamanya ari nibo ta, shikhoba she khu mibili kyaabwe shakhunariire khu makuumba kaabwe, boomile busa bafwaanile nga tsiikhu.

⁹Abo babaafwiila mu busoolo, bali buulayikho khufuurisa abo babaafwa lwe ntsala; nibo intsala yabeera mu mbola busa, baatsya nga baweetsekhelela busa lwe khuulekha khubakho ni she khuulya ta.

¹⁰Bakhasi babaali be shiisa bawaambile babaana baabwe babeene baabateekha khukhwiikyela she khuulya khu mbuka iyaba iye buwaangafu.

¹¹Umukasya okesanisa buubalaayi bwe lirima lyeewe lyoosi, aryo waatsukhiilila lirima lye burafu bweewe lilitindiima. Aryo aaburusa kumulilo mu Sayuuni, kukwoosha kwakubulaka ni kimisiinji kyasho kyeene.

¹²Bayiinga be shiibala sibaashifukiililakho nakhari namwe babaandu boosi be mu shibala khuushifukiilila bari umusiku yeesi anyala khukhwinjila mukari mwe bilibwa bya Yerusalemu ta.

¹³Shino shakholekha shiryo khulwe bubwoonaki bwe baŋoosi baasho, ni bubwoonaki bwe basaayi baasho, babaatsukha kamafuki ke bakwalaafu mukari mwasho.

¹⁴Baaraangilisi baasho bano baakyeenda nga batiimaana busa mu nguudo tse mu shiriimba nga baabofu be tsimoni, baaba baayinyaalutaka ni kamafuki, shaakila yataambayo umuundu na mutweela abe unyala waatiilakho ni khu bikwaaro byaabwe ta.

¹⁵Babaandu baayokesela angaaki nga baloma bari, “Rurawo tsya! Inywe muli banyaalu! Rurawo tsya! Tsya! Mukhakhola muri mwaakhutiilakho!” Baryo musaambo iyo, bekyela babaandu baamuli, nga bakyeendana busa. Ne nga buli isi batsya, babaandu be kamanaambo babalomela bari, “Bano sibanyala bamenya ano luundi ta.”

¹⁶Umukasya umweene niye ubasalanisile, niye s'alibenaanayo luundi ta. Basaayi sibashiiweebwa luukoosi luundi, ni baasakhalu sibashisiimibwa luundi ta.

¹⁷Ifwe khweluwisa busa nga khuli meeso, nga khuliindilila khuufuna buyeeti; Khweemikha khu ngaaki khu minaala nga khuliindilila khuubona noola iliwo linaambo lilinyala lyaakhuwonesa ifwe.

¹⁸Baasiku beefwe bakhwibuulila ifwe nga bakhulolelela buli oosi isi khuutsya, nga sikhunyalisa ni khuukyeendakho mu nguudo tse mu shiriimba ta. Intsakamwo yeefwe yaaba nga yoolile, bifukhu byeefwe byaaba nga byaabalibwile, lwekhuuba khuufwa khweefwe khwaba nga khwoolile.

¹⁹Abo babaaba nga bakhutimisa ifwe baaba be tsiindimo tsingali naabi, nga bafuurakho ni kiminywiinywi waasu kye mu ngaaki; nibo baakhutimisila khu njiinji, baaba nga bakhwibuulila ni mu mubiimbi.

²⁰Buulamu bweefwe bwoosi, bweesi Umukasya umweene aarawo, bwawaambikhila mu mireko kyaabwe. Babeene abo nibo beesi khwaambaasakho khuri, nga khwabeele aasi e buukayi bwaabwe, khunyala khwamenya akari mu manaambo koosi.

²¹Nashiryo, yikhoya luukali luundi musangaale, inywe babaandu ba Edomu, ni nanywe mweesi babaamenya mu shiibala sha Uzi. Ne mushebulilatsaka muri nanywe bukosi bweenywe buli khukhwiitsa; nanywe muryo mukhaanywe khu shikhopo she kumutaambo, mwoole khukyeenda bukhuna.

²²Ne inywe babaandu ba Sayuuni, shitaambiso sheenywe shikhaakame; Umukasya s'alibamenyisa inywe mu bubowe khuumala imbuka indeeyi ta. Ne inywe babaandu ba Edomu, niye akhabawe shitaambiso khulwe bubwoonaki bweenywe, aryo okesanise buumoyaani bweenywe.