Read lumasaaba Ezekeli 10 Bible Online

Ezekeli 10 - lumasaaba bible

Ezekeli 10

¹Lwanyuma ise ndi ndola mu libaanga abe liliili angaaki e bakeruubi, shabonekhayo shishiindu shishifwaana nga shitsoloŋo she buwuli sheesi baakhoora khukhwaama mu libaale libuusi limiliwu naabi.

²Umukasya waalomela umusaani abe ukwaarire bikwaaro biimiliwu naabi ari, “N'utsye akari e kimikuwu kye kamakaari kaatsana kakaali aasi e tsisolo tsyatsana, uyoole kamaanda kakeseŋeeŋile witsuse mu makhono koowo. Lwanyuma utsye usalaase kamaanda ako khu shiriimba.” Waatsya nga ise naamuloleleele.

³Ari, niye isi engililawo, abe kerubi itsyo tsyemiikhile luwaande lwamwaalo lwe Lisaayilo. Kila lifuumbi litsula mu lwaanyi mukari mwoosi.

⁴Kila shiriifwa sh'Omukasya shenyukha khukhwaama khu kerubi tsyatsana itsyo, shaatsya imulyaango we Lisaayilo Liikhulu. Lisaayilo Liikhulu lyeetsulamo lifuumbi, ni lulwaanyi lwoosi lwetsulamo khuutsasa khwe shiriifwa sh'Omukasya.

⁵Liyoombo lyeesi tsindaha tsye kerubi itsyo tsyakhupa, lyawulilikhana ikhaba ni mulwaanyi luluuli ibulafu. Likono ilyo lyawulilikhana nga likono lye khuukanikha khwa Wele, Umunyali uwa byoosi.

⁶Ari nga Umukasya waalakiile umusaani abe ukwaarire bikwaaro biimiliwu khuutsya khubukula kumulilo khukhwaama akari e kimikuwu kye kamakaari abe kakaali aasi a kerubi, niye waatsya wemikha aambi ni kumukuwu mutweela.

⁷Kerubi mutweela waatsanuula kumukhono kweewe waayila mu mulilo abe kukuutsili nitsyo aambi, waabukula kamaanda kakeseŋeeŋile, waakara mu makhono k'omusaani abe ukwaarire bikwaaro biimiliwu naabi. Umusaani uyo waakaanila kumulilo wakyeenda waatsya.

⁸Ise naabona nga aasi e lutaha lwa buli kerubi, abe iliwo shishifwaana nga kumukhono kw'omuundu.

⁹Ise ni nalola, naabona nga iliwo kimikuwu kine aambi ni bakeruubi, nga buli aambi ni kerubi mutweela abe iliwo kumukuwu mutweela. Abe kimikuwu kino kili kimimiliwu nga kitsasa ni buwaanga bukali naabi.

¹⁰Abe mu mbonekha yakyo, kimikuwu ikyo kine kyoosi kifwaanana busa; nga iliwo kumukuwu kukuundi kumukeekhe kukuuli mukari mwe kumuboofu.

¹¹Abe tsisolo tsine tsikyeenda, tsinyala tsyaatsya khu luwaande lwoosi lweesi abe tsiba tsikanile. Abe tsikyeenda, tsyoosi tsitsya khu luwaande lutweela lweesi abe tsikanile khuutsya. Abe tsitsya busa mu moni akhali khushuukha ne tsitsiila busa atweela.

¹²Abe kimibili kyatsyo kyoosi, ni khu mikoongo, ni khu makhono, ni tsindaha, ni kimikuwu byoosi byaayitsula tsiimoni.

¹³Kila ise mbulila likono nga lilaanga kimikuwu kikyaba kili nga ikhuungu iye kamaani.

¹⁴Abe buli kerubi ali ni mu moni mwe kimiluundi kine. Mumuunyoowa abe muli nga mwa kerubi. Mumuukhola khabili abe muli nga mw'omuundu. Mumuukhola khataru abe muli nga mw'etalanyi. Mu mumuukhola khane abe muli nga mu moni mw'ekhosi.

¹⁵Kila bakeruubi baniina mu ngaaki. Tsisolo tsino tsili ni tsinyene tsyeesi ise nabona nga indi khu luutsi Kebari.

¹⁶Nga bakeruubi ni baniina mu ngaaki, kimikuwu ikyo nakyo kyatsya ni nabo. Abe lweesi bakerubi babaayuluusa tsindaha tsyaabwe khupamburukha, ni kimikuwu nakyo abe kitsya ni nabo.

¹⁷Abe uli tsisolo tsiima atweela, kimikuwu nakyo kyeema atweela; abe uli tsiisolo tsipamburukha, kimikuwu nakyo kyapamburukha ni natsyo. Khulwekhuuba abe kamaani kakaaraangirira kimikuwu ikyo kaama musolo itsyo.

¹⁸Kila shiriifwa sh'Omukasya abe shishiili khuumweekhamweekha, shaama mu mulyaango kukwingila mu Lisaayilo Liikhulu, shaatsya shaaba angaaki e bakerubi abo.

¹⁹Kila bakerubi abo babayuluusa tsindaha bapamburukha khukhwaama khu shibala nga ise naloleleele. Ni kimikuwu kyatsya ni nabo. Nga kyoolile khu shilibwa she bwaamanyaanga we Lisaayilo Liikhulu, tsyeemakho khakyeekhe. Shiriifwa sh'Omukasya abe shishiili khumweekhamweekha shaba nga shili angaaki we tsisolo.

²⁰Ise naabona bakerubi bano nga nibo ni babeene beesi ise nabona nga bali aasi a Wele, uwa Isiraeli, nga ise ni naba nga ndi khu luutsi Kebari. Ise naamanya ndi bano bali nibo bakeruubi.

²¹Abe buli ubira ali ni mu moni mwe kimiluundi kine, ni tsindaha tsine, nga aasi wa buli lutaha iliwo abe shishibonekha nga kumukhono kw'omuundu.

²²Imbonekha iye mumooni mwatsyo, abe ili iye mu moni mubweene mweesi ise nabona nga indi khu luutsi Kebari. Buli isolo yakeenda burereefu nga yilooselayo mu moni.