Read lumasaaba Ezekeli 11 Bible Online

Ezekeli 11 - lumasaaba bible

Ezekeli 11

¹Umwoyo uwa Wele waasuta waambila khu shiilibwa shishiili ibwamanyaanga we Lisaayilo Liikhulu. Shiilibwa shino shaloleelela ibwaamanyaanga. Indi indola, naabona basaani kabili na baraano nga bali aambi ni shilibwa isho. Mu bano mwabamo baraangirisi babili, nga nibo Yayazaniya, umusoleeli uwa Azuri; ni Pelatiya, umusoleeli uwa Benaya.

²Kila Wele anomela ise ari, “Umwaana w'omuundu, basaani baabili bano nibo babaakhootsa bye bubwoonaki bweesi babaandu bali ni khuukhola, naluundi nibo babaawa babaandu be mu shiriimba shino kamakhula kakaakhali kamalayi ta.

³Basaani bano baloma bari, ‘Imbuka iye khukhwombakha tsiintsu ishiili khukhwoola ta. Shiriimba shino shili nga isaatsi iye khuuteekhelamo, ne ifwe khuli busa nga tsinyama tsitsiili musaatsi. Ne she khabi indayi, shiriimba shino shikhutseeta ifwe khukhwaama khu mulilo.’

⁴Ni nashiryo, mwaana w'omuundu, iwe khola buŋoosi bububekiitsa nibo; bekiitse naabi.”

⁵Kila Umwooyo uwa Wele antsikha khus'iise. Awo Umukasya waanomela ise khuuboolela babaandu buurume buno: “Baandu ba Isiraeli, ise naamanyile bibiindu byeesi inywe mulikho mwambaasa naluundi byeesi murengekharengekha khuukhola.

⁶Inywe mwaayira babaandu baakali naabi mu shiriimba muno, ni kimikhoosi kye shiriimba kyayitsulamo kimilaambo.”

⁷Ni nashiryo, Umukasya Wele alikho aloma ari, “Ilala shiriimba shino shili isaatsi iye khuuteekhelamo. Ne abo beesi inywe mwamala khukhwiira bababebotookheleele, nibo tsinyama. Ne inywe singene mumenye mu shiriimba muno ta, akhali ise ikhaabatuume ibulafu washo.

⁸Inywe mwaarya busoolo; ne ise intsya khubarereera inywe busoolo khubebwakala.

⁹Ise ikhaabaruse inywe khukhwaama mukari mwe shiriimba, imbawaaneyo mu makhono ke babaandu beesi mukhamanya ta. Kane ise imbakhalile inywe kumusaango kwe khuufwa.

¹⁰Inywe mukhaafwiile mu linaambo lyeenywe Isiraeli lilyeene nga mufwa khulwe buusoolo. Nio lwanyuma mumanye muri ise ndi niye Umukasya.

¹¹Shiriimba shino seshikhaabatseete inywe, musaambo yeesi isaatsi itseetamo tsiinyama ta, namwe inywe simuliba nga nibo tsiinyama tsye mu shiriimba ta. Ise ikhaabaweele inywe shitaambiso mu liloba lya Isiraeli lilyeene.

¹²Kane shino shikile inywe mumanye muri ise ndi niye Umukasya. Khulwekhuuba inywe simwaloondelela bilakilo byaase, namwe mwakhola byeesi ise imbaleekela inywe ta. Akhali indi inywe mwayibirisa khuuloondekhana ni indeekela iye kamanaambo kakaabebotokheleele inywe.”

¹³Ise ni naba nga ishikhola buŋoosi ubwo, Pelatiya umusoleeli uwa Benayiya wekhupa aasi waafwa. Kila ise ingwa aasi mafuumala, ingukuula ni likono lye angaaki, nga inoma indi, “Aaa Umukasya Wele, uwe ukana khukhwiira ikhaba abo babaaramawo mu Isiraeli ubamalewo?”

¹⁴Umukasya waanganikhayo isi ise luundi, nga aloma ari,

¹⁵“Mwaana w'omuundu, bebulebe boowo, bebulebe boowo babeene, ikhaba ba Isiraeli bashoowo babaali ni nawe mu bubowe, ni naabo babaali mu Yerusalemu balikho ni byeesi balikho baloma. Balikho baloma bari, ‘Abo babaali mu bubowe bali aleeyi naabi sibanyala besaaya Umukasya ta. Umukasya waakhuweele ifwe liiloba lino khuuba lilyeefwe.’

¹⁶“Nashiryo, ari iwe boolela baabowe bashoowo byeesi ise ndikho inoma. Ikhaba nga ise niye uwabarusa mu liloba lyaabwe nabasiindikha mu manaambo kakaandi kakaali aleeyi; ikhaba nga ise nabasalanisa mu manaambo kakaandi, ne shitweela busa ise niloosela khuuba akari mu nibo mu manaambo keesi baatsya khumenyamo.

¹⁷“Nashiryo baboolele sheesi ise Umukasya Wele indikho imbaboolela nibo. Ise ikhaababuusaase khukhwaama mu manaambo kakaandi, imbareere khukhwaama mu manaambo keesi mwasalanila mwiikyele lituuli litweela, ise imbakobosele inywe liiloba lya Isiraeli.

¹⁸Nga bakoboole ano khukhwaama iyo, bali ni khukhwisisakula bye bunyaalu byoosi ni bye mbikho byoosi byeesi baakhola.

¹⁹Nio akile ise imbaremo nibo kimyooyo kimishaakha ni intsambaasa ishaakha. Ise ikhaarusewo mu buulamu bwaabwe kimyooyo kikyakhuna nga libaale, imbawe kimyooyo kikinyala kyaloondelela byeesi ise inoma.

²⁰Shino kane shikile baloondelele indeekela yase naluundi bakhole byeesi kamakaambila kaase kaloma. Bakhaabe babaandu baase, ni nase ikhaabe Wele waabwe.

²¹Ne abo babaali ni kimyooyo kikikana naabi khuuloondelela bye bunyaalu ni khuukhola ibyo bibiili bye mbikho, ise ikhaabawe shitaambiso khulwe bibiindu byeesi bakhola.” Bibiindu bino Umukasya Wele niye ubikanikhile.

²²Lwanyuma lw'ebyo bakeruubi baabayuula tsindaha tsaabwe baapamburukha, nga ni kimikuwu kyatsana kitsya ni nabo. Buwaanga bubuutsasa nga bwokesanisa buri Wele uwa Isiraeli aliwo, abe buli angaaki e bakeruubi.

²³Kila shiriifwa sha Wele shaarura khukhwaama akari mu shiriimba, shaatsya sheemikha khu lukoongo luluuli ibwamanyaanga we shiriimba.

²⁴Mu khubonekhelwa ukhwo, umwooyo wa Wele waasuta ise mu ngaaki, waantsisayo mu Babulooni isi baabowe bashaase. Ari khubonekhelwa khweesi ise nafuna khwangoraanakho.

²⁵Ise naboolela abo abe babaali mu bubowe bibiindu byoosi byeesi abe Umukasya antsokesanisile ise.