Read lumasaaba Ezekeli 12 Bible Online

Ezekeli 12 - lumasaaba bible

Ezekeli 12

¹Umukasya waanganikhayo isi ise, nga aloma ari,

²“Mwaana uw'omuundu, iwe umenya akari mu baandu babaali banabumiinyi. Bali ni tsimoni, ne sitsibona ta; bali ni kamaru, ne sikawulila ta.

³Khulwekhuuba bali babaandu banabumiinyi. Ni nashiryo, iwe bowa bisutwa bibe nga by'omuundu isi balikho bayila mu bubowe mu shibala shishiindi. Rakikha lukyeendo lwoowo nga antsye bushiili khukhwilabula ta, utsye nga babaandu boosi baakhuloleleele. Uli ni khukhwaama mu shifwo shoowo mweesi iwe umenya, utsye mu shifwo shishiindi busa nga boosi baboone. Winyoola isho kane shikile bamanye bari bali lituuli lye banabumiinyi.

⁴Uli ni khubowa bisutwa byoowo bibe nga by'oyo utsya mu bubowe mu shibala shishiindi nga antsye ashiili kumuusi, babaandu boosi bakhubone. Angoloobe uli ni khuururawo utsye nga umuundu n'atsya mu mubowe mu shibala shishiindi, nga boosi baboone.

⁵Rundura inuma mu litikiiyi lye intsu yoowo nga boosi baboone.

⁶Khayo boosi babone nga iwe ura bisutwa byoowo khu mayi koowo, urure utsye ibulafu mu khumasi. Uli ni khubowa tsiimoni tsyoowo nio ulekhe khubona isi ulikho utsya ta. Khulwekhuuba ise ingana iwe ube khaabonelo isi ba Isiraeli boosi.”

⁷Ise naakhola nga Umukasya n'andakila ise khuukhola. Naarusa bisutwa antsye kumuusi, byaaba nga by'oyo ulikho utsya mu bubowe mu shibala shishiindi n'akhola. Angoloobe eene awo, nga antsye bulikho bwilabula, ise naarundura inuma muntsu yase nga inaambisa kamakhono kaase, naabiriramo. Naara bisutwa byaase khu mayi naatsya nga boosi baboone.

⁸Antsye ni bwasha kumutishinyi, Umukasya weetsa waanganikhayo, nga aloma ari:

⁹“Mwaana uw'omuundu, banabumiinyi be linaambo lye ba Isiraeli sibaakhureebire iwe bari, ‘Ulikho ukhola shiindu shiina ishi’ ta?

¹⁰Iwe baboolele nibo sheesi ise Umukasya Wele, indikho imbaboolela nibo. Buurume buno buli bw'omuwuli uli mu Yerusalemu ni babaandu babaamenyamo boosi.

¹¹Iwe baboolele uri sheesi iwe ukholile khali khaabonelo khe bibiindu bibikhaabakholikhe khu nibo. Bakhaawaambibwe, bayilibwe mu bubowe mu shibala shishiindi.

¹²N'umuwuli uuli khuubawula imbuka yino, akhaatwiikhe bisutwa byeewe khwibeka mu shiilima, naye atsye mu bubowe, nga abirira mu numa isi balimukholela mu litikiiyi. Akhaabimbilile tsiimoni tsyeewe alekhe khubona isi ali khuutsya ta.

¹³Ne ise ikhaareke buuliba bwase ibweeni weewe imuwaambisilemo. Nio ise imuyile mu shiriimba she mu shibala Babulooni. Akhaafwiile ibweene iyo, nga ashiili khushibonakho na khushibonakho ta.

¹⁴Ise ikhaasalanise khu buli luwaande abo beesi aaraamba ni nabo mu buwuli, ni babaamuwa kamakhula, ni nabo babaamutseeta niye, ni babaandu boosi, bali baweentsa nga bakana bari babeere.

¹⁵“Nga ise naamalile khuubasalanisa mu manaambo kakaandi ni mu liloba lye babaandu babaandi busa, awo nio bamanye bari ise ndi niye Umukasya.

¹⁶Ne ise ikhaalekhewo bafwiiti bari khu nibo bawone busoolo, ni intsala, ni buulwaale buubi naabi, nio nga boolile mu manaambo mweesi bali khuutsya, banyalise khukhwibiiyisa bibiindu byaabwe bye mbikho byeesi baakhola. Ikhumaliilisa kane bafukiilise bari ise ndi niye Umukasya.”

¹⁷Umukasya waanganikhayo isi ise luundi nga aloma ari:

¹⁸“Mwaana uw'omuundu, nikina busa nga uli khuulya biilyo, naluundi nga uli khuunywa kameetsi, nikina khulwe khuurya.

¹⁹Boolela babaandu be linaambo lyoosi uri buurume buno bwaama isi Umukasya Wele, nga buwaamba khu beekhali be mu Yerusalemu, babashiimenya mu Isiraeli. Bakhaalye biilyo byaabwe nga bali ni khuurya khuukali, naluundi banywe kameetsi nga bali ni khunikina khuukali. Bibiindu bibiili mu liloba lyaabwe byoosi bikhaahele biwewo, khulwekhuuba babaandu babaamenyamo boosi bamenya buulamu bwe bubwoonaki.

²⁰Biriimba byeesi babaandu balimo ari, bikhoonakisbwe biikele kamakubili, ni liloba lyoosi likhekele busa kumubiimbi. Nio bamanye bari ise ndi niye Umukasya.”

²¹Umukasya waanganikhayo isi ise nga aloma ari:

²²“Mwaana uw'omuundu, shiina kila babaandu ba Isiraeli bali ni luulikha lululoma luri, ‘Imbuka itsya iwayo, ne bibiindu byeesi batebelesa busa sibyaamamo ta’?

²³Nashiryo baboolele uri ise Umukasya Wele, ikhaakile baakamise khuuraambisa luulikha luno. Ikhaalwakamise, balekhe khuluraambisatsakakho luundi mu Isiraeli ta. Akhali baboolele uri, imbuka ili aambi yoolile, isi ibyo byeesi batebelesa busa bikhaamemo byaŋali.

²⁴“Khulwekhuuba mu ba Isiraeli s'ikhaabeyo khuubonekhelwa khwe bubeeyi busa, namwe buŋoosi bwe bubeeyi ta.

²⁵Ne ise Umukasya, ikhaalome ilomo isi samweene imanyile, shishiindu ni shisheene shikholikhe. Banabumiinyi, mu mbuka yeenywe inyene, ise kane ikhole ibyo byeesi namala khaale khuubareewura inywe indi ikhaakhole. Ise Umukasya Wele, niye ulomile bibiindu bino.”

²⁶Umukasya waanganikhayo isi ise luundi nga aloma ari:

²⁷“Mwaana uw'omuundu, bona ba Isiraeli bambaasa bari bye khuubonekhelwa khwoowo ni buŋoosi buno, buli bwe bibiindu bibikhaakholikhe mu mbuka ili khukhwiitsa aleeyi mu moni.

²⁸Nashiryo iwe baboolele sheesi ise Umukasya Wele, indikho inoma. Singane ibewo khuuliindakho luundi ta. Byeesi inomile kane bikholikhe. Ise Umukasya Wele, niye ulomile bibiindu ino.”