Read lumasaaba Ezekeli 13 Bible Online

Ezekeli 13 - lumasaaba bible

Ezekeli 13

¹Umukasya waanganikhayo isi ise, nga aloma ari:

²“Mwaana w'omuundu, khola buŋoosi bubwikiitsa baŋoosi ba Isiraeli babaabumbaawo buŋoosi bubwaabwe busa. Baboolele barekeerese byeesi Umukasya aloma.”

³Umukasya Wele alikho aloma ari, “Nga shili she kumutaambo isi baŋoosi babaali baasilu! Baloondelela bibiindu byeesi babeene bambaasa busa, nga sibaafunilekho ni khuubonekhelwa khwoosi ta.

⁴Inywe ba Isiraeli, baŋoosi beenywe imbaamo kumukaso ta; bali busa nga tsikhipwe tsitsiimenya mu makubili ke shiriimba.

⁵Baŋoosi bano sibatseeta mu bifwo mweesi kamatikiiyi kaamala khaale khuuwumbukha, namwe baakombakha bushaakha ta. Ni nashiryo mbaawo shishinyala shaatseeta ba Isiraeli nga busoolo bwaakwiilewo khu shifukhu sh'Omukasya ta.

⁶Bali babaandu babaakanikha bye buubeeyi, ni khuubonekhelwa khweesi baloma bari bafuna, sikhuli khwaŋali ta. Bakanikha bibiindu nga baloma bari Umukasya niye ukhurumanire, ate nga ise sinaabarumanirekho ta. Ne shitweela busa, bambaasa bari ibyo byeesi baloma kane byaamemo nga ni balomile; shishiindu shishikhanyalikha shaakholikha ta.

⁷Ne ise imbaboolela nibo indi, khuubonekhelwa khweesi mufuna khuli khwe bubeeyi, ikhaba buŋoosi bweesi mukhola buli bwe buubeeyi. Inywe muboolela babaandu muri biilomo ibyo bili by'Omukasya, ikhaba nga ise mbaakhubakanikhayo ta!”

⁸Ni nashiryo, Umukasya Wele alikho aloma ari, “Khukhwaama nga byeesi inywe muloma ni bili bye bubeeyi, ni buuŋoosi bweesi mukhola nabwo ni buli bwe buubeeyi, ise s'ifukiilisana ni naywe ta.

⁹Ise kane imbe shitaambiso baaŋoosi babaakanikha bye buubeeyi naluundi ni baakhola buuŋoosi bwe buubeeyi. Ise singane imbafukiilise nibo khuuba mu lubusano lwe babaandu baase ta, namwe kamasina kaabwe singane karonebwe mu luruungo lwe kamasina ke ba Isiraeli, namwe sibalingila mu liloba lya Isiraeli luundi ta. Shino kane shikile nibo bamanye bari ise ndi niye Umukasya Wele.

¹⁰“Ilala, ilala, khulwekhubeela baŋoosi be bubeeyi abo bakila babaandu baborokha mu byeesi bakhola. Balomela babaandu bari buli shitweela shili buulayi, nga ilala isho sishilikho shaŋali na khari ta. Uri babaandu bombakha lumako lwe kumuyekhe luluyeŋaana busa, baŋoosi abo beetsa bawakhakho iraangi.

¹¹Boolela baŋoosi abo uri lumako lwaabwe ulwo lukheekhupe aasi kumubwii. Ise ikhaasiindikhe kufula kwe kamaani kameene, ni kamararara, n'ikhuungu bye kamaani.

¹²Ne lwanyuma nga lumako ulwo lwekhupile aasi kumubwi, babaandu bakhaabareebe nibo bari, ‘Ne iraangi yeesi mwawakhakho, yayeeta shiina?’”

¹³Nashiryo Umukasya Wele alikho aloma ari, “Khulwe liirima liikali, ise ikhaasiindikhe ikhuungu iye kamaani, n'ifula ingali naabi, ni kamararara kamakali, byoonakise lumako ulwo.

¹⁴Kane ise ifuniaake lumako lweesi nibo baawakhakho n'iraangi, lukwe aasi khu liloba, nio akile kumusiingi kwalwo kubonekhe. Nga lukwa, lukhaabakwiile inywe mufwiile mu bweene umwo. Shino kane shikile nibo bamanye bari ise ndi niye Umukasya.”

¹⁵Umukasya alikho aloma ari, “Musaambo iyo, ise ikhaamalile liirima lyase khu lumako, ni naabo babaaluwakha iraangi. Lwanyuma ise ikhaakhubolele iwe indi lumako lwoonakisibwile, ikhaba abo babaaluwakha iraangi nabo boonakisibwile.

¹⁶Khulwekhuuba baŋoosi be bubeeyi be mu Isiraeli baakhola buŋoosi bubuwaamba khu Yerusalemu nga baloma bari itsya khubawo lukoosi, ne nga mbaawo lukoosi ta.”

¹⁷Umukasya waaloma ari, “Ari, mwaana uw'omuundu, losa tsimoni tsyoowo isi baakhasi babaali mu Isiraeli, babaakhola bye buŋoosi. Iwe khola bye buŋoosi bibibekiitsa nibo,

¹⁸ubaboolele sheesi Umukasya alikho aloma.” Baloma uri: “Bakhasi inywe, nga shili she kumutaambo isi muli! Khulwekhuuba inywe mulukha birere bibireera bye kamakaanga bye khukwaara khu makhono. Naluundi abo boosi babaali be lisuno inywe mubakholela tsingubo tsye khukhwibiimba khu murwe, nio banyalise khuuba ni kamaani khu buulamu bwe babaandu babaandi. Inywe mukana mube ni kamaani khu bulamu ni khuufwa khu baandu baase, nga iliwo sheesi inywe mukana khuufunamo.

¹⁹Inywe muumalamo ise lukoosi lwase nga muli mu moni tsye babaandu, nio inywe munyalise khuufuna bali mukyeekhe ari ni buubuya bwe kimikaati. Mu shino inywe mwoonakisa buulamu bwe babaandu babakhiile khuuba baalamu, ne abo babandyakhiile khuufwa, mwaabalekha nga bashiili baalamu. Ni nashiryo inywe muboolela babaandu baase bibiindu bye bubeeyi, ni nabo bafukiilisa byeesi inywe muloma.”

²⁰Ni nashiryo, ari Umukasya Wele alikho aloma ari, “Ise buulamu bwase bwaabiyila biirere bye khuukwaara khu makhono byeesi inywe murukha, nio bari mube ni buunyala khu bulamu ni khuufwa khwe babaandi. Kane ise ikhanuluule babaandu abo khukhwaama mu makhono keenywe, babe baalekhuule busa nga biinywiinywi.

²¹Kane ise imbarusekho inywe tsingubi tsyeesi mubiimba khu mirwe, akile babaandu baase bekele baalekhuule, inywe mulekhe khubabaakho ni kamaani na khari ta. Shino kane shikile inywe mumanye muri ise ndi niye Umukasya.

²²“Khulwekhuuba isaambo isi inywe mumenyamo buulamu bweenywe, ikila mwaamalamo babaandu kamaani, ikhaba nga ise singana naatsiinisa babaandu abo ta. Abo babaali baboonaki inywe mwabeesamo kamaani, nga mubakumisa muri bakhashuukha baantsukha bibyoonako byaabwe nio bawonese buulamu bwaabwe ta.

²³Ni nashiryo ari khuubonekhelwa khweenywe khwe bubeeyi ni buŋoosi bweenywe bwe bubeeyi byaakamile. Ingana khurusa babaandu baase khukhwaama mu makhono keenywe, babe balekhuule. Shino kane shikile inywe mumanye muri ise ndi niye Umukasya.”