Read lumasaaba Ezekeli 14 Bible Online

Ezekeli 14 - lumasaaba bible

Ezekeli 14

¹Lwanyuma aabawo batweela khu baraangirisi be ba Isiraeli babeetsa isi ise ndi, khukhuuntsireebakho byeesi Umukasya akana babaandu bakhole.

²Kila Umukasya anganikhayo nga aloma ari:

³“Mwaana uw'Omuundu, babaandu bano baamala khuuwaanayo kimyooyo kyaabwe mu khwisaaya bifwaani. Naluundi bifwaani ibyo byakila nibo baakwa mu byoonako. Ise inyala indyeena naafukiilisa nibo baantsireeba khus'iise?”

⁴Ni nashiryo iwe bakanikheyo, ubaboolele uri Umukasya Wele alikho aloma ari, “Umu Isiraeli yeesi uwahaanayo buulamu bweewe mu khwisaaya bifwaani, naluundi nibyo byaakila umuundu uyo waakwa mu byoonako, ne shitweela busa umuundu uyo waatsya isi umuŋoosi khuumwireebakho, kane ise Umukasya, samweene imwiilemo, musaambo isi shaakhila khukhwiilamo bibuumbe ibyo.

⁵Bibuumbe ibyo byoosi byaakila ba Isiraeli bayiindurakho khus'iise, ne musaambo isi ise kane imbakobolemo, ise niyikina indi kane shibanyalise nibo khukobola isi ise babe babeyikinwa.

⁶“Ni nashiryo ari iwe boolela ba Isiraeli uri Umukasya Wele alikho aloma ari, bari inywe ni mwantsukhe bifwaani byeenywe byeesi mwisaaya, naluundi mwantsukhe bye kimisilo byoosi byeesi mukhola.

⁷Khulwekhuuba umu Isiraeli yeesi, namwe umwiitswa yeesi umenya mu Isiraeli, urura khus'iise waayila buulamu bweewe khukhwisaaya bifwaani naluundi waakila byaamureerera khuukhola bibyoonako, ne shitweela busa umuundu uyo weetsa isi umuŋoosi khukhuuntsireebakho, kane ise Umukasya samweene imwiilemo.

⁸Kane ise samweene imukhaandise, imwikese niye she khuubonelakho isi babaandi. Kane ise imuruse niye mu lituuli lye babaandu baase, nio akile inywe mumanye muri ise ndi niye Umukasya.

⁹“Ne umuŋoosi yeesi n'ikane akanikhe biilomo bye bubeeyi, ise Umukasya, samweene kane imbe nawombesele busa umuŋoosi uyo. Shitweela busa kane ise imbirire mu khuraambisa kamaani kaase, akile niye ahele arurewo mu lituuli lye babaandu baase, ba Isiraeli.

¹⁰Umuŋoosi n'umuundu utsya khumwireebakho, boombi bakhaafune shitaambiso nisho shitweela.

¹¹Ise ikhaakhole shino nio akile lisaaye lya Isiraeli lilekhele awo khuutsya khwisaaya bifwaani, namwe nio balekhelawo khuukhola bibyoonako. Ne akhali ndi nio nibo babe babaandu baase, nase imbe Wele waabwe. Ise Umukasya Wele niye ulomile bibiindu bino.”

¹²Lwanyuma Umukasya waanganikhayo isi ise nga aloma ari:

¹³“Umwaana uw'omuundu, linaambo ni likhola bye bubwoonaki luundi lyaalekha khuuba liliyikinwa isi ise ta, kane ise inaambise kamaani kaase noonakise kumukhoosi kweesi lifunilamo biilyo. Shiibi isho shikile intsala yiire babaandu baamwo ni bisolo byamwo.

¹⁴Abe ikhaba basaani bataru bano, Nowa, Daneli, ni Yobu, bakhaba nga bamenya mu linaambo ilyo, bukhosefu bwaabwe abe sibunyala khuuwonesa babaandu abo ta, akhali buwonesa buulamu bwe babaandu bataru abo bonyene. Umukasya, umunyali uwa byoosi niye ukanikhile bibiindu bino.

¹⁵Namwe ise inyala naasiindikha tsisolo tsitsiilya babaandu khuuba mu shibala umwo, waakile tsiire babaandu. Shino shikile shibala shibemo buukosi buukali naabi, ikile babaandu bashaantsukhe shikele kumubiimbi.

¹⁶Abe ikhaba bari basaani bataru abo bamenya mu shibala isho, khukhwaama nga ise Umukasya Wele n'iindi umunyali uwa byoosi, abe sibanyala baawonesa ikhaba babaana babaabwe babeene ta. Abe nibo bonyene babaawonesebwa, ne shibala isho shili ni khukhwikela kumubiimbi.

¹⁷“Namwe ise inyala naasiindikha umusiku khukhwibwakala linaambo ilyo, naaloma indi khayo ibewo busoolo mu shibala isho, nio akile bwiire babaandu ni bisolo mu saambo niyo indweela busa.

¹⁸Abe ikhaba basaani bataru abo bakhaba mu linaambo ilyo mu mbuka yeesi ise ndiweelamo shitaambiso, abe ikhaba babaana baabwe sibanyala baawona ta. Akhali abe nibo bonyene babaawonesebwa.

¹⁹“Namwe abe khulwe lirima lyase liikali ise nasiindikha buulwaale buubi naabi khu linaambo ilyo, indi bwiire babaandu ni bisolo byeene.

²⁰Abe ikhaba bari Nowa, Daneli, ni Yobu baamenya mu linaambo ilyo, khukhwaama nga ise Umukasya Wele n'iindi umunyali uwa byoosi, abe sibanyala baawonesa ikhaba babaana baabwe ta. Akhali abe lwe bukhosefu bwaabwe, bawonesa buulamu bwaabwe bwonyene.”

²¹Ni nashiryo Umukasya Wele alikho aloma ari, “Kane ise isiindikhe bitaambiso byase bibifuura buubi bine khu shiriimba Yerusalemu, biire babaandu ni bibyaayo byaabwe byeene. Bili nibyo bino: busoolo, intsala, tsisolo tsitsiilya babaandu, ni buulwaale buubi naabi.

²²Ne shitweela busa, n'iiba bari iliwo batweela babaaramireyo nga bashiili baalamu, naluundi nga baawonesile babaana baabwe, nga baakhwiitsile isi iwe uli Ezekeli, yimenielesa isaambo isi beebirisamo buubi. Isho kane shikile nawe ulome uri ise naaweele Yerusalemu shitaambiso musaambo iyaŋali.

²³Nga iwe waaboone intsibirisa yaabwe imbi iyo, kane iwe wiilemo kamaani nga umanya uri shitaambiso sheesi ise nabawa nibo shaba abe shishibaakhila.” Ise Umukasya Wele samweene niye ulomile bibiindu ibyo.