Read lumasaaba Ezekeli 15 Bible Online

Ezekeli 15 - lumasaaba bible

Ezekeli 15

¹Lwanyuma Umukasya waanganikhayo isi ise nga aloma ari:

²“Umwaana uw'omuundu, n'ulekhaasa ku muzabibu ni kuusaala kukuundi kwoosi, kifwaanana namwe ta? Lusakya lwe kumuzabibu lufuurira shiina tsisakya tsye kimisaala kikiindi kikiili mwirome?

³Unyala wawaamba lusakya lwakwo waakholamo shishiindu shoosi? Unyala waakhootsamo lusaala lwe khusuungakho shishiindu shoosi?

⁴Lunyala busa khuraambisibwa nga tsiikhu. Lwanyuma lwe khukhwoosha lusakya ulwo eyi ni n'eyi, ni she akari nga shaamaliile khulwe lisuusi, ari unyala waaluraambisa khuukhola shiina?

⁵Abe nga ni luli lubuufu, abe selulikho ni kumukaso ta. Ne bona nga kumulilo kwalwoshelekho naluundi lwetsuule lisuusi, luba lwaweleelemo ilala kumukaso.”

⁶Ni nashiryo Umukasya Wele alikho aloma ari: “Nga lusakya lwe kuusaala kumuzabibu ni balubukula khukhwaama mu shisaali baalura mu mulilo lwaasha, ni nase musaambo niyo indweela, kane nikaane babaandu babaamenya mu Yerusalemu.

⁷Kane ise imbawe nibo shitaambiso nga inaambisa kumulilo; abe baakhatitukha khukhwaama isi kumulilo, ne shitweela busa kane kumulilo kubooshe. Ezekeli, nga ise naabaweele nibo shitaambiso, kane iwe umanye uri ise ndi niye Umukasya.

⁸Kane ise ikhole shibala shaabwe khukhwikela kumubiimbi busa, khulwekhuuba babaandu abo sibabeele babeyikinwa isi ise ta. Ise Umukasya Wele umunyali uwa byoosi niye ukanikhile bibiindu biindu bino.”