Read lumasaaba Ezekeli 16 Bible Online

Ezekeli 16 - lumasaaba bible

Ezekeli 16

¹Umukasya waanganikhayo isi ise luundi nga aloma ari:

²“Mwaana uw'omuundu, boolela babaandu be mu Yerusalemu buubi ni bubwoonaki bwaabwe.

³Boolela babaandu be mu Yerusalemu uri, Umukasya Wele alikho aloma ari: Inywe mwaama mu liloba lye ba Kanani, ikhaba khuusaalikha mwasaalikhila ibweene iyo. Paapa weenywe abe ali umu Amori, ne maayi weenywe abe ali umu Hiti.

⁴Iwe nga ni wasaalikha, mbaawo umuundu uwakhukhala luulela, namwe waakhusiingakho ni kameetsi ta. Mbaawo uwakhusilikhakho iwe, namwe waakhubowakho iwe mu ngubo ta.

⁵Mbaawo umuundu yeesi uwakhuwaambilako iwe shiisa shishoolesa awo, waakila waakhukholela iwe bibiindu ibyo ta. Akhali ndi khu shifukhu khweesi iwe wasaalikhilakho, baakhutuuma iwe waaba busa mwiirome, nga mbaawo ukhukana ta.

⁶“Ise ni naba nga ndi khuubira, naakhubona nga wifuufulila mu mafuki koowo. Abe iwe wehakhile kamafuki buli aandu, ne ise nakhwinaanayo, nga singana ufwe ta.

⁷Ise nakhuyeta iwe waatsowa nga shilimwa shishiili khu liloba liilayi. Iwe watsowa, waaleeha weekela umukhaana umukhulu, ni kamabeele koola khuusitowa, litsuune lyoowo lyaatsowela ilala. Ne shitweela busa abe ushiili bukhuna bubweene.

⁸“Ise ni nakobola khuukhulolakho luundi, nanyoola nga ari waatsowele, nga waayola ni khuukhwaalikha. Ise nabukula shikwaaro shase naakhuwa, iwe weboha waalekha khuuba bukhuna ta. Kila ise ikhola indakaano iye bukhwaale ni nawe, iwe weekela uwase. Umukasya Wele umweene niye ulomile bibiindu bino.

⁹“Lwanyuma ise nawaamba kameetsi naakhusiinga iwe; naakhusiingakho kamafuki abe kakaakhulikho, lwanyuma ise naakhuubita iwe tsiikhabi nga ikhuwakha kamafura.

¹⁰Kila ise ikhukwaarisa iwe bikwaaro biimiliwu naabi, naakhuwa tsingaato tsye buukusi bwe angaaki, ni she khuubowa imurwe shilayi naabi, atweela ni bikwaaro bibiindi biimiliwu naabi.

¹¹Ise nakhuwa iwe bye khukhwisaaha nio ubonekhe buulayi, nga bilimo bye khuura khu makhono, ni bye khuukwaara muumilo.

¹²Ise nakhuwa iwe intsiyi iye khuukwaara, bye khuura khumaru biimiliwu, ni lihabi limiliwu naabi lye khuura khu murwe.

¹³Ni nashiryo, iwe wafuna bye khukhwisaaha nga bili by'efeetsa n'izaabu, nga busheele iwe ukwaara bikwaaro biimiliwu naabi naluundi bye buukusi bwe angaaki naabi. Iwe weloosela waaba umumiliwu naabi, wafwaanana busa nga umenya mu lubili lw'omuyiinga.

¹⁴Bumiliwu bwoowo ubwo bwaakila iwe waamanyikhana mu manaambo koosi, khulwekhubeela ise Umukasya, niye uwaakila iwe waaba umumiliwu uryo.” Umukasya Wele umunyali uwa byoosi, niye umweene ulomele bibiindu bino.

¹⁵“Ne khulwe buumiliwu bwoowo ni khuumanyikhana naabi, iwe wekela malaaya, iwe wehaanayo mu bwamalaaya ubwo isi musaani yeesi abe ubira khu ntsila.

¹⁶Iwe wawaamba bitweela khu bikwaaro byoowo, wasaaha bifwo byoowo bye khukhwisaayilamo. Waakholela mu bikwaaro ibyo bwamalaaya. Bwamalaaya bweesi iwe wakhola, buli bwe shikuuka she angaaki naabi, nga mbaawo abe umuundu yeesi abe uwakholatsakakho aryo ta, namwe nyaanga shilibawo ukuundi ulikhola bwamalaaya bwoole abweene awo ta.

¹⁷Iwe wawaamba ifeetsa n'izaabu byeesi abeele ise nakhuwa iwe, wekholelamo bifwaani bye basaani, iwe waakhola ni nabyo bwamalaaya.

¹⁸Iwe wawaamba bikwaaro biimiliwu byeesi ise nakhuwa iwe, waabibiimba khu bifwaani ibyo. Naluundi iwe wawaanayo isi bifwaani ibyo, kamafura ni bubaani abe byeesi ise nakhuwa iwe.

¹⁹Ise nakhuwa iwe biilyo biilayi naabi, nga mulimo buufu buunose naabi, kamafura ke kuusaala ku olivu, ni bubuushi bwe ntsushi. Ne iwe wawaamba bino byoosi waabiwaanayo nga isaayilo isi bibuumbe ibyo, uri nio ubiikhoyese nibyo.” Umukasya Wele umunyali uwa byoosi, niye umweene ulomele bibiindu bino.

²⁰“Lwanyuma iwe wawaamba babaana besiinde ni bakhaana beesi iwe wasaalila ise, wabawaanayo nga tsisaayilo isi bifwaani ibyo khuulya. Iwe wambaasa uri abe bwamalaaya bweesi iwe wakhola sikuli kumusaango kumukali isi ise ta,

²¹kila wawaamba babaana baase waabeera waabawaanayo nga isaayilo intsoshe isi bifwaani?

²²Mu khukhola bye bunyaalu byoowo ni bwamalaaya bwoowo, iwe siwakhebulilakho buulamu bweesi iwe wabamo nga ni waba ushiili umwaana, isi wabeela nga uli bukhuna, s'ulikho ni shishiindu shoosi ta, nga wifuufulila busa mu mafuki koowo kameene.”

²³Umukasya Wele alikho aloma ari, “Iwe nga uli mu mutaambo kumukali! Nga uli mu mutaambo kumukali! Lwanyuma lwe khuukhola bwamalaaya ubwo bwoosi,

²⁴iwe weyombekhela biifwo bye khukhwisaayilamo bifwaani ni khuukholelamo buyeeyani, khu buli kumukhoosi kwe mu shiriimba.

²⁵Buli isi kumukhoosi kwe mu shiriimba kwaakama, iwe weyombekhelayo biifwo biimiliwu naabi naluundi iwe wawaamba buumiliwu bwoowo, waabuyila mu buyeyani. Iwe wamweene wewaanayo isi buli musaani ubira khu ntsila, uryo weloosela busa ni bwamalaaya bwoowo.

²⁶Mu khukana uri nio umaambise ise lirima, iwe wakhola buyeyani ni babesanwa boowo be lukhobe ba Misiri. Shino shalooselakho busa bikholwa byoowo bye buyeyani.

²⁷“Ni nashiryo, ari ise nenyusa kumukhono kwase angaaki naakhuwa iwe shiitaambiso. Ise naakhurusakho iwe tsiikhabi abe tsyeesi ise nakhuwa iwe. Ise naakhuwaanayo iwe mu makhono ke baasiku boowo be kumuluungo, ba Filisitiya. Ne ikhaba nabo, khu lwe saambo imbi naabi isi iwe wibirisamo, nabo yabawaambisa kamaŋaanyu.

²⁸“Iwe ni waba nga ushikaniilila busa, watsya waakhola buyeyani ikhaba ni ba Asiriya nabo. Ikhaba nga iwe wakhola buyeyani ni nabo, ne iwe warama busa nga isho seshikhumala ta; nga ushikaniilila busa.

²⁹Iwe watsya waakhola buyeyani ni ba Babulooni nabo. Ne shitweela busa baalekha khukhuumala ta; iwe waarama nga ushikaniilila busa.”

³⁰Umukasya alikho aloma ari. “Kumwoyo kwoowo nga kwikoomba naabi basaani, kila ubona uri iwe wakhola bibiindu bino byoosi biri, bibiili bikholwa by'omuyeyani ukhalimo kamaŋaanyu ta!

³¹Khu buli kumukhoosi kwe mu shiriimba iwe wombekhakho biifwo bye khukhwisaayilamo bifwaani ni khuukholelamo buyeyani. Ne ate abe mu buyeyani bwoowo, s'ufukiilisa baakhuwa kamapeesa nga bamalaaya babaaramire ni bakhola ta.

³²Iwe uli busa nga umukhasi ukhali umwiyikinwa ta, uwitubaasa ni babaandu b'ebulafu busa, ne waalekha khukhwitubaasa n'umuseetsa weewe umweene ta.

³³Tsindaalo, basaani nibo babaakula bamalaaya; ne iwe niye uwakula bakanwa boowo nga ubawa biwaanwa, nga ubakulilila uri beetse isi iwe khukhwaama buli aandu oosi, nio akile iwe witubaase ni nabo.

³⁴Nashiryo iwe uli umumalaaya uwe saambo ikiindi busa, ikhafwaanana ni tsitsiindi ta. Mbaawo umusaani uwakhwiitsayo ari ukhole ni naye buyeyani ta, akhali iwe niye uwabakulilila.”

³⁵Nashiryo ari, umumalaaya Yerusalemu iwe, rekeeresa bibiindu byeesi Umukasya alikho aloma.

³⁶Umukasya alikho aloma ari: “Iwe weyabula bikwaaro byoowo byoosi waarama bukhuna busa, waswaala mu moni tsya buli mutweela. Iwe webirisa nga umumalaaya, wewaanayo isi bakanwa boowo n'isi bifwaani byeesi abe wisaaya. Iwe weera babaana boowo waabawaanayo nga tsisaayilo isi bifwaani ibyo.

³⁷Ni nashiryo, bona ari ise imbuusaasa atweela abo boosi babaabakho bakanwa boowo nga wihaanayo isi bali, abo boosi beesi iwe wakana, ni naabo beesi abe iwe wabiyila. Kane ise imbabusaase nibo atweela khukhwaama buli luwaande, beetse bakhukhaandise iwe, nio lwanyuma ise ikhwabulemo iwe bikwaaro, nio banyalise khuukhubona iwe nga uli bukhuna bubweene.

³⁸Kane ise ikhukhalile iwe kumusango kweesi bakhalila bakhasi babaarura mu bukhwaale. Baatsya baakhola bye buyeyani, naluundi beera babaandu. Ni khulwe lirima lyase liikali, kane ise ikhukhalile iwe kumusango kwe khuufwa.

³⁹Lwanyuma ise kane ikhuwaaneyo mu makhono ke bakanwa boowo, bakhukholowe aasi khukhwaama muntsu tsyoowo tsye angaaki itsyo, naluundi batikulule biifwo abe byeesi iwe ukholelamo buyeyani. Kane bakhurusekho iwe bikwaaro, bayile ni biimiliwu byeesi iwe wisaaha, bakhulekhe nga uli bukhuna busa, nga mbaawo sheesi uli ni nasho ta.

⁴⁰“Baakanwa boowo bakhaakhusiindikhile iwe lituuli lye babaandu liitse, liliikhukhupa iwe kamabaale, naluundi bakhutaanyake iwe nga buli mutweela araambisa luurima lweewe.

⁴¹Bakhooshe tsintsu tsyoowo naluundi bafukiilise bakhasi baakali babone shitaambiso sheesi bakhuweele iwe. Ise ikhaakile iwe waakamise khuukhola buyeyani, naluundi ulekhele awo khukhwikulila basaani uri witubaase ni nabo.

⁴²Ni nashiryo mu khukhola indyo, kane ise imbe nawosawosele lirima lyase, iba ndi ise singene ikhukoboleyo luundi khulwe lirima ta. Kane nileyo imbe umuwolu busa, indekhe khukhwookesanisa lirima luundi ta.

⁴³Mu khukhola bibiindu bino, iwe wamaambisile ise lirima liikali naabi, khulwekhuuba iwe waayibilila buulamu bweesi iwe wabamo nga ni waba ushiili umwaana umukyeekhe. Ni nashiryo kila nase nilihaasile khulwe buraambi bwoowo buubi. Iwe waloosela shiibi khu shiindi, nga wokesanisa kumuluungo kumukali mu khwikoomba basaani! Ise Umukasya Wele niye ukanikhile bibiindu bino.”

⁴⁴Umukasya waaloma ari, “Yerusalemu, mu ndikha tsyeesi babaandu bakhaaraambise, mukhaabemo khuuloma khuri, ‘Mweesi ikhulu yabirira, nimwo mweesi inyana isaamba.’

⁴⁵Iwe wibirisila ilala buubi nga maayi woowo ni aba. Khulwekhuuba niye ekaana umuseetsa weewe ni babaana beewe. Uli babandaayo baabili babekaana baseetsa baabwe ni babaana baabwe. Maayi weenywe abe ali umu Hiti, ne paapa weenywe yaba umu Amori.

⁴⁶“Khu bandaayo abo, umukhulu niye Samariya, nga yuno atweela ni babaana beewe, abe bamenya ingaaki woowo. Ne wandaayo umukyeekhe niye Sodomu, nga yuno abe atweela ni babaana beewe, bamenya imwaalo woowo.

⁴⁷Ne iwe siwaakamisa busa khukhwibirisa buubi nga nibo abe ni beebirisa ta, namwe khuukhola bye bumoyaani byeesi abe nibo bakhola ta. Mu mbuka ingeekhe iri iwe webirisa buubi khuubaminyisakho nibo.”

⁴⁸Umukasya Wele alikho aloma ari, “Ise naashimanya ndi wandaaye woowo Sodomu ni bibyaalo bibimwibotokheleele, sibaakhola bubwoonaki bubuminyisa bubwoowo ni babaana boowo, byeesi mwakhola taawe.

⁴⁹Kumusaango kweesi waandaaye woowo Sodomu aasaala nikwo kuno: niye ni babaana beewe beniinisa naabi angaaki, baaba ni biilyo biikali naabi, baamenya mu lukoosi luukali naabi, ne baalekha khukhwiinaanayo isi bataambi ni babaandu be aasi ta.

⁵⁰Baaba babeniinisa angaaki naabi, baryo baakhola bibiindu bye bunyaalu mu moni tsyase. Ni nashiryo ise ni nabona indyo, nabahesa boosi.

⁵¹“Bubwoonaki bweenywe be mu Yerusalemu abe bwoolisamo kimiluundi kibili nga waalekhaasile ni bweesi babaandu be mu Samariya baakhola. Nga waalekhaasile bubwoonaki bweenywe khu bwa Sodomu ni Samariya, bubwaabwe bwabakho aasi, bafwaana busa nga babaakhonakakho shishiindu ta.

⁵²Ni nashiryo ari muli ni khukhwikhaliilikha shitaambiso sheenywe. Bibyoonako byeenywe bili bye angaaki naabi khuuminyisakho bye bayaaya boowo, waakila nibo babonekha nga babaakhalikho ni kumusaango kwoositsana ta. Ni nashiryo muli ni khukhwikhaliilikha shitaambiso sheenywe, khulwekhuuba nga waalekhaasile, bayaaya beenywe babonekha nga babaakhalikho ni bibyoonako byoositsana ta.”

⁵³Umukasya waalomela be mu Yerusalemu ari, “Ise ikhaakile be mu Sodomu ni bibyaalo bibibetokheleele, atweela ni Samariya ni bibyaalo bibebotokheleele, bafune buyiindifu bwaabwe bushaakha. Ikhaba nanywe ise ikhaabakoboselewo buyiindifu bweenywe bushaakha.

⁵⁴Shino shikhaakile kamaŋaanyu kabawaambe inywe khulwe isaambo yeesi mwebirisamo buubi. Isho shiisemo Samariya ni Sodoma kamaani, shibawosaawose nibo.

⁵⁵Sodomu ni babaana beewe boosi, ni Samariya ni babaana beewe boosi, ise ikhaabakobosele bye buyiindifu bwaabwe, babe nga ni baaba amakiboole. Ikhaba iwe nawe ni babaana boowo, ise ikhaabakobosele bye buyiindifu bweenywe, mube nga ni mwaba makiboole.

⁵⁶Iwe isi wabeela nga uli mu khwiyiinga khwoowo, abe utsekhelela naabi Sodomu.

⁵⁷Ne ari buli mutweela wamanya nga iwe n'uuli umwoonaki. Ne ari nawe wayikela nga nibo ni bahesanwa baabwe ni bali. Ari linaambo lye ba Siriya ni lye ba Filisitiya, ni kamanaambo kakaandi, bakhulekelesa iwe.

⁵⁸Uli ni khuweebwa shitaambiso khulwe khukhwookesanisa kumuluungo kumukali mu khwikoomba basaani, ni bumoyaani byeesi iwe wamala khaale khuukhola. Ise Umukasya samweene niye ulomile bibiindu bino.”

⁵⁹Umukasya, Umunyali uwa byoosi, alikho aloma ari, “Kane ise ikhubirise musaambo isi wakhiile khuubirisibwamo, khuuloondekhana ni bubwoonaki bwoowo. Khulwekhuuba iwe walekelesa indakaano isi wakhola ni nase, waakifuniaaka.

⁶⁰Ne ise khulwase singene ifuniaake indakaano isi nakhola ni nawe nga ushiili umukyeekhe ta. Naluundi ise kane khole ni nawe indakaano ikane imale biilo ni biilo.

⁶¹Lwanyuma uri ushebulila intsibirisa yoowo imbi iyo, kamaŋaanyu kakhuwaambe, nga ise imaamba baakooko boowo boombi, umukhulu n'umukyeekhe, imbakhuwaambise iwe nga babaana boowo. Ikhaba nga shino seshili mu ndakaano isi ise nakhola ni nawe ta.

⁶²Ise ikhaakhole indakaano ni nawe, ni nawe ukhaashimanye uri ise ndi niye Umukasya.

⁶³Ise ikhaakhwiyakhile iwe bibyoonako byoowo byeesi wakhola. Ne iwe n'ukhabishebulile, kamaŋaanyu kakhaakhuwaambe waasamilile busa.” Ise Umukasya Wele, niye ukanikhile bibiindu bino.