Read lumasaaba Ezekeli 17 Bible Online

Ezekeli 17 - lumasaaba bible

Ezekeli 17

¹Umukasya waanganikhayo isi ise nga aloma ari:

²Umwaana uw'Omuundu, entselesayo kumunayi, uboolele ba Isiraeli luukano.

³Baboolele sheesi ise Umukasya Wele indikho inoma. Lutweela aabawo kuukhosi kuuboofu naabi, nga kuli ni tsindaha tsindeeyi naluundi tsye kamaani, nga kamafuumbo kaakwo kali ke tsiraangi tsingali, naluundi nga kabonekha buulayi, kukwapamburukha kwaatsya mu Lebanoni, kweema imurwe we kuusaala ku kedali.

⁴Kuukhosi ukwo kwasaasula lusakya lulushiili lulwaana khukhwaama imurwe we kuusaala ukwo, kwaalusuta kwaaluyila mu shibala she babaakhola bye khuukulaana, kwaalubyaala mu shiriimba shitweela.

⁵Kuukhosi ukwo kwasuta ni buumiitso khukhwaama mu Isiraeli, kwaatsya kwaabubyaala khu liloba liilayi, kwaabubyaala mu shifwo shishiilimo kameetsi kakaamala. Kwaabubyaala nga ni babyaala bisaala bye mu mubiimbi.

⁶Buumiitso ubwo bwaarura bwekyela kumuzabibu kukwalaamila busa aasi. Tsisakya tsyakwo tsyatsowa nga tsyaaloleeleele isi kuukhosi kwatsana, ni tsiindi tsyeekha aasi naabi mu liloba. Nashiryo kwaba kumuzabibu kumulayi, kwaarakho tsisakya ni kamasaafu.

⁷“Ne yabayo kuukhosi kukuundi nakwo kwe kamaani, nga kuli ni tsindaaha tsye kamaani, ni kamafuumbo kamakali. Ne she khukhwiyaanga, kumuzabibu kwatsana kwashuusa tsiindi tsyakwo isi kuukhosi kukuundi kuno. Kumuzabibu kwashuusa ni tsisakya tsyakwo tsyaloleeleela isi kuukhosi kukuundi ukwo, nga kwiyikina kuri kane kuukhosi kukuundi ukwo kukuwe kameetsi kamakali kakaafuurisakho ako abe kakaali isi kwabyaalibwa.

⁸Ne abe kwaamala khaale khubyaalibwa khu liloba liilayi, liliili ni kameetsi kakaamala, nga bari nio kutsowe buulayi kwaame bibyaamo, naluundi kube kumuzabibu kwe kamaani.

⁹“Ni nashiryo ari ise Umukasya, ndi khuureeba ndi: Kumuzabibu ukwo kukhaatsowe namwe ta? Wambaasa uri singane kuukhosi kukuunyoowa ukwo kukhuule kumuzabibu ukwo, kurusekho bibyaamo, kufuniakekho tsisakya, kukulekhe kuniaale ta? Seshikoombisa liiye liikali namwe linaambo lye kamaani khuukukhuula ta.

¹⁰Ilala, ilala, abe baakhakubyaala mu shifwo shishiindi, wambaasa uri kane kutsowe? Wambaasa uri singane kuniaale kwoome waangu busa, nga ikhuungu iye kamaani yeetsile ta?”

¹¹Kila Umukasya anganikhayo luundi nga aloma ari:

¹²“Ezekeli, reeba banabumiinyi abo uri, inywe mwaamanya sheesi luukano ulwo lumanyisa? Baboolele uri, bona umuyiinga uwa Babulooni eetsa mu Yerusalemu waayila umuyiinga weenywe ni baraangirisi babaandi, baatsya mu Babulooni.

¹³Umuyiinga uwa Babulooni uyo waabukula mutweela khu be mu ntsu y'omuyiinga weenywe, waakhola ni naye indakaano, waamwitsubisa ari kane akholatsake byeesi bamulakila. Bawaamba babaandu babaandi abe babaamanyikhaanemo, baabayila nga baabowe.

¹⁴Shino shakholekha nio linaambo lilekhe khuminyaala luundi ta, naluundi khuubona khuri batsiila khu biindu bibiili mu ndakaano.

¹⁵Ne ndi umuyiinga umushaakha uwa Yuda yuno waaminyaalila ba Babulooni, nga asiindikha baarume beewe ari batsye mu Misiri baamiseyo tsiŋwaaŋwa ni liiye liikali. Umuyiinga umushaakha yuno aaba kane anyalise khuukhola isho? Umuundu ukhola bibiindu nga ibyo, banyala baamulekha waatsya busa? Anyala aryeena waafuniaaka indakaano, naluundi waalekha khufuna shiitaambiso ta?”

¹⁶Umukasya, umunyali wa byoosi alikho aloma ari, “Khukhwaama nga ise n'iindi Wele uliwo biilo ni biilo, umuyiinga uyo ali ni khufwiila mu Babulooni, khulwekhuuba aafuniaaka khukhwitsuba khweesi abe aakhola, n'indakaano abe isi niye aamala khaale khuukhola. Aakikhola n'umuyiinga wa Babulooni uwamura niye mu buwuli, waamwikhasa khu shitsoloŋo.

¹⁷Ikhaba liiye lye kamaani lya Faraawo umuyiinga uwa Misiri, singene linyalise khuumuyeeta mu busoolo nga ba Babulooni bebwakaala ta. Shino shikhaabe nga baamalile khubuusa kuuloba kwe khuniinilakho, bebotokheleele shiriimba nga baayabile buurwi, bari nio banyalise khukhwiira babaandu baakali.

¹⁸Khulwekhuuba niye aalekelesa khukhwitsuba khweesi abe aakhola naluundi waafuniaaka indakaano. Niye ali ni khuuweebwa shitaambiso khulwekhuuba niye umweene ewaanayo waakhola bibiindu bino byoosi.”

¹⁹Nashiryo, Umukasya Wele alikho aloma ari, “Ilala, ilala, khukhwaama nga ise samweene n'iindi Wele uliwo biilo ni biilo, kane ise imuwe niye shiitaambiso khulwe khuulekelesa ni khufuniaaka indakaano isi niye aakhola nga etsuba mu lisina lyase.

²⁰Ise kane indeke kumureko kwase imuwaambilemo. Lwanyuma ise imuyile mu Babulooni, imukhalile kumusaango khulwe khukhuundyamo ise luuwomelo, lwe khuulekha khuuba umwiyikinwa ta.

²¹Basilikhale babaaminyisa buulayi khukhwaama mu lihe lyeewe bakheribwire mu busoolo, ne babaakharamewo bakhaasalanisibwe khu buli lubeka lwe shiibala. Nio shino shikile inywe mumanye muri, Ise, Umukasya, niye ukanikhile bibiindu bino.”

²²Umukasya Wele umunyali wa byoosi alikho aloma ari: “Ise samweene ikhaafune lwayooyo khukhwaama imurwe we kuusaala kufigi kukufuurisa buuleeyi, intsye indubyaale khu lukiingi luluuli luleeyi naabi,

²³nga luli mu linaambo lya Isiraeli. Lukhaatsowe tsisakya lwaame bibyaamo, lwiikele kuusaala ku kedali kwe kamaani naabi. Biinywiinywi bya buli saambo bikhoombakhe biiswi byabyo mu kuusaala kuno, bimenye mu bweene umwo.

²⁴Nio kimisaala kyoosi mu shisaali kimanye kiri ise Umukasya, inyala naawaamba kimisaala kikiili angaaki, naakikhisa aasi, naluundi naawaamba kikiili aasi, naakiniinisa angaaki. Naluundi ise inyala naawaamba kimisaala kikiili buulayi, naakikhola kyooma; ni n'ekyo kikiili kimyoomu, naakikhola kyekela kikiili buulayi. Ise Umukasya, samweene ulomile bibiindu bino, naluundi kane ise ikhole bibe biryo.”