Read lumasaaba Ezekeli 18 Bible Online

Ezekeli 18 - lumasaaba bible

Ezekeli 18

¹Umukasya waanganikhayo isi ise luundi nga aloma ari:

²“Khukhwaama mu ndikha tsyeenywe, iliwo lutweela lweesi mwikhala mwilaŋanamo nga luloma luri, ‘Basaali nibo babasaala kumusaango, ne babaana nibo babaaweebwa shitaambiso.’

³“Ari iwe baboolele uri, khukhwaama nga ise n'iindi Wele uliwo biilo ni biilo, singene muraambisekho luulikha ulwo mu Isiraeli luundi ta.

⁴Iwe shimanye uri buulamu bwe babaandu boosi buli bubwase: bwe babaana ikhaba bwe ba paapa baabwe. Umuundu ukane akhole she bubwoonaki, uyo ali ni khuufwa khulwe bibyoonako byeewe.

⁵“N'iiba bari iliwo umuundu ulikhola bye bwaŋali naluundi nga ali umukhosefu,

⁶nga s'esaaya bifwaani bye ba Isiraeli, namwe waalya khu bilyo byeesi besaayilakho, namwe wakhola bye buyeeyani, namwe wetubaasa n'umukhasi uuli khuutsya imasaaba ta.

⁷Nga umuundu uyo s'amiinikhilisa ukuundi ta, nga s'alyaakhana ta, s'eeba ta, awa abo babaali bataambi bye khuulya, ni babaali bukhuna abawa bikwaaro.

⁸Nga umuundu uyo s'ekopisa kamapeesa ari nio afunemo kamafuurisa ta, s'akhola bye bubwoonaki ta, naluundi akhola bibiindu biilayi isi buli mutweela.

⁹Nga umuundu uyo aloondelela kamakaambila kaase n'indeekela yase. Umuundu ufwaana nga yuno aba ali umukhosefu, ni nashiryo aba kane aramewo nga ashiili umulamu.” Umukasya Wele, niye umweene ulomile bibiindu bino.

¹⁰“Ne n'iiba bari umwaana w'omuundu umulayi tsana uyo wekyelile umwiifwi, naluundi umwiiri, naluundi nga akhola bye bubwoonaki bibikhali bitweela ta,

¹¹nga bili bibiindu biibi byeesi ikhaba paapa weewe akhaakholakho ta. Nga alya biilyo byeesi besaayiilekho bifwaani mu mesaayilo kaabwe, naluundi nga akhola bye buyeeyani.

¹²Nga amiinikhilisa bataambi, akhola kwe bubwiifwi, nga wekopile s'esaayo byeesi ekopile ta, esaaya bifwaani, naluundi akhola bibiindu bye bunyaalu naabi,

¹³nga wekopisile babaandi akana ari bamureerekho kamafuurisa. Ilala, ilala, umuundu ufwaana nga umweene uyo, ali ni khuufwa. Aba indi niye umweene ukholile bibiindu biibi nga ibyo, ni nashiryo ali ni khuufwa. Kumusaango kuli ni khuumukobolela umweene.

¹⁴“Ne n'iiba bari umusaani tsana uyo ali n'umwaana, waabona bubwoonaki bweesi paapa weewe akholile, waarya khuukhola bye bubwoonaki ibyo, niye webirisa musaambo ikiindi busa.

¹⁵Niye waalekha khukhwisaaya bifwaani bye ba Isiraeli, namwe khuulya biilyo byeesi besaayilekho ba wele baabwe ta. Waaba nga s'aali ni lukhobe khu bakhasi be babaandi ta,

¹⁶namwe nga s'amiinikhilisa umuundu yeesi namwe weeba shishiindu shoosi ta. Naluundi nga ayeeta abo babaakhali ni biilyo ta, ni nabo babaakhali ni bikwaaro ta.

¹⁷Nga s'ewaambila mu bye bubwoonaki byoosi ta, naluundi s'ekopisa ari nio afune kamafuurisa ta. Nga aloondelela bilakilo byaase, n'indeekela yase. Umuundu uyo aba ali ni khuurama nga ashiiliwo umulamu: aba singane afwe khulwe bubwoonaki bwa paapa weewe ta.

¹⁸Ne khukhwaama nga paapa weewe n'aakhola bye butsoonwaaki, weeba bya beene, waakhola bibiikhali biilayi ta khu baandu babaandi, ali ni khuufwa khulwe bibyoonako byeewe.

¹⁹“Ne inywe mwireeba muri, ‘Shiina kila umwaana akhafuna shiitaambiso khulwe bibyoonako bya paapa weewe?’ Khulwekhuuba umwaana aba waakholile bibiindu biilayi byeesi ise ingana. Aba wetsiliilisile naabi mu khuuloondelela bilakilo byaase, ni nashiryo s'akhila khuufwa ta.

²⁰Uyo ukhola bye bubwoonaki niye uli ni khuufwa. Umwaana s'aliweebwa shiitaambiso khulwe bibyoonako bya paapa weewe, namwe paapawe s'aliweebwa shiitaambiso khulwe bibyoonako by'omwaana weewe ta. Umuundu umukhosefu umweene alifuna biilayi khulwe bukhosefu bweewe, ni nooyo uli umwoonaki, umweene alifuna shitaambiso khulwe bubwoonaki bweewe.

²¹“Ne n'iiba bari umuundu umwoonaki waashuusilekho buulamu bweewe, waantsukha bye bubwoonaki byoosi byeesi aamala khuukhola, waaloondelela kamakaambila kaase, waakhola byeesi ise ingana, umuundu uyo singane afwe ta, kane arame nga ali umulamu.

²²Kane ise imwiyakhile niye bubwoonaki bwoosi bweesi niye aamala khuukhola, arame nga aliwo umulamu, khulwekhuuba aba wakholile bibiindu biilayi.”

²³Umukasya, umunyali uwa byoosi alikho abareeba inywe ari: “Inywe mwambaasa muri ise ifuna kumwikhoyo nga umuundu umwoonaki wafwiliile mu byoonako byeewe? Taawe. Akhali ise ifuna kumwikhoyo nga umwoonaki waashuusilekho buulamu bweewe, waarama nga ashiili umulamu.

²⁴“Ne umuundu umukhosefu n'antsukha bukhosefu bweewe, waakhola bye bubwoonaki, ni bibiindu bye bunyaalu byeesi baboonaki bakhola, umuundu uyo ali ni khuufwa namwe ali ni khuurama nga ali umulamu? Ali ni khuufwa khulwekhuuba aba ali ni kumusaango kwe khukhola bye bubwoonaki. Mbaawo na shitweela khu biindu bye bukhosefu byeesi akhola sheesi ise ikhaashebulile ta.

²⁵“Ne inywe mwashuukha mwaaloma muri, ‘Byeesi Umukasya akhola sibili bya ŋali ta.’ Ba Isiraeli, ni murekeerese ise imbaboolele: Ise niye ukhola bibiindu bibikhali bya ŋali ta, namwe inywe nibo babaakhola bibiikhali bya ŋali ta?

²⁶Nga umuundu umukhosefu waantsukhile buukhosefu bweewe, waakholile bibiindu bye bubwoonaki, umweene niye uli ni khuufwa khulwe byeesi akholile. Ali ni khuufwa khulwekhuuba aba waakholile bye bubwoonaki.

²⁷Naluundi, nga umuundu umwoonaki waashuusilekho buulamu bweewe, waantsukha bye bubwoonaki, waakhola bibiindu biilayi, umuundu uyo aba singane afwe ta.

²⁸Aba singane afwe ta, waarama nga ashiili umulamu, khulwekhuuba aba wambaasile khu bwoonaki bweewe, naluundi waashuusakho waabwakamisa.

²⁹Ne shitweela busa ba Isiraeli inywe muloma muri, ‘Byeesi Umukasya akhola sibili bya ŋali taawe. Lisaaye lya Isiraeli, ise niye ukhola bibiindu bibikhali bya ŋali ta, namwe inywe nibo babaakhola bibikhali bya ŋali ta?’

³⁰“Ni nashiryo, ise Umukasya, kane imbakhalile nywe be lisaaye lya Isiraeli kimisaango, nga kitsiila buli mutweela khulwe bibyoonako byeewe. Nga simwebiyisile mwaakamisile bye bubwoonaki taawe, kane mufwe khulwe bubwoonaki bweenywe.

³¹Ni mushuusekho mwaakamise bye bubwoonaki byoosi byeesi mukhola, murakikhe intsambaasa imbyaakha, ni buulamu buushaakha. Ba Isiraeli, shiina kila inywe mukana khuufwa khulwe bibyoonako byeenywe?

³²Umukasya, umunyali uwa byoosi alikho aloma ari: Ise s'iifuna kumwikhoyo kwoosi khulwe khuufwa khw'omwoonaki taawe. Ni nashiryo ni mwantsukhe bibyoonako byeenywe, nio akile mulekhe khuufwa ta.”