Read lumasaaba Ezekeli 19 Bible Online

Ezekeli 19 - lumasaaba bible

Ezekeli 19

¹Umukasya waanomela ari ni wiimbe kumweenya kwe kumutaambo, nga kuwaamba khu baraangirisi ba Isiraeli babili.

²Maayi woowo abe ali busa nga italanyi ikhasi iye kamaani naabi, akari mu talanyi tsiseetsa, iyanyalisa khuutsowesa tsinyana tsyayo buulayi!

³Waatsoyisa indweela khu inyana tseewe, yekyela italanyi isoleeli, yeyika khuuwaamba byeesi ilya, yoola ni khuulya babaandu.

⁴Kamanaambo kakaaramire kaakikholela luwomelo, kaakiyabila lilowo yaakwamo, baakiwaambilamo. Baaraambisa biibya khuukikhweeselesa, baakiyila mu Misiri.

⁵Italanyi ikhasi iyo yaliinda iri inyana yayo ikobole. Ni yabona nga biilayi mbaawo, yaawaambamo inyana ikiindi, yaakitsowesa khuuba indafu naabi.

⁶Yaatsowa yaaweentsatsaka biisolo ni tsitalanyi tsitsiindi, yeeyika khuuwaamba bye khuulya, yoola ni khuulya babaandu.

⁷Yaafuniaaka tsimako tsye kamaani, yaakhaandakilila biriimba bye babaandu babaandi. Abe buli nga yaabulukhumile, buli mutweela aba ni khukhwiyembeelela khuukali.

⁸Kamanaambo kaabuusana khuukisoolanisa, baareka kimibasu khu buli luwaande, baareka kimireko kyaabwe, bakiwaamba.

⁹Baakira mu shiindu abe sheesi bombashile khukisutilamo, bakiyila isi umuyiinga uwa Babulooni. Bakiyila mu bubowe, bari nio abe yaakhabulukhuma, likono lyayo lilekhe khuwulilikhana mu njiinji tsye mu Isiraeli ta.

¹⁰Maayi woowo aaba busa nga kumuzabibu, kweesi babyaala aambi ni luluutsi. Khulwekhuuba abe iliwo kameetsi kamakali, abe khulikho bibyaamo biikali ni kamasaafu kamakali.

¹¹Kusina kwakhwo kwe kamaani, kwekyela nikwo kamaani ke buwuli. Kwatsowa kwaaleeha khukhwoola mwikulu, buli mutweela waabona kamasaafu kaakwo, naluundi nga ni kwaleeha.

¹²Ne khulwe liirima, ise nakutitula ni tsiindi tsyakwo, nakutuuma khu liloba khu ngaaki. Ikhuungu iye kamaani ni yeetsa, yakila bibyaamo byakwo byaniaala. Kamasaafu kaakwo kooma kaalakala, bakwoosha ni kumulilo.

¹³Ari bakubyaala luundi mu mubiimbi, mu shifwo shishoomu, shishikhalimo kameetsi ta.

¹⁴Kumulilo kwawaamba kusina kwe kumuzabibu kweene ukwo, kwoosha tsisakya tsyakwo ni bibyaamo byakwo. Ni nashiryo mbaawo kuusina kwe kamaani kukwaaramawo ta, mbaawo kamaani ke buwuli ta. Kuno kuli kumweenya kwe kumutaambo; bali ni khukwiimbatsaka ni beelaŋanamo.