Read lumasaaba Ezekeli 2 Bible Online

Ezekeli 2 - lumasaaba bible

Ezekeli 2

¹Ise naawulila likono ilyo nga liloma liri, “Mwaana w'omuundu, yinyukha wiime khu ngaaki, ise ingana khukhukanikhayo isi iwe.”

²Likono ilyo ni lyaba nga lilikho linganikhayo, Umwoyo uwa Wele wantsikha khusi ise, wantsinyusa nemikha khu bikele byase.

³Ise naawulila likono nga liiloosela khuuloma liri, “Mwaana w'omuundu, ise ndikho ikhurumana iwe isi babaandu be linaambo lye ba Isiraeli. Babaandu abo bekyelile banabumiinyi, baantsikaangilekho, baaminyaaliile ise. Nibo atweela ni bakuuka baabwe bayintsikaangakho ise, ni khukhwoolisa shifukhu she shaleelo shino.

⁴Babaandu abo bali ni shikili naluundi sibantsisamo ise shiriifwa ta. Ari ise ndikho ikhurumana isi bali, utsye ubalomele bibiindu byeesi ise Umukasya, indikho ingana nibo bamanye.

⁵Ne oba banabumiinyi abo barekeeresa byeesi iwe uloma namwe ta, kane nabo bamanye bari iliwo umuŋoosi umenya atweela ni nabo.

⁶“Ne iwe, umwaana w'omuundu, ukhabarya, namwe waarya bilomo byeesi nibo baloma ta. Kane nibo bakhaabise bibiindu byeesi iwe uloma naluundi bakhulekelese iwe, ufwaanane busa nga umenya mu mawa, namwe isi makhata alumile. Ne shitweela busa, iwe ukharya banabumiinyi abo, namwe waarya bibiindu byeesi baloma ta. Namwe isaambo isi babonekhamo ikhakhuriisariisa iwe ta, khulwekhuuba ise naamanyile ndi bali banabumiinyi.

⁷Ingana utsyeyo ubawe buurume bwase, oba barekeeresa namwe ta, khulwekhuuba bali linaambo lye banabumiinyi.

⁸Ne iwe umwaana uw'omuundu, uli ni khuuloondelela byeesi ise ikhuboolela; iwe ukhaba umunabumiinyi nga linaambo lye banabumiinyi abo ta. Yaasama mukhanwa mwoowo, ulye sheesi ise intsya khuukhuwa iwe.”

⁹Lwanyuma ndi ndola, naabona kumukhono nga kwatsalaalile kwaalolile isi ise, nga kwawaambile kuupapula kuwulukuse kukuulikho buurone.

¹⁰Kila kumukhono kukaangulula kuupapula kuwulukuse ukwo, ise naabona nga buurone buli khu maande tsyoombi. Abe baaronakho biilomo bye kumutaambo ni khuulila, ni bye butsiina bukali.