Read lumasaaba Ezekeli 20 Bible Online

Ezekeli 20 - lumasaaba bible

Ezekeli 20

¹Lwaba lwe shifukhu she likhumi, mu mweesi kwe kharaano, mu mwiiko kwe kumusaafu kwe buubowe bweefwe. Kila batweela khu baraangirisi be ba Isiraeli beetsa isi ise abe indi khukhuuntsireebakho, nga bakana bamanye sheesi Wele akana ifwe khukhole. Bantsikhala ibweeni wase.

²Kila Umukasya anganikhayo, nga aloma ari:

³“Umwaana uw'omuundu, kanikha isi baraangirisi be ba Isiraeli, ubareebe uri: Inywe mweetsile khukhwireeba nga mukana mumanye sheesi Umukasya akana mukhole? Khukhwaama nga ise n'iindi uliwo biilo ni biilo, singana inywe mweetsa khukhuuntsireebakho isi ise ta.

⁴“Umwaana uw'omuundu, iwe unyala waabakhalila nibo kumusaango? Unyala waashikhola? Nashiryo lekha bamanye bibiindu bye bunyaalu byeesi bakuuka baabwe baamala khaale khuukhola.

⁵Baboolele uri Umukasya alikho aloma ari: Khu shifukhu khweesi ise naroborerakho ba Isiraeli, ise samweene netsuba nga iliwo sheesi nabasuubisa nibo. Ise neyokesanisa isi nibo bali waakila baamanya ise nga bali mu Misiri, nabalomela ndi: Ise ndi niye Wele weenywe.

⁶Mu mbuka iyo niyo isi ise nabetsubila nga imbasuubisa indi ise ikhaabaruse nibo mu Misiri, imbayile khu liloba lyeesi ise nabafunila. Liloba ilyo lili liilayi naabi nga lyaana biilyo biikali, nga nilyo lilifuurisayo buulayi mu shibala shoosi.

⁷Ise nabalomela nibo indi balekhele awo khuukhola bibiindu bye bunyaalu bye khukhwisaaya bifwaani, naluundi indi balekhelawo khukhwisaaya ba wele be ba Misiri, khulwekhuuba abe ise ndi niye Umukasya Wele waabwe.

⁸Ne shitweela busa barama nga baaminyaliile ise, baalekha khuuloondelela sheesi ise nabaloma ta. Baaloba khukhwakamisa bibiindu bye bunyaalu bye khukhwisaaya bifwaani, naluundi beloosela khukhwisaaya ba wele be ba Misiri. “Kila lwanyuma ise inoma indi kane imbokesanise lirima lyase, imbawe nibo shitaambiso, nga bashiili mu liloba lye ba Misiri.

⁹Ne ise nalekha khushikhola indyo ta. Khulwekhuuba abe n'ishikhola, shiimalamo ise lukoosi. Abe ise namala khaale khukhwiyokesanisa isi nibo nga bali mu manaambo kakaandi, nga isuubisa indi ikhaabaruse mu Misiri imbayile mu liloba liliindi.

¹⁰“Nashiryo ise nabarusa mu shibala she ba Misiri, naabayila mu mubiimbi.

¹¹Ise nabawa nibo bilakilo byase ni kamakaambila kaase, nga babaandu boosi bali ni khuuloondelela bibiili mu bilakilo ni mu makaambila.

¹²Ni khuuminyisilakho ilala, ise naabawa nibo shiifukhu sha Sabato, nga khali khaabonelo akari aabwe ni nase khari, bali ni khuumanya bari ise ndi Umukasya, naluundi ise imbawa nibo tsiikhabi.

¹³Ne ikhaba shitweela busa nga bali mu mubiimbi, ba Isiraeli baaminyaalila ise. Baaloba khuuloondelela indeekela yase ta, baantsukha kamakaambila kaase, keesi abe babaandu boosi bali ni khuuloondelela. Baakhola bibiindu bye bunyaalu naabi khu shifukhu sha Sabato. “Shino shaakila ise naakana ndi mbawe shiitaambiso nga bali mu mubiimbi, indi mbeere boosi bawewo.

¹⁴Ne khulwe shiriifwa she buunyala bwase, ise naalekha khushikhola ta. Ise sinakana kamanaambo abe kakaabona nga ise imbukula ba Isiraeli khukhwaama mu Misiri, kabone nga ikhola shishiindu nga isho ta.

¹⁵Ni khuuminyisila ilala, nga bali mu mubiimbi ise nabetsubila nga noma ndi, singene imbayile imbawe shiibala abe sheesi nabasuubisa ta. Shiibala shishiilimo liiloba liilayi nga shaana biilyo biikali, naluundi nga nilyo liliifuurisayo buulayi mu shibala shoosi.

¹⁶Ise netsuba shino khulwekhuuba abe baantsukhile indeekela yase, nga sibaloondelela kamakaambila kaase ta. Abe bakhola bibiindu bye bunyaalu khu shifukhu sha Sabato, nga mu buulamu bwaabwe besaaya bifwaani.

¹⁷“Ne shitweela busa ise nabawaambila nibo shiisa, ise nalekha khubeera, namwe khuubamalawo nga bali mu mubiimbi ta.

¹⁸Nashiryo ise nareewura babaana baabwe nga imbalomela indi: Mukhebirisa mu saambo tsiimbi nga bakuuka beenywe ni beebirisa ta; namwe mukhereerera mwabeene bunyaalu nga mwisaaya bifwaani byaabwe ta.

¹⁹Ise ndi niye Umukasya Wele weenywe; ni muloondelele bilakilo byaase, naluundi muwaambe kamakaambila kaase.

²⁰Muli ni khukhwiisa lukoosi mu shifukhu sha Sabato, nio akile shirame nga shili indakaano akari enywe ni nase. Nio inywe mumanye muri, ise ndi niye Umukasya Wele weenywe.

²¹“Ne lisaaye ilyo nalyo lyaaminyaalila ise. Baalekha khuuloondelela kamakaambila kaase n'indeekela yase ta, abe byeesi babaandu boosi bali ni khuuloondelela. Beloosela baakhola bibiindu bye bunyaalu khu shifukhu sha Sabato. Shino shaakila ise nakana indi imbawe shiitaambiso nga bali mu mubiimbi, indi imbeere boosi bawewo.

²²Ne khulwe shiriifwa she bunyala bwase, ise nalekha khushikhola ta. Ise sinakana kamanaambo abe kakaabona nga ise imbukula ba Isiraeli khukhwaama mu Misiri, kabone nga ikhola shishiindu nga isho ta.

²³Ni khuminyisila ilala, nga bali mu mubiimbi, ise nabetsubila nga inoma indi ikhaabasalanise mu manaambo kakaandi ni mu bibala bibiindi busa.

²⁴Ise nakhola shino khulwekhuuba abe balobile khuuloondelela bilakilo byaase ni kamakaambila kaase. Abe balikho bakhola bye bunyaalu khu shifukhu sha Sabato, nga besaaya bifwaani nga bakuuka baabwe ni baakhola makiboole.

²⁵Isho nisho shishakila ise nabawa nibo kamakaambila n'indeekela bibiikhali biilayi ta, nga sibinyala byakila nibo baafuna buulamu ta.

²⁶Ise nabalekha khubwaabwe busa, waakila baakhola bye mbikho khubirira mu byeesi abe bawaanayo khukhwisaaya, nga imbalekha bawaanayo babaana baabwe besiinde bakiboole. Ise nakhola shino indi nio khuurya khubawaambe. Ise nashikhola indyo, nga ingana nibo bamanye bari ise ndi Umukasya.

²⁷“Ni nashiryo, umwaana uw'omuundu, n'uboolele ba Isiraeli sheesi ise Umukasya indikho inoma. Baboolele uri bakuuka baabwe bafwotsola ise, nga bakhola bibikhali bye bubwiyikinwa ta.

²⁸Ise nabayila nabawa nibo shiibala abe sheesi nabasuubisa indi kane imbawe. Nga ni baabona tsinjiinji tsindeeyi ni kimisaala kye kamasaafu kamakali, baabiwaanayo tsisaayilo isi nibyo. Baakila ise liirima lyamaamba khulwe tsisaayilo abe tsyeesi bawaanayo n'iviini abe isi bawaanayo nga shiwaanwa.

²⁹Kila ise imbareeba nibo indi: Bifwo shiina bye khukhwisaayilamo ibyo byeesi inywe mutsyamo? Babilaanga bari biifwo Bye angaaki bye Khukhwisaayilamo.

³⁰Nashiryo, ari iwe boolela ba Isiraeli sheesi ise Umukasya, indikho inoma: Kane inywe mwolese liina nga mukhola bibyoonako byeesi bakuuka beenywe baakhola khaale, naluundi mwisaaya bifwaani byaabwe?

³¹Ikhaba ni biifukhu bino, bona inywe muwaanayo biwaanwa nibyo bitweela isi bifwaani tsana nibyo bitweela, nga muwaanayo babaana beenywe khukhwookhebwa. Mukhola bibiindu nga ibyo, ne shitweela busa bari inywe mwiitsa khukhuuntsireebakho nga mukana mumanye sheesi ise ingana inywe mukhole! Khukhwaama nga ise n'iindi Umukasya Wele uliwo biilo ni biilo, ise singene ifukiilise inywe muntsireebekho shishiindu shoositsana ta.

³²“Inywe mwaamalile khaale khuukhalawo muri mukana mube nga kamanaambo kakaandi, muri mube nga babaandu babaamenya mu bibala bibiindi, nga besaaya bisaala ni kamabaale. Ne isho seshinyala shakholikha ta!

³³“Khukhwaama nga ise Umukasya Wele, n'iindi ubawo biilo ni biilo, kane imbokesanise liirima lyase, naluundi inaambise kamaani kamakali mu khuba umuyiinga weenywe.

³⁴Kane ise imbokesanise inywe liirima lyase ni kamaani kaase kamakali, nga nababuusaasile inywe atweela nabakobosile khukhwaama mu manaambo keesi inywe mwasalanilamo.

³⁵Ise ikhaabayile inywe mu mubiimbi kweesi kamanaambo kebootokheleele, nio nga muli ibweene iyo, ise imbakhalile inywe kumusaango nga mwabeene mubona.

³⁶Ise ikhaabakhalile inywe kumusaango, musaambo isi nakhalilamo bakuuka beenywe kumusaango, nga bali mu mubiimbi kwa Sinaayi. Umukasya, Umunyali uwa byoosi niye ulomile bibiindu bino.

³⁷“Ise ikharaambise kamaani imbone indi muli aasi e buwuli bwase, naluundi imbawaambile kamaani mu khuuloondelela indakaano yase.

³⁸Ise ikhaaruse mus'iinywe abo babaali banabumiinyi, ni naabo babaakhola bibyoonako isi ise. Ikhaabaruseyo khukhwaama mu biibala byeesi bamenyamo ari, ne ise s'ikhaabafukiilise bengile mu shibala she ba Isiraeli ta. Nio isho shikile inywe mumanye muri ise ndi niye Umukasya.

³⁹“Ba Isiraeli, ari inywe mweesi ni mutsye mu moni, mutsye buli atweela mwisaaye bifwaani byeenywe. Ne akhali ise imbareewura inywe indi, lwanyuma lweebyo mukanile mulobile, muli ni khuuloondelela byeesi ise inoma. Muli ni khukhwakamisa khufwotsola lisina lyase likhosefu, nga mwakamisa khuwaanayo tsisaayilo isi bifwaani byeenywe.

⁴⁰Khulwekhuuba nga ba Isiraeli boosi boolile mu shibala shaabwe, bali ni khukhuuntsisaayila ise khu lukiingi luukhosefu, ulwo lulufuura buuleeyi mu Isiraeli mwoosi. Ise ikhaabekhoyele nibo naabi, naluundi ise ikhaabe naabaliindiliile nibo khuureera tsisaayilo tsaabwe tsitsiiminyisa buulayi, ni biwaanwa byaabwe biikhosefu.

⁴¹Lwanyuma lwe khuubarusa inywe mu manaambo keesi mwasalanilamo nababusaasa atweela, ise ikhaafukiilise khukhwakaanila biwaanwa byeenywe bibyooshe. Ni kamanaambo koosi kane kabone kari ise ndi umukhosefu.

⁴²Nga ise naamalile khuubakobosa inywe mu shibala sha Isiraeli, shibala sheesi ise namala khukhwiitsuba indi ikhaawe bakuuka beenywe, awo isi inywe mulimanyila muri ise ndi niye Umukasya.

⁴³Nio inywe mushebulile bibiindu bye bubwoonaki byoosi, ni bye bunyaalu byoosi byeesi inywe mwekhola khu mwabeene. Bibyoonako byeenywe byeesi inywe mwakhola bikhaakile mwiwulile buubi.

⁴⁴Nga iliwo sheesi ikhola khulwe shiriifwa she lisina lyase, ba Isiraeli inywe mulimanya muri ise ndi niye Umukasya. Khulwekhuuba ise singene imbawe inywe shiitaambiso khuuloondekhana ni bubwoonaki bweenywe ta.” Umukasya Wele umweene niye ulomile bibiindu bino.

⁴⁵Umukasya waanganikhayo nga aloma ari:

⁴⁶“Umwaana w'omuundu, loleelela imwaalo we shiibala. Bekiitse byeesi bakhola, naluundi ukhole buŋoosi bubwikiitsa abo babaali mu shibala shishiili mu mubiimbi nga shilimo shisaali.

⁴⁷Lomela shiibala shishiili mu mubiimbi uri, iwe n'urekeerese byeesi Umukasya alikho aloma. Umukasya alikho aloma ari, bona ise ndi khuutsya khuwaambisa kumulilo mus'iiwe, kukile kwooshe bibiindu byoosi bibitsowa mu shibala isho, ni bisaala bibyoomu byoosi. Mbaawo ulisimisa kumulilo kukuutindiima ukwo ta. Kukhaasalanile khukhwaama imwaalo kwoole ingaaki, nga kwoosha buli mutweela.

⁴⁸Babaandu boosi bakhaashimanye bari ise Umukasya, niye uwaambisile kumulilo ukwo; mbaawo ukhaanyalise khuukusimisa ta.”

⁴⁹Nio waakila ise nelootsa nga inoma indi, “Umukasya Wele, iwe ukhakhola shishiindu nga isho ta. Khulwekhuuba babaandu balikho belootsa bari ise imuumbaawo tsiindikha tsino.”