Read lumasaaba Ezekeli 21 Bible Online

Ezekeli 21 - lumasaaba bible

Ezekeli 21

¹Umukasya waanganikhayo nga aloma ari:

²“Umwaana uw'omuundu, n'utsye mu Yerusalemu, wikiitse babaamenyamo. Kuukuula nga wikiitsa biifwo byaabwe biikhosefu byeesi besaayilamo, naluundi ukhole buŋoosi nga wikiitsa abo babaamenya mu Isiraeli.

³Balomele uri, Umukasya alikho ari, bona ari ise ndi umusiku weenywe, kane ise imaambe luurima lwase mukhono, nga ndi umwirekefu khuubeera inywe mweesi, nga imbilila atweela abo babaali bakhosefu ni baboonaki.

⁴Ni nashiryo, kane ise imaambe luurima niire babaandu khukhwaama imwaalo, khukhwoolisa ingaaki we shiibala.

⁵Buli muundu yeesi kane amanye ari ise Umukasya nawaambile luurima lwase muukhono, ari ise singane nileyo indubiikhe luundi ta.

⁶“Mwaana uw'omuundu, kuukuula; kuukuula luukali nga uli mu mutaambo kumukali n'ingunyi ingali. Kuukuulila isi babaandu boosi bali ni khuukhubona.

⁷Nga baakhureebire bari, shiina kila ulikho ukuukuula, ubeelamo uri khulwe kamakhuuwa kakaali khukhwiitsa. Nga kamakhuuwa ako keetsile, buli mutweela kane abe ni khuurya khuukali, abe mu binikino bye angaaki. Buli mutweela akhaayekhelele busa, bakhaasikhe ni khukhwiimikha khu ngaaki. Bona, bibiindu bino bili aambi, bikana khukholikha.” Bibiindu bino Umukasya Wele, niye umweene ubikanikhile.

⁸Umukasya waanganikhayo nga aloma ari:

⁹“Umwaana uw'omuundu, iwe khola buŋoosi, ulome uri, Umukasya alikho aloma ari: Bona ise nawakaale luurima lwase, luurima ise nawakaale, naluundi ise naamalile khuulumiliisa.

¹⁰Ise nalumiliisile lulikho lumulikha busa nga luuheni, naluwakaale nga ingana induraambise mu khwiira. Mbaawo unyala waaba mu mwikhoyo ta, khulwekhuuba babaandu baase sibenaanayo isi khuureewura khwoosi, namwe shiitaambiso shoosi ta.

¹¹Nashiryo ise ishimiliisa busa luurima lwase, indi nio induraambise buulayi. Ise naluwakaale naluundi nalumiilisile, indi induwaambise uyo utsya khukhwiira.

¹²Umwaana w'omuundu, iwe kuukuulila mu mutaambo kumukali; khulwekhuuba luurima luno lutsya khwiira babaandu boowo. Lutsya khwiira baraangirisi ba Isiraeli atweela ni babaandu baase boosi. Ni nashiryo iwe yokesanisa kumutaambo kumukali.

¹³Khulwekhuuba ise ndi khuukhakilisa babaandu baase, ne nga baalobile khukhwibiiyisa bibyoonako byaabwe, kane babeene babonele khu kwaabwe.

¹⁴“Ni nashiryo, umwaana w'omuundu, iwe khola buŋoosi. Khupaka muukhono mwoowo, ukile luurima lwibwakale nga lwilaŋanamo busa, isi abo babaali ni khukhwiiribwa. Luli luurima luluuli ni khukhwiira babaandu baakali, naluundi nga luriisa naabi.

¹⁵Kane lukile babaandu baase bawetsekhelele kamaani, buuri bubawaambe. Ise naweeleyo luurima lulumulikhamulikha ulwo, indi luubeere nibo.

¹⁶Kane luurima luno lwiire babaandu buli luwaande lwoosi, na buli oosi isi baluloselela.

¹⁷Kane liirima lyase liwewo, nase imbe ni kumwikhoyo, ikhupake muukhono.” Ise Umukasya niye ulomile bibiindu bino.

¹⁸Umukasya waanganikhayo nga aloma ari:

¹⁹“Umwaana uw'omuundu, roborayo kimikhoosi isi umuyiinga uwa Babulooni ali ni khuubirirakho nga eetsa ni luurima lweewe. Kimikhoosi kino kyoombi kili ni khuunanikhila mu shiibala shitweela. Uli ni khuurawo shipaande mu shifwo mweesi kimikhoosi kino kyoombi kyawukhanila, nga kilola mu shiriimba.

²⁰Kumukhoosi mutweela kuli ni khuumuraangirira niye nga kumuyila mu Raba, shiriimba she ba Amoni, ni kukuundi nga kulola i Yuda, mu shiriimba Yerusalemu, sheesi bebotokhelesile ni litikiiyi.

²¹Khulwekhuuba umuyiinga uwa Babulooni ali ni khukhwiimikha isi kimikhoosi kino kyaawukhanila. Mu khukhalawo khu mukhoosi shiina kweesi ali ni khuuwaamba, ali ni khuuraambisa buyiingo bweewe nga isaasi, ali khukhwireeba isi bawele beewe, naluundi ali ni khukhwiira shishaayo alole muunda.

²²Kumukhono kweewe kumuseetsa kane kuwaambe buyiingo bweesi bawandikhakho bari ‘Yerusalemu’. Buno bumuboolela khuutsya khwombakha ni khuutsukha kuuloba kwe khuuniinilakho khuukhwibwakala shirimba, ni khuuyokesela angaaki liyoombo lye busoolo. Naluundi buri ali ni khuutsukha kuuloba kwe khuuniinilakho khu buli shilibwa she khukhwingililakho mu shiriimba, abuuse tsimuumbi tsimboofu tsye kuuloba, naluundi ombakhe biifwo bye khukhwiimakho khukhwikheetsa baasiku.

²³Ne isi babaandu be mu Yerusalemu, shino kane shibafwaanile busa nga khuulakula balekhe khushifukiilisa ta, khulwe tsindakaano tsyeesi baamala khaale khuukhola. Ne nga shishiindu shino shili ni khuukila nibo bashebulile bye bubwoonaki byaabwe, ni khubareewura khuri banaba bawaambe mu mbuka yoosi.

²⁴Ni nashiryo, ise Umukasya Wele indikho inoma indi: khulwekhubeela inywe mwabeene mwakilile ise nashebuliile bibyoonako byeenywe, mwakilile byerurukhiliile busa, nga buli mutweela alikho abibona, ise nabakhaliile inywe kumusaango. Kane ise indekhe baasiku babasute inywe, babayile.

²⁵“Ne iwe umuwuli uwa Isiraeli uli umwoonaki naabi, bona ari imbuka yoolile, shifukhu sheesi iwe uli ni khufunilakho shitaambiso shoowo shoolile.

²⁶Ise Umukasya Wele niye uli khuloma bibiindu bino. Ikhulakila iwe indi rusakho ikuutwa ni shitaambaala bibiili khu murwe kwoowo. Mbaawo mu bulamu shishiindu shoosi shishinarama nga abe ni shili taawe. Abo babaali babaandu ba busheele busa, kane beekyele khuuba nibo baawuli, ne abo babaali mu buwuli kane beekyele babaandu ba busheele busa.

²⁷Kane ise imaambe Yerusalemu ingikyelise kamakubili, yikyele kamakubili kameene; ilekhe khubawo khe khushebulilakho khoositsana ta, khukhwoolisa nga uyo yeesi imalile khuuwa Yerusalemu shiitaambiso woolile. Nio imuwe niye shiriimba isho.

²⁸“Ne iwe, umwaana uw'omuundu, khola buŋoosi nga ubaboolela uri bibiwaamba khu khukhwikiitsa ba Amoni, Umukasya Wele alikho aloma ari, Ise ndikho niitsa ni luurima, indikho niitsa ni luurima khubeera inywe imbamalewo. Ise naamalile khaale khulumiliisa, lumulikha busa nga luheni.

²⁹Khuubonekhelwa khweesi mubona, khuli khwe bubeeyi busa, ni byeesi mutebeelesa muri bitsya khukholikha, byoosi bye bubeeyi busa. Inywe muli baabi naluundi muli baboonaki. Shifukhu sheesi ise intsya khubaweelakho inywe shitaambiso shili aambi khukhwoola. Kane luurima lwase lubeere inywe mweesi.

³⁰“Inywe mwabeene ni mwiise aasi luurima lweesi muwaambile khukhwiira babaandi. Ise ikhaabakhalile inywe kumusaango nga muli mu shifwo sheesi mwabuumbibwilamo, nga nisho sheesi mwasaalikhilamo.

³¹Ise ikhaabokesanise inywe liirima lye kamaani, lifwaane busa nga ubatsukhileho kumulilo kwe buunoro. Ikhabaawaaneyo inywe mu makhono ke babaandu babaakhali ni shiisa ta, abo babeyika kumulimo kwe khukhwiira, babeere.

³²Kumulilo kukhaabooshe muwewo; mukhaafwiile mu shibala sheenywe shisheene. Mbaawo umuundu na mutweela ukhaabashebulile inywe ta. Ise Umukasya samweene niye ulomile bibiindu bino.”