Read lumasaaba Ezekeli 22 Bible Online

Ezekeli 22 - lumasaaba bible

Ezekeli 22

¹Ni khuminyisila ilala, Umukasya weetsa isi ise nga aloma ari:

²“Umwaana w'omuundu, uwe uli umwirekefu, khukhalila shiriimba shishiilimo babeeri abo kumusaango? Iwe bokesanisile ilala boosi buulayi bubweene bye bunyaalu byeesi nibo baamala khaale khuukhola.

³Boolela babaandu abo byeesi ise Umukasya, indikho ikhuboolela iwe. Balomele uri, imbuka yeenywe yoolile khulwekhuuba mwayira babaandu baakali, naluundi inywe mwayireerera mwabeene bunyaalu khuubirira mu khwisaaya bifwaani. Ne ari imbuka yeenywe yoolile.

⁴Inywe muli ni kumusaango kwe khukhwiira babaandi, naluundi mwayireerera mwabeene bunyaalu khulwe khukhwisaaya bifwaani. Naluundi inywe mwakilile imbuka iye khubawa inywe shitaambiso yeetsile aambi; imbuka yaaweeleyo. Ni nashiryo, kamanaambo kakaandi kane kabatsekhelele inywe naluundi kabakhomyaase.

⁵Kamanaambo kakaali aambi ni nanywe, ni naako kakaabali aleeyi, kane kabalekelese inywe, mumwibirisa buubi naluundi mumuuli be bituluungu.

⁶“Bona baraangirisi be mu Isiraeli boosi beyikina kamaani kaabwe babeene, naluundi ke khukhwiira babaandi.

⁷Mbaawo uwiisamo shiriifwa mu paapawe namwe mu maayi weewe ta. Inywe mulyakhana abo babaali babeetswa musiinywe. Ikhaba banamulekhwa ni baafuubi, inywe mubalyakhana.

⁸Inywe mulekelesa biifwo byase bibiili bikhosefu, naluundi semwisa lukoosi mu shifukhu sha Sabato ta.

⁹Iliwo batweela mu siinywe babaaboolela babaandi bye bubeeyi, bari nio abo beesi babooleele beeribwe. Iliwo batweela musiinywe babaalya biilyo byeesi bawaanileyo nga tsisaayilo isi bifwaani. Iliwo batweela babaali ni kumuluungo kumukali mu khwikoomba bakhasi ni basaani.

¹⁰Iliwo batweela mu siinywe babetubaasa ni bakhasi be ba paapa baabwe. Iliwo babaandi mu siinywe babetubaasa ni bakyelama nga bali imasaaba.

¹¹Iliwo batweela babaakhola bye buyeeyani; babaandi betubaasa ni bakhasi be babaana baabwe; babaandi betubaasa ni bakooko be ba maayi baabwe babaandi.

¹²Iliwo batweela mus'iinywe beesi baliipa beetsa beera babaandi. Babaandi barusa kamafuurisa khu byeesi bekhopesile ba Isiraeli bashaabwe, baryo bafuna buyiindifu nga babira mu khumiinikhilisa. Inywe mwaayintsibilila ise.” Umukasya Wele, umweene niye ulomile bibiindu bino.

¹³“Ni nashiryo, ise inaminiaangula bibiindu byoosi byeesi iinywe mwafuna khukhwaama mu khunuula babaandi ni mu khwiira babaandi.

¹⁴Inywe mwambaasa muri munyala mwaba ni bunyiindaalifu bubuumala, namwe mwaba mushiili ni kamaani nga ise naamalile khaale khubakhupa inywe? Ise Umukasya samweene niye ukanikhile bibiindu bino; kane imbikhole nga s'ishuusakho ta.

¹⁵Ikhaabasalanise inywe mu buli shibala ni mu buli linaambo, ingile imbamalemo kumwooyo kwe khukhola bibyoonako.

¹⁶Inywe mukhaakile kamanaambo kakaandi kalekhe khukhuuntsisamo ise lukoosi ta. Shino shikhaakile inywe mumanye muri ise ndi niye Umukasya.”

¹⁷Umukasya waanganikhayo nga aloma ari:

¹⁸“Umwaana uw'omuundu, isi ise ba Isiraeli boosi sibalimo kumukaso ta. Bali busa nga kuuloba kukurama mwiruumbi lwanyuma lwe khubukulamo biibya bibikanibwa.

¹⁹Nashiryo, ari ise Umukasya Wele indikho imbaboolela indi nibo sibalimo kumukaso kwoosi ta. Ni khu lwe ilomo iyo, ise ikhaabuusaase boosi mu Yerusalemu.

²⁰Khu lwe lirima liikali, nase kane imbabusaase nga babaandi ni babusaasa kuuloba mwiruumbi nga batsya khwoosha nio baamisemo biibya. Kane nase imbabusaase atweela, imbooshe bayengukhe bawewo.

²¹Kane imbabusaase inywe mu Yerusalemu, imbokesanise liirima lyase liliikhaabe busa nga kumulilo. Inywe mukhaayengukhile mu mulilo ukwo.

²²Nanywe mukhaayengukhile mubweene umwo, mube busa nga ifweeza n'iyengukhila mu mulilo. Nio nanywe kane mumanye muri ise, Umukasya, nabokesanile inywe liirima lyase.”

²³Umukasya waanganikhayo luundi nga aloma ari:

²⁴“Umwaana uw'omuundu, boolela ba Isiraeli uri shiibala shaabwe shaayitsula bubwoonaki. Ni nashiryo khulwe liirima lyase, ise ndi khuutsya khubawa inywe shiitaambiso.

²⁵Baŋoosi nga nibo babaali baraangirisi baabwe, balikho bewuumila busa nga italanyi n'iilya khaasolo kheesi ikhonyele. Beera babaandu, baanuula bibiindu byaabwe, ni khulwe bubwiiri ubwo waakila yaabawo banamulekhwa baakali naabi.

²⁶Basaayi baabwe baafuniaaka kamakaambila kaase, naluundi bibiindu byaase biikhosefu sibabiisamo lukoosi ta. Sibaawukhanisawo akari e bibiili biikhosefu ni bibiikhali biikhosefu ta. Sibenaanayo khu shifukhu sha Sabato ta. Ni nashiryo waakila ba Isiraeli baalekha khukhuuntsisamo ise lukoosi ta.

²⁷Baraangirisi baabwe bali busa nga shibulukhu ni shityenuulakamo isaanyi isi shimalile khukhwiira. Beera babaandu, boonakisa buulamu bwe bashaabwe bari nio bafune buyiindifu.

²⁸Baŋoosi babaabamenyamo baabimbilila busa bibyoonako, nga umuundu n'aapa luloongo khu ntsu yeewe bari abimbilile kamawuumbu. Babeeha busa babaandu bari baafunile khuubonekhelwa khukhwaama isi ise, naluundi bibiindi baambulisa busa. Bakanikha bye bubeeyi, ne baashuukha baaloma bari bibiindu ibyo byaamile isi Umukasya Wele.

²⁹Abo babaali bayiindifu, banuula naluundi balyakhana bashaabwe. Bamiinikhilisa abo babaali bataambi, naluundi babirisa babeetswa buubi, nga mbaawo isi banyala batsya beelootsela ta.

³⁰Ise naakhakakho khuwentselesa umuundu yeesi abe unyala khukhwombakha kumako, abe unyala wemikha mu bifwo byeesi kuumako kwatikulukha waatseeta shibala nga ingana khushoonakisa khulwe liirima lyase, ne naalekha khunyoolayo umuundu yeesi ta.

³¹Ni nashiryo, ise inabokesanisa nibo liirima lye kamaani, ni khulwe biikholwa byaabwe biibi kane ise imbooshe busa ni kumulilo bawewo.” Ise Umukasya Wele niye ulomile bibiindu bino.