Read lumasaaba Ezekeli 23 Bible Online

Ezekeli 23 - lumasaaba bible

Ezekeli 23

¹[2] Umukasya waanganikhayo nga aloma ari:

²“Umwaana w'omuundu, lutweela abawo bakooko babili nga boombi bali maayi mutweela.

³Nga ni baaba nga bashiili bahele, nga bamenya mu Misiri, betubaasa ni basaani waakila baalekha khuba tsindungubaasi luundi ta, nashiryo beekyela bamalaaya.

⁴Umukiboole abe bamulaanga bari Ohola, nga aliwo mu lisiina lye ba Samariya. Umukyeekhe abe bari Oholiba, nga aliwo mu lisina lya Yerusalemu. Boombi bekyela bakhasi baase, basaalile ise babaana.

⁵Ikhaba nga Ohola aba umukhasi uwase, ne shitweela busa eloosela mu khukhola kwe bwamalaaya ni basaale beewe khukhwaama mu Asiriya.

⁶Abe bano mulimo banyiindaalifu babaakwaara bikwaaro bye angaaki, baraangirisi, baraangirisi be kamahe. Bano boosi bali basilikhale babaashili bahele, nga babonekha buulayi, naluundi nga bakyeendela khu ŋwaaŋwa.

⁷Abe niye akhola bwamalaaya ni baraangirisi be liiye lye ba Asiriya boosi. Ni bwamalaaya ubwo bwaamureerera khuukhola bye bunyaalu nga esaaya bifwaani bye ba Asiriya.

⁸S'akamisa bwamalaaya bweesi abe akholatsaka khukhwaama nga n'aaba nga ali mu Misiri ta. Khulwekhuuba ikhaba nga abe ashiili umukhaana indungubaasi, abe akana naabi khukhwitubaasa ni basaani, ni nabo baamubirisa busa nga umumalaaya.

⁹Ni nashiryo nase namusiindikha mu bakanwa beewe ba Asiriya, abe beesi asiima naabi.

¹⁰Bano baamurusakho biikwaaro byeewe, bawaamba babaana beewe, nio lwanyuma baamwiira umweene nga baraambisa luurima. Nga kumusaango kwaamufuurire naluundi nga shino shaamalile khuumukholikhakho, bakhasi buli aandu oosi baashikanikhakho.

¹¹“Ikhaba nga wandaaye weewe Oholiba aabona shino, ne shitweela busa niye waaba umubi naabi khuuminyisakho awo, niye wekyela umumalaaya khuuminyisakho yaayawe, Ohola.

¹²Naye aakhola bwamalaaya ni baraangirisi be babaandu, ni baraangirisi be kamahe, nga bano bakwaara buulayi, baashiili baahele, babonekha buulayi, naluundi nga bakyeendela khu ŋwaaŋwa.

¹³Ise naabona nga naye waakholile bye bunyaalu; nga naye ali busa nga wandaaye weewe.

¹⁴“Ne Oholiba yuno wehaambila naabi, naabi mu bye buyeeyani. Shishamukhweselesa shaba bifwaani bye baraangirisi be basilikhale be ba Babulooni nga babikhupa khu litikiiyi babiwakha iraangi imbesemu,

¹⁵nga bebowile tsiikhoba mu bikuute, naluundi nga bebowile bitaambaala imurwe waabwe. Bino byamushebusa niye khu basilikhale be ba Babulooni abe babaakyeendela khu ŋwaaŋwa.

¹⁶Niye n'ababona, wekoomba naabi khukhwitubaasa ni nabo, ni nashiryo niye waabasiindikhila nibo buurume nga bashiili mu Babulooni.

¹⁷Basaani ba Babulooni beetsa betubaasa ni naye, baakhola ni naye bye buyeeyani. Nga shino shaamukholikhilekho tsifuunda tsingali, baamulokhela ni kumwooyo kwaabawayo.

¹⁸Nga alikho akholela buyeeyani abulafu busa, nga s'enaanayo khu byeesi babaandu baloma ta, nase kumwooyo kwamuwayo, namwaantsukha musaambo niyo indweela isi naantsukhamo yaaya weewe.

¹⁹Ne shitweela busa weeloosela mu buyeeyani bweewe, webirisa mu saambo isi ebirisamo nga ashiili umukhaana, mu mbuka isi abeela nga akholela buyeeyani mu Misiri.

²⁰Niye waaba naabi ni kameelu ke buyeeyani, nga akana naabi etubaase ni basaani ba Misiri, abe babaali ni kamaani kamakali mu bye buyeeyani.

²¹“Oholiba, iwe wakana naabi wiilemo wokesanise kumuluungo kumukali isi basaani, nga ni wakhola nga ushiili mukhaana isi wabeela mu Misiri, isi wetubaasila naabi ni basaani nga bakhuwaambawaamba naluundi nga babooraboora kamafuungu koowo.

²²“Ni nashiryo, iwe Oholiba, iwe unakila bakanwa boowo beesi iwe kumwooyo kwawayo bakhwinyukhile aasi, bakhwibotokhelele iwe khulwe liirima lyaabwe.

²³Ise ikhaareere basaani ba Babulooni ni ba Kalidiya boosi, khukhwaama i Pekodi, Showa, Kowa, ni ba Asiriya boosi. Ikhaabuusaase atweela basooleli babaali bamiliwu khukhwaama mu baraangirisi be babaandu, ni baraangirisi be kamahe, ni naabo boosi babaamanyikhaane, ni baraangirisi be basilikhale babaakyeendela khu ŋwaaŋwa.

²⁴Bakheetse ni liiye liikali lye kamakaali ni tsiŋwaaŋwa, ni babaandu baakali, bakhwibwakale iwe khukhwaamila kwe ngaaki woowo. Bakhaakhwibwakale iwe khukhwaamila khu buli luubeka, nga betseetile babeene ni tsingabo tsifwiiti, tsingabo tsya busheele, ni biibya byeesi bakwaara khu mirwe. Ise ikhaakhuwaaneyo iwe mu makhono kaabwe, bakhukhalile iwe kumusaango, khuuloondekhana ni kamakaambila kakaabwe.

²⁵Ise ikhaakhwookesanise iwe liirima lyase lye angaaki naabi, shikile balekhe khuukhuwaambilakho iwe shiisa ta. Bakhaakhukhalekho iwe kamoolu koowo, ni kamaru koowo, ne umuundu yeesi ulirama nga ashiili umulamu, bakhaamwiire. Bakhaawaambe babaana boowo, babooshe ni kumulilo.

²⁶Bakhaakhurusekho iwe bikwaaro byoowo, urame nga uli bukhuna, bakhurusekho ni bibiindu biimiliwu byeesi iwe wisaaha.

²⁷Ni nashiryo ise ikhaakile iwe waakamise khukhwokesanisa kumuluungo kumukali khu basaani, ni khuukhola bye buyeeyani bwoowo, byeesi iwe waamisa mu shibala she i Misiri. Nio iwe ulekhe khukhwiinaanayo khukhwisaaya bifwaani bye mu Misiri, namwe khubishebulila luundi ta.”

²⁸Khulwekhuuba Umukasya Wele alikho aloma ari: “Ise ikhaakhuwaaneyo iwe mu makhono ke babaandu beesi iwe wabiyiila, beesi kumwooyo kwoowo kukhakana ta.

²⁹Babaandu bano bakhaakhubirise iwe mu saambo imbi naabi iye bubiiyile, bakhurusekho iwe biilimwa byoowo byoosi, bakhaakhulekhe bukhuna nga s'uulikho ni khakhaandu ta. Buyeeyani bwoowo bakhaabukhupe ibulafu buli mutweela abubone. Kumuluungo kwoowo kwe khukhwikoomba naabi basaani ni buyeeyani bwoowo,

³⁰nibyo bibikilile biindu bino byaakhukholikha khuusi iwe. Bino bili biryo, khulwekhuuba iwe wewaanayo waakhola buyeeyani ni kamanaambo kakaandi, wereerera wamweene bye bubwoonaki khuubirira mu khwisaaya bifwaani.

³¹Iwe webirisire buubi nga yaaya woowo umukhulu ni ebirisa. Ni nashiryo ise inakhuwa iwe shitaambiso shitweela nga ni namuwa niye.”

³²“Nashiryo, Umukasya Wele alikho aloma ari; Kane ise ikhuwe iwe shiitaambiso nga sheesi nawa yaaya woowo; shili shiboofu naluundi she kamaani. Buli mutweela kane akhutsekhelele iwe naluundi akhukhomyaase; khulwekhuuba shitaambiso shili shikali.

³³Shikhaakhuwaambise iwe kumutaambo kumukali ufwaane busa nga umeelile. Shitaambiso sha yaaya woowo Samariya, shili shishireera ingunyi ni khukhwoonakisa bibiindu.

³⁴Iwe ukhaabire mu khutaambisibwa khwa buli isaambo, ni khulwe ngunyi, iwe ukhale kamafuungu koowo ukarusekho.” Ise Umukasya Wele, umweene niye uulomile bibiindu bino.

³⁵Ni nashiryo, ari Umukasya Wele alikho aloma ari: “Khukhwaama nga iwe ni wantsibilila ise wakhupa kumukoongo kwoowo, kane iwe utaambisibwe khulwe buyeeyani bwoowo ni khuuba ni kumuluungo kwe khukhwikoomba naabi basaani.”

³⁶Umukasya waanomela ise ari: “Umwaana uw'omuundu, iwe unyala khukhalila Ohola ni Oholiba kumusaango? Nga shiryo, ari iwe n'ubaboolele biikholwa byaabwe biibi byeesi baakhola.

³⁷Khulwekhuuba nibo bamala khaale khuukhola bye buyeeyani ni khukhwiira babaandu. Nibo baakhola buyeeyani nga besaaya bifwaani byaabwe, ni khukhwiira babaana beesi abe ise nasaala ni nabo. Nibo bawaamba babaana baase baabawaanayo isi bifwaani byaabwe nga tsisaayilo.

³⁸Sibakhola khusi ise shishiindu isho shonyene ta. Bakholela bibiindu bye imbikho mu lisaayilo lyase Liikhulu, naluundi balekha khuuloondelela shifukhu sha Sabato, sheesi ise narawo ta.

³⁹Khulwekhuuba ni khu shifukhu shisheene sheesi beerirakho babaana babawaanayo nga tsisaayilo isi bifwaani byaabwe, ni khu shifukhu sheene isho beetsa mu Lisaayilo lyase baakhola bibiindu bye imbikho. Nawe yambaasa, isho nisho sheesi nibo baakhola mu lisaayilo lyase.

⁴⁰“Baasiindikhatsaka baarume khuutsya mu bibala bye aleeyi khuutsya khubaweentsela basaani khukhwaama mu bisiintsa bye aleeyi, ni basaani bano abe beetsa. Abe khulwe basaani abo, bakhaana abo abe besiinga, bawakha iraangi khu moni tsyaabwe ireerekho bibiniini, naluundi besaahaka bubuuma.

⁴¹Abe lwanyuma lwayo bakhaana bano beekhala khu kusisinwe kuumiliwu, nga ibweeni waabwe baareereyo imeetsa nga yetsuule bibiindu biilayi byonyene. Abe mubamo ni bubaani, ni kamafura ke kuusaala ku olivu keesi ise nabawa nibo.

⁴²Abe kamakono ke lituuli lye babaandu babekanikhila busa nga sibenaanayo ta, liwulilikhana nga lyaama muntsu mwaabwe. Basaani bano abe babaaba nga baamile mu mubiimbi, abe baba nga bameelile. Abe basaani abo bakwaarisa bakhasi abo bipaangiri biilayi naabi khu makhono kaabwe, ni tsikuutwa tsiimiliwu naabi khu mirwe kyaabwe.

⁴³Ise nashibona nga basaani bano balikho baraambisa umukhasi uyo mu khukhola bye bwamalaaya, ne nga abe kamaani kaamuweelemo khulwe khuukhola bye buyeeyani.

⁴⁴Khulwekhuuba abe basaani abo betubaasa ni bamalaaya abo nga beelaŋanamo busa. Abe betubaasa ni Ohola ni Oholiba nga beelaŋanamo busa, khukhwookesanisa nga ni bali ni kumuluungo kwe khukhwitubaasa ni bakhasi.

⁴⁵Ne basaani babaali baakhosefu bakhaakhalile basaani abo kumusaango kwe buyeyani ni khukhwiira. Khulwekhuuba bakhola bye buyeeyani naluundi bamala khaale khukhwiira babaandu.”

⁴⁶Nashiryo, Umukasya Wele alikho aloma ari: “Reera lituuli lye babaandu libebwakale, libabirise buubi, naluundi libanuulekho byeesi bali ni nabyo.

⁴⁷Khayo lituuli lye babaandu likhupe bakhaana abo kamabaale, libebwakale nga buli mutweela ali ni luurima. Khayo beere babaana baabwe, naluundi booshe tsiintsu tsye bakhaana abo.

⁴⁸Mu saambo iyo, kane ikile ise naakamise bye kumuluungo kwe khukhwikoomba naabi khukhwitubaasa ni basaani, kukuuli mu shibala isho. Manya nio baakhasi boosi babonelekho shino nga she khuubareewura, balekhe khuba ni kumuluungo kwe khukhwikoomba naabi khuuba ni basaani, nga bakhaana bano ni bakholile ta.

⁴⁹Ise ikhaabelihaasilekho khulwe khuuba ni kumuluungo kwe khukhwikoomba naabi khuuba ni basaani. Ikhaabawe inywe shiitaambiso khulwe bibyoonako bye khukhwisaaya bifwaani. Nio lwanyuma lwayo, nanywe kane mumanye muri ise ndi niye Umukasya Wele.”