Read lumasaaba Ezekeli 24 Bible Online

Ezekeli 24 - lumasaaba bible

Ezekeli 24

¹Khu shifukhu she liikhumi, mu mweesi kukuukhola liikhumi, mu mwiiko kukuukhola sheenda kwe buubowe bweefwe mu Babulooni, Umukasya waanganikhayo nga aloma ari:

²“Umwaana uw'omuundu, rona bifukhu bye shaleelo. Khulwekhuuba khu shifukhu she shaleelo, umuyiinga uwa Babulooni waarakikhile khukhwibotookhelela Yerusalemu, nga akana khuushibwaakala.

³Boolela babaandu be mu Yerusalemu luukano luno, lweesi ise Umukasya Wele ingana indi bamanye: Bukula isaatsi mukire khu mayika, mukitsukhemo kameetsi.

⁴Remaka inyama indaayi inyene muremo; ramo tsinyama tsye shiinama ni tsye ngwaakwa. Ni murobore ni kamakuumba nako muremo.

⁵Inyama iyo muli ni khuurobora indaayi inyene nga ili iye lisheese; mubwaane kumulilo mukirekho; mukitutubise, nga muteekhelamo ni kamakuumba.”

⁶Ni nashiryo, Umukasya Wele alikho aloma ari: “Kumutaambo kwoolile khu shiriimba isho shishitsuulemo bikholwa bye bubwiiri! Shili busa nga isaatsi isi bakhasiingakho ta, iyitsuule buumali mukari. Muli ni khuurusamo tsinyama itsyo, indweela sha ndweela, tsyoosi tsiwemo, akhali khuromboosa ta.

⁷Khulwekhuuba shiifuki she babaandu sheesi baatsukha, sebashitsukha khu liloba busa lyamilikhila mu liloba ta, akhali indi bashitsukha khu lwaanda lulwoomu lulweene busa.

⁸Mu khukana khubokesanisa nibo liirima, ni khukhwilihaasa, ise naara shifuki isho khu lwaanda lulweene busa, nio balekhe khunyalisa khushibimbilila ta.

⁹“Ni nashiryo Umukasya Wele alikho aloma ari: Nga shili she kumutaambo isi shiriimba shishiilimo shiifuki! Ise samweene inabuusa tsiikhu tsingali tsinyene.

¹⁰Ni mwoongelekho bikeenga, mubwaane kumulilo. Ni mututubise inyama ishe buulayi, yaamemo suupu umusiro, khukhwoolisa ni kamakuumba kafwiifwitsikhile ilala.

¹¹Nio lwanyuma mwikhase isaatsi nga ili iŋaara busa khu maanda, ishe irobereere busa iri pe. Isho kane shinyalise isaatsi iyo khupyeeluukha, buumali bubuulimo bwoosi bururemo.

¹²Ikhaba nga ise naakhakilekho ni kamaani, ne kumulilo kwaakhasikhile khurusakho buumali ubwo bwoositsana.

¹³Khuukuba khweesi isaatsi iyo yakubamo, niyo khukhwikoomba khweesi inywe mwikoombamo naabi khuukhola bye buyeeyani. Khulwekhuuba ise naakhakakho naabi khubapyeluusa inywe khukhwaama khu bunyaalu bweenywe, ne inywe mwakhasikhana khupyeluukha, nashiryo inywe singane mupyeluukhe ta, khukhwoolisa nga ise naamalile khuubokesanisa inywe khuukhalala khwase.

¹⁴Ise Umukasya, niye ushilomile, ise ikhaashikhole. Ise singane imbokesanise inywe shiisa luundi ta, singane imbalekhe mutsye busa ta, naluundi singane nisonise khulwe bikholwa byase ta. Kane ise imbakhalile inywe kumusaango khuuloondekhana ni biikholwa byeenywe.” Ise Umukasya Wele niye ulomile bibiindu bino.

¹⁵Umukasya waanganikhayo nga aloma ari:

¹⁶“Umwaana uw'omuundu, bona mu mbuka ikhali iye aleeyi ta, ise ingana khukhurusakho umuundu isi iwe ukana naabi. Ne shitweela busa, iwe ukhalila namwe ukhakuukuula ta, namwe wakwiisa liisika ta.

¹⁷Yikhiliisa busa kumwooyo mumbola busa; akhali khukhwookesanisa uri ulikho ulila uyo ufwiile ta. Ukhenyusakho shitaambaala she khu murwe kwoowo ta, namwe wakyeendela aasi mu bikele busa, namwe webiimbilila mu moni, namwe waalya biilyo bye babaali khu masika ta.”

¹⁸Nashiryo ni bwasha kumutikhinyi, ise naboolela babaandu bibiindu bino. Uri angoloobe e shifukhu isho, umukhasi wase waasumbukha. Shiifukhu shisheelakho ise naakhola nga abe Umukasya n'anomela.

¹⁹Babaandu ni bambona isaambo yeesi nabamo, bandeeba bari, “Shiina kila iwe ulikho wibirisa mu saambo iyo? Shiina kila ukhali khuulila umukhasi woowo ta?”

²⁰Kila ise imbeelamo nga inoma indi: “Umukasya anganikhayo nga aloma ari,

²¹n'uuwe ba Isiraeli buurume bubuuloma buri: Inywe mwikana khulwe kamaani kakaali mu Lisaayilo Liikhulu. Mukana naabi khuuliloleelela ni khuulikyeniyila, ne Umukasya ali khuutsya khulyoonakisa. Babaana beenywe babaakane barame mu Yerusalemu, bakhaafwiile mu busoolo.

²²Shino shikhaakile inywe nanywe mukhole bibiindu byeesi ise ikholile; nga simwibimbililila mu moni ta, naluundi nga simulya biilyo bye babaali khu masika ta.

²³Inywe mukheebowe bitaambaala byeenywe khu mirwe, simukhaakyeendele aasi busa ta, namwe simukhaalile ta. Ne akhali mukhaawetsekhelele busa khulwe bibyoonako byeenywe, nga buli mutweela elootsela uwashe kumutaambo kwonyene.

²⁴Mu saambo iyo, ise ikhaabe she khuubonelakho ise muli; khuuba indi buli sheesi Umukasya akhola khus'iise, nanywe kane mushikhole. Nga shino shaabakholikhilekho, kane nanywe mumanye muri ise ndi niye Umukasya Wele.”

²⁵Umukasya waaloma ari, “Umwaana uw'omuundu, ise ikhaabarusekho nibo shishiindu sheesi bafuurisa khuukana naabi mu buulamu bwaabwe. Liisaayilo Liikhulu nilyo lyeesi beekanilamo naluundi nilyo kumwikhoyo kwaabwe, nga bakana naabi khuliloleelela ni khulikeniyila. Ne khu shifukhu khweesi ise ikhaakholele shishiindu isho, imbarusekho ni babaana baabwe,

²⁶umuundu mutweela alititukha amolokhe busa khukhwaama mu shiriimba, eetse akhuboolele iwe kamakhuuwa ako.

²⁷Khu shifukhu isho luulimi lwoowo lulikaangulukha wiilemo ukanikhe luundi, nio unyalise khuukanikha ni nabo, ulekhe khuba wawuma luundi ta. Ni nashiryo, iwe kane ube she khubonelakho isi bali, naluundi kane banyalise khuumanya bari ise ndi niye Umukasya.”