Read lumasaaba Ezekeli 25 Bible Online

Ezekeli 25 - lumasaaba bible

Ezekeli 25

¹Umukasya waanomela ari:

²“Umwaana uw'omuundu, khola buŋoosi khu ba Amoni, nga ubekiitsa bibiindu byeesi bakhola.

³Baboolele uri bali ni khuurekeeresa byeesi ise Umukasya Wele inoma: Nga Lisaayilo lyase ni lyonakisibwa, nibo baaba ni kumwikhoyo. Naluundi baaba ni kumwikhoyo khubona bari shibala she ba Isiraeli shonakisibwa, ni khuubona babaandu ba Yuda nga baatsya mu bubowe.

⁴Ni nashiryo nga inywe ni mwaba ni kumwikhoyo, ise intsya khubawaanayo inywe mu makhono ke babaandu khukhwaama i Bwaamanyaanga, khukhwikela nibo baawuli beenywe. Bakhoombakhe tsikaambi tsaabwe mus'iinywe bamenye mus'iinywe. Bakhaalye biilimwa byeenywe, naluundi banywe kamabeele keenywe.

⁵Ise ikhaashuuse shiriimba Raba shikyele shifwo she khubayilamo tsiŋamiya, ni shibala she ba Amoni shoosi shikele kamaayilwe ke kamasheese. Isho shikhaakile inywe mumanye muri ise ndi niye Umukasya.”

⁶Umukasya Wele alikho aloma ari: “Inywe mwaapaka muukhono naluundi mwashina khulwe kumwikhoyo. Inywe mwalekelesa shibala she ba Isiraeli.

⁷Ni nashiryo, bona ari ise naabebwakaalile inywe. Kane isiindikhe kamanaambo kakaandi khuunuula byeesi muli ni nabyo ni khuubeera inywe. Kane ise imboonakise inywe muweleewo ilala, mukoraanewo khukhwaama mu manaambo kakaandi. Kane ise imboonakise inywe, nio nanywe mumanye muri ise ndi niye Umukasya.”

⁸Umukasya alikho aloma ari: “Khulwekhuuba babaandu be mu Mowabu baaloma bari linaambo lya Yuda nalyo lili busa nga kamanaambo kakaaramire koosi,

⁹kane ise indekhuule baasiku beebwakale biriimba bibiili khu ndulo khwa Mowabu, nga bikitseeta. Biriimba bino mulimo bye kamaani naabi nga Besi Yesimosi, Bali Mewoni, ni Kiliyasimu.

¹⁰Ise ikhaalekhe babaandu be mu mubiimbi kukuuli ibwamanyaanga bawule linaambo lya Mowabu mu busoolo, atweela ni linaambo lye ba Amoni. Shino shikile linaambo lye ba Amoni likoraanilewo ilala, ilekhe khubawo umuundu yeesi ulishebulila ta.

¹¹Babaandu be mu Mowabu ise ikhaabawe shitaambiso, nio bamanye bari ise ndi niye Umukasya.”

¹²Umukasya Wele alikho aloma ari: “Babaandu be mu Edomu mu khwiliyaasa byeesi be mu Yuda baakhola, baababirisa buubi naabi, waakila shareerera be mu Edomu kumusaango kwe biilo byoosi.

¹³Ni nashiryo ise ndi khuukana khuuwa babaandu be mu Edomu shiitaambiso, nga niira babaandu boosi ni bisolo byoosi. Kane ikhole Edomu shikele kamakubili busa. Khukhwaamila mu shiriimba she i Temani, khuutsya khukhwoolisa mu shiriimba she i Dedani, babaandu boosi bakhaafwiile mu busoolo.

¹⁴Ise ikharaambise babaandu baase ba Isiraeli beliyaase khu ba Edomu, nio akile ba Edomu bamanye buurafu ni liirima byeesi ise ndi ni nabyo.” Ise Umukasya Wele, samweene niye ulomile bibiindu bino.

¹⁵Umukasya Wele alikho aloma ari: “Ba Filisitiya mu khwilihaasa baabirisa abo abe babaali baasiku baabwe khuumala imbuka ingali buubi naabi, waakila khulwe liirima liikali, baaboonakisa baabamalawo.

¹⁶Ni nashiryo, ise Umukasya Wele, indikho inoma indi, kane ise nibwakale ba Filisitiya imbeere bawewo boosi. Kane ise niire ba Keresi, ikhaba ni naabo babaali khu ndulo khwe inyaantsa.

¹⁷Kane ise imbawe shitaambiso she kamaani naabi shishookesanisa liirima lyase. Nga ise naamalile khuubakholakho khu nibo bibiindu bino, kane nio bamanye bari ise ndi niye Umukasya.”