Read lumasaaba Ezekeli 26 Bible Online

Ezekeli 26 - lumasaaba bible

Ezekeli 26

¹Khu shifukhu shishinyoowa she kumweesi, mweesi ifwe khwoolisila kimiiko likhumi na mutweela nga khuli mu bubowe, Umukasya weetsa anganikhayo.

²Waaloma ari, “Umwaana uw'omuundu, iliwo shishiili khukila kila babaandu be mu Tuulo balikho beekhoya. Balikho bakukuukulila angaaki bari, ‘Shiriimba Yerusalemu shonakisibwile! Ari seshili ni kamaani ke khuukhola bye busuubusi ta! Ari seshinyala shelekhaasa ni nafwe luundi ta.’

³“Nashiryo Umukasya Wele alikho aloma ari: inywe babaandu be mu shiriimba Tuulo, ari ise nekelile umusiku weenywe. Kane ise isiindikhe kamanaambo kamakali keetse kasiindikhana nga biibuli bye kameetsi khu nyaantsa, babebwaakale inywe.

⁴Bakhoonakise kamatikiiyi ke shiriimba Tuulo, bafuniaake ni kumunaala. Ise ikheyele ilala liiloba lyaabwe indimalewo, imbalekhele lulwaanda lulwoomu busa.

⁵Mu shifwo mweesi shiimilemo ari, abo babaaloba tsinyeeni bakhaatsye barekho butiimba bwaabwe bari nio bwoome. Kamanaambo kakaandi kakhaanuule buli sheesi babaandu be mu Tuulo bali ni nasho. Ise Umukasya Wele, niye ulomile bibiindu bino.

⁶Baasiku bakheere ikhaba abo babaamenya mu biriimba bibiili aleeyi khukhwaama khu nyaantsa. Nio shino shikile babaandu be mu Tuulo bamanye bari ise ndi niye Umukasya.”

⁷Khulwekhuuba Umukasya Wele alikho aloma ari. “Bona ise ndi khuutsya khureera mu Tuulo umuyiinga ufuurisa kamaani mu bayiinga boositsana, nga niye Nebukaduneza, uli umuyiinga uwa Babulooni. Kane eetse ni tsiŋwaaŋwa, ni kamakaali, ni basilikhale babaakyeendela khu ŋwaaŋwa, nga ali atweela ni basilikhale babaandi baakali babeene.

⁸Abo babaamenya khu liloba liliili aleeyi khukhwaama khu nyaantsa, bakhaabeerire mu busoolo. Umusiku akhaayabe buurwi, atsukhe naluundi emise kuuloba kwe khuuniinilakho, babebotookhelele inywe nga bawaambile kamafumo.

⁹Bakhaaraambise kimisaala kye kamaani khuukuunyaka litikiiyi lyeenywe khuukwa aasi, ne babaandi baliraambisa kimibya khuukuunyaka kiminaala tsyeenywe.

¹⁰Lufuumbi lweesi tsiŋwaaŋwa tsikhenyuse, lukhaabe luukali naabi, lubabimbilile inywe. Luutiri lwe tsiŋwaaŋwa nga tsikhweesa kamakaali luukhaabe luukali lulweene, khukhwoolisa lunikinise ni kamatikiiyi ke shiriimba, nga kabira mu bilibwa bye shiriimba shishikhaabe shekyelile kamakubili.

¹¹Baselikhale beewe bakhengile mu shiriimba sheenywe, beere babaandu nga buli mutweela araambisa luurima. Kimisiindi kyeenywe kye kamaani naabi ikyo, bakhaakituume aasi.

¹²Baasiku bakhaakabanane bye buyiindifu byeenywe, ni bye busubuusi byeenywe. Bakhaamenyulake kamatikiiyi ke shiriimba sheenywe naluundi boonakise tsiintsu tsyeenywe tsindayi itsyo. Bakhaawaambe kamabaale keenywe, ni tsimbaawo tsyeenywe, ni liiloba lyeesi bakhaayoole, babituume mu nyaantsa.

¹³Ise ikhaakamise kimyeenya kyeenywe kyeesi mwiimba, naakamise ni khuuwulilikhana khwe likono lye kamatuungu.

¹⁴Ikhaabalekhe mube busa nga lulwaanda lulwoomu busa, khweesi abo babaloba tsinyeeni boomisila tsinyeeni tsyaabwe. Simukheelemo mwombakhe shiriimba isho bushaakha ta. Ise Umukasya Wele, samweene niye ulomile bibiindu bino.”

¹⁵Umukasya Wele alikho alomela babaandu be mu Tuulo ari: “Nga inywe mulikho mwiiribwa naluundi mutsiinisibwa, babaandu babaamenya khu ndulo khwe nyaantsa ni bakhaabone ibyo, bakhaabe ni khuurya khuukali naabi, biinikino bibawaambe.

¹⁶Isho shikhaakile baayiinga be babaandu babaamenya khu ndulo khwe nyaantsa abo baantsukhe bitsoloŋo byaabwe, balekhuulile buuyiinga. Bakheyabule bikwaaro byaabwe bye shiriifwa, berusekho biikwaaro biimiliwu, bekhale aasi nga bali mu binikino byoonyene. Isaambo isi inywe mukhaabirisibwemo ikhaakile nibo beekhale aasi khwiiloba banikine akhali khukhwaakama ta.

¹⁷Isho shikhaakile beembe kumweenya kwe kamasika kukubawaamba khus'iinywe nga kuloma kuri: Shiriimba abe shishamanyikhana naabi, shoonakisibwile! Tsimeeli tsyaabwe abe tsitsiili khu nyaantsa, tsyayilibwile. Babaandu baamwo abe nibo bawuli ba buli shishikholikha khu nyaantsa. Abe nibo baawula buli mutweela umenya khu ndulo khwe nyaantsa.

¹⁸Ari khu shifukhu khweesi bakhaashoonakisilekho, bikelemeesi bikhaanikine busa. Ni babaandu babaabilikho beyaangile naabi musaambo isi shoonakisibwilemo.”

¹⁹Umukasya Wele alikho aloma ari: “Ise ikhaakile inywe mube shiriimba she kamakubili busa, nga biriimba byeesi umuundu akhanyala waamenyamo ta. Ikhaareere kameetsi khukhwaama mu nyaantsa, kakhwiliilise iwe.

²⁰Nio lwanyuma ise ikhusiindikhe iwe imakoombe, khuutsya khukhwitubaasa khu baandu babaafwa khaale. Ikhaakhulekhe iwe umenye imakoombe mu makubili ke biilo ni biilo, nga uli atweela ni naabo babaafwa khaale. Nio ikhumaliilisa, ilekhe khubawo na mutweela uli khuumenya mus'iiwe luundi ta, naluundi s'uulikyela shiriimba luundi ta.

²¹Ise ikhaakhwoonakise iwe uweelewo ilala, nga mbaawo shishiramawo ta. Abe ikhaba babaandu baakhakhuweentsa, ne iwe s'uulinyoolikhana luundi ta.” Umukasya Wele, umweene niye ulomile bibiindu bino.