Read lumasaaba Ezekeli 27 Bible Online

Ezekeli 27 - lumasaaba bible

Ezekeli 27

¹Umukasya waanomela ari,

²“Umwaana w'omuundu, ni wiimbe kumweenya kwe khusiikha shiriimba Tuulo,

³nga uloma uri, Tuulo iwe shiriimba shishiili khu ndulo khwe inyaantsa, naluundi nga shikhola bye busubuusi ni babaandu babaamenya khu ndulo khwa buli inyaantsa. Umukasya alikho akhulomela iwe ari: Tuulo, iwe weyiinga naabi khulwekhuuba bari uli umumiliwu naabi.

⁴Iwe wabalaayisa bubwikhalilo bwoowo khukhwoolisa ni mu nyaantsa mukari; Babaandu babaakhwombakha iwe baakhukhola waabonekha nga imeeli imiliwu.

⁵Baboombakhi babaakhwombakha iwe, baaraambisa tsimbaawo tsye kimisaala kimikumu naabi khukhwaama khu lukiingi Herumoni. Naluundi baaraambisa kuusaala kedali nga bakhola kusiindi kukwehelekesa mu ngaaki.

⁶Bawaamba kimisaala kimi oko khukhwaama mu Bashani, baakholamo kimikaango kikiitimisa kamakhoŋolo. Lulwaalo lwa buli likhoŋolo baalukhola khukhwaama mu misaala sayipuraasi. Khu ngaaki khwakyo babiimbakho ni kamasaanga k'entsofu.

⁷Tsingubo tsitsikeendisa tsimeeli, baatsikhola khukhwaama mu bikwaaro biimiliwu khukhwaama i Misiri. Shino shaanyalisa babaandu khuutsimanya nga tsishiili aleeyi. Baraambisa tsingubo tsitsilimo iraangi imbuusi n'inandaafu khukhwaama mu Sayipuraasi, khukhwibotokhelesa ibulafu we lulwaalo lwe imeeli.

⁸Basaani abe beesi inywe mwarawo khuutimisa tsimeeli tsino, abe baama mu biriimba bye Sidoni ni Aravadi. Babaandu boowo nga bali nibo baamanyilifu naabi mu bye tsimeeli, abe nibo babaraangirira tsimeeli tsino.

⁹Babeetsi be kamakhula khukhwaama i Babulooni, abe babaakhola kwe khuuŋoona ibyo bibyoonekha khu meeli itsyo. Baraangirisi be tsimeeli khukhwaama buli aandu oosi, abe bakhola bye busuubusi ni nawe.

¹⁰“Basilikhale khukhwaama i Pasiya, Lidiya ni Libiya abe bali batweela khu be liiye lyoowo. Abe tsingabo tsyaabwe ni tsikofwiila tsitsibatseeta nibo imurwe, babibiikha mu kaambi yoowo iye kamahe. Abe nibo basilikhale babaakila iwe wafuna shiriifwa.

¹¹Basilikhale khukhwaama i Aravadi abe nibo babaatseeta tsiimako tsyoowo. Ni naabo khukhwaama i Gamadi abe nibo babaatseeta kumunaala. Abe baasuunga tsingabo tsyaabwe khu matikiiyi koowo. Nibo babaakila iwe wabonekha nga uli umumiliwu naabi.

¹²“Iwe wakhola bye busubuusi ni Sipeyini khulwekhuuba abe iwe uli ni bye buyiindifu bye kamaani naabi, nga mulimo ifweesa, bibyuuma, ni bibyuuma bibiindi biisiro. Abe nibo bayila bino, bakhureerera iwe byeesi bali ni nabyo.

¹³Iwe wakhola bye busubuusi ni babaandu be mu Buyonaani, Tubali, ni Meseki. Abe iwe ubawa nibo bye busubuusi byoowo, nibo baakhuwa iwe baakulwa ni buroonzi.

¹⁴Abe iwe ukulaana ni babaandu be Besi Togama, nga nibo bakhureerera iwe tsiŋwaaŋwa tsitsikhola kimilimo, tsye khuraambisa mu busoolo, ni tsye khuubaya busa.

¹⁵Babaandu be mu Rodesi abe bakhola bye busubuusi ni nawe; ikhaba babaandu baakali abe babebotokheleele inyaantsa, nabo baryo. Abe nibo bakhureerera iwe kamasaanga ke tsintsofu ni tsimbaawo tsimali.

¹⁶Babaandu be mu Siriya abe bakula bye busubuusi byoowo ni bibiindu biikali khukhwaama mu byeesi iwe ukhola. Abe nibo bakhureerera iwe tsingubo tsinandaafu, ni tsitsiindi nga tsimiliwu naabi, ni kamabaale kamamiliwu naabi khukhwaama mu nyaantsa.

¹⁷Babaandu be mu Yuda ni be mu Isiraeli abe bakhola busubuusi ni nawe. Abe nibo bakhureerera iwe iŋaano, bubuushi, kamafura ke kuusaala ku olivu, ni bibiwunya buulayi, nio baayila bitweela khu bye busubuusi byoowo.

¹⁸Babaandu be mu Damasiko baabona nga iwe uli ni bye busubuusi biikali, bakulaana ni nawe nga bakhureerera iviini khukhwaama i Heluboni, ni bubwooya bwe kamasheese khukhwaama i Zahari.

¹⁹Naluundi bakulaana ni nawe nga bakhureerera iwe biibya ni bibiindu bibiŋaayisa tsinyanyi.

²⁰Babaandu be mu Dedani abe bakulaana ni nawe nga bakhureerera iwe tsingubo tsye khukhwikhalilakho khu ŋamiya.

²¹Be mu Buwarabu ni baawuli be mu shibala she ba Kedari abe bakulaana ni nawe nga bakhureerera iwe kamasheese kamaana, ni kamakhulu, ni tsimbusi.

²²Babaandu be mu Shaba ni Rama abe bakhola busubuusi ni nawe, nga bakhureerera iwe bye khukhwisaaha, izaabu, ni bibiŋaayisa tsinyanyi.

²³Babaandu be mu biriimba bye Harani, Kane, ni baasuubusi be mu Sheba, ni be mu biriimba Ashuru ni Kilimadi, bano boosi baakhola bye busubuusi ni nawe.

²⁴Bano abe bakhukulisa iwe bikwaaro bibiibonekha bulaayi naabi, nga bili birandaafu, nga bibonekha buulayi, ni kimikheekha kimimiliwu, ni kimisipi nakyo kimilayi naabi.

²⁵Abe bye busuubusi byoowo babisutila mu meeli tsitsisuta bibiindu nga tsili tsingali, naluundi nga tsikyeendela atweela. Nashiryo iwe waba busa nga imeeli ili mu nyaantsa nga yetsuulemo bisutwa.

²⁶Babaakhukyeendisa iwe nga imeeli baakhureera baakhwoolisa aleeyi naabi khu nyaantsa. Ne ikhuungu iye kamaani yaama ibwaamanyaanga, yaakila iwe wefumalikha.

²⁷Bye buyiindifu byoowo, bye khuukulisa byoowo, ni n'aabo boosi babaaraangirira tsimeeli tsyoowo, ni babaaŋoona tsimeeli nga tsyonekhile ni baasubusi boowo, ni basilikhale boosi babaali ni nawe, byoonekha. Lituuli lyoosi lyeesi iwe waba ni nalyo, ibyo byoosi byoonakisibwila khu nyaantsa, nga imeeli yoowo ni yesiikha mu meetsi.

²⁸Shibala shoosi shaarya khulwe khukuukuula khw'abo babaatimisa tsimeeli tsyoowo.”

²⁹“Babaandu bayaantsukha tsimeeli tsyoosi, abe babaatsiraangirira, ni babaatsikeendelamo boosi, beemikhile khu ndulo khwe inyaantsa.

³⁰Boosi balila nga bakuukuulila angaaki khulwoowo. Baatuumaka lifukhuulu mu mirwe kyaabwe, naluundi befuufulila mu likoshe.

³¹Babekakho kamatsuune kaabwe khulwoowo, naluundi bakwaara ni bikwaaro bye bukoongwe bibiiwunaka. Kimyooyo kyaabwe kyetsuule kumutaambo, nga ni balila khulwoowo.

³²Mu khulila khwaabwe, bakhwiimbila iwe kumweenya kwe kumutaambo, nga bakhola shiisa khulwoowo, nga baloma bari: Tuulo, iwe abe uli shiriimba she ka maani naabi! Ne bona ari waayonakisibwa uli aasi mu nyaantsa!

³³Abe nga bye busubuusi byoowo byatsiile mu manaambo k'eebulafu, abe buli linaambo lifunakho sheesi likana. Bayiinga be khu shibala shoosi baafuna buyiindifu khukhwaama mu bye busubuusi bwoowo.

³⁴Ne bona ari iwe waayisiikha mu nyaantsa aasi; waayisiikha khu lwaalo lwe nyaantsa. Bye busuubusi byoowo ni naabo abe babaraamba khu meeli tsyoowo, besiikha ni nawe mu meetsi.

³⁵“Babaandu babaamenya khu ndulo khwe nyaantsa boosi beesindukhile naabi, khulwe bibiindu bibikhukholikhile khus'iiwe. Ikhaba bayiinga baabwe bafuna kamariisyo kamakali naabi, baasamiliile busa.

³⁶Baasuubusi boosi khu shibala basiisikha busa kimirwe khulwe khuurya, musaambo isi iwe woonakisibwilemo. Iwe woonakisibwa musaambo imbi naabi, naluundi iwe woonakisibwiile ilala, s'uulilakho ubewo luundi ta.”