Read lumasaaba Ezekeli 28 Bible Online

Ezekeli 28 - lumasaaba bible

Ezekeli 28

¹Umukasya waanganikhayo nga aloma ari:

²“Umwaana uw'omuundu, tsya uboolele umuyiinga wa Tuulo byeesi ise Umukasya, indikho inoma uri: Bona iwe wiyiinga naabi nga winiinisa angaaki, nga wilaanga khuuba wele. Iwe wilomela wamweene uri uli nga wele khulwekhuuba wiikhala khu shitsoloŋo she angaaki, nga inyaantsa yaakhwibotookhelela. Iwe waakhekholisa khuuba wele, iwe waakheyila khuumanya buli shitweela nga wele, ne uli ni khuushimanya uri uli muundu busa.

³Iwe wambaasa uri uli ni kamakhula kamakali khuuminyisa Danieli, nga wambaasa uri waamanya buli shimoonyo shoositsana.

⁴Khulwe kamakhula koowo ni bumanyilifu mu khuukhola bibiindu, iwe waayifunila bye buyiindifu by'efeetsa n'izaabu.

⁵Khulwe kamakhula koowo ke angaaki mu bye busuubusi, iwe waayikholela wamweene kamafuurisa kamakali naabi. Ari khulwe buyiindifu buno, iwe winiinisa naabi angaaki.

⁶“Ni nashiryo, Umukasya Wele, alikho aloma ari: Khulwekhubeela iwe wiyila khuuba ni kamakhula nga ka wele,

⁷nashiryo bona ari ise inasiindikha bareende bakhwibwaakale iwe. Bakhoonakise bibiindu biilayi byoosi byeesi iwe wafuna nga ubirira mu makhula koowo, ni mu bumanyilifu bwoowo mu khukhola bibiindu, nga baraambisa busoolo.

⁸Baasiku boowo bakhaakhwiire iwe, bakhutuume mu lilowo, ufwe liifwa ly'aabo babaatuumibwa bafwiila aasi mu nyaantsa.

⁹Nga baasiku beetsile khukhwiira, iwe shitweela busa ukheyiinge nga uloma uri uli wele? Nga bakhwibwakaale, iwe ukhaataambisibwe busa nga umuundu yeesi naaba mu mutaambo, khulwekhuuba iwe s'uuli wele ta.

¹⁰Babaandu be kamanaambo kakaakhaantsisaaya ise ta bakhaakhwiire iwe, ufwe liifwa lye babaandu be kamanaambo kakaandi busa. Ise samweene, Umukasya Wele niye uweele shilakilo shino.”

¹¹Umukasya waanganikhayo nga aloma ari:

¹²“Umwaana uw'omuundu, yiimba kumweenya kwe kumutaambo, nga ukwiimba khulwe khubeela umuyiinga uwa Tuulo. Umuboolele byeesi ise Umukasya Wele indikho inoma indi: Yabawo imbuka indweela yeesi iwe wabeela nga she khubonelakho mu khuba umuundu umulayi. Nga waba abe uli umumiliwu naluundi nga abe wayitsula kamakhula!

¹³Iwe abe umenya mu Edeni, mu mukuunda kwa Wele. Abe iwe ukwaara bye khukhwisaaha bya buli shikuuka ni tsiraangi ni kamabaale ke buukusi bwe angaaki. Abe bibiindu bino mulimo nga karameli, topasi, yasipa, kurisola, berili, onikisi, safaya, ni bibiindi bye angaaki. Abe uli ni bibiindu nga bili bye izaabu.

¹⁴Ise narobora malayika khuuba nga niye umuliindi woowo. Iwe wamenya khu lukiingi lwa Wele, luluuli lukhosefu, wakyeendela khu mabaale kakaamelamela busa.

¹⁵Khukhwaamila khu shifukhu sheesi ise nakhubuumbilamo iwe, abe wibirisa buulayi, khukhwoolisa khu shifukhu sheesi iwe warakikhilakho khuukhola bibyoonako.

¹⁶Khulwe buyiindifu bweesi iwe waamisa mu bye busuubusi byoowo ni kamanaambo kakaandi, iwe wetsulamo biikholwa bye bisayuumba ni bubwoonaki. Ni nashiryo, ise nakhutuuma iwe nga shishiikhalimo kumukaso ta, khukhwaama khu lukiingi lwa Wele. Ni malayika abe ukhuliinda iwe uyo, waakhutimisa iwe khuurura abe isi ukyeendela khu mabaale kakaamelamela busa.

¹⁷Abe iwe wiyiinga bari khulwekhubeela uli umumiliwu, ni shiriifwa shoowo shaakila iwe wawaamba kamakhula koowo waakekyeelisa she buusilu. Khulwa shino, ise nakhutsukutsa iwe aasi, nga ise ingana bayiinga babaandi bakhubone iwe bakhulekelesa nga n'uuli.

¹⁸Khulwe bubwoonaki bwoowo buukali, ni mu khuba nga iwe wibirisa buubi mu bye busuubusi bwoowo, waakila iwe waareera imbikho mu biifwo byoowo bye khukhwisaayilamo. Ni nashiryo, ise nareera kumulilo kwakhwoosha iwe, waakila mu moni tsyaabo babaakhubona, ise nakhwikyelisa iwe khuuba nga shibiikha she likoshe khu shibala.

¹⁹Kamanaambo koosi abe kakaakhumanya iwe, kalikho keyaanga busa shishakhukholikha khuusi iwe naluundi kali ni khuurya khuukali. Intsakamo yoowo yaabeele imbi naabi naluundi iwe waaweleelemo ilala, s'uulinyukha luundi ta.”

²⁰Umukasya waanganikhayo nga aloma ari:

²¹“Umwaana uw'omuundu, tsya i Sidoni ukhole buŋoosi nga ubaboolela bibiindu bibibawaambakho. Balomele uri Umukasya Wele, alikho aloma ari, babaandu be mu Sidoni, bona ari ise nekelile niye umusiku weenywe. Ise kane nookesanise shiriifwa shase akari mus'iinywe. Ari nga ise naabaweele nibo shitaambiso, naluundi naabokesanisile nibo bukhosefu bwase, kane nabo bamanye bari ise ndi niye Umukasya.

²²Baboolele uri Umukasya Wele alikho abalomela inywe be mu Sidoni ari, bona ari ise ndi umusiku weenywe. Kane ise nokesanise shiriifwa shase akari mus'iinywe. Ari nga ise nabaweele nibo shitaambiso, naluundi nabokesanisile nibo bukhosefu bwase, kane nabo bamanye bari ise ndi niye Umukasya.

²³Khulwekhuuba ise ikhaabasiindikhile nibo tsindwaale tsiimbi naabi tsibeere, kamafuki ke babaandu keekhe busa mu mikhoosi nga kameetsi. Baasiku bakhaabebwaakale inywe khukhwaamila khu buli luwaande, beere babaandu beenywe. Nio mumanye muri ise ndi niye Umukasya.”

²⁴Umukasya waaloma ari, “Mbaawo na litweela khu manaambo kakebotookheleele ba Isiraeli nga kababirisa buubi, lilikane liramewo nga lili nga kamawa namwe luwaambi isi ba Isiraeli ta.”

²⁵Umukasya weeloosela waaloma ari, “Nga ise naabuusaasile be lisaaye lya Isiraeli khukhwaama mu manaambo keesi basalaniilemo, naluundi nga nookesanile bukhosefu bwase nga kamanaambo koosi kabona, balitsya bamenye mu liloba lyaabwe lilyeene lyeesi ise naawa umwakaanisi wase Yakobo.

²⁶Bakhaamenye ibweene iyo mu lukoosi, boombakhe tsiintsu bamenyemo naluundi babyaale kimizabibu. Nga ise naamalile khuuwa shitaambiso babaandu abo boosi babaabirisa ba Isiraeli buubi, naluundi baabalekelesa, ba Isiraeli bakhaamenye mu lukoosi. Nio ikhumaliilisa bamanye bari ise ndi niye Umukasya Wele waabwe.”