Read lumasaaba Ezekeli 29 Bible Online

Ezekeli 29 - lumasaaba bible

Ezekeli 29

¹Khu shifukhu she liikhumi na bibili, mu mweesi kwe likhumi, mu mwiiko kukuukhola liikhumi kwe buubowe bweefwe, Umukasya waanganikhayo isi ise.

²Waanomela ari, “Umwaana uw'omuundu, tsya isi Faraawo umuyiinga uwa Misiri ukhole buŋoosi bubuumwikiitsa. Muboolele uri niye ni babaandu be mu Misiri boosi batsya khufuna shiitaambiso.

³Muboolele uri Umukasya Wele alikho akhuboolela iwe umuyiinga uwa Misiri ari: Iwe wilomela wamweene uri luluutsi Nayilo luli lulwoowo, iwe wamweene niye uwalubuumba. Iwe uli busa nga ikoonya iye kamaani n'iikona mu meetsi. Ne bona ari ise nekyelile umusiku woowo.

⁴Kane ise ikhure iwe kimilobo mu khanwa khoowo, nio akile tsiinyeeni tsye mu luutsi lwoowo tsyoosi tsikhwihandikhekho khu makhakayu koowo tsikhwomeelekho. Nio lwanyuma ise ikhukhweese iwe ikhuruse mu meetsi mukari, nga ni tsinyeeni tsye mu meetsi tsyoosi tsyakhwihandikhile khu mahakayu koowo tsyakhwomeelekho.

⁵Ise ikhaakhutuume iwe, atweela ni tsinyeeni tsitsiili mu ntsitsi tsyoowo itsyo, mu mubiimbi. Kumulaambo kwoowo kukhaakwe khu ngaaki busa, ilekhe khubawo namutweela ukubukula khuutsya khukusiikha ta. Ikhaakuwaaneyo isi biinywinywi ni tsisolo tsye mwiiswa, bikulye.

⁶Nio lwanyuma babaandu be mu Misiri boosi bamanye bari ise ndi Umukasya. Khulwekhuuba ikhaba nga ba Isiraeli babeyikina inywe nga babesikamakho, ne inywe mwaalekha khuuba babeyikinwa ta.

⁷Nga nibo ni baaloma bari babeyikamilila khuusiinywe, mwaamenyukha, mwaabawuna mu khwaawa, mwaakila baakhongokha kimikoongo kyaabwe.

⁸Ni nashiryo, ari ise Umukasya, indikho imbaboolela nywe ndi, intsya khubareerakho khusiinywe baasiku, babaakhaabeere inywe mwabeene atweela ni bibyaayo byeenywe.

⁹Shibala she ba Misiri shikhekyele busa busuumbu naluundi shibe nga kamakubili. Nio lwanyuma mumanye muri ise ndi niye Umukasya. “Khulwekhuuba iwe uloma uri luluutsi Nayilo luli lulwoowo, uri iwe niye uwalubuumba.

¹⁰Ni nashiryo, ari ise ndi umusiku woowo, naluundi umusiku uwe luluutsi lwoowo Nayilo. Kane ise ikhole Misiri shibe busuumbu busa, naluundi shibe nga kamakubili, khukhwaamila mu shiriimba she Migidoli shishiili ingaaki, khukhwoola mu shiriimba Aswani, shishiili ibikyele we shibala, ni khuutsya khukhwoolela ilala khu Esiyopiya.

¹¹Mbaawo umuundu ukhaasambemo shiikele namwe isolo ikhaasambemo ta. Shikhaabe busa nga mbaawo ushimenyamo ta, khukhwoolisa kimiiko kamakhumi kane.

¹²Ise ikhaakhole Misiri shibe nisho shibala shishiminyisa khuuba she kumubiimbi mu bibala bye kimibiimbi byoosi. Biriimba bye mu Misiri bikhaabe busa nga kamakubili khuumala kimiiko kamakhumi kane, biminyisekho biriimba bibiindi byoosi bibiili nga kamakubili. Ise ikhaakhole ba Misiri khuuba baamuli, imbasalanise mu manaambo koosi, ni mu bibaala bibiindu byoosi.”

¹³Khulwekhuuba Umukasya Wele, alikho aloma ari: “Lwanyuma lwe kimiiko kamakhumi kane, ise ikhaabuusaase ba Misiri khukhwaama mu baandu beesi ise nabasalanisamo,

¹⁴imbakobosele liiloba lyaabwe liliili imwaalo wa Misiri, liloba lyaabwe lilyeene lilyanyoowa, imbakobosele ni buyiindifu bwaabwe. Ne bakhaabe buyiinga butoro, bubukhali ni kamaani ta.

¹⁵Bakhaabe buyiinga bubuuminyisayo khuulekha khuuba ni kamaani ta, balekhe khukhwiilamo khuuwula kamanaambo kakaandi ta. Ise ikhaabekyelise nibo khuuba buyiinga bubuuli bukeekhe naabi nga sibuli ni kamaani ta, balekhe khuuwula kamanaambo kakaandi ta.

¹⁶Isiraeli s'ililakho luundi yisikame khu ba Misiri lwe buyeeti ta. Bibiikhaakholikhe khu Misiri bishebuse ba Isiraeli nga ni baakhola buubi amataayi, khuutsya khwisikama khu Misiri. Nio isho shikile bamanye bari ise ndi niye Umukasya Wele.”

¹⁷Khu shifukhu shiikiboole she kumweesi kumukiboole, kwe kumwiiko kwe kamakhumi kabili na musaafu kwe buubowe bweefwe mu Babulooni, Umukasya waanganikhayo.

¹⁸Waanomela ari, “Umwaana w'omuundu, umuyiinga Nabukaduneza uwa Babulooni aayila liiye lyeewe khukhwibwakala shiriimba Tuulo ni kamaani. Wawaambila liiye lyeewe kamaani khuusuta bisutwa bisiro khu mirwe kyaabwe ni khu mayi kaabwe, boola ni khuupumukha khu mirwe ni kamayi kanubuukha. Ne she khabi imbi, niye umweene namwe baselikhale beewe, mbaawo uwafuna khalayi khoosi khulwe khuutitiikhana khwaabwe, khukhwaama i Tuulo ta.

¹⁹Ni nashiryo, Umukasya Wele alikho aloma ari: Bona ari ise ndi khutsya khuuwa Nabukaduneza umuyiinga uwa Babulooni, liloba lye ba Misiri. Akhaasute buyiindifu bwaabwe bwoosi atsye ni nabwo, onakise shibala isho nga anuula buli shitweela, abiwe be liihe lyeewe nga nikwo kumusheemba kwaabwe.

²⁰Ise ndikho imuwa niye liloba lye ba Misiri nga imuliyila niye khulwe buraambi bweewe, khulwekhuuba liiye lyeewe lyayikholela ise buraambi bukali. Ise Umukasya Wele, samweene niye ulomile bibiindu bino.

²¹“Nga bibiindu bino byaakholikhile, ise ikhaakhole babaandu ba Isiraeli khuuba ni kamaani, naluundi iwe ukhaabe ni bunyiindaalifu bwe khubakanikhayo isi bali. Nio lwanyuma bamanye bari ise ndi niye Umukasya.”