Read lumasaaba Ezekeli 3 Bible Online

Ezekeli 3 - lumasaaba bible

Ezekeli 3

¹Kila Umukasya anomela ise ari, “Mwaana uw'omuundu, lya kuupapula kuwulukuse kweesi ise ikhuweele, nio lwanyuma utsye ukanikhe isi babaandu be linaambo lya Isiraeli.”

²Nashiryo ise naasama mukhanwa, Umukasya waamba ise kuupapula kuwulukuse naakulya.

³Kila anomela ise ari, “Mwaana uw'omuundu, n'ulye kuupapula kuwulukuse kuno kweesi ise ndikho ikhuwa iwe, witsuse inda yoowo niinakwo.” Kila nase ndi ingulya, nga mukhanwa kwaanula nga bubuushi bwe intsushi.

⁴Lwanyuma Wele waanomela ari, “Mwaana uw'omuundu, n'utsye mu linaambo lye ba Isiraeli ubaboolele buli shishiindu shoosi sheesi kane ise ikhuboolele iwe khuuloma.

⁵Khulwekhuuba sishili bari ise ndikho ikhurumana iwe mu linaambo lye babaandu babaakanikha luulomo lweesi iwe ukhamanyile ta; indikho ikhuramana isi ba Isiraeli.

⁶Ne shiba bari abe ise nakhurumana iwe mu manaambo kamakali kakaakanikha luulomo lweesi iwe ukhamanya namwe waatekeela ta, khali barekeeresa byeesi iwe uloma.

⁷Ne mbaawo namutweela khu baandu be linaambo lya Isiraeli ukane arekeerese byeesi iwe uloma ta. Khulwekhuuba boosi bali ni shikili naluundi bali ni sibakana bashuusakho buubi bwaabwe ta.

⁸Nashiryo kane ise ikhukhole iwe nawe ube ni shikili nga nibo, naluundi ube umunyiindaalifu nga nibo ni bali.

⁹Kane ise ikhukhole ube umukumu nga lulwaanda. Iwe ukhabarya nibo namwe imbonekha yaabwe yaakhurisaka iwe ta, khulwekhuuba bali liinaambo lye banabumiinyi.”

¹⁰Wele weloosela waanomela ari, “Mwaana w'omuundu, rekeeresa buulayi bubweene biilomo byeesi ise ndikho ikhuboolela, ubishebulile byoosi mu mwooyo kwoowo.

¹¹Lwanyuma utsye isi babaandu be linaambo lyoowo, babaali mu bubowe i Babulooni, ubaboolele sheesi ise Wele, Umukasya, indikho mbaloma nibo. Iwe baboolele oba barekeeresa oba sibarekeeresa ta.”

¹²Nio lwanyuma Mwoyo uwa Wele wasuta ise angaaki, naluundi ise naawulila liikono lye kamaani imukoongo wase nga liloma liri, “Ruuya shiriifwa sh'Omukasya uli mu ngaaki mwikulu.”

¹³Ilyo lyaba abe liikono lye khukhwitilanakho khwe tsindaha tsye tsisolo tsana tsine, ni likono lye kimikuwu abe kikitsili aambi. Ibyo nibyo bibyawoloola ni likono liikali.

¹⁴Kamaani k'Omukasya kaantsikha khus'iise ni bunyali bwe angaaki naabi, Umwoyo weewe waasuta ise waambila, ne nawulila lirima liikali ni khuukhalala khuukali naabi.

¹⁵Nashiryo ise naatsya i Tele Abibu shishiili khu ndulo khwe luluutsi Kebari, isi abe baabowe bamenya. Naamenya ni nabo khuumala biifukhu musaafu, nga ndi ni khuurya khuukali khulwe bibiindu byeesi ise nabona, naluundi byeesi nawulila.

¹⁶Lwanyuma lwe biifukhu musaafu, Umukasya weetsa isi ise ndi waanganikhayo, nga aloma ari,

¹⁷“Umwaana uw'omuundu, ari ise nakhwikyesile iwe khuuba niye umuliindi uwe linaambo lye ba Isiraeli. Buli lweesi ise inomela ilomo iye khuubareewura nibo, uli ni khuutsya ubareewure khu biindu byeesi ise imba naalomile.

¹⁸Siinga ise imala khuureewura umuundu umwoonaki nga inoma indi ali ni khuufwa, ne iwe waalekha khumureewura niye khuunyalisa khushuusakho tsisaambo tsyeewe, nio awonese buulamu bweewe ta, umwoonaki uyo akhaafwe khu lwe bibyoonako byeewe. Ne iwe niye ukhaabe ni kumusaango khulwe khuufwa khw'omuundu uyo.

¹⁹Ne siinga ureewura umwoonaki, ne niye waalekha khurura mu bye bubwoonaki bweewe, namwe intsibirisa yeewe imbi ta, umwoonaki uyo akhaafwe khulwe bibyoonako byeewe. Ne iwe s'uukhabekho ni kumusaango ta.

²⁰“Shishiindu shishiindi shili indi, n'iiba bari umuundu umukhosefu waantsukhile waarurire khu bukhosefu bweewe, warakikhile khuukhola bye bubwoonaki, ne ise naakhalawo khumureka kumubasu, umuundu uyo ali ni khuufwa. Umuundu afwa khulwe bubwoonaki bweewe, ise nalekha khushebulilakho bibiindu biilayi byoosi byeesi niye aakhola ta. Ne iwe niye ukhaabe ni kumusaango khulwe khuufwa khw'omuundu uyo.

²¹Ne iwe n'uba bari waarewuure umuundu umukhosefu uyo khuulekha khukhola bye bubwoonaki ta, naye waatsiilakho waalekha khukhola bye bubwoonaki ta, uyo s'akhaafwe ta, khulwekhuuba aba waaloondelela khuureewura khwase. Ni nawe s'ukhaabekho ni kumusaango ta.”

²²Kamaani k'Omukasya kaantsibotookhelela ise, kila ise naawulila nga Umukasya anoma ari, “Yiinyukha khu ngaaki, ukyeende utsye mu litila. Kane ise ikhukanikheyo nga iwe woolile ibweene iyo.”

²³Nashiryo ise nenyukha naatsya mu litila. Khaangukho, ise naabona shiriifwa sh'Omukasya shibonekha musaambo inyene isi nashibonela nga ni naba khu ndulo khwe luluutsi Kebari. Ise naakwa aasi nga nefumalikhile khu liloba.

²⁴Ne Umwoyo uwa Wele waantsingilamo, kila antsinyusa ise neemikha khu ngaaki. Kila Umukasya anganikhayo nga aloma ari, “N'utsye ingo woowo wiyikaliililewo muntsu yoowo.

²⁵Ni nawe mwaana w'omuundu, kane bakhubowe iwe ni kimikosi, ulekhe khunyalisa khukyeenda mu baandu ta.

²⁶Kane ise ikhole lulimi lwoowo luhaniilile, shikile iwe wikyele ukhanyala khuukanikha wareewura linaambo lye banabumiinyi abo ta.

²⁷Ne kane lwanyuma uri ise ikhukanikhayo isi iwe luundi, kane ise ikhukaangulule iwe lulimi lwoowo unyalise khuukanikha, unyalise khubaboolela byeesi ise Umukasya Wele, inaba naalomile. Abo babaakana khuurekeeresa, lekha barekeerese; abo babaakhaalobe khurekeeresa, lekha babe, khulwekhuuba ise naamanyile ndi lino lili linaambo lye babaandu banabumiinyi.”