Read lumasaaba Ezekeli 30 Bible Online

Ezekeli 30 - lumasaaba bible

Ezekeli 30

¹Umukasya waanganikhayo nga aloma ari:

²“Umwaana w'omuundu, n'ukhole buŋoosi nga ukuukuula sheesi ise Umukasya Wele indikho inoma. Uli ni khukuukuula nga uloma bilomo bino: Shiifukhu she kumutaambo shilikho shiitsa!

³Khulwekhuuba shiifukhu shili aambi, shiifukhu sh'Omukasya shili aambi. Shili shiifukhu she kumutaambo ni kamanaambo khutsiinisibwa.

⁴Ikhaabewo busoolo mu Misiri n'ingunyi ingali ikhaabe mu Esiyopiya. Babaandu baakali mu Misiri bakheeribwe, basute buyiindifu bwaabwe, balekhe shiibala isho nga shili busa nga kamakubili.

⁵“Mu busoolo umwo mukhaafwiilemo baasilikhale babaakholakanila atweela ni liiye lyeenywe, nga bano abe baama mu Esiyopiya, Puti, Ludi, Araniya, ni Libiya. Ikhaba abo babaama mu baandu baase babeene nabo bakhaafwiilemo.”

⁶Umukasya alikho aloma ari. “Khukhwaamila ilala i Migidoli shishiili ingaaki we linaambo, khukhwoolisila ilala khu Aswani, shishiili imwaalo we linaambo, abo boosi babatseeta Misiri bakheeribwile mu busoolo. Bakhoonakise liiye lya Misiri liliiyiinga ilyo. Ise Umukasya Wele niye ulomile bibiindu bino.

⁷Shiibala isho shikhaabe nisho shishiminyisa khuuba she kumubiimbi mu bibala byoosi bye kimibiimbi, ni biriimba byasho bikhaabe nibyo bibiminyisayo khuuba bye kamakubili khuuminyisa ibyo byoosi bibyekyela kamakubili.

⁸Nga ise nawaambisile kumulilo mu Misiri, naluundi nga abo boosi babaakiyeeta beeribwire, nio nabo bamanye bari ise ndi niye Umukasya.

⁹“Khu shifukhu isho sheesi balyoonakisilakho Misiri, ise ikhaasiindikhile baarume nga bali mu meeri tsingali, batsye babuukhe busa ba Esiyopiya nga babaakuukuulila bari bali aambi khukhwiiribwa. Shiifukhu isho shili aambi shilikho shiitsa!”

¹⁰Umukasya alikho aloma ari. “Ise ikharaambise kamaani k'omuyiinga Nebukaduneza uwa Babulooni, khukhwoonakisa buyiindifu bwa Misiri.

¹¹Nebukaduneza ni liiye lyeewe lilikhalimo shiisa ilyo ta, mu manaambo koosi, bakheetse boonakise shiibala isho. Bakhebwakale ba Misiri mu busoolo, balekhe nga shibala shetsuule kimilaambo.

¹²Ise ikhaakhole luluutsi Nayilo lwoome, naluundi imaambe Misiri ingiwaaneyo mu makhono ke babaandu babaali baabi naabi, bekyele baawuli baabwe. Babeetswa abo bakhaasisakule shiibala sha Misiri shoosi nabuli shishiindu shishiishilimo. Ise samweene Umukasya, niye ukanikhile bibiindu ibyo.”

¹³Umukasya Wele alikho aloma ari: “Ise ikhoonakise bibuumbe ni bifwaani bye ba wele be bubeeyi, bibiili mu Menfisi. S'ikhaabeyo umuundu yeesi unyala khuuba umuraangirisi mu Misiri ta, ni nashiryo bakhaabemo khuurya khuukali naabi.

¹⁴Ise ikhaakaluse shisiintsa she imwaalo wa Misiri shiikyele kumubiimbi busa, naluundi shiriimba she Zowani shishiili ingaaki we linaambo ikhaashiwaambisekho kumulilo. Shiriimba shikhulu she Tebesi, ise ikhaashiwe shiitaambiso.

¹⁵Babaandu be mu shiriimba Pelusumu, nga nisho shishiminyisa khuuba she kamaani naabi mu Misiri, ise ikhaabokesanise liirima liikali naabi. Liiye lyaabwe liliili mu Tebesi lyoosi, likheeribwe.

¹⁶Ise ikhaawaambise kumulilo mu Misiri. Ni babaandu be mu shiriimba she Pelusumu bakhaakhalale naabi. Bakhaawumbulake kamatikiiyi kakaatseeta Tebesi, nio akile kameetsi kasalasale mu shiriimba shoosi.

¹⁷Basoleeli be mu biriimba bye i Heliyopolisi ni Bubasitisi bakhaafwiile mu busoolo; ne bakyelema bakhaatsye ni nabo babayile mu bubowe.

¹⁸Nga ise naafuniaakile kamaani ke ba Misiri, naluundi nga naakamisile buwuli bwaabwe, bubuukila nio beyiinga, shishiilima shikhaamaamile shiriimba she i Tapanesi. Kamafuumbi kakhaabimbilile Misiri yoosi, ni babaandu babaamenya mu biriimba byaabwe bakhaayilibwe nga baabowe.

¹⁹Musaambo iyo niyo isi ise ikhaawemo Misiri shiitaambiso. Nio shino shikile nabo bamanye bari ise niye Umukasya.”

²⁰Khu shifukhu shishikhola musaafu, mu mweesi kukuunyoowa, mu mwiiko kwe likhumi na mutweela kwe buubowe bweefwe, Umukasya waanganikhayo luundi.

²¹Waaloma ari, “Umwaana uw'omuundu, ise ari naamalile khufuura umuyiinga uwa Misiri mu busoolo. Mbaawo umuundu ulikho umusilikha kamakoontso keewe, namwe waamuyeeta khutitilisa kumukhono kweewe bari nio kuwone, kunyalise khukhwiilamo khuwaamba luurima luundi ta.

²²Ni nashiryo, ise Umukasya Wele indikho noma indi, ari ise ndi umusiku uw'omuyiinga wa Misiri. Kane ise ifuniaake kamakhono keewe koombitsana, ukwo kukushiili kumulamu ni n'okwo kukwafunikhakho khaale. Kane shino shikile luurima luhanukhe khukhwaama mu mukhono kweewe.

²³Kane ise isalanise ba Misiri mu manaambo koosi, bamalaatane shiibala shoosi.

²⁴Kane ise inyalise umuyiinga uwa Babulooni khuuba ni kamakhono kakaali ke kamaani naabi, imuwaambise ni luurima. Ne kane ise ifuniaake kamakhono k'omuyiinga uwa Misiri, akuukuule nga alilila mu butsiina bukali ibweeni w'omuyiinga uwa Babulooni, abe busa nga umuundu uli khuufwa.

²⁵Kane ise inyalise umuyiinga uwa Babulooni khuuba ni kamakhono kakaali ni kamaani naabi, ne kane ise ifuniaake kamakhono k'omuyiinga uwa Misiri. Nga ise nawaambisile umuyiinga uwa Babulooni luurima, akhebwakale ba Misiri. Shino shikhaakile nabo bamanye bari ise ndi niye Umuyiinga.

²⁶Ise ikhaasalanise ba Misiri mu manaambo koosi, bamalaatane shiibala shoosi. Shino shikhaakile bamanye bari ise ndi niye Umukasya.”