Read lumasaaba Ezekeli 31 Bible Online

Ezekeli 31 - lumasaaba bible

Ezekeli 31

¹Khu shifukhu shiikiboole she kumweesi kukuukhola khataru, mu mwiiko kwe likhumi na mutweela kwe buubowe bweefwe, Umukasya waanganikhayo.

²Wanomela ari: “Umwaana uw'omuundu, tsya uboolele umuyiinga uwa Misiri ni babaandu beewe boosi bibiindu bino: Iwe nga uli uwe kamaani! Kamaani koowo kane khukalekhaase khu shiina?

³Kane ise ikhulekhaase iwe khu kuusaala ku kedali kwe mu Lebanooni, Kukuuli ni kamasaafu kamabalaayi naluundi kamamiliwu, kukuuli kuusaala kuleeyi naabi nga kwoola ni mu mafuumbi.

⁴Kwaba ni kameetsi kakaamala mu khuukutsowesa, ni kameetsi ke mwiloba aasi kaakila nikwo kwaatsowa kwaaba kuuleeyi. Baakhiingilila kameetsi kaatsya isi baakubyaala, waakila kameetsi ke tsintsitsi itsyo keekha mu misaala kyoosi kye mu shisaali.

⁵Ni nashiryo isho shaakila kwaaleeha naabi kwaaminyisakho kimisaala kyoosi kye mu shisaali. Tsisakya tsyakwo tsyaaba tsindeeyi naluundi nga tsili tsimboofu, khulwe kameetsi keesi abe kunywa.

⁶Binywiinywi bya buli shikuuka byaatsya byoombakha biiswi muusakya tsyakwo. Ikhaba tsisolo tse mwirome natsyo tsyaatsya tsyamenya mwiisina mwakwo. Kamanaambo ke khu shibala koosi kaatsya kaamenya mwiisina mwakwo.

⁷Abe kuli kuuboofu nga kubonekha buulayi, khulwe tsisakya tsyakwo abe tsitsiili tsindeeyi. Tsiindi tsyakwo tsyeekha tsyoolela ilala aasi abweene khu meetsi.

⁸Kimisaala kimi kedali abe kikiili mu mukuunda kwa Wele kyaalekha ikhaba khuukwoolakho ta. Namwe mbaawo kuusaala kukuundi kwe mu shisaali abe kukukwoolakho ta. Abe nga waakulekhaasile khu misaala kye khu lukyeewa busa, abe sekikwoolakho ta. Abe mbaawo kuusaala mu mukuunda kwa Wele abe kukwoolela ku kedali ukwo buumiliwu ta.

⁹Ise naakukhola kwaabonekha buulayi khulwe tsisakya tsimbalaayi tsyeesi ise nakuwa nikwo. Kimisaala kyoosi kye mu Edeni, nga nikwo kumukuunda kwa Wele, kyoosi kyakwikoomba.

¹⁰“Ni nashiryo, ari Umukasya Wele alikho aloma ari: Khulwekhubeela kuusaala ukwo kwaaleeha naabi imurwe wakwo, kwoola mu mafuumbi, khu lwashino waakila kwaaba ni khukhwiniinisa angaaki.

¹¹Kane ise inguwaaneyo mu makhono ke linaambo litweela liliili ni kamaani. Ilala, kane linaambo ilyo likuraambekho khuuloondekhana ni bubwoonaki bwakwo. Ise nakwikaanile.

¹²Babeetswa khukhwaama mu manaambo kakaandi babaakhalikho ni shiisa shoosi ta, bakhaakureme kukwe aasi bakulekhe abweene. Tsisakya tsyakwo tsikhaakwe khu buli lukoongo na buli litila lyoosi. Tsisakya tsyakwo tsikhaafunikhake tsikwe mu buli litila lye luluutsi mu shibala isho. Ni babaandu be mu shibala shoosi bakhaarure mu shisiisa shakwo, bakwaantsukhe.

¹³Binywiinywi bikheetse bikwiimikhekho nga kwaakwiile aasi, ni bisolo bikheetse bikyeendele khu masaafu kaakwo.

¹⁴Shino shikhaabe shiryo nio akile khukhwaama ari, ilekhe khubawo kuusaala kwoosi khuutsowa kwaaleeha, nga ukwo namwe kwoola mu mafuumbi nga kuno, abe kwaakhanyoola kameetsi kakoola karyeena ta. Khulwekhuuba kyoosi kikhaafwe kiikhe imakoombe mu bafu, kibe atweela ni n'inaabo babeekha aasi imakoombe.”

¹⁵Nashiryo Umukasya Wele alikho aloma ari: “Nga kuusaala ukwo kwaamalile khukhwiikha imakoombe, ise ikhaakhole kameetsi ke mwiiloba aasi kakubimbilile, khube nga nikhwo khuulila kuusaala ukwo. Ise ikhaakamise tsintsitsi khulekha khukhwiikha ta, ishingilile ni kameetsi khuutima. Ise ikhaareerewo shishiilima khu njiinji tsya Lebanoni, akile kimisaala kye mu shisaali kyoosi kyoome.

¹⁶Nga ise ndikho isiindikha kuusaala ukwo khuutsya imakoombe aasi wa naleme, kulikwa ni kumuwuulo kwe kamaani kukukhaariisake kamanaambo koosi. Kimisaala kye mu Edeni kyoosi, ikhaba ikyo abe nga kili ni kameetsi kakaamala, naluundi nga kifuurisa buulayi mu Lebanoni, ne nga kili imakoombe, kikhaawulile buulayi nga nikwo kwakwiile.

¹⁷Nakyo kikheekhe imakoombe atweela ni nakwo, khukhwitubaasa kh'uubo babaamala khaale khuufwiila mu busoolo. Ilala, abo babaali be kamanaambo kakaandi nga bamenya aasi we kuusaala ukwo, bakhaafwe bawewo.

¹⁸“Kusaala ukwo ali niye umuyiinga uwa Misiri ni babaandu beewe boosi. Ikhaba kimisaala kye mu mukuunda kwa Edeni abe sikili kimileeyi naluundi kimimiliwu kiryo ta. Ne ari, kane nakwo kutsye aasi mwiiloba imakoombe mu shibala she baafu, nga kimisaala kye mu Edeni kyoosi, kwitubaase kh'uubo babaali baboonaki naluundi nga bafwiila mu busoolo. Ise Umukasya Wele samweene niye ulomile bibiindu bino.”