Read lumasaaba Ezekeli 32 Bible Online

Ezekeli 32 - lumasaaba bible

Ezekeli 32

¹Khu shifukhu shiikiboole mu mweesi kwe likhumi na kibili, mu mwiiko kwe liikhumi na kibili kwe buubowe bweefwe mu Babulooni, Umukasya waanganikhayo.

²Waaloma ari, “Umwaana uw'omuundu reewura umuyiinga uwa Misiri. Muwe buurume buno bubwaama isi ise nga buloma buri: Mu manaambo koosi iwe wambaasa uri uli nga italanyi. Ne iwe uli busa nga ikoonya iyikhururira mu luutsi. Iwe utumbuusa kameetsi ni bikyele byoowo, waakila kameetsi kawunya buubi.

³Umukasya Wele alikho aloma ari: Ise ikhaatuume khatiimba khaase mu meetsi, ikhuwaambilemo, nio ise samweene atweela ni lituuli lye kamanaambo kakaandi, khukhukhweese khukhuruse mu luutsi khukhupe ibulafu.

⁴Ise ikhaakhukhweese iwe ikhuupe ibulafu khu liloba lilyoomu busa, ikhusiindikhile biinywiinywi khuukhulya, naluundi ikhurekho tsisolo tse mwirome bikhusosomolemo tsiinyama.

⁵Ise ikhaasalanise tsiinyama tsye kumubili kwoowo tsitsibolile, tsimalaatane khu njiinji ni mu matila.

⁶Kamafuki kakaakheekhe khukhwaama mus'iiwe, kakhaakile liiloba lyoosi limaliye busa, ni khukhwoola khu njiinji, keetsuse ni tsintsitsi tsyoosi.

⁷Nga ise naakhwiirire iwe, ise ikhaabimbiilile likulu mu ngaaki, tsinieniesi tsilekhe khubonekha ta. Ise ikhaabimbilile inyaanga nga inaambisa kamafuumbi, ikhaba ni kumweesi sikukhaamulikhe ta.

⁸Ibyo byoosi bibiili mu ngaaki nga biwa buwaanga bwe kamaani, ise ikhaabibiimbilile, shikile iwe ube mu shibala she shishiilima. Ise Umukasya Wele, samweene niye ukanikhile bibiindu bino.

⁹“Babaandu be kamanaambo kakaandi bakhaabe ni khukhwiyembeelela, nga baaboone bari ise ikhuyila iwe nga uli umubowe, mu manaambo abe keesi iwe ushiili khuwulilatsakhakho ta.

¹⁰Sheesi ikhaakhukholekho shikhaakile kamanaambo kakaandi kafune khukhwiyembeelela khuukali. Bayiinga be kamanaambo ako bakhaarye naabi khulwoowo, nga ise naabebwakaale. Khu shifukhu khweesi iwe ukhaarusibwile mu bunyala, buli mutweela khu nibo akhaabe ni khuurya khuukali, nga buli mutweela eyembeelela buulamu bweewe.”

¹¹Khulwekhuuba Umukasya Wele alikho aboolela umuyiinga uwa Misiri ari, Umuyiinga uwa Babulooni akheetse akhwibwaakale iwe.

¹²Ise ikhaakile basilikhale babaakhali ni shiisa ta, beerire babaandu boowo boosi mu busoolo. Bakhoonakise Misiri yoosi iwewo, ni babaandu baayo boosi bakheeribwe.

¹³Ise ikheere bibyaayo bye mu Misiri byoosi, bibyaaya khundulo khwe kameetsi. Lwanyuma ilekhe khubawo umuundu yeesi namwe bibyaayo byoosi, bibinyalisa khuutulula kameetsi ako ta.

¹⁴Nio lwanyuma kameetsi keeleyo kakwalaale busa, keekhe nga katima mu lukoosi. Ise Umukasya Wele samweene niye ulomile bibiindu bino.

¹⁵Nga ise naamalile khuukhola Misiri shekyelile busa kumubiimbi, nga baamalile khuuyila buli shitweela shishiili mu shibala isho, naluundi nga ise naamalile khukhwiira babaandu babaali mu shibala isho boosi, ikhumaliilisa kane bamanye bari ise ndi niye Umukasya.

¹⁶Khuureewura khuno khukhekele busa nga kumweenya kwe baafu. Baakhasi be kamanaambo kakaandi bakhaakwimbaatsake nga balila khulwa Misiri, ni khulwe babaandu baamwo boosi. Ise Umukasya Wele samweene niye ulomile bibiindu bino.

¹⁷Khu shifukhu she likhumi na biraano, mu mweesi kukuunyoowa kwe kumwiiko kwe likhumi na kibili kwe buubowe bweefwe, Umukasya waanganikhayo.

¹⁸Waaloma ari: “Umwaana uw'omuundu, lila nga ukuukuula khulwe babaandu ba Misiri boosi. Basiindikhe beekhe aasi atweela ni kamanaambo kakaandi abe kakaali ke kamaani, keekhe imakoombe mu shibala she baafu.

¹⁹Ubalomele uri: Mwambaasa muri inywe nibo babaaminyisayo bumiliwu mu baandu boosi? Kane mufwe mwiikhe aasi imakoombe mu shibala she baafu, mube ibweene iyo ni n'aabo babaakhesaaya Wele ta.”

²⁰“Babaandu ba Misiri bakheeribwire atweela ni naabo babaakheeribwire mu busoolo. Luurima lw'omusiku luli lulwirekefu khubeera boosi.

²¹Babaandu babaaba banyiindaalifu nga bali ni kamaani ni n'aabo amataayi babaasoolanila atweela ni ba Misiri, bakhaabe nibo babaakhaabakaanile nibo mu shibala she baafu she makoombe. Bakhaalome bari, ‘Abo babaakhesaaya Wele ta, nga nibo babaafwiila mu busoolo, beetsile imakoombe, abashiina ano bali ni nafwe.’

²²“Asiriya yoosi ili ibweene iyo, ni tsiŋani tsye basilikhale baayo tsyabebotokheleele. Abo boosi babafwiila mu busoolo.

²³Tsiŋani tsyaabwe tsili mu shisiintsa shishifuurisila ilala buubi imakoombe yoosi. Baasilikhale baabwe boosi babafwiila mu busoolo, ari ni tsiŋani tsyaabwe tsyabebotokheleele. Ate nga makiboole abe nibo babebwakala ni beera kamanaambo kakaandi.

²⁴“Elamu ali ibweene iyo, ni tsiŋani tsye baselikhale beewe tsyoosi tsyaamwibotookheleele. Abo boosi bafwiila mu busoolo, baatsya imakoombe mu shibala she khuufwa nga bali babaakhafukiilila mu Wele ta. Isi baabeela baalamu abe nibo babebwakala babaandi ni babeera, ne ari bali mu khuswaala nikhwo khutweela ni n'aabo babaatsya aasi imakoombe mu shibala she baafu.

²⁵Elamu naye baamusiikha atweela ni naabo babeeribwira mu busoolo, ni tsiŋani tsye basilikhale beewe tsyoosi tsyaamwibotokheleele. Abo boosi babaakhafukiilisa mu Wele ta, bafwiila mu busoolo. Isi babeela baalamu abe nibo babebwakala babaandi ni babeera. Ne ari bali mu khuswaala nikhwo khutweela ni n'aabo babaatsya khaale aasi imakoombe mu shibala she baafu.

²⁶“Baasilikhale Meseki ni Tubali nabo bali imakoombe iyo, nga tsiŋani tsye baasilikhale baabwe tsyaabebotookheleele. Abo bali abe babaakhesaaya Wele ta, nga boosi bafwiila mu busoolo. Isi babeela baalamu abe nibo babebwakala babaandi ni babeera.

²⁷Babeene abo mbaawo uwabasiikha mu lukoosi nga ni baasikha basilikhale abo babaaba banyiindaalifu amakiboole ta. Babeene abo abe baatsya imakoombe mu shibala she baafu nga buli mutweela ali ni luurima lweewe khu murwe kweewe, nga tsingabo tsyaabwe tsyaabiimbile khu mibili kyaabwe. Banyiindaalifu bano amakiboole abe nibo babebwakala babaandu babaandi ni babeera.

²⁸Ni nashiryo, Misiri, nawe bakhaakhwiire, wiikhe aasi imakoombe she baafu, atweela ni n'aabo babaakhesaaya Wele ta. Babe atweela ni naabo beesi beera ni luurima.

²⁹“Tsiŋani tsye bayiinga ni baraangirisi ba Edomu natsyo tsili ibweene iyo. Babeene abo baaba nga bali basilikhale be kamaani naabi, ne ari bali imakoombe atweela ni naabo babaakhesaaya Wele ta, nga bali nibo babaafwiila mu busoolo.

³⁰“Bayiinga khukhwaama ingaaki we shibala nabo bali imakoombe iyo, ikhaba be mu Sidoni boosi nabo bali bweene iyo, atweela ni n'aabo babeeribwa baatsya imakoombe mu maŋaanyu kamakali naabi. Khulwekhuuba abe nibo bebwakalatsaka naluundi beera babaandi. Bali atweela ni n'aabo abe babaakhesaaya Wele ta, nga bafwiila mu busoolo. Boosi bali mu maŋaanyu ke khuutsya aasi imakoombe mu shibala she baafu.

³¹“Nga umuyiinga uwa Misiri ni liiye lyeewe baaboone babaandu bano boosi babaafwiila mu busoolo, niye ni liiye lyeewe bakhekhiliise kimyooyo kyaabwe nga baaboone bari khana sibali nibo bonyene babaali mu khutaambisibwa ukhwo ta.” Bibiindu bino Umukasya Wele umweene niye ubilomile.

³²Umukasya Wele alikho aloma ari: “Ise nasiindikha umuyiinga uwa Misiri atweela ni liiye lyeewe, khukhwibwakala ni khukhwiira babaandu babaandi khu shibala. Nashiryo, ari naye atweela ni liiye lyeewe, kane beeribwe, basiikhibwa atweela ni n'aabo babaakhesaaya Wele ta, babafwiila mu busoolo.”