Read lumasaaba Ezekeli 33 Bible Online

Ezekeli 33 - lumasaaba bible

Ezekeli 33

¹Umukasya waanganikhayo nga aloma ari:

²“Umwaana uw'omuundu, boolela babaandu shishikane shikholikhe nga ise naakhalilewo khukhwibwakala shibala shaabwe nabareerera busoolo, n'iiba bari babekhali be mu shibala isho baroboore mutweela khukhwaama khu linaambo lyaabwe khuuba umusilikhale umuliindi.

³Umusilikhale umuliindi uyo n'abona nga umusiku alikho eetsa, akhupa luwuungu waareewura babaandu beewe boosi.

⁴Ne n'iiba bari iliyo uwuliile luwuungu ulwo, ne waalekha khukhwiinaanayo ta, baasiku beetsa baamwiira, uyo umweene kuba kwaamunyoolile ni kumusaango kuba kumufuura umweene.

⁵Aba waawuliile luwuungu ne waalekha khukhwiinaanayo ta. Nashiryo kumusaango kumufuura umweene. Ne aba uwenaanayo khu byeesi aawulila, khali aawonesa buulamu bweewe.

⁶Ne n'iiba bari umuselikhale umuliindi yuno wekheetsile waaboone basiku balikho beetsa, ne waalekha khukhupa luwuungu, nashiryo waalekha khureewura babaandu ta, iba kane umusiku eetse eere babaandu boosi. Umusiku aba kane eere babaandu abo bafwiile mu byoonako byaabwe, ne kumusaango kuba kw'omusilikhale umuliindi uyo.

⁷“Ni nashiryo, umwaana w'omuundu, ari ise naakhwikyelisile iwe khuuba umuselikhale umuliindi uwe linaambo lye ba Isiraeli. Nga ise naakhubooleele iwe shishiindu shoosi, uli ni khuutsya ubareewure mu byeesi ise imba inomile.

⁸Nga ise naalomeele umuundu umwoonaki ndi kane afwe khulwe bibyoonako byeewe, ne iwe waalekha khumureewura nio alekhele awo khuukhola bye bubwoonaki byeewe ta, umwoonaki uyo akhaafwiile mu byoonako byeewe. Ne kumusaango kuba kukwoowo.

⁹Ne iwe n'urewura umwoonaki uri alekhele awo bubwoonaki bweewe, ne weloosela busa, umwoonaki uyo akhaafwiile mu bwoonaki bweewe. Ne iwe ukhaabe s'uulikho ni kumusaango kwoositsana ta.”

¹⁰Umukasya waanganikhayo nga aloma ari: “Umwaana uw'omuundu, ba Isiraeli beekhala beelisalisa busa bari, shiitaambiso sheesi ise imbawa nibo khulwe bibyoonako byaabwe, shili shiikali naabi sebashinyala ta. Baloma bari, bibyoonako byeefwe ni buubi bweefwe byaakilile khulikho khuwetsekhelela busa naluundi baloma bari sibanyala baarama nga bashiili baalamu ta. Nashiryo bantsikiitsa ise.

¹¹Ilala, iwe baboolele uri, ise ndi niye Umukasya Wele. Ise singana naabona babaandu nga bafwa khulwe bibyoonako byaabwe ta. Ise imba ni kumwiikhoyo kumukali nga naaboone baboonaki balekhela awo bubwoonaki bwaabwe, nio barame nga bali baalamu. Nashiryo ba Isiraeli, lekhelawo bibyoonako byeenywe, mushuukhe mukobole isiise ndi, nio mulekhe khufwa ta, ne murame nga baalamu.

¹²“Iwe baboolele uri, nga umuundu abe uuli umulayi ne waananikha khuukhola bye bubwoonaki, abe bibiindu biilayi byoosi byeesi aamala khaale khuukhola sibinyala byaamuwonesa khukhwaama khu shitaambiso ta. Naluundi iwe bashebuse uri, nga umuundu umwoonaki waalekheelawo khuukhola bye bubwoonaki byeewe, ise imwiyakhila bibyoonako byeewe byeesi niye aamala khaale khuukhola, indekhe ni khuumuwa shitaambiso ta.

¹³Ise n'iimba bari naalomeele umuundu umulayi indi kane arame nga ashiili umulamu, ne lwanyuma lwayo waarakikha khuukhola bibyoonako, nga ambaasa ari kane awonesebwe khulwe bibiindu biilayi byeesi aakhola amataayi. Umuundu uyo s'aanyala khuuba umulamu ta, khulwekhuuba ise singene ishebulile biilayi byeesi niye aakhola amataayi ta.

¹⁴“Ne shishiindi shili indi, siinga ise inomela umuundu umwoonaki indi kane afwe, khulwe bibyoonako byeewe, ne waakamisa bubwoonaki ubwo, waarakikha khuukhola bibiindu biilayi, aba singane afwe ta.

¹⁵Siinga umwoonaki uyo esayo isho shoosi sheesi aabukula khu baandu babaandi nga ashiwaambiilila khulwe likobi, weesayo ibyo byeesi aanuula, waaloondelela kamakaambila kaase, nga s'akholakho bibyoonako byoosi ta, aba kane aramewo nga ashiili umulamu.

¹⁶Ise imba singane ishebulilekho ikhaba na shitweela khu byoonako byeesi niye aakhola ta. Aba waakholile isho shishiili shaŋali naluundi shishiloondekhana ni kamakaambila, nashiryo aba kane arame nga ashiili umulamu.

¹⁷“Ne shitweela busa babaandu boowo baloma bari bibiindu byeesi ise ikhola sibili bya ŋali ta. Baalekha khumanya bari byeesi nibo bakhola nibyo bibiikhali bya ŋali ta.

¹⁸Umuundu n'aaba umukhosefu ne waantsukha buukhosefu bweewe, waarakikha khuukhola bye bubwoonaki, ali ni khuufwa. Khulwekhuuba aba woonakile.

¹⁹Ne umuundu n'aaba umwoonaki, waantsukha bye bubwoonaki bweewe, waakhola ibyo bibiili bya ŋali naluundi bibiloondekhana ni kamakaambila, aba singene afune shitaambiso ta.

²⁰Ne shitweela busa inywe muloma muri ise, Umukasya, siikhola bya ŋali ta. Iwe boolela shikuuka she ba Isiraeli uri, ise kane imbakhalile kimisaango buli mutweela khuuloondekhana ni biikholwa byeewe.”

²¹Khu shifukhu shishiikhola kharaano, mu mweesi kwe liikhumi, mu mwiiko kwe liikhumi na kibili kwe buubowe bweefwe mu Babulooni, aabawo umusaani mutweela uwatitukha khukhwaama mu Yerusalemu, weetsa waamboolela ari, “Baasiku bawaambile shiriimba.”

²²Ne sh'angoloobe, nga abe umusaani umumuli uyo ashiili khukhwiitsa khukhuumboolela aryo ta, ise neewulila nga kamaani ka Wele kaantsikhilekho. Naluundi umusaani uyo atsya khukhwoola isi abe ise ndi kumutishinyi, nga abe Umukasya wangangululile luulimi lwase, nga abe narakikhile khuukanikha.

²³Lwanyuma ndi Umukasya waanganikhayo luundi.

²⁴Waaloma ari: “Umwaana uw'omuundu, babaandu ba Isiraeli bano babaamenya mu bifwo bibiili nga kamakubili beekhala baloma bari, ‘Iburayimu aaba ali umuundu mutweela yenyene, ne Umukasya waamuwa niye liiloba lya Isiraeli lyoosi. Ne ifwe khuli baakali busa, ni nashiryo shiibala shili ni khuuba shisheefwe.’

²⁵“Ni nashiryo, Ezekeli, baboolele nga uloma uri, Umukasya Wele alikho aloma ari, inywe mulya tsinyama mwaanywa ni kamafuki ke shishaayo, mwaatsya mwesaaya bibuumbe, mweera ni babaandu basheenywe. Munyala muryeena mwambaasa muri shiibala isho shishiili shisheenywe?

²⁶Lwaweele inywe mukana khusoolana, mukana naabi khuukhola bye mbikho, naluundi mulekha bakhasi babeenywe ni mutsya be basheenywe. Munyala mwakhola bibiindu nga ibyo, mwambaasa muri shiibala isho shishiili shisheenywe?

²⁷“Iwe baboolele uri, ise Umukasya Wele indikho inoma indi: Khukhwaama nga ise n'iindi Wele uliwo biilo ni biilo, babaandu abo babaali mu biriimba bibyeekyela kamakubili ibyo, bakhaafwiile mu busoolo. Abo babaamenya mu byaalo busa, ise ikhaabasiindikhile tsiisolo tsibalye. Abo babebisile mu mafuluma ni mu mabaale, ise ikhaabasiindikhile nibo buulwaale buubi naabi, bubeere.

²⁸Ise ikhaakhole shiibala shoosi shibe busa kumubiimbi, naluundi nga shetsuule kamakubili, nio kamaani kaabwe kakaakila beyiinga kawewo. Ni tsingoongo tsye mu Isiraeli tsiikhaabe kumubiimbi busa, nga mbaawo umuundu unyala waatsikhalisa ta.

²⁹Nga ise naamalile khuuwa babaandu shiitaambiso khulwe bibyoonako byaabwe, naluundi nga ise nakholile shiibala shaabwe khukhwikyela kumubiimbi, nio nabo bamanye bari ise ndi niye Umukasya Wele.”

³⁰Umukasya waaloma ari, “Ezekeli, iwe khu lwoowo, babaandu balikho beelomela bonyene nga bali aambi ni kamatikiiyi ke shiriimba, namwe mu milyaango kye tsiintsu tsyaabwe bari, ‘Ni mwiitse khurekeerese ilomo iyaamile isi Umukasya shaleelo.’

³¹Ni nashiryo babaandu baase beetsa beekhala isi iwe uli, baarekeeresa byeesi iwe uloma, ne sibakhola byeesi iwe ubalomela khuukhola ta. Biilomo byeesi bakanikha byookesanisa khuukana khuukali, ne kimyooyo kyaabwe kishikana naabi khuukhola bye bulyakhani.

³²Isi nibo iwe uli busa nga umuundu umala busa imbuka, nga abeembela nibo kimyeenya kye khukanana, namwe nga ukhupa lituungu. Barekeeresa byoosi byeesi iwe uloma, ne mbaawo na shitweela sheesi batsiilakho ta.

³³Ne nga bibiindu byeesi iwe uloma byakholikhile nga ni byalomebwa, ilala bikhaakholikhe, isho shilikila nabo bamanye bari iliwo umuŋoosi umenya ni nabo.”