Read lumasaaba Ezekeli 34 Bible Online

Ezekeli 34 - lumasaaba bible

Ezekeli 34

¹Umukasya waanganikhayo nga aloma ari:

²“Umwaana w'omuundu, iwe n'ukhole buŋoosi bubwikiitsa baraangirisi be ba Isiraeli, babaali nga babaayi be kamasheese. Balomele uri Umukasya Wele alikho ababoolela inywe baraangirisi be ba Isiraeli, inywe babaakhenaanayo isi kamasheese kaase ta, akhali khukhwiyinaana khu mwabeene mwenyene.

³Inywe mulya tsiinyama tsiinulu, mwakwaara bikwaaro bibyaama mu bwooya bwe bibyaayo, mweera bibyaayo bibiminyisa buulayi mwaabilya. Ne simwinaanayo khu masheese ta.

⁴Ako kakaali kamatoro simukenaanayo ta, kakaali kamatsiina simukasilikha ta, ako kakaafunikhile kamakuumba simukayeeta ta. Kamasheese kakaatimaana simukenaanakho ta, ni kakaatibile khukhwaama mu kaandi simwinaanayo khuukakobosa ta. Muraambisa kamaani naluundi mukabirisa buubi naabi.

⁵Nashiryo, khulwe khuutaamba umwaayi, kamasheese kaase kaasalanila busa; waakila tsiisolo tsye mwiiswa tsyaakalya.

⁶Kamasheese kaase kaatsya nga kasalanila busa, kaatimaana kaatsya khu buli lukiingi; naluundi kasalanila khu shibala shoosi, khulwe khuutaamba ukenaanayo namwe ukaweentsa khuukakobosa.

⁷“Ni nashiryo, ari inywe mumuuli babaayi ni murekeerese byeesi ise, Umukasya, indikho imbaboolela inywe.

⁸Khukhwaama nga ise n'iindi Wele, umunyali uwa byoosi, ni murekeerese. Inywe mwalekhile tsiisolo tsye mwiiswa khukhwibwakala kamasheese kaase, naluundi tsyaliilekho kamalala, khulwekhuuba mbaawo umwaayi ta. Inywe simwenaanileyo khuutsya khuweentsa ako kakaatibile ta, ne indi inywe mwiyinaanayo mwabeene mwenyene, naluundi simukaayisa ta.

⁹Ni nashiryo, inywe babaayi be kamasheese, ni murekeerese byeesi Umukasya aloma.

¹⁰Umukasya Wele, alikho aloma ari, bona ari ise nekyelile umusiku uwe babaayi. Kane ise imbarusekho inywe kamasheese kaase, mulekhe khuuba babaayi baako luundi taawe. Ise singane imbafukiilise inywe khukhwiliisa inywe mwabeene nga simwinaanayo isi kamasheese ta. Kane ise ndimiilile kamasheese kaase ingamuse, inywe mulekhe khukalya ta.”

¹¹“Khulwekhuuba Umukasya Wele, alikho aloma ari, bona ise samweene kane imeentse kamasheese kaase, ingobose ako kakaamala khaale khukoraana.

¹²Kane ise imeentse kamasheese kaase ingakobose atweela, imbe nga umwaayi uwe kamasheese n'aweentsa kamasheese keewe nga kaasalaniile, waakakobosa atweela. Khu shifukhu shiibi isho, naluundi she kumutaambo, ise ikhaaweentse kamasheese kaase khukhwaama iyo yoosi isi kaamala khaale khuusalanila, ingamuse ingakobose.

¹³Ise ikhaakakobose khukhwaama mu manaambo ke babaandu babaandi, ingabusaase atweela, ingeseyo mu shibala shako shisheene. Ise ikhaakaayise mu bikoongo bye mu Isiraeli, inganyweese kameetsi mu ntsitsi tsye mu Isiraeli, ni mu bisiintsa bye mu liloba ilyo byoosi bibiilimo babaandu.

¹⁴Ise ikhaakayile mu bikiingi ni mu njiinji tsye mu Isiraeli, ingaayise mu maayilwe kamalayi. Ikhaakayise mu maayilwe kamalayi kakaali mu bikoongo bye mu Isiraeli.

¹⁵Umukasya Wele, alikho aloma ari, ise samweene niye ukhaabe umwaayi uwe kamasheese kaase, ingayile ingolese mu shiifwo mweesi kanyala kawolelakho.

¹⁶“Ikhaaweentse ako kakaamala khaale khuukoraana ingakobose, ingobose ni naako kakaamala khaale khuusalanila. Ako kakaafunikhile kamakuumba kane ise ingawe bukaangi, ninaaneyo isi ako kakaali kamatoro. Iko kakaali kamakhomefu buulayi, naluundi nga kali ni kamaani, ise ikhaakakhoonye, khulwekhuuba ise ndi umwaayi ukhola bibiindu bya ŋali.

¹⁷“Ni nashiryo, ari ise Umukasya Wele, indikho imboolela kamasheese kaase ndi, ise ikhaakhalewo akari e kamasheese ni kamasheese, akari kamamiiku ni tsindurume.

¹⁸Batweela khus'iinywe seshibamala khukhwaaya mu maayilwe kakaaminyisa buulayi ta, khulwekhuuba kamaayilwe kakaaramire inywe mukakhaandikilila ni biikele mwakoonakisa. Inywe munywa kameetsi kakaakwalaalile buulayi, ne kakaaramire mwaakakhaandakilila mwaakatulula.

¹⁹Shimanyisa shiri kamasheese kaase kakaaramire, kali ni khuulya bunyaasi bweesi inywe mukhaandakiliile aasi, ni khuunywa kameetsi kakaatululukhile.

²⁰“Ni nashiryo, ari ise Umukasya Wele indikho inoma indi, kane ikhalewo akari e kamasheese kakaali kamanefu ni naako kakaateenya.

²¹Inywe mumuuli kamasheese kamanefu mukuwa ako kakaali kamatsiina, naluundi mwawuunaka ako kakaakhali ni kamaani ta, mwaakasalanisa mu manaambo kakaandi.

²²Ne ise samweene kane imbonese kamasheese kaase, ilekhe khubawo tsiisolo tsitsikalya ta; naluundi ise ikhalewo akari e kamasheese kakaali kamalayi ni naako kakaakhali kamalayi ta.

²³Ise ikhaakawe umwakaanisi wase Dawudi, khuuba niye umwaayi wako mutweela yenyene. Akhaakayise buulayi, akaliinde buulayi, niye abe umwaayi wako.

²⁴Ise, Umukasya, ikhaabe niye Wele waabwe, naluundi umwakaanisi wase Dawudi, akhaabe niye umuraangirisi waabwe. Ise Umukasya, samweene niye ulomile bibiindu bino.

²⁵Ise ikhaakhole ni nabo ikwangwaanyi iye lukoosi, nio ise indusewo tsiisolo tsye mwiirome khukhwaama mu shibala isho. Nio shino shikanyalise khuumenya mu lukoosi mu mubiimbi, ni khuukona ibulafu busa nga mbaawo shishikataambisa ta.

²⁶“Ise ikhaabawe nibo tsiikhabi imbafukiilise khuumenya khu lukiingi lwase luukhosefu. Ise ikhaabawe ifula mu mbuka inyene isi bakikanilamo.

²⁷Biilimwa bye mu mikuunda kyaabwe bikhaabawe nibo bibyaamo, ni byeesi bakhaamiitse mwiiloba byaame buulayi, naluundi nga bamenya mu lukoosi mu shibala shaabwe. Lwanyuma nga ise naabarusilekho umusiku ubamiinikhilisa, imbaruse ni makhono k'aabo babaakholisa buukulwa, balimanya bari ise ndi niye Umukasya.

²⁸Mbaawo kamanaambo kakaandi kakaakhaabebwaakale, namwe tsiisolo tsye mwiiswa tsitsikhaakalye ta. Bakhaamenye mu lukoosi, nga mbaawo shishibariisariisaka ta.

²⁹Ise ikhaabawe nibo kimikuunda kye liiloba lilyaama bibyaamo biikali, naakamise intsala khuubalya mu shibala shaabwe. Kamanaambo kakaandi sikakhaabalekelese ta.

³⁰Nibo bakhaamanye bari ise ndi niye Umukasya Wele waabwe, indi ni nabo. Naluundi bakhaamanye bari nibo, linaambo lye ba Isiraeli, bali babaandu baase. Umukasya Wele, umweene niye ulomile bibiindu bino.

³¹“Inywe kamasheese kaase, kamasheese keesi ise samweene naayisa, muli babaandu baase, ni nase ndi niye Umukasya Wele weenywe.”